Fil-Bandla

Fil-bandla bejn il-ħtieġa

Li tlaħħaq ma dil-ħajja

U l-patt li lilek inħallik

Tgħix ħienja fi ġnien il-Għeden

Nitbandal jiena.

Jekk issa nsejt jien x’ridt ingħidlek

Għax moħħi ma tagħnix

Jew ma kienx hawn

Jew kont imbiegħda minni

Int ħsibt li din xorti ħażina

Inkella gax naħlu l-ħin

Fuq din il-mejda skarsa.

Jekk dan li qed naraw hu biss il-bidu

Ta’ binja bħalma tibni xehda n-naħla

U tkun int merħba bik

U lilek nilqa’ jien

B’dirghajja miftuħa

Ħekk nibda nerġa, nħobbok

Bħalma ħabbejt dahri.

Alfred Grech

29/05/2019

Ħadd Mhu Se Jagħtina.

Ħadd mhu se jagħtina

Dal-passaġġ biex nirkbu ftit,

Xarabank trid tgħaddi

Biex twassalna sal-infern.

Nidħlu lkoll fi drawwa

Għax naraw lil ta’ madwar,

Bla ma biss nistaqsu

Dan għaliex jew fejn sejrin?

Għax jekk ta’ qabilna

Ħadu żball nirrepetuħ,

Nagħmlu li jgħidulna

Bla nistaqsu : Dan għaliex?

Nemmnu li jgħidulna

Sakemm dan isir twemmin,

Hawn qiegħdin ghax naħsbu

M’hemm imkien fejn tista’ tmur.

Ilħna li jistordu

Fil-benniena tal-ġwejjdin,

Bnadar ma nofs l-arblu

Qed iperpru bid-dulur.

Xkiel u barrikati

Sa ma naslu sal barkun,

Toroq parelelli

Sabiex naslu f’tarf l-irdum.

Jekk  xi darba naslu

Bla ma nafu fejn sejjrin

Dawk huma l-fruntieri

l-konfinit  tagħna stess.

Alfred Grech.

28/05/2019.

Iramblu u jkomplu Jramblu.

U jrammblu u jkomplu jramblu

Fuq poplu aljenat

Bl-inġenji li jopprimu

Fuq ġens alluċinat.

U jkomplu jiftħu beraħ

Bibien is-swar tal-belt

Bla jafu qed jistiednu

Kull ħażen ma kull għelt.

“Mma xejn ma jħabblu rashom

Sakemm qed jikkmandaw!

Pajjiż li qed jitfarrak

U huma jixxalaw.

U jkomplu jgħixu l-gidba

Li għada ma jasalx

U jħaffru qabar wieħed

Għal kull min ma felaħx.

Itellqu fit-tellieqa

Li ħolqu huma stess,

Tellieqa artifiċjali

Ta’ qtigħ il-qalb u stress.

Biex għad xi darba jgħidu

Hawnhekk kien ġenna fl-art,

Illum imlewħ bil-bini,

Illum imlewħ bl-iskart.

Alfred Grech

28/05/2019

Xħin Tgħaddi.

Xħin tgħaddi ħajjetek kollha tagħmel li kont tagħmel

Tistaqsi: Din ħajjti?

U ssib li nhemm xejn ġdid

Minn dak li stajt titgħallem

Għajr kif titgħallem tgħix fil-kumdita’.

Xħin tgħaddi ħajjtek kollha tagħmel li kont tagħmel

Tkun sirt espert, speċjaliżżat

Xi ħadd ta’ professjoni

U taqbeż lil ħaddieħor li xejn ma jifhem.

Issib li tkun imdawwar

Min min ma jistax jifhmek.

Alfred Grech

27/05/2019

Sibtni Hawn.

Sibtni hawn indur u nagħqad

Minn ġo bieb għall-ġol-ieħor

F’din il-logħoba silutata tal-bibieb iduru

U la naf jekk jiniex dieħel

U lanqas jekk ħiereġ.

Iva naf li dak kollu li hemm barra

Hu fil-mera ta’ hawn ġewwa

Iżda xorta għadni niġġerra

Wara l-friefet u l-bżieżaq tas-sapun

Qisha kienet l-ewwel darba.

