X’inkunu Ngħidu.

X’inkunu ngħidu xħin niltaqgħu int u jiena

fin-nofs ta’ nhari li qattajna

mingħajr għajnejna qatt jiltaqgħu.

Jien inħossni niexef, moħli u mormi.

Għax aħna m’aħna xejn

waqtiet jew bżiezaq t’arja mal-kurrenti.

Jien nerġa’ niġi ħdejk biex nieħu s-saħħa

u nerġa’ nibda’ nagħmel bħal ħaddieħor

u terġa ttini x-xenqa ta’ tfuliti.

Irrid insib l-għeruq tas-siġra tiegħi

biex nerda mill-ħamrija s-suqu primordjali

u nfittex ġo l-għenieqed qed ixenxlu

l-għanja mill-ġdid.

Xi drabi mbagħad inkun nixtieq

intir fuq ġwienaħ l-isqra

biex naħtaf ix-xintilli solitarji

tas-sħab mutu mberfel fix-xemx,

Inkella ngħum u negħreq

fil-baħar ta’ ħin li lanqas jgħaddi.

Irrid ningħalaq f’kull taghannieqa li tagħtini

u naħseb li dal waqt se jibqa’ għal dejjem.

Alfred Grech

28/01/2018

Jien Xtaqt.

Jien xtaqt kont ġurnalista

–attaparsi-

Intir fuq mewġ iġorr

Il-ħelsien tal-espressjoni.

Inkun fuq xi tribuna

Ħa nagħti xi ħastig aħrax

Għal kull abbuż sesswali,

Jew fuq xi pedestal

Nikkundanna xi pedofelu,

Inkella xi politiku

Sabiex ninnormalilzza

Dak li normali mhux

Jew inħares b’lenti waħda

Dak li mhux l-istess.

Hawnhekk kulħadd prosekutur minbarra wieħed:

Min hu bla ħtija jitfa’ l-ewwel ġebla.

Alfred Grech

27/01/2018

M’Aħniex Flimkien.

M’aħniex flimkien għax ta’ kull darba

Jien nibda biex nistaqsi: hawn x’ġejt nagħmel.

U int ittenni l-mistoqsija

Li jien m’għandix tweġiba għaliha:

Għaliex sejjaħtli?

Illum stenbaħt b’din il-burdata

U b’ruħ ta’ pellegrin.

Qiegħdin hawnhekk għax ma ntbaħniex

U ma konniex inkunu hekk jekk mhux tort ta’ l-imgħoddi.

Għax konna nħobbu d-dell tar-riflessjoni

U għax insejna t-tnejn mnejn konna tlaqna.

Iżd’issa f’din l-arja tar-riħ isfel,

Jien sibtni ngħum mal-ħut il-kbar

U int qed tittawwalli mill-fanal

Ta’ fuq l-iskolji.

Alfred Grech.

25/01/2018

XLV.

Ma jdumx biex jaqbad dan in-nar tat-tiben

U mbagħad xħin jaqbad xejn ma jagħmel sħana.

Hekk hi xewqati lejk, lanqas tiżtiżen.

Aktar ma  jgħaddi ż-żmien jien qed nistagħna.

Għalhekk minn ħarset dawn in-nies aħbini,

Tikketta jwaħħlu  mhux la kemm tneħħija.

Jistħuk b’ħarsithom, minn warajk għaddini,

U b’hekk għall-ġenb inwarrbu kull stmerrija.

Aħbini wkoll minn dawk tal-unifirmi,

Minn dawk li sabu ruħhom fuq tribuna

Għax dawk taħsibom jerfgħu pis enormi,

U l-passi tagħhom tqal bħal ta’ fekruna.

Imm’aktar hu meħtieġ malajr taħbini,

Minn dik il-mera li kif jien turini.

Alfred Grech

09/01/2012

Xejn Aktar Ma Tkun Tiswa’.

Xejna aktar ma tkun tiswa’ din ix-xniegħa,

Tellieqa biex tinqara fl-ewwel paġna

Tiżżewwaq u tinbidel ma kull siegħa

Skond min kapaċi l-aktar jitfa’ xrara.

