Efimera dil-ħajja

iffinanzjar virtwali

m’hemm xejn  li jibqa’ għal dejjem

munita din virtwali.

Jekk int fuq naħħa għandek

is-snin tal-pusvalenza

tektika n-nħħa l-oħa

tas-susa fis-sekwenza.

Miżien imdaqqas f’sikktu

u m’għandek xejn kull naħħa

tal-alġebra tidqisa,

fin-nofs duħħan bla saħħa.

Alfred Grech
31-03-2018

Aħna nafu.

Aħna nafu iżda nemmnu li mhix din il mantra tagħna

Mhix it-triq li trid twassalna sabiex ninfdu swar lilhinn

Aħna nafu li mhux dan huwa r-rużarju biex insemmgħu

leħen fqir li jrid jasal sal-konfini

ta’ li hu jew seta’ kien.

Aħna nafu li mhix din il-purċissjoni

lanqas din m’hija l-filliera li trid twassal

min nisel għal nisel

minn żmien għal żmien

ta’ dil-mixja fid-deżert li trid tirfes fl-art imwiegħeda.

Din hi biss stennija t’għada,

jew irxoxt perfezzjonat.

Aħna nafu dak li l-bieraħ qal ħaddieħor

dak li qajla jagħmel sens

sabiex sforz lanqas ma nagħmlu

sabiex naħsbu nkella nindmu.

Aħna nafu! Madankollu nippreferu

illi nemmnu biss fl-allat

illi nemmnu fil-maġija

fit-teatru tal-assurd.

Alfred Grech

30/03/2018

Għal Min il-Kwiekeb Għandu.

Għal min il-kwiekeb għandu ġewwa qalbu

Il-lejl imdawwal dejjem:

Aħna li sa mill-bidu stajna mmissu

Is-sema b’subgħajna,

Ma bbastajniex bil-qċaċet tal-muntanji.

Lilkom ħallejniekom hemm fl-art

Timtlew b’ħafna arja sħuna

U d-doqqu tnabar li mank biss jinstemgħu

U trombi muti

Biex taljenaw irwieħkom bil-ferħ adulteru.

Aħna spiċċajna hawn fuq dan is-sħab

U qajla sejrin ninżlu

Fl-art, nitħalltu mal-bnedmin,

Jekk mhux għax hekk jinħtieġ

Jew biex insarrfu.

Alfred Grech

29/03/2018

Deżert ir-Ruħ.

Dal-waqtiet għal dejjem jibqgħu

Imdendlin hawn fil-preżent

Iżda li l-mili li firduna

Xejn ma jfissru għax kuntent.

Ġod-duħħan, ċpar tat-tnissija

Sibtni waħdi, sibtni kwiet,

B’din ir-rieda biex inkisser,

Dak li jxekkel, kull drawwiet.

F’dan deżert lli fih interraq

Lejl u nhar għal ħafna żmien

M’hemmx il biża li jirxoxta

Dak li għadda u seta’ kien.

F’salt ftakart! Dan mhux eżami,

Dan hu biss ħasil ir-ruħ,

Qtajtli l-għatx, il-ġuħ bil-manna

Ġod-deżert m’hemmx ward ifuħ.

Alfred Grech

28/03/2018

Agunija.

Jekk tridni mmur lilhinn

Biex naqbad it-triq l-oħra

Tkun taf mhux biss għaliex

Ridt nibdel ħajja m’oħra.

Jekk wara lli nkun mort

Nistagħdar fil-mistħija

Ħassejt li nbdilt xi ftit

Bl-uġih u bit-tbatija.

Quddiemi mbagħad ressaqt

Dal kalċi biex nixorbu

Mistkenn taħt iż-żebbuġ

U s-siġar li jokorbu.

Ridt nifhem int xi trid

U mort in-naħħa l-oħra

Biex ninfed l-infinit

U nindem għal darb’oħra.

X’hemm wara dan l-istar?

Din hija l-agunija,

Għereqt il-qtar tad-demm

Matul din it-tfittxija.

Alfred Grech

27/03/2018

Jekk Tfittex Int L-Immensita’.

Jekk tfittex int l-immensita’ għad tista’

tħares ftit f’għajnejja; jekk taħsel tibda

tara kbir, żgur se ssibni differenti,

għax taħseb li tassew mibdul u tieqaf.

