Anqas Naf Għaliex Bdejt Nikteb.

Anqas naf għaliex bdejt nikteb

Dawn il-vrus ma jfissru xejn,

Lanqas naf kif f’daqqa waħda

Dawn il-ħsibijiet minn fejn?

F’liema sqaq int ser teħodni

U timlieni ftit bil-ferħ,

Liema kliem se tq’għed fuq fommi

biex ta’ ruħi tkun is-serħ.

Nistaħbew it-tnejn li aħna,

Nispiċċaw f’xi post straman,

Anki jekk it-temp mhux magħna,

Fuq ix-xefaq, sħab ruxxan.

F’tarf it-trejqa dejjqa, dejjqa,

Li ma twassal għal imkien

Jien stennejtek tiġi lura

U ġġib miegħek dak li kien.

F’dina l-għodwa ta’ riħ isfel

Jien għarrixt ma kullimkien,

Bqajt hawnhekk nistenna lilek

Biex naħarbu t-tnejn flimkien.

Jien stennejtek ser tifaċċa

biex noqgħodu niflu s-skiet,

Jiena nisma’ qalbek taħabbat

Int ittenni t-tifkiriet.

Jiena nikteb għanja ġdida,

Għanja mlewwna tal-ħolqien,

Għanja ħelwa tas-sireni,

u ngħannuha int u jien.

Alfred Grech.

30/09/2016.

Anqas Naf Għaliex Bdejt Nikteb.

Anqas naf għaliex bdejt nikteb

Dawn il-vrus ma jfissru xejn,

Lanqas naf kif f’daqqa waħda

Dawn il-ħsibijiet minn fejn?

F’liema sqaq int ser teħodni

U timlieni ftit bil-ferħ,

Liema kliem se tq’għed fuq fommi

biex ta’ ruħi tkun is-serħ.

Nistaħbew it-tnejn li aħna,

Nispiċċaw f’xi post straman,

Anki jekk it-temp mhux magħna,

Fuq ix-xefaq, sħab ruxxan.

F’tarf it-trejqa dejjqa, dejjqa,

Li ma twassal għal imkien

Jien stennejtek tiġi lura

U ġġib miegħek dak li kien.

F’dina l-għodwa ta’ riħ isfel

Jien għarrixt ma kullimkien,

Bqajt hawnhekk nistenna lilek

Biex naħarbu t-tnejn flimkien.

Jien stennejtek ser tifaċċa

biex noqgħodu niflu s-skiet,

Jiena nisma’ qalbek taħabbat

Int ittenni t-tifkiriet.

Jiena nikteb għanja ġdida,

Għanja mlewwna tal-ħolqien,

Għanja ħelwa tas-sireni,

u ngħannuha int u jien.

Alfred Grech.

30/09/2016.

Liebsa l-ilbies ta’ Mara.

Strambi dal-kliem li qed nipprova ntenni

u strambi wkoll il-ħsibijiet bħal żraġen

illi jikbru fuq blat għeri.

Dir-ruħ tipprova tifhem għaliex qalb das-skiet

int terġa’ tirritorna

ukoll xħin ġiegħeltni nilgħaq

l-iskart tal-imprudenza tiegħek.

Inti li turini xi ftit mid-dlamijiet li minn daqqiet

jiddellek is-sebħ tiegħek

tgħallimni bosta tagħlimiet

biex noqgħod bogħod mit-tentazzjoni.

Għaliex it-tentazzjoni  bħal xitan

liebes ilbies ta mara.

U issa m’għandix aktar għalfejn noqgħod

insawwat lili nnifsi

intant li m’għadekx aktar importanti.

Alfred Grech

29/09/2016

Xi trid Minn din Il-Ħajja.

Xi trid minn din il-ħajja,

Li jibqa’ ż-żmien għaddej?

Inkomplu fejn ħallejna

Bla taf minn fej’ sa fej’?

U tul il-mixja kollha,

Induru ’l-hemm u ’l-haw’,

La nafu fejn se mmorru,

Suldati jimmarċjaw?

