Għaliex Qatt Mhu Se Jitla’ Ż-Zejt F’Wiċċ L-Ilma.

Għaliex qatt mhu se jitla’ ż-żejt f’wiċċ l-ilma,

Itambru kemm itambru l-ġurnalisti,

Esperti tal-qlajjiet u l-malafami

Mal-bċieċen li jibilgħu u jisimgħu.

Din hi tellieqa ġdida ta’ min jonfoħ

Duħħan, eklissi u bżar fl-għajnejn bil-ħela.

Minflok il bżieżaq t’arja, s-sensazzjoni,

Bħal inflazzjoni din, qatt ma tinfaqa’.

Din hi tellieqa ta’ min jgħajjat l-aktar,

Ħanġra ta’ ljun li twerwer il-foresta,

Li ġġiegħel lil kullħadd f’qoxortu jidħol

U jaqra t-taħżiżiet mal-ħajt taċ-ċirku.

Din hija aħbar li tiswa’ biss ġurnata,

Daqshekk kullma tkun tiswa din ix-xniegħa,

Għax għada jaġġornawna b’xi qlajja oħra.

Tellieqa din li tkun tal-ewwel paġna,

Tiżżewwaq u tinbidel ma kull siegħa,

Skond min kapaċi jitfa’ xrar ix-xjaten,

Biex aħna nsiru l-ħrief tas-sagrifiċċju.

Din hi tellieqa l’aħna mhux se nirbħu

Għax jirbħu l-qassisin ta’ wara l-kwinti,

Ghax jirbħu n-nisa tagħom, dawk li jservu

L-idejn li jiġbdu l-ħjut tal-marjunetti.

Tellieqa din ta’ min jaf jgħix il-gidba.

Alfred Grech

30/04/2017.

123.

Ma nistkantax jekk ma tiġix għalija,

Għax issa sirt duħħan tal-perċezzjoni,

Sibilla tat-turmenti u tal-fastidju,

bħal xemx li tinżel siekta wara l-kwinti

fuq xefaq mimli ċpar u mimli gideb.

u bqajt ma grejtx warajk , ja profetessa,

għax ma kontx għadni lest, kont qed nitnikker,

ghax naqbad ridt il-brimba qabel tinseġ

l-għajnqbuta ħsibijiet li hemm jittajjru

u l-kosbor ta’ xewqat bħan-nanna kola.

Inħossok bħalma nħoss ir-riħ ma wiċċi,

u l-art tal-baħħ etern li qed titriegħed,

għax issa l-ghanja tiegi bħal taċ-ċinju

għax ma baqgħali xejn xi ngħidlek aktar.

Alfred Grech

30/4/207

Bħal Meta Nħażżeż Id-Dell Tiegħek.

Bħal meta nħażżeż id-dell tiegħek seduċenti,

Nummudellak bit-tafal trasparenti

Biex tersaq lejja tgħanni bħas-sireni

Inkella tas-sibilla trewwaħ

Il- fwar tal-profezija.

Kemm tird nixxierku u nibdlu ta’ xulxin ix-xeħta

U nirxuxtaw u mmewtu tqanqil sagru

Li m’għadu jiswa’ xejn għax simulakru.

Jien ġrejt warajk qalb ward artifiċjali

Ta’ ġonna jfewwħu l-fwieħa minn tal-Għeden,

Imqarr li wara kollox sibt ftit hena

It-triq tan-nofs tinsab fl-għeqqel taqbida,

Fix-xifer tal-irdum, bejn taqa’ u ma taqax

Fejn darba konna ltqajna.

Aħjar jekk siekta u muta

Nimmudellak kif irrid jiena.

Alfred Grech

28/04/2017

Qed Tibża’ Li Tirxoxta.

Qed tibża li tirxoxta

Inkella terġa’ tqum

Min-nagħsa li ħakmitek

Ta rqad li ser idum.

Sakemm int b’moħħok taħseb

Daqshekk iddum stordut,

U tibza’ li tistejqer,

Għat-tul mal-art mixħut.

U tibqa’ din l-imħabba

Għal din l-identita’

Ta’ ħajjtek tkun id-drama

U ssir eternita’

Il-Jien iġorrok miegħu

U tibqa’ hekk issummast,

Sa tarf l-irdum iwasslek,

Biex tibqa’ skonsolat.