Iżda, jekk aħna hawnhekk it-tnejn se nibqgħu,

imdawwra b’dak li nafu u dak li rajna,

mhu ser insibu qatt li qed infittxu.

Ma jimpurtax  li jien miniex qed nifhem:

jimporta għal darba dak li qiegħed nara,

għax it-tbissima fuq xufftejk qed tgħidli

li llum aħjar mill-bieraħ, u int qed tfittex

li tifhimni u bqajt ma ntbaħtx li t-tweġiba

qed taħrablek. Fil-bidu bdejt biex kelli

xi ħaġa li nixtieqha. Illum il-kontra.

Għax issa sibt il biċċa li naqsitek.

Ħaddieħor qed jiddarras xħin jarana

miexjin fuq dil-bankina għax issa sirna

parabbola li jtenni kien ħaddieħor.

Sakemm il-logħoba tkompli, jien ser nagħmel

ta’ bir-ruħi li qed nifhem.

Alfred Grech

25/03/2018

Pupa tal-Purċellana.

(Lil Sharon)

L-ewwel darba li kont rajtha

Iċċassajt, jew ma nafx x’kien,

Ħsibtni qbadt kont ma xi oħra,

Ċpar madwari kullimkien.

Ridt neħodha u nifraħ biha,

Ridtha mqar għal siegħa biss,

Ridt naqbadha min idejha

Xkien ġie fuqi nkiss inkiss?

Ridt naqbadha, ridt nagħnnaqha

Inkellimha għal ftit ħin,

Bdejt nixxennaq għal sbuħitha

Kollox tajjeb, kollox bnin.

Kont insejt u qed niftakar

Konna ltqajna ħin bla waqt,

Kont insejtha din il-ġrajja

Hemm ridt noqgħod, imma tlaqt!

Kif saħħritni bi sbuħitha

Din il mara u qatt ma nsejt,

’Mma triqatna kienu ssalbu

Lura mbagħad qatt ma rġajt ġejt.

Dawk ħaddeja kienu rosa

Aħmar xagħarha, kien perfett,

Kont nixtieqha, kont irridha

Għax tħallilek dak l-effett.

Ta’ kull darba li nilmagħha

Jew xħin tixref minn x’imkien

Sewwa nħossni xħin tkun qribi

Ma nixtieqx li jgħaddi ż-żmien.

Lanqas xejn ma kien jimporta

Illi kellha ftit tas-snin

Ftit qadima  mhix minsusa

Li mhix ġdida. Dak il-ħin

Ma kontx naf! Xejn ma jimporta

Illi jien ma kont naf xejn,

Għax sabiħa, għax togħoġobni

Ma kien ser jinbidel xejn.

Skarlattina sejjaħtilha

Għax isimha ma nafx x’kien

Imma għalija dak kien joqgħod

Bqajt niftakru tul iż-żmien.

Xtaqt li setgħet tibda timxi

Xtaqt li qaltli mqar kelmtejn,

Dik il-libsa bellusija

Kemm ileqqu dawk l-għajnejn!

U ma nafx x’kien waqa’ fuqi

Għax bdejt noħlom ħin bla waqt,

Nibda niżfen? nibda’ ngħanni?

Inkellimha? Hekk kont xtaqt.

Pupa din tal-purċellana,

Xtaqtha ħajja tmidd il-pass,

Kont insejt għaliex fakkarni

Tat-tifkira dat trapass.

Alfred Grech

23/03/2018

Ineżorabbli l-Mixja Tiegħek

Ineżorabbli l-mixja

Int tista tmur tistaħba u terġa’ tiġi.

Int tistaż tmur tiġġerra bnadi oħra

Jekk ma toħroġx mill-kmamar ta’ ġo moħħok

Tista’ tmur jekk trid, sa tarf id-dinja.

Jekk ma tinħallx mill-ktajjen ta’ ġo ruħek

Għax tibqa’ tgħix u tnin ġo l-istess raħal

TimxTibqa’ fejn kont jew terġa’ lura

U ġġorr it-toqol tat-twemmin li sawwrek

Meta tfajjel kont imqabbad

Ma djul ommok.

Alfred Grech

23/03/2018

Xħin Jinżel Sfiq.

