Ġew Fuqna.

Gew fuqna jiem ta’ swied il-qalb

Ta’ deżolazzjoni

U żdiedet id-dalma fuq wiċċ in-nies.
Il-qarnita mhux swaba bdiet tiekol

Il-qarnita bdiet tiekol lin-nies

Tisplodihom mas-sebgħa sema.

U jibqu itellgħu

‘l-fuq mis-sħab jekk jistgħu

Jitilgħu bl-axxensur

Insieħit-taraġ

U joqgħodu minn hemm fuq

Inemmsu lin-nemel ta-ġot toroq

Il-fuq minn fejn jittajwru l-ajklu l-għasafar tal-ħtif

Mhux bħal ġawwi

Il-ħares tax-xtut tagħna.

It-turrretti tagħom jidhru

Imqar minn fuq ix-xefaq

Hekk kif toqrob lejn din l-art

Li m’għadiex tnixxi ħalib u għasel.

Hekk f’daqqa waħda tingħalaq it-tnalja

Tal-qarnita biex tibqa’ bla nifs.

Serqulna x-xemx

Ħadulna l-arja

Ma baqgħalniex fejn njistgħu nimirħu.

Dalmulna l-ġranet tagħna

U xejn ma baqa’

Minn dak li kien għażiż għalina.

Alfred Grech

31/12/2019

Ifirħu.

U niġi ħdejk għad doż’oħra ta’ hena

Fil-fliexken tal-ħġieġ

Imqarr jekk narmi kollox.

Qed tara? Xejn ma jinbidel

Narmu mit-tieqa għail-isfel

Dak li m’għadux jgħodd

Lanqas għat tallaba tat-triq

Li jiġbru l-loqom

Fit-tarf ta’ sena ġdida.

Għax drajna fl-affluwenza

U issa kollox jgħodd

Fit-tkattir u fit-tkabbir

Tal ġenna virtwali

Inkella tal-ġenn tas-sokor

Fit-tkattir u fit-tħassir

Ta’ dak li konna drajna

Fl-infiż tal-bżieżaq tas-sapun

Bin-nifs tal-żasil tal-flus

U bit-tixħim.

Min fuq il-mambar tar-rikkieba toħroġ l-għajjta

“ifirħu għaliex l-ekonomija dejjem tikber!”

Alfred Grech

30/12/2019

Mintix Tismagħha?

Mintix tismagħha

l-għajta tal-folla

x’għadek tistenna

għax għadek hemm?

Mintix tismagħha

Din il-kundanna

Kulħadd itenni,

Ej’ żul minn hemm.

X’għadek tistenna

Iktar kundanna

Mill-poplu ġwejjed

Biex iżżid l-‘hemm”?

Għax kull ġurnata

Li tibqa’ ssaltan

Iżżid il-ħsara

Ma tafx bil-kemm.

U jekk qed taħseb

Li mit se tħalli

Għad jistħuk sħabek

Ejj’itlaq l’hemm.

Alfred Grech

28/12/2019.

Meta Jiena u Int.

Hemm kanċell ma jinfetaħx

Hemm reċint li ma taqbżux

A meta l-ġrajja tiegħi tiltaqa’ ma dik tiegħek

U jsiru binarju wieħed

Nitilqu għal għonq it-triq

Ta’ xefaq li jitbiegħed

Inġorru l-valiġġi ta’ ħaddieħor

Bl-isfida għamja ta’ min iħobb il-ħajja

U ta’ min daq il-ħeffa tal-friefet itiru

Ta’ min is-saħħa għandu

Li jħares fiss fil-baħħ

U saħansitra jisfida l-uħux’għada

Mal-biża li jżomm lin-nies ankrati

Ma dak li jafu.

Meta jien u int niltaqgħu

Ikun ir-riħ li qed ivenven.

Alfred Grech.

27/12/2019

Demenzja.

Ġismek mitluq ma tafx kif ser tinġabar

tħares lejja fis u mank tagħrafni;

kliemek sar diwi mtenni

ta’ dak li qiegħed ngħidlek,

ma nafx jekk intix hawn

inkella ximkien ieħor.

Tlaqt u lanqas taf x’ħallejt warajk

jew għadek hawn u lanqas taf  xinhuwa tiegħek.

Dinjietek fuq is-sħab ta’ dak li jista’ jkun

jew qatt ma tista tilħqu

Rabbejt ġwienaħ dehebija bħal tal-anġli

li lanqas l-aqwa għasfur tal-ħtif ma jxiddhom

u issa qiegħeda ddur fuq kull quċċata

tara tilmaħx lil dak li qiegħeda tfittex

il qċaċet bojod li jnessuk kull għelt u dnewwa.

Alfred Grech

26/11/2019

Milied 2019.