U ssib is-salvazzjoni,

Għalkemm iddiżgustat,

Fejqan mill-marda kronika

Xħin tkun hekk aljenta.

Jien nikteb dawn il-versi,

Biex nibqa’ bħal miżien,

La naħħa u lanqas oħra

Ma mmil, ma mmur imkien.

Għax malli naqbad naħseb

Jinqala’ l-uragan

Biex aktar enerġija,

Tinħela f’għerf bħal dan.

U bla ma qed nintebaħ

Qed noħloq teatrin

F’did-drama ta’ dil-ħajja

Li fiha ngħix kull ħin.

Fil-logħoba tal-kuluri,

Kuntrast bejn dak u dan,

Hemm ħemda li tinfidha

U ġġib mill-ġdid serħan.

U qalb l-evanexxenza,

U qalb it-tibdiliet,

X’hinu li jibqa’ għall-dejjem

Li l-paċi jġib fis-skiet.

Alfred Grech

27/04/2017

F’Dal-kaldarun Ta’ Soppa Tbaqbaq

F’dal kaldarun ta’ soppa tbaqbaq

Li aħna l-plebej qed nagħalu ġewwa fiha, għidulna intom l-alkemisti

Tas-sewwa li tafu tbiddlu l-ilwien tal-qawsalla,

x’inhuma l-għażliet tagħna

aħna li magħkom ngħammru ġo dir-roqgħa art imtarrfa

fil-perifiji tal-fruntieri lluminati

ta’ kontinent li belgħa l-vixxri tiegħu

qalb dir-rettorika qadima ta’ tqasqis, tkeskis u tal-velenu.

Għax aħna sirna tfal mill-ġdid, orfni mingħajr għażla.

Xħin titla’ x-xemx mill-ġdid ta’ kull filgħġodu

Fuq liema minaret ser tiddi l-kewkba,

inkella fuq il-kampnar ta’ liema knisja jisseqqru

it-tajr tal-ħtif estint ta’ dan nisel

li xi darba jgħammru kienu

fuq ix-xfar tal-ogħla ġebel.

Liema sentinella sejjra tidwi

Inkella tirrispondi l-ħbit barrani

Ta’ min bil-ftit il-ftit, taħt skuza nkella t’oħra

Qed jisirqilna dak li hu tagħna,

Jinsobna biex jindiehes u demmu jħallat

Mal-għerq tan-nisel tagħna.

Għidulna intom, l-għorrief u l-viżjonarji

Jekk għadx jibqa xi wild ta’ dawn il-gżejjer

Li jagħraf lilu nnifsu jew lilkom,

Intom li triduna nemmnu fikom,

Fil madmad u fil-jasar tal-kuxxjenza.   

Alfred Grech

27/04/2017

Kliemek.

Kull kelma li kont għidli

Tiżżerżaq bħad-dmugħ li jġelben

Miżiep li jferra fil-bir bla qiegħ

Ta’ moħħi.

Insir tellieqa waħda

Fil-ferrovija ta’ kuljum

F’binarji li saru ċirku

Li drajt indur ġo fih.

Kull kelma li kont tgħidli

Bħal zveljarin li jrid jaħsadni

Ħa nqum min-nagħas,

Ta’ l-għaġna li għaġnitni

Biex nerġa’ nibda nfittex

Fejn hu posti.

Kliemek bħal balal tal-kanun

Li jifqgħu, jisfrundaw u jħarbtu

t-torri li kont bnejt

Dak kollu li kont nemmen.

Alfred Grech.

26/04/2017

Jien Niġi Nbennen.

Jien niġi nbennen imqar waħdi

B’dan moħħi ħsibijietek

Biex naħtaf bejn idejja

Dak li tassew tixtieq mingħandi.

Jien xtaqt li dejjem noqgħod fil-miżien ruħek

Għax naf

Li fil-fond t-għajnejk hemm is-sewwa moħbi,

Is-sewwa li ma nafx

U li xi minn daqqiet

Tkun taħbi bħalma taħbi

Ix-xejn tal-infinit.

Xħin naqsam il-fruntiera ta’ bejni u bejnek,

Jien niġi dritt niltaqa’ miegħek

Biex int ma tintilifx qalb l-agħa tal-folla

Inkella qalb il-ħafna kliem,

Inkella qalb l-istqarrijiet jew skużi

Li jaqblu u ma jaqblux man-narrattiva.