Dak li mhux ġo fik mhu mkien

U mhu fuq l-ebda skrin jew ologramma

Għalxejn tiftaħ il-bieb

Biex toħroġ barra

Għax barra ma ssib xejn.

Alfred Grech

25/05/2019.

Għidilhom Lill-Atturi.

Għidilhom lill-atturi

Li dan hu teatrin,

Għalfejn qed tikkonfondu

Hekk ġara tul is-snin.

Għidilhom lill-votanti

Dan mhux ħlief telf ta’ ħin,

Għax dawn iwiegħdu kollox

Temminhom tkun miskin.

Għidilhom li din farsa

U xejn bis-serjeta’,

Din hi traġikummiedja

Għat-tfal ta’ kull eta’.

Mhumiex ippreparati,

Qed jgħidu l-ħmerijiet,

Iwiegħdu s-sema u jagħmlu

Taparsi għeġubijiet.

Jagħmlulek l-ilma jiżfen

U tant u tant wegħediet

Imm’intom x’tagmlu tafu

Xħin tkunu hemm fis-skiet.

Dawn huma biss atturi

Għax suġu m’hemm ta’ xejn,

Duħħan u bżieżaq fl-arja,

U tmur tivvota għalxejn.

Alkfred Grech

24/05/2019

Bil-varniċ.

Hemm offiżi li għandhom minn tal-blugħa

hemm oħrajn li huma biss ħela ta’ ħin.

Aħna nivvjaġġaw fuq sħab l-eklissi ta’għada

inqanqlu ġewwa fina l-burraxki

li jdallmu l-ikħal tas-smewwiet fi żmien il-bnazzi

u l-votiġini ta- dinja nsensata

tfittex fil-baħħ tan-numri fl-irdieden taċ-ċifċifogu

biex tinsa l-ħsara li toħloq is-sistema.

Serbut nemel li qatt ma jrid jistaqsi fejn u sejjer

iżda jimxi wara l-passi ta’ min hemm quddiemhu.

Insensati dawn l-uċuħ iċarrta u mġerrċa

li jidhru fil-paġni tar-rivista jleġġu bil-varniċ tal-attaparsi

illi bellgħulhom u aħna mmutatai u ssummati

nistħajjluhom jew nixtarruhom.

Biex jagħmlu l-bżar fl-għajnejn li min dara

jibla’ kollox fil-battal ta’ dak kollu

li qed jgidu.

Alfred Grech

23/05/2019

Għada.

Jien naf li nilgħab qed man-nar

u f’ħin jew f’ieħor għad ninħaraq.

Jibki mbagħad vjolin li qatt ma tmissu

bil-melodija li ma sawwartx.

Pulzier, pulzier qed noqrob lejn ix-xifer

sakemm ikolli naqbeż,

inkella nerġa’ lura

u naqa’ għaċ-ċajt.

Għaliex għada qatt ma wasal.

għaliex għada jġorr il-biża’ tiegħu

bħall-ħmura ta’ f’l-għaxija

hekk kif ix-xemx tkun nieżla.

Biżżejjed hu għall-jum il-ħażen tiegħu

kemm trid,

imm’għada joqrob ma kull pass

u twaqqfu ma tistax.

għaliex għada trid tinsieħ,

bħall-mewt li twieldet miegħek

u tibqa’ tgħix għall-dejjem.

Għax għada hu bħal ħrafa

li lanqas trid temminha.

Alfred Grech

21/05/2019

Fuq Din in-Naħħa.

Fuq din in-naħħa mġennba ta’ dil-perċa

Fejn inti ġejt tistaqsi dwar it-temp u l-klima

Għax ħsibt li xħin tivvjaġġja tbiddel il-viżjoni

U x-xemx tiddilek isbaħ minn din-naħħa,

Fuq din in-naħħa tax-xaqliba

Fejn ħsibt li ser issib is-skiet u l-ħemda

Ħarist f’wiċċ dal-miskin

U sirt narċiża.

Fuq din-in-naħħa  tal-munġbell li raqad

Fittixt mingħajr ma sibt

Il-meravilja,

Kun af li ħadd ma jista’ jagħmlek ħienja

U dan hu tarf tat-triq it-twila,

Li dan hu simulkakru

U li f’dil-ħajja xejn ma kien li jibqa’.

Alfred Grech.

21/05/2019