Kont.

Kont inħossni nitmermer mat-tinwieħ tar-riħ

U l-mormoriju tal-għasafar

Xħin ma nżul ix-xema jinħbew

l-aħħar xrar ta’ tama li dan il-jum

għad jista’ jfisser xi ħaġa aktar

minn dak ta’ qablu

inkella xi ħaġ’oħra minn aljenazzjoni

miġbura fil-kapsula taż-żmien

għaliex ma sibt xejn għajr

il-frugħa u l-ġiri wara r-riħ

biex ninsa’ lili nnifsi.

Tista’ tkun ukoll ix-xewqa li nitla’

Sal-quċċata għaliex mingħajr l-imbuttaturi

Aktarx li nibqa’ kont niġġerra

Qalb l-għelieqi wara l-friefet

Fl-evanerxxexxenza tal-ġenna tal-art.

Alfred Grech

31/10/2019

Imbagħad Nixjieħu Bdejna.

Imbagħad nixjieħu bdejna

u qatt m’għamilna kont

tal-ħin li sadattant kien jibqa’ għaddej

mingħajr ma ntbaħna

li t-tifkiriet li mbagħad insejna

qatt ma stajn nġorru magħna.

Iż-żmien kien jibqa’ għaddej,

imqar jekk qatt ma ltqajna

fl-istess waqt u fl-istess post

biex naqsmu kull burdata.

Imbagħad bdejna nixjieħu,

iżda jien ma ridtx nixjieħ

u għalhekk għadni nagħmel

dawk it-titjiriet bil-ġwienaħ

tar-tix u tax-xema’

sabiex nisfida x-xemx.

Alfred Grech

29/10/2019.

Liturġija.

Jien li kont naqrak qed nogħodos

ta’ kuljum fl-ilma ċar ta’ din-nixxiegħa,

dil-liturġija ta’ min irid itejjeb

lilu nnifsu biex noqgħod ta’ kuljum

indur il-parabboli fuq paġna waħda

tal-ktieb miftuħ sakemm insib id-dlam

tas-sotterran ta’ ġewwa fija

ngħum fejn ma jilħaqlix

imbagħad itir ix-xrar illuminat

u nisma’ t-tifsir kollu

ta’ dak li qegħeda tgħidli.

Imbagħad jingħalaq jerġa’ l-ktieb.

Aħna konna biċċa miż-żmien li għadda,

iż-żifna stess li żfinna mingħajr ma ntbaħna,

kurrent fix-xmara li qatt ma tasal

sal-oċean,

il-misraħ li sibna ruħna fih,

il-mewġ li tefgħana fuq ix-xtajta

fejn issa nistgħu ngħidu tabilħaqq

li tassew weħidna

nikkuntemplaw l-isolament tar-ramel.

Hawnhekk stajna naraw ukoll

inżul ix-xemx u l-għabex tal-allat.

Għaliex m’aħniex se nsibu mod

kif ngħidu li din it-triq li kellna nterrqu

u l-qtar tax-xema fuq il-ġilda

mhux sejjer jaħraq ir-rieda

li nibqgħu għaddejjin

Alfred Grech

27/10/2019.

LIL PAUL COPPINI

Fl-okkazzjoni tal-irtirar minn Magistrat Ghal Ghawdex

Tal-haqq u d-dritt int kont l-epitomija

Tal-kalma u tal-pacenzja li hadt bina

Bis-sens tal-ewkilibriju u tjubija

Fl-istudju tal-gudizzju u tad-duttrina

Mix-xoghol ta’ gudikant illum se thalli

U tibda thares lura lejn hidmietek

Matul is-snin bir-reqqa bla ma tfalli

U sod u dritt f’ghajnejn in-nies li flietek

Ghax bqajt ghaddej hidmiet mhix minsija

Ghalkemm ghal genb minghajr elevazzjoni

Warajk gharfien se thalli mhux bhal bqija

Pass wara pass minghajr ezultazzjoni

U min jafek sew, jew ghandu ftit valuri

Bhali jistqarr, li int spiccajt bl-unuri

Alfred Grech

Dari Kienet.

Dari kienet li trid tagħmel kollox sew

u tidħol fil-filliera

għax Alla jara kollox

saħansitra jaqra l-qlub

Dari kienet il-kuxxjenza

tordna r-ritmi tal-qalb tħabbat.