Xi darba mbagħad insibu triq

Fejn int u jien weħidna nterrqu.

Alfred Grech.

25/04/2017

Għix Issa.

Il-massa mhix konxja

Tal-ego sfrenat,

Il-ħażen li jiġri

Li jsawwar l-Istat;

Li joħloq id-drama

Li joħloq il-ġenn,

Dal qafas, fi ħdanu

Mintix se ssib kenn.

Li joħloq il-gwerer

Li joħloq il-hemm

Il-ġiri u l-isfidi

Li tifhem bil-kemm.

Kull meta jixxierku

Tnejn u aktar min-nies,

Hemm biss distorsjoni

U drama bla qies.

Imqar xħin tkun waħdek,

Trid toqgħod attent

Mid-drama li toħloq

Biex tagħmlek kuntent.

Xħin lilek innifsek

Titħassar mhux ftit,

Qed toħloq teatru,

Tixxala kemm trid.

Tistenna li jiġri

Dak l-inti tixtieq

Hemmhekk l-istennija

Tal-ego fid-dieq..

Kull meta l-imgħoddi

Tirxoxta, għaliex?

Inkella l-ġejjieni

Li għadu ma ġiex.

Qed toħloq l-ispazju

Fejn jimraħ mhux ftit

Il-moħħ li bi ħsiebu

Ikattar l-aptit.

Tkun tinsa li l-ħajja

Trid tgħix fil-preżent,

Kull waqt u kull ħtieġa

Biex b’hekk tgħix kuntent.

U twaqqaf il-ġlieda

Ġo fik bħal ħurrieq

Bejn dak illi huwa

U dak li tixtieq.

Alfred Grech

24/04/2017

Lil Silvio.

Xħin inti kont tittajjar u bħal Ikaru tisfida

jien hawn kont qed nitħasseb kemm se ddum ma taqta’ nifsek.

Xħin int kont mal-folla tgħajjat “salbu”,

Jien hawn qed nittama tiġi f’tiegħek,

u jiena ma ninġarrx mir-rwiefen tar-tabbja u tal-mibgħeda.

Xħin inti kont tinġarr mill-mewġa tal kurrenti

u mingħalik li rkibt fuq dahar iż-żiemel,

jien hawn kont nikkontempla mirkeb

minsub fuq skoll li jarġina l-baħar

ta’ tqasqis, rettorika u velenu.

Xħin inti moħħok frisk ittajjar il ħamiema. . .

Kun af ħabib li aħna kosbor fl-arja

qawsalla ta’ bla lwien,

Naffara mlibbsa l-ħwejjeġ.

Għax jista’ jkun aħjar li tmut bil-qilla tal-passjoni

milli bid-dwejjaq tas-sikkatura.

Alfred Grech

23/04/2017

Lill-Edukaturi.

Biex lilkom nistgħu nifhmu

Sax-xifer wassaltuna,

Naraw kemm kollox fieragħ,

U l-madmad libbistuna.

Kif kollox kien mod ieħor

U mhux kif għallimtuna,

Mill-angolu li tħares

U mhux fejn wassaltuna.

Kif kollox kien mod ieħor,

Mhux sagrosant kif ħsibna

U kollox  qed jinbidel

M’għadux dak illi sibna.

Kif kollox kien mod ieħor,

Mhux sagrosant is-sewwa

U dak lil tajjeb ħsibna

Stajt tilmaħ fih id-dnewwa.

Kif mhux ħażin jew tajjeb

Kif sata’ kien mod ieħor,

Id-dinja kif tagħmilha

Kif lanqas jaf ħaddieħor.

Għallimtu salt prinċipji

Biex bihom issawtuna,

Biex bdejtu l-lasti tbiegħedu,

M’aħniex tajbin għedtulna.

Biex kollox għal idejkim,

Hawnhekk fejn wassaltuna

Hawnhekk hi l-ħakma tagħkom

Bħat-tafal għaġintuna.

U bdejna bħalkom naħsbu,

Biex sirna ġugarelli,

Sakemm kien hemm mod ieħor

U sirna mbagħad ribelli.

Il-ħakma tqila tagħkom,

Mimlija silloġiżmu,

Tiskatta l-oppressjoni,

Tiskatta t-terrorożmu.