X’ħin ninżel sfiq id-dlam tal-lejl

u inti bħal siparju

idejja mmid fid-dlamijiet

u nitla’ t-telgħa tal-kalvarju .

Ħallini nibda‘ l-velu nċarrat

il-velu tal-misteri

li jaħbi dak li tkun trid tgħid

u tteni ħrejjef veri.

Ħallini mmur l-infern

inkella nitla’ l-ġenna,

xħin nibda mmidd il pass u nħoss b’dejja

tagħmilli għamad fuq għajnejja.

Jgħaddili l-ħsieb li m’għadekx ħdejja

dan ħsieb li jqajjem riefnu

u f’daqqa waħda jitla’ l-ajru

mal-ferrovija għaddejja.

Alfred Grech

20/03/2018

Trid Tibda Minn Filgħodu.

Trid tibda minn filgħodu

Tkun mixja din misruqa,

Li titlaq mill-filliera

Ma nħossuniex misjuqa

Trid tibda minn filgħodu

Tgħid le, biex ma tkunx magħhom

Iddur u tmur għal rasek

Ma ddoqx it-tnabar taghom.

Trid tibda minn filgħodu

Ma tkunx skorfina f’magna

U tagħmel l-almu tiegħek

Biex b’hekk qatt ma tistagħġna.

Alfred Grech

21/03/2018

Twassalni sa fuq ix-Xifer.

Twassalni hawn sa fuq i-xifer

Imbagħad arak titlaqni waħdi,

tbexxaqli t-tieqa tad-dar tiegħek

u toqgħod hemm biex tittawwalli.

Tagħtini l-armi biex niġġieled

u twiegħdni li se tkun warajja,

tagħtini l-għodda biex nixxabbat

imbagħad insibek hemm, titpaxxa.

Aqtagħa din li tibqa’ taħseb

tfaqqa’ subgħajk u jiena naqbeż,

insib il-bieb u nitlaq niġri

u milli għedna xejn ma baqa’.

Alfred Grech

20/03/208

Orpheus.

Issa li sibt il-wiċċ ta’ dis-sbuħija,

ta’ dan is-seħer sfiguranti tal-burdati

fil-qiegħ ta’ mera tħares lejja

irid ikun ħelsien mill-ġdid ta’ kif naħsibha

u kif nitkellem.

Issa li sibt mogħdija għalija waħdi

ta’ kif mingħajr tqanżiħ il-kelma noħroġ

ta’ kif mid-dizzjunarju antik u minsi

nislitha

u nagħmel minnha ħjut f’tapezzerija.

Issa sirt naf kif nislet ħsieb qalil minn ieħor

u nibda kif irrid taħlita nħawwar

fil-mewġ tal-fwieħa tmewweġ filgħaxija

tar-rieħa trewwaħ ir-riħ tagħha

fejn għad titwieled drabi oħra

Arfrodite li toħlom biss l-imħabba.

Issa li sibt kif noħroġ mill-filliera

mingħajr ma nweġġa’ ’l-ħadd

jew nagħmel ħsara.

Issa! Ekwilibrista fl-aħħar ħolma.

Alfred Grech

18/03/2018

Lill-Editur tal-Ħajja f’Għawdex.

Aħna li nagħlaqna f’dil-bużżieqa illi nfaħna

Fejn intom ma tidħlux, ’mma biss tittawlu

Bla ma tisimgħu x’aħna ngħidu

Inkella taqbdu biss il-ħsejjes rimbombanti tal-kliem fieragħ

Bla ma tfissruh;

Għax kliemna doppju sens

Inkella xi parabbola li ngħiduha biss

Lil min jifhimha.

Aħna li qiegħdin fl-istratosfera tax-xintilli

Ta’ arja mżewqa bil-qawsalli

Arja rarifikata li qawwa tagħħa saħansitra

Taqtagħalek nifsek,

Ma rridukomx li taqtgħu minn dis-siġra

Bnedmin imsensla ta’ nofs kedda

Għaliex ibagħad allat issiru

Inkella tgħixu għal dejjem.

Intom se tibqgħu hemm

Tistagħdru f’dik l-għadira ta’ gżira msewwsa

Titbaħbħu fit-tajn medjokri ta’ kuljum

U ttennu l-mantra.

Alfred Grech

17/03/2018

136.