Iżd’issa Alla nħeba wara sħaba

u llum sar hemm xi ħadd

jittawwal minn wara l-persjani

li dejjem jibqa’ moħbi.

Xi tallab jgħid li hekk aħjar

għall-ġid tal-poplu kollu

sabiex jinqatgħu d-dnubiet

minn wiċċ id-dinja.

U dak ta’ wara l-kwinti bellagħhielna

li hekk meħtieġ għal ġid ta’ kull maħluq.

Alfred Grech

23/10/2019.

Xi Minn Daqqiet.

Xi minn daqqiet jien ngħir għalikom

li tmorru fit-tempju darba fil-ġimgħa

tinħaslu mill-ħmieġ kollu u mill-lanżit

u ttellgħu l-offerta fuq il-mitbaħ.

Inħossni eżultat

inħossni eżaltat.

Xi minn daqqiet jien ngħir għalikom

ħerġin mas-sieħeb jew mas-sieħba

liebsin l-ilbies ta’ nhar ta’ Ħadd.

Xi minn daqqiet jien ridt ninħasel bħalkom

fl-għadira ta’ Siloam

iżd’ebda anġlu  ma mbuttani.

Jekk nitgħammed bil-magħmudija tax-xewqat

xi darba għad insir ħieles.

Iżda  s’issa għadni dgħajjef

u għalhekk bdejt nimxi kura

infittex lili nnifsi

Alfred Grech

22.10.2010

Mnejn Sa Fejn.

Jiswa’ wisq daż-żmien li ma nafux fejn aħna

jiswa’ wisq dal waqt li qatt ma jgħaddi

għax din hi fraka oħra

li tgerrem is-susa sa ma tasal

in-naħħa l-oħra

u aħna li dorna għal kemm il-darba dan il-globu

ma jimpurtax li nduru dawra oħra

u saħansitra ntbaħna

li l-globu kien kien battal minn ġewwa

u jirbombja.

Għalhekk bdejna nitħassbu

jekk tassew kienx ta’ min jemmen

inkella jekk hux kollox kien mistħajjel

u għadna qed noħolmu.

Ikun eħfef jekk kollox kien miżjud

bħal meta tilbes par imsielet u tiddandan

għax l-infinit la jagħraf ħin u lanqas spazju

u tibda’ tistaqsi dak kollu

mnejn sa fejn.

Alfred Grech

19/10/2019.

Dawn Huma Vrus.

Dan huma vrus indeċifrabbli

Hekk qalu huma xħin ġew jimmitazzaw

It-tmiem efimeru ta ġrajjiethom

Għax messew li l-qiegħ ta’ dak kollu

Li kien hemm u li qiegħdin jgħidu

Ma kienx biżżejjed.

Lilna ttimbrawna profeti tal-aħħar żminijiet

U b’hekk ħolqu ċirku vizzju li fih

Innafraga kullħadd.

U b’hekk ħolqu alla ġdid

Tabernaklu tad-deheb u l-ġawhar

Li quddiemu setgħu jinżlu għarkubtejhom

Xħin ħassew li kollox kien mistħajjel.

B’hekk issa kull meta

Maż-żernieq is-serduq jitlef leħnu

Jibdew iwerżqu l-ilsira u bit-taħbit tagħħhom

Jqajjmu lil kullħadd,

llsira dawn li bihom inqdew biex ikomplu jħarrbtu

dak li kien baqa’ mis-sbuħija

ta’ dn l-art ħelwa,

l-omm li tagħna isimha.

Alfred Grech

19/10/2019

Qasira Din I-Żifna.

U hekk nibqħu nirkbu l-imwieġ

Bħal meta konna iżgħar

U nibqgħu niżfnu dik iż-żifna

Imqar jekk daħal il-lejl sewwa.

Hemm min mank biss qed jemmen

Li għadda daż-żmien kollu

Hemm min ma jridx jiblagħha

Li għad jinqata’ l-ħabel.

li ġewwa din il-bitħa

nippasssiġġaw filliera

induru u nerġgħu lura

kull darba nagħmlu ċirku

Qasira din iż-żifna

Li tiżfen fuq is-sħaba

Għax bħala l-emozzjoni

Fix-xrara li titkebbes

U tindifen.

Alfred Grech

17/10/2019