Allat tat-tafal kontu,

Tixxierku mal-potenti,

Ftit, ftit ilkoll qiegħedtuna

Fin-niċeċ opprimenti.

Biex ħloqtu ċittadini

Tal-merħla sokkombenti,

Li tobdi x-xewqa tagħkom

U tal-omnipotenti

Alfred Grech.

20/04/2017

It-Tama Tagħna Fik.

It-tama tagħna fik għax aħna ġwejjda;

Nieqsin mis-saħħa, wkoll neqsin mil-ħila,

Irridu nemmnu fik, għax l-aqwa wieħed

Li faqqas dan il-moħħ minn fuq it-tila.

Irridu nemmnu wkoll lilhinn mill-ħajja

Li trid tispiċċa hawn dil-freneżija,

Għax ma jistax ikun fix-xejn jispiċċa

Dal ħafna strobju, u tibqa’ l-mistoqsija.

Irridu nemmnu wkoll li hemm ħajj’oħra

X’imkien fejn isir ħaqq u ssir ġustizzja

Għax ma jistax ikun quddiem għajnejna

Titkompla u tittrrepeti dil-ħniżrija,

Ta min igawdi biss u min ibati

Ta min jitwieled prinċep jew jittallab

Ta’ min li jrid qed jagħmel u ħaddieħor

Mal ewwel żball li jagħmel hemm jissallab.

X’imkien dan il-miżien jiddaqqas f’sikktu

U minn f’did-dinja l-ħajja għex ħażina,

Irid x’imkien ipatti għal-għermilu

Bl-invers għal min dil-ħajja mhix ħanina.

Gfħax jekk għal-bniedem tfisser inġustizzja

Bl-istess miżien u kejl issir tpattija,

Inkella ma nifhmux is-sens tal-ħajja

U għaliex f’did-dinja hawn daqshekk tbatija.

Trid tkun tassew krudil u qalbek iebsa

Li ttina l-għerf u l-għodda tar-raġuni,

Imbagħad titlaqna hawnhekk bħal gladjaturi

Qalb bosta klieb feroċi u qalb l-iljuni.

U fl-aħħar kollox jidher illużżjoni,

Ma ġibna xejn, ma ħadna xejn xħin spiċċa

Dat-tejatrin assurd mingħajr il-prova,

U bqajna ma ntbaħniex xhini dil-biċċa.

Trid tkun tassew krudil u qalbek xierfa,

Biex tfjatna hawnhekk fid-dlam bla spjegazzjoni

B’dal-moħħ li jird xi darba jaf u jifhem

Għax bit-tbatija t-triq tas-salvazzjoni.

Biex fl-aħħarnett insibu l-preċipizzju,

Jekk għad naħarbu l-morsa tal-arena,

Nistaqsu x’ġejna nagħmlu hawn f’did-dinja

Jekk dan l-uġih jiswiex il-ftit tal-hena.

Alfred Grech

19/04/2017 

Għeden.

Hemmhekk irrid immur,

Hemmhekk fejn hemm iċ-ċpar,

Fejn lanqas tagħraf timxi,

Mank tagħżel lejl min-nhar.

Hemmhekk m’hemm liġijiet,

Fejn ma tkunx taf xi jmiss

Fejn lanqas biss trid tagħzel

Fejn kollox tista’ tmiss.

Hemmhekk immur jien ngħix,

Fejn lanqas m’hemm bnedmin,

U għalhekk m’hemmx argumenti

Fejn qatt ma jsir il-ħin.

Fejn hemm is-sħab opak

Fejn hemm il-qaddisin

Fejn mhemmx u lanqas biża’

Li jiiġi l-ħallelin.

Malajr issib l-imkien

Maġenb il-qaddisin

Fejn ma tkunx tista’  tagħżel

Bejn dak u dik u min.

Hemmhekk jien  nibni dar,

Ma tistaqsix ’l-min

Fejn lanqas ma trid tagħżel

Bejn tajjeb u ħażin.

Alfred Grech

18/04/2017

Lil Kristu Rxoxt.

Għax jien ma rridx narak

Taħt din l-impostazzjoni,

Imsallab u migħlub

Quddiem l-inkwiżizzjoni.

Għax jien ma rridx narak

Imlibbes il-kuruna,

Inkella tagħmel ħaqq,

Imħallef fuq tribuna.