Biex aħna nsiru dejjem it-telliefa,

Għax din tellieqa li qatt mhu ser nirbħu

Għax jirbħu l-qaddisin ta’ wara l-kwinti

U jirbħu n-nisa tagħhom, dawk li jservu:

Tellieqa din ta’ min jaf jgħix il-gidba.

Għaliex qatt mhu se jitla’ ż-żejt f’wiċċ l-ilma,

Itambru kemm itambru l-ġurnalisti,

Profeti tal-qlajjiet u l-malafami

Mal-bċieċen li jibilgħu li jisimgħu.

Din hi tellieqa ġdida ta’ min jonfoħ

Duħħan, eklissi u bżar f’għajnejn min jara,

Minflok il-bżieżaq arja u sensazzjoni

Bħal kif l-ekonomija dejjem tikber

Bħal xi bużżieqa qatt mhu ser tinfaqa’.

Din hi tellieqa ta’ min jgħajjat l-aktar,

Ħanġra ta’ ljun li jwerwer il-foresti;

Li ġġiegħel lil-kullħadd f’qoxortu jidħol

U jaqra t-taħżiżiet ma ħajt ta’ ċirku.

Din hi aħbar li tiswa’ biss ġurnata,

Għax għada jaġġornawna b’aħbar ikbar.

Alfred Grech

20/01/2018

Ejj’għidli Kif Se Nkomplu.

Ejj’Għidli kif se nkomplu,

Id f’id fguq dan ix-xifer,

Ejj’għidli kif se nkomplu

Mingħajr ma niksru difer.

Ejj’għidli kif wasalna

Biex dorna l-kanruniera,

Imdawwra bis-seksieka

Minn wara kull purtiera.

Ejj’għidli kif se nkomplu,

Il-bogħod mill-illużżjoni,

Nimxuha din il-mixja

U naslu f’konklużjoni.

Ejj’għidli ‘mma ddumx ħafna,

Għax hawn bdiet dieħla l-għajja,

Għax hawn id-dawl qed jikfes

U tlift is-sens tal-ħajja.

Alfred Grech

19/01/2018

Fittixni.

Fittixni bla ma tibża’

Fitixni bla dewmien

Jien qatt mhu se nintilef

Imqar jekk jgħaddi ż-żmien.

Fittixni qalb il-kwiekeb,

Fid-dalma ta’ bil-lejl

Taħt qamar qed jitbissem

Fil-wisa’ ta’ bla kejl.

Fin-noti musikali,

Fittixni kullimkien,

Fittixni fil-baħħ t’għada

Fli hu jew seta’ kien.

Fittixni u erġa’ fittex,

Fil-baħar qed ifur,

Fil-baħħ ta’ fik innifsek

Hemmhekk se ssibni żgur.

Alfred Grech

18/01/2018

F’did-Dinja.

F’did-dinja tat-telliefa,

Inkun minn ta’ quddiem;

Profeta nibqa’ ntambar,

Nitkarrab: Gej it-tmiem!

F’did-dinja tal-ispjuni

Li jinfdu kullimkien

Min jgħasses, qatt ma jorqod,

Tistaħba? M’hemm imkien!

F’did-dinja tal-qawsalli

Nittajtru t-tnejn ħenjin

Bħall anġli ta’ bla tebgħa,

Man-naħħa tat-tajbin.

F’did-dinja fejn trid tisraq

Biex taqdef il-quddiem

Ma jiswa’ xejn li toqgħod

Bi kwietek jew fis-sliem.

F’did-dinja “attaparsi”

Fost bżieżaq tas-sapun

Tonfohom waħda waħda

Biex tibdel l-istaġun.

Alfred Grech

17/01/2018

Jien Noqgħod Nisma’.

Jien noqgħod nisma’ lili nnifsi

Biex ma nismax x’għaddej madwari

Għax jekk il-moħħ mill-ġdid jitwebbel

Iġġudikat ukoll fil ħaqq aħħari.

Qalil għal ġisem joqgħod lura.

Kif midneb tkun , u tkun il-ħati

U ssir qaddis bla diadema

Trid tieħu biss mingħajr ma tagħti.