U f’daqqa waħda kollox kien jinftiehem

intbaħt malajr li mara ssaffi t-tbajja tas-sabiħ

imnebbaħ mit-tħabbir tal-anġlu

u li kien mgħawweġ issa ddritta

u dak li kien mitluf jinsab l-bogħod

mid-deni. Hekk kif ix-xebba ssir omm

u tqaddes bit-tqala tagħha l-ikraħ li jindara

imdendel fuq il-perċa ta’ mħuħ magħluqa.

Jinkixfu l-misteri kollha

għax welldet ħajja ġdida

issenslet katina li tirfed sal-mewt u lil hinn

u twassal ghas-sollenita’ ta din il-ġrajja

rabta li ma tinħalx bin-nar tal-ħaqq aħħari

fl-awla tal-imħallfin.

Ja xebba li ma tilfitx xbubitha

omm fid-deffa ta’ dak li hu

int għaraft il molla tal ħajja

tal-iben li jrid jgħix fil-qawwa tal-ġejjieni

u dak li kien mjistur fih innifsu

jinkixef mingħajr biża

mingħajr star, mingħajr siparju.

Inti li ssaffi dak li ttabba

fin-niżġa tal-ħolqien.

Alfred Grech

25/12/2019

Pajjiżi. *

Jien ukoll inħossni li tlift is-sabar

U ma niflax għat-tkaxkir u tbenġil li qed tlaqqat

Pajjiżi!

U trid tkun  tassew skars u mingħajr demm

Biex tibqa’ biered quddiem it-travestiji

l-isfigurar u l-mmassakru

tax-xbiha tiegħek.

Jien ukoll inhossni wasalt fix-xifer

Iżda ma naqta’ jiesi qatt

U bil-kuraġġ kollu

Nipponta subajjja lejha

Dik il-brimba li kullħadd jaf min hi u fejn qiegħda

Iżda li ħadd ma jrid isemmi

U jixliha.

Għax kulħadd ġifa

Għax kulħadd ġwejjed

Għax kulħadd għandu x’jitlef

U kulħadd iqis qieshu.

Ma nistmerr qatt lil dal-pajjiż

Fejn jien twelidt, trabbejt u sawwart id-dinja tiegħi,

Din l-art li fit-tgeżwir tagħha

Għaġnitni u għamlitni

Dak li jien,

Iżda rrid nemmen u nittama

Li dawk li nasbu x-xibka għad jinqabdu

U dawk li haffru l-moħba

Biex fiha jistaħbew

Jinkixfu.

Imqar li dawk li issa jippużaw ta’ palladini

Ma jinħakmux ukoll

Mill-qarnita ta’ bla isem,

l-innominata,

u flok ibajjdu l-oqbra tal-intiena

jiskavaw sal-qiegħ

biex joħroġ kull skeletru.

Alfred Grech

24-12-2019.

*Lil John Portelli l-awtur tal-poeżija “Pajjiżi”

Luminarja.

Jekk  ma tifridx il-qoxra

Mill-qalba tal-lumija

Ma tista’ tifhem qatt

Kif toħroġ int bla ħtija.

Jekk tħares fiss fil-bogħod

U toqgħod hemm bħall-bqija

Turini dik il-ħaġa

Li tfiser wisq għalija.

Jien mimxi wara d-dell

Bl-għasluġ tal-kwintessenza

Xintilla minn tal-bidu

Mitliuf fl-effervexxenza.

Fir-rassa ta’ xufftejk

l-ugiħ u l-baħħ tal-bqija

tal-leħma tal-waqtiet

li jfissru wisq għalija

Jekk ma tħarisx fid-dlam

U tifhem dak li tara

Il-ħsieb malajr ifittex

Kif jeħles mis-sunnara..

Fil-baħar ta’ bla xefaq

Jien negħreq u nitmiegħek

Biex nislet dawk l-ilwien

Evanexxenti tiegħek.

Alfred Grech

23/12/2019

Inħossni Qed Nitwieled.

Inħossni qed nitwieled

Inqum minn bejn l-imwiet,

Illum qed ngħix il-ħajja

U nishar qalb is-skiet.

Inħossni qed nitwieled

U nogħla ’l-fuq miċ-ċpar,

Bħal kewkba li bdiet tixgħel

U tiddi ’l-fuq mis-swar.

Illum iddiet xemx oħra

U dija ħawn bla qies

U nħossni qiegħed nogħla

’l-fuq mill-ħmieġ tan-nies.

Mhemmx lok għal aktar dwejjaq

Għal-biki u għall-ilfieq

Għal manipulazzjoni

Tal-midja tħambaq sfiq.

Hawn biss l-istat tal-grazzja

Ħelsien minn kull uġih,

Lin-nies ta’ rieda tajba

Xewqat mill-aktar sbieħ.

Alfred Grech.

21/12/2019