Irrid narak ribell

Li jaqleb l-istrutturi,

Ta’ kull mhu aċċettat

Ta’ dak li jġib l-unuri.

Tisdfida dak li taf

U l-ordni stabbilita,

Biex taqleb ta’ taħt fuq

Kull setgħa u l’hemm biswita.

Irrid narak qalb dawk,

L-għrrief li mhux magħrufa,

Mhux dawk li jippużaw

U l-libsa tkun mislufa.

Irrid narak bħal dawk

Li lanqas għandhom vuċi,

Li l-meżżi tax-xandir

Qatt mhu se tintroduċi.

Irrid narak qalb dawk

Li jħobbu bħali jsaqsu

U ħsiebhom mhux misluf

Kell meta d-dubbji jfaqqsu.

Irrid narak qalb dawk

Li m’għandhom xejn x’jitilfu

Li lanqas ħażnu xejn

U lanqas xejn x’jisilfu.

Fuq kollox tkun ma dawk

Li ħadd ma jagħti kashom

Ma jġorru magħhom xejn

U m’għandhom xejn taħt rashom.

U tkun tassew sultana,

U hekk kulħadd jistaqsi

Fejn hija din is-saltna

U ħadd ma jkun jaf daqsi

Alfred Grech.

15/04/2017

122.

F’dil-fewġa ta’dulur u dwejjaq vjola,

Infittxu nittradixxu lilna nfusna

Bi swat, tortura, dieqa u bi ħruxija,

Bid-demm itir u slaleb li jordmuna,

F’dan l-Għid ta’ qtil ta’ min mhux lanqas ħati

Sabiex il-ħaqq u l-liġi jagħmlu tagħhom

Sabiex il-kilba ntaffu, tat-tpattija,

Mingħajr tingiż mingħajr rimors u qalbna safja,

U ngħidu ħtija tagħna għax aħna sirna

Qaddejja tal-Istat, tas-setgħa lsira,

U nagħmlu nkini u nerġgħu rasna nbaxxu

Quddiem min alla pinġa lilu nnifsu,

Għax b’katapult sab ruħu fuq tribuna.

Alfred Grech.

Il Gimgha l-Kbira

14/04/2017

Bħax-Xemx li Ma Ssaħħanx.

Bħax-xemx li ma ssaħħanx il-wegħedi tiegħek. . .

Kemm il-ħolma ma tgħaddix

Bħal ferrovija minn ġol-mina,

Biex nerġa’ nqum nittama kull fil-għodu

B’dak kollu li kont tgħidli?

Biex nerġa’ nħossni ħati

Ta’ dak li ma naħtix,

Niddakkar mill-ġenn tiegħek

U għal ftit ħin inħossni f’sikkti.

Kemm il-ħolma ridt infaqqas

Bħal bajd tal-kukkudrill?

Jew bħal rigal li ridt nagħtik

Biex nurik kemm għadni nħobbok.

Id-dubbju l’hemm bejnietna,

Dan kollu fejn se nasal

Bħal sħaba fuq ix-xefaq

Il-wegħedi tiegħek. . .

U hemm għal fejn nixxabbat.

Kull darba li rrid nasal

Insib li hemm tarġa oħra.

Bħax-xemx li ma ssaħħanx il-wegħedi tiegħek. . .

Aħjar il-bard minnha.

Alfred Grech

12/04/2017

Is-Snin Għaddew

Is-snin għaddew kemm trid u qabżu l-velu,

U jien bqajt hawn niġġerra bla bandiera;

Il-velu li jurik lilhinn mix-xefaq

Għax bqajt ma sibtha qatt dik il-fruntiera.

U jien wasalt s’ hawnhekk, sa taref id-dinja,

Għax vista ma kellixd xħin ftaħt it-twieqi,

Ma kienx hemm la ħitan u lanqas xtabi

Xħin magħhom kont qed nimraħ qalb l-għelieqi.

Ma tmurx fejn trid; id-dinja saret tagħhom,

Hemm biss is-sotterran jekk trid tivvjaġġja,

U toroq fejn il-bini twil sas-sema,

U ġġorr il-piż u tibqa’ hawnhekk ġo gaġġa.

Jien xtaqtek kemm il-darba taqsam miegħi,

Il-beraħ, u mhux dak li tgħid l’ hu tiegħi.

