144.

Nimxuha din it-triq mingħajr ma nħarsu

Lejn kull naħħa u bl-għamad fuq għajnejna

Għaliex kull fejn se tħares hemm medusa

Bil-vleġġa tagħha ssamrek u ssir ġebel.

Minn dan il-wied tad-dmugħ irridu ngħaddu

Mingħajr werrej li juri fejn trid tasal,

Għaliex sal-lum kull min it-trieq uriena

Għallatna, jew daħħalna ġewwa żenqa.

Irridu nitilgħuha din it-telgħa;

Telgħin mingħajr sejħiet traxxendentali

Mingżajr l-ispirazzjoni ta’ xi anġlu

Inkella qaddisin jipproteġuna.

Għax bqajna ma nafux sal-lum fejn huma

Il-mogħodijiet li jwasslu għat-tnissija.