Kollox Trab Kollox Deżert.

Il-feriti li jagħmlu bħad-dlam tal-lejl

l-avultuni li jħobbu jerdgħu

dak li jħalli ħaddieħor

il-priża tat-titani

li ċedew kollox quddiem il-qawwa moqżieża tal-allat.

Irħula sħaħ jinħallu fil-brodu

Tal-ġeġwiġija li ma tafx rażan

Toqob tal-ħamiem, barumbari twal sas-sema

Griebeġ tal-fniek li ma jgħammrux

U l-art timtela’ bl-id it-twila tal-iskavaturi

U karrijiet sproporzjonati jferrxu trab id-dinja.

Imnalla l-poeżija għada taf timla’

l-ispazji ta’ bla tmiem tal-univers

u tgħallmet trabbi l-ġwienaħ biex tittajjar

il-fuq mis-sħab, lilhinn mill-ilmijiet.

Lanqas jibqa’ minn fejn tgħaddi

Għax kollox maħtuf, kollox meħud,

Triqat mhumiex triqta, xtajtiet mhuumiex xtajtiet

Maqlugħa s-siġar minn għeruqhom

U djarna saru ħabs

Biex minn fuqhom jittajjar, jittawwal

l-avultun mekanizzat ta’ mingħajr xebgħa

jew qamar ieħor qisu ċassa

Jittewweb ix-xewqat.

Issa qalulna li dan u biss il-bidu

Ngħollu iżjed u nħaffru aktar l-isfel

U hawnhekk ma tidħlux, hawnhekk privat

Privileġġjat fejn jiskru biss l-allat t’olimpu.

U jekk lanqas biss baqa’ fejn nibnu?

Lanqas ghaħndna fejn noqgħodu?

Nisirqu l-art mill-baħar

Biex nonfħu aktar bżieżaq

Inferrxu l-konfetti tax-xewqat u tal-wegħediet

Biex jitkattru n-nies li jaħdmu

Biex il-jasar b’hekk jiżdied.

L-art ta’taħtna ma tiflaħx it-toqol kollu

l-arja ma tissaportiniex

il-kruha ta’ madwarna

serqilna l-ferħ u t-togħma tas-sabiħ.

Il-ħsejjes tar-raħal dagħjfa wisq

Lanqas ir-riħ m’għadu jaf jintona l-kordi

Lanqas l-għasafar m’għadhom iġorru

Wiċċ ir-raħa sfuġurat

Bħal tfajjel miblugħ li tilef l-ommu.

Sabu ż-żibel ħafna skart

Qalu nibnu triq fil-baħar

Nagħmlu mina minn taħt l-art

Għaliex issa trab sar kollox

Għaliex issa sar deżert

B’risq il-kuntratturi, l-ispekulaturi

U dawk kollha li jerdgħu magħom.

Alfred Grech

01/09/2019