Alfred Grech

10/04/2017

Fin-Nar Minn ta’ Dejjem,

Imbagħad tgħannaqni tiġi bit-tgħannieqa

Li għandha minn tad-dnub, tal-innoċenti,

Ta’ dar-ribell jisfida l-amar, inkella

Sabiex idduq xi ftit mill-ħlewwa

Tat-trasgressjoni.

Il-grazzja tiegħek issakkar il-moħħ

U titturmaneta l-ġisem fil-ħlewwa ta’ filgħodu

Fit-taħlit li ma jidhirx ta’ bejn taqliba u oħra

Ta’ bejn il-ħażen u l-ġjufija,

Fl-għarfien bla leħen u bla viżjoni

Li ma jtaqqalx ir-ruħ

Li huwa ħela.

Passjoni din li tixħtek fin-nar leqqien,

Fin-nar minn ta’ dejjem.

Alfred Grech

10/04/2017

Imqar Jekk Ma Kellix.

Imqarr jekk ma kellix

paċenzja biex nistenna,

iż-żmien biex ibattik

u għad trid tilta’ l-ġenna.

U bqajt hawnhekk skantat,

u ż-żmien kien għamel tiegħu,

ma kien inbidel xejn

tinġarr ukoll trid miegħu.

Hemm mod kif nista’ ngħix

mingħajr ma niġi miegħek,

ukoll xħin sar il-ħin

isseħħ ir-rieda tiegħek.

Bla biża’ u bla tħeddid

li inti ser tifgani,

u nibda’ nafda fik

Għax naf li ser tilqgħani.

Għalkemm xtqt li komplejt,

int tħobb tikkoreġini

f’dil-bandla ta- kulljum

u-serħ le qed tagħtini.

Alfred Grech

09/04/2017

Sejjaħtlek.

Sejjaħtlek biss biex tkun il-kenn aħħari,

Mhux biex mill-ġdid nibdew xi avventura.

M’hemm ebda rokna fejn jien stajt nistaħba,

Xi ħadd jeħlisni minn din l-iżvintura.

Maqsum bejn dak li hu tal-ġenn u d-dwejjaq

U dak li ta’ kulljum għajjien jagħmilni.

Sejjaħtlek biss biex tkun il-kenn aħħari

U mhux biex nagħmel qrara jew taħsilni.

Li kieku taf il-qilla tal-burraxka

Li ħloqt xħin dħalt f’dan l-univers minn tiegħi,

Li kieku tibqa’ hemm barra wara l-ħġieġa

U tħobbni kif trid int bla ma tkun tiegħi.

Alfred Grech.

07/04/2017

Sakemm Għajnejk Iwasslu.

Għaliex għandna nagħlquhom il-bibien,

Inqiegħedu l-għatu fuq il-borma bl-ilma jagħli?

Ma jibqa’ xejn, lanqas l-imgħoddi

Imqarr jekk terġa’ tibda tiktbu

Imqarr jekk terġa’ tibda’ l-ħajja.

Ma niddejjaqx jekk ħlejt il-ħin, il-ħin mhux tiegħi,

Ma jiswa’ għalxejn, trid tmur tindifen.

Xtaqt biss li kien hemm żmien li stajt kont ħieles

Illum sirt naf li dan mhu sa jseħħ qatt,

U xħin tlift il-futur  xejn ma tkun titlef

Għax il-futur imfassal fuq l-imgħoddi.

Għawwiem tal-lum, għawwiem ta’ dejjem

Ġo baħar desolat taħt xemx li tikfes,

Wieqaf u trankwill daqs ilma mniġġes

Wieqaf, daqs kermm wieqaf ikun, min qed jiċċassa.

Il-ġejjieni kien bħal xefaq, il-bogħod kemm jista’ jkun,

Il-bogħod, sakemm għajnejk iwasslu.

Alfred Grech.

06/04.2017

Biżżejjed Kien Għalik.

Biżżejjed kien għalik in-nida ta’ filgħodu

Tal-wegħda mdennsa li xi darba kont għamiltli

Fl-intensita’ ta’ bejn tmellisa u oħra,

Fil-qawwa tal-buffura,

Li taqta’ l-għatx ta’ kull deżert u tnaddaf qiegħa.

Biżżejjed tkun għalija

Id-daqqa t’għajn misruqa,

Biex lili terġa’ ssalva minn kull ħtija

Minn kull tidwir esaġerat li nieħu

Kull meta miegħi stess intellaq it-tiġrija.