Issib lil dik li tiġi ħdejk tqalliblek

Il-qiegħ u n-naqal ta’ ġo qalbek

U ssib li s-sensazzjoni ħaġa

Fejn mhemmx allat jisimgħu talbek.

Dawk illi jagħtu sens u togħma

Lill kull ġurnata ta’ ħajjitna.

Irrid jien stess inkun il-ħtija tiegħi

Jew dal-kurrent fejn mar xeħitna.

Li nħobbok huwa dnub m’hemmx x’tagħmel

Bħall-kull passjoni: intriganti,

U li nixtieqek hi tortuta

U l-fantasija lluminanti.

Alfred Grech

16/01/2018

Iż-Żmien Kurrent.

“Eħlisni, iva eħlisni! Mit-toqol tiegħi nnifsi f’dal kurrent imsejjaħ żmien. (Djarju mill-Ermitaġġ: Tħabbat Xtaqtek, Gioele Galea, No. 90 Horizon 2017.)

Iż-żmien kurrent għaddej

Bħar-riħ li lanqas jidher,

Ir-riħ hu biss in-nifs

Li joħroġ minn ġos-sider.

Inaqqas jew iżid

Kull kif ir-ritmu tiegħu,

Iż-żmien ma jneħħi xejn

Mit-toqol li jġorr miegħu.

Hu int , inkella jien

Mad-dinja ta’ madwarna

Ninġarru f’dal kurrent

Flimkien sat tarf aħħari.

Qadim flimkien mal-ġdid

Inkella kull tifkira

Stampata fuq l-ħajt

Ta’ moħħna bla tifsira.

Tifkira ta’ li kien,

Li ġara xi żmien ilu,

Jew f’moħħ dak li kien hemm

Għax hu kien xhud t’għemilu.

X’jibqa’? Ma jibqa’ xejn!

Mit-twila sal qasira,

Ui mbagħad xħin nitlaq jien

Tmur miegħi kull tifkira.

Alfred Grech

15/01/2018

Lili.

Lili li qiegħed hawn ngħix ħajjti

maġenb l-assenza tiegħek, ismagħni

bħalma tisma’ x-xita nieżla

jew l-iwiefen illi jaħbtu mal-kampnari tal-għerf

li konna ġmajna

fid-dalma ta’ dal-lejl iħares ġewwa fina.

Iftaħli l-bieb tal-meravilji

fuq ħerża ta’ bir ħiemed

li qatt ma tista’ tara qiegħhu

fejn jirgħu ħafna nsetti fl-ilma qiegħed.

Noqgħodu nħaffru jew nistagħbu bix-xejn tagħna

bil-baħħ jirbombja ta’ ġo fina

fejn inti qatt ma tfittex

fejn wiċċ il-lejl jitkixxef għal darb’oħra

u jħares lejħ innifsu.

Imqar ritratt jirrakkuntalna u jikkunslana

bil-frugħa ta’ żmien ilu

għax għandu mnejn jirxoxta s-sensazzjoni

f’dawk il-waqtiet ta’ ġenna efimerali

u d-dellijiet li jiffullaw fuqna

qabel terġa tiġi lura

fuq l-għolja tat-trasfigurazzjoni.

Sadanittant jien nibqa’ hawnhekk

nistenna.

Alfred Grech

14/01/2018

Kopji.

Ma kienux dawk kopji tieghek

Dawk li daħlu u reġghu ħarġu

fuq il-palk evanexxenti

jew bit-tanabar invadenti

Ma kienux dawk kopji tiegħek,

dawk in-nisa f’purċissjoni

kienu jħaddnu fidi waħda, 

jew iqabblu jew iħabbtu

perskussjoni.

Ma kienux dawk kopja tiegħek

dawk l-uċuh ta’ bl’ espressjoni

kienu maskri li ridt nilbes

ħalli nimla’bil-kuluri

l-baħħ li tħalli l-konvenzjoni.

Alfred Grech

13/01/2018

U Int Ħallejtni Hawn.

U int ħallejtni hawn

Qalb dawn it-tifkiriet tax-xbiha tiegħek

Biex issa sirt ukol nitfixkel

Il-fattizzi ma kull ritratt li nsib f’idejja.