Minn wara li ħallejtek tistedinni

Biex issa ddur u tgħidli li ttradejtek

Dan mhux kuntratt li bih sejrin nintrabtu

Biex lili żżommi ħabsi tal-ġenn tiegħek
Għax sir qaddej fidil tal-frugħa tiegħek

Dak li qabillek issejħilha mħabba

Għax lanqas biss sibt kelma biex tfissirha

Mitbuq dak fommok baqa’ bla tweġiba

Mitluf fit-trufijiet ta’ xi żurżieqa

Xħin daharek kont mal-ħajt mingħajr difiża

Għax taf l’hekk biss inti lili stajt tirbaħli

Tfixkilni bdejt fil-kobba mħabbla tiegħek

Kull meta  jien inbdilt u sirt ħaddieħor

U inti bqajt ilsiera tal-ġurnata.

Alfred Grech

16/03/2018

Lil Stephen Hawking.

Eleġija.

Fuq truf il-qċaċet fejn xi darba ħsibna

Li bdejna qafas ġdid fuq li tgħallimna

Bqajna hemm staġnati frott l-insikurezza

Biex niggranfaw mal-mambar tal-profeti.

Imbagħad ġejt int bil-ħsieb submlimi tiegħek.

U bdejna niflu sew il-ħofor suwed

It-toqob ta’ kull żmien f’kull dimensjoni

U mbagħad kissirt il-qoxra u ħriġt il-qalba

Tal-lewża li kissirt bl-intelliġenza.

F’inżul ix-xemx inin minn wara l-kwinti

Sebbaħt ukoll l-iljieli bil-ħolm tiegħek

B’dawk ix-xintilli, xrar tal-kwiekeb jiddu.

U frott il-għerf tgħollejt hemm fuq l-ispalel

Ta dawk l-iġganti, ġenji li ġew qablek.

Fil-fwar ta sbieħ il-jum li jiżvanixxi

Issa li m’għadekx hawn il-bieb jingħalaq

Fuq dawl il-ħsieb li jgħola ‘l-fuq u jiddi

Jinfed in-nagħas, l-aljenazzjoni folta.

Alfred Grech

14/03/2018

LIII.

X’qed taħbi u tostor wara dik is-sura,

Sbuħija tal-istatwi fik magħġuna?

LI kieku ma kontx nafek, nerġa’ lura,

Milqut minn dawk l-għajnejn, bħal sejf misnuna.

X’qed taħbi wara surtek il-ħanina?

Li kieku ma nafekx kont nerġa’ lura,

U kont tħajjarni nduq tuffieħa bnina,

Għalkemm illum jien frotta sirt misjura.

Li kieku ma kontx nafhek, nibdlek m’oħra.

Illum li naf il-prezza tad-drapp tiegħek,

Illum, indawwar wiċċi n-naħħa l-oħra,

Ma rridx li jkolli x’naqsam aktar miegħek.

Illum li nafek sew, għalfejn nistaqsi?

Int taf li m’hawnx ħaddieħor jafek daqsi.

Alfred Grech

17/07/2012

Lilhinn Minn Dad-Deżert.*

Lilhinn minn dad-deżert ta’ ruħ għatxana,

Xħin ma jibqagħlek xejn għaliex tistenna

Jisbaħ l-għada;

Jew tħares lejn li ġej b’għajnejn il-gawwi

Bil-ferħ ta’ sfida li tiġik biex taqta’ xewqtek.

Jien xtaqt li kont għannej sabiex insawwar

Dak l-innu li għad jista’ ismek jgħolli.

Imqar xħin tara s-sema mċajpar bir-riħ isfel

Inkella tara l-qlugħ fuq baħar qiegħed

Mill-ponta tat-turretta b’inqas ħerqa,

Inti tistenna!

Jien miegħek irrid ngħannaq żernieq ieħor

Li jżernaq fuq dal jum li qatt ma jisbaħ

U nerġa’ nistaqsik għall-kemm il-darba:

Lilek li taf it-tweġibiet imdendla

Bħal fil-kwadru ta’ nżul ix-xemx efimeru.

Bħal kieku qatt ma kien u m’hemm xejn aktar

Għajr ħsieb li jisparixxi wara x-xefaq

U nerġa’ niskoprik filwaqt li nifraħ:

Ja mara tal-misteri.

Alfred Grech

08/03/2018

*F’jum Il-Mara