In-nifs tal-istennija hu aktar qawwi

Mir-riħ li jonfoħ mill-grigal

Mitluf fis-sotterran ta’ kull dilemma

U skiet il-kwiekeb jinfed

L-inħawi l-aktar fondi

Ta’ qiegħ il-baħar.

Imbagħad jekk jibqa’

Ħallili ftit mill-ġenna tiegħek,

Il-biċċa li ma tkunx tinħtieġ il-kliem

Sabiex tfissirha.

Alfred Grech

Kull Meta Jitla’ L-Ajru.

Kif jinżel bħaċ-ċomb it-temp fis-skiet ta’ ruħi,

u għax għandi nirrispondi għal kull sajjetta

u noqgħod ħafna attent li ma naqlibx

id-dagħjjsa mmejla?

Jien nixtieq biss li noqgħod hawn bi kwieti

fit-tarf uman tal-art minsija

ninġarr f’kenur mingħajr moqdief ma kull kurrent

mingħajr ma niġi mġiegħel noqgħod naħseb

jekk hux ser naħbtu ma x’imkien jew ma xi sikka

inkella nduru dawra mejt fejn qatt ma kellna induru.

Ħajjitna għandha tkun bħal passiġġata

fil ġonna primordjali fejn ma kellniex għalfejn niftakru

u lanqas wisq nitħassbu. U min ġie b’dan il-ħsieb u ħassu mixli

ma jista’ qatt ikun ħabib għalija.

Jien missni qed niżżerżq fiż-żurżieqa

ma twassal għal imkien,

inkella passiġġier fuq ferrovija

li twassal ’l-hemm, lilhinn mix-xefaq.

Għalhekk tarani x’minn daqqiet li nagħmel f’qalbi

kull meta jitla’ l-ajru.

Alfred Grech

03/04/2017

Min Jaf Kewkba Ferriħija.

Min jaf kewkba ferriħija qattx intbaħt

Bil-frustrazzjoni ta’ dal-poeta sieket

Li ma jistax jesprimi lilu nnifsu;

Ta’ dal-poeta jonfoħ il bziezaq tas-sapun

Fil-baħħ tal-ħajja. Dan l-iblaħ f’tarf l-irdum.

Xi minn daqqiet aħjar is-skiet minn tiegħek

Biex noħroġ minn dal-wied mudlam ta’ ruħi,

Biex nisma’ ħsejjes is-selienzju

Ta’ qalb mimlija ndiema.

Min jaf ja kewkba ferriħija!

Xi minn daqqiet aħjar tegħemiża tiegħek

Biex nibqa’ nħares fiss u noħlom

Li jien ħabbejt xi darba.

Nistaqsi  ’l-baħar jekk jafhiex din-narrativa,

Inkella hux qed jisma’ wkoll il-ħsejjes

Tiegħu stess,

Ħa jerġa’ jtenni lili dak li jħoss

Fl-abbis ta’ dejjem: dak li ħadd ma jaf.

Ja kwekba ferrihija,

Il-ħsejjes tiegħek distrazzjoni.

Jien leħnek ma nafux imma,

Min jism’ dan is-skiet,

Ikun qed jifhem lili.

Alfred Grech

02/04/2017

Qed Infittex. *

Qed infittex ix-xintilla

Biex tqajjimni minn dan ngħas,

Qed infittex dik l-iskuża

Biex għażżien ma jkunx f’kull ħaż.

Qed infittex is-sorpriża

U malajr għaqqadt il-ponn,

Kien dover inkella ħaġa

Trid issir, għax hekk hemm bżonn.

Qed infittex illi nitlaq

U ma nara ‘l-ħadd u xejn,

Immur niġri qalb il-beraħ

Ma nistaqsi qatt għalfejn.

Qed infittex li nkun bħalhom,

Imma bħalhom ma nistax,

U nispiċċa għalhekk imdejjaq

Għax għalija ma jibqax.

Qed infittex bħal ħaddieħor

U f’idejja sejf misnun.

Qed infittex li nixbaħhom

U dan qatt ma jista jkun.

Alfred Grech

01/04/2017.

* B’dedika lil Mariella Abela li dalgħodu nkoraġġietni biex nikteb poeżija posittiva għax il-poeżija bl-isem “Filgħodu” kienet wisq dipressanti.