F’das-Skiet li Qed Jaħfinni.

F’das-skiet li qed jaħfinni,

Inħossok tersaq qrib,

Fil-baħħ fejn trid tintilef

Fis-serħ li rrid insib.

Fil-firxa bla konfini,

Fl-eternita’ bla waqt,

Nagħarafha l-għanja tiegħek

Fix-xejn li jmut dalwaqt.

Għad-dawl ta’ qamar kwinta,

Fil-ħemda ta’ bil-lejl,

Jien negħereq ġo ferħ għami,

Fl-immensita’ bla kejl.

M’għandix bżonn tabernakli,

M’għandix bżonn ta’ xi nvit,

Tinsab int hawn maġenbi,

U jien ninħall ftit, ftit.

Il-bogħod mid-daqq tat-trombi,

Is-skiet iwelled ħoss,

Il-bogħod minn għajn ma tara,

Qed nara bla ma nħoss.

Għax inti, inti kollox,

U kollox mhuwa xejn,

U dak li mmiss b’idejja,

Turini mnejn sa fejn.

Alfred Grech

20/07/2016