U int ħallejtni hawn fid-dlam iwaħħax

Biex nishar jew niskava l-fdal li baqa’

Fil-ħerba li ninsab imdawwar biha

Bħalkieku għadda riefnu.

U int ħallejtni hawn biex ta’ kull darba

Inqum u niġbor nerġa lili nnifsi

Nintebaħ ta’ kull darba li xi ħaġa

Tkun intilfet u jonqos kemm il-biċċa

Li tkun mitlufa għall-dejjem.

U nerġa’ nsaqsi lili nnifsi

Kif għada ser inkun

U mhux kif ser inżomm,

Wieqaf fuq saqajja.

Alfred Grech

12/01/2018

Il-Ħsejjes Tagħna.

Il-ħsejjes tagħna ma jissarfux fi kliem,

Il-ħemda timla’ l-bogħod li hemm bejnietna.

B’għajnejna t-tnejn nissinkandaljaw

Il-fond ta’ dak li jista’ jkun,

Jew dak li xtaqna nafu.

Jien qiegħed hawn, jew jien miniex

F’dal bosk li qed jirbombja ħsibijieti.

Ir-ritmi tiegħi mhux bil-fors li jżommu l-pass

Mar-ritmi tiegħek

Mal-ħin li qed iġorrna bla ma nafu.

Int tħaddan spazju ieħor

Fejn jien ma stajtx inkun,

Fejn jien bil-ħsieb ta’ moħħi

Qatt mhu se ninfed.

Jien nibża’ nħares l-isfel

Fil-fond tal-preċipiżżju

Għax l-għoli jwerwirni.

Imm’inti tgħid lil tħobb tħares

Fil-fond tal-qiegħ ta’ ruħi.

L-ispazju tiegħi mimli ħemda

Għax moħħi dejjem sejjer

U ma jħallini qatt inkejjel dawn l-abbissi.

Il-ħsejjes tiegħek ma jisaffux fi kliem.

Jien xtaq nimmiskja l-ħsejjes tiegħi

Ma dawk tiegħek,

Biex flimkien inkomplu ngħarrxu

Jew naqbżu l-barrikati

Ta’ dak li huwa sew

U dak li nistgħu nagħmlu.

Alfred Grech

10/01/2018

 Mini Vaganti.

Nitelqu taħt dal-ħajt tal-paradossi

Bi klien u tifsiriet evanexxenti

Biex sibna dak iċ-ċirku li jagħqqadna

Kien biss il-ġometrija trasparenti.

U kollox jgħib fis-skiet ta’ baħar iswed

Taħt l-għera ta das-sma alluċinanti.

Il-lejla mhemmx il-kwiekeb, lanqas qamar

Hemm biss il-waħx ta’ żewġt erwiħ vaganti.

Alfred Grech

09/01/2017

Xi Trid Int Minni?

Xi trid int minni kull xħin terġa’ tiġi,

Iddoqqli l-ħsejjes tiegħek ġo widnejja,

Imbagħad jibbnazza wara ftit u titlaq,

Moħħok mistrieħ, għax għal ftit ħin kont ħdejja?

U xi trid tgħid int biha din li taqsam

Il-baħar tas-silenzju ta’ bejnietna,

U ma ħaddieħor tikxef din il-ġenna

Biex lanqas iħalluna ftit bi kwietna.

Konkwista għalik li jiena ndur u nidwi

Dak li tgħid int jirbombja ħabs bejnietna.

Alfred Grech

07/01/2018

Meta Leħnek Lanqas Jasal.

Int trid tgħix u trid il-beraħ

Trid issb iċ-ċebtru tiegħek,

Jiena bħalek kont, imm’issa

Mhux se nasal naqbel miegħek.

U jien hawn nipprova nniżżel

Dak li f’daqqa waħdu jaqa’

Minn ġoċ-ċpar ta’ fuq għajnejja

Nibda niġbor milli baqa’.

Meta leħnek lanqas jasal,

U ġo qalbi jieħdu s-sura

Dwejjaq kbar ta’ letarġija

Nimxi pass u nerġa’ lura.

Hemm xi ħaġa li mhix sewwa,

U tistona ġo widnejja,

Qed inħossni qed nitbiegħed

U mhux lilek nara ġejja.

Alfred Grech.

06/01/2017