Jew tieqaf ftit u twarrab

U toħroġ mis-serbut,

Il-barra mill-filliera

Imnebbaħ, mhux stordut?

Il-bogħod mill-konfużjoni,

Mix-xifer tal-irdum,

Il-bogħod mill-ħoss tat-tnabar

U l-ġiri ta’ kuljum.

U mhux bil-fors li jkollok

Tweġiba għal li staqsejt,

Biżżejjed qed tgħix issa

U tinsa’ li ħallejt.

Biżżejjed qed tgħix issa,

Tkun tifrex it-tapit,

Li fuqu għad trid timxi

Fid-dell tal-infinit.

Alfred Grech

29/09/2016

Jien Nikteb.

Jien nikteb biss biex noħroġ

il barra mill-uġih

ta’ tqanqiliet bla rażan

li jiġu minnufih.

Bħal bżieżaq tal-ispazju

jinfaqgħu ma jdumux,

is-sabar espressjoni

li jmorru u ma jiġux.

Jien nobzoq biss il vomtu,

nisbroffa bħal vulkan

li jogħnos tul is-seklu

u jġemma bla serħan.

Taċ-ċirkustanzi l-magma,

is-seħer tal-waqtiet,

marsus fil-labirinti,

tar-ruh iċ-ċaqliqiet.

Għaddej fuq il-binarji,

Inkella ħmar il-lejl,

Għaddej daqs ferrovija,

u nagħaqad kont, bla kejl,

Dawrien bħal ta’ raddiena

li ddur bil-logħob tan-nar,

jew riefnu li jġorr miegħu,

u kollox tar u mar.

’Mma llum il-ferrovija

bla tmun idderaljat,

stenbaħt. inħlew l-irdieden,

bqajt hawn u nħossni fgat.

Imnalla kelli lilek

bħal ikel tal-allat,

ja poeżija tiegħi

insir trasfigurat.

Alfred Grech

28/09/2016

L-Ispazji Li Ħallejtli.

L-ispazji li ħallejtli

huma l-bibien li minnhom nista’ ngħaddi

għan-naħħa l-oħra,

u nerġgħa mmur fejn konna darba

intennu r-reżonzi tagħna

li jidwu l-infinit.

It-talba tiegħi trid tasallek

bħal dmugħ li mal-ħaddejn iġelben,

inkella l-qtar ta’ xema li weħida

tisfida d-dlamijiet.

L-ispazji li ħallejtli

bħal oqbra l’għad jimtlew bir-rimiżolji

li bihom kienet fgata dik ħajjitna.

Hemm fewġa t’arja friska

li terġa’ tirritorna l-għanja tagħna

dik l-għanja li jien bqajt ma nafx ngħannilek.

Hemm fewġa tirritorna

il-fwieħa tal blanzuni

ta’ fuq l-irdum minn fejn jien kelli nagħmel

dik il-qabża li kien imiss.

Iżda issa nista’ ngħid ukoll

li b’hekk biss nista’ ngħix is-seħer li ħallejtli.

Alfred Grech

27-09-2016

Fil-Baħħ u x-Xejn Jittieħed ta’ Din l-Għodwa.

Fil-baħħ u x-xejn jittieħed ta’ din l-għodwa,

Indifferenti l-kosmos għall-li jiġri

Ma jitkellimx taħt sema nkomprensibbli,

Ix-xemx li tfittex ’l-għada terġa’ titla’.

U tibda ta’ kulljum tiskatta bħali

Burdati li jagħmlulek differenza.

Il-fewġa’ tibqa’ tilgħab siekta, siekta,

Titniehes ma dak kollu li jmeriha.

Stennejt li nsibek hawn fuq dix-xaqliba

Tal-qasma primordjali li ġabitna

Lit-tnejn fuq naħħa waħda hawn skjerati,

In-naħħa tat-tajbin, inejjer bħali,

Il-palm, ir-rand u taż-żebbuġ il-weraq

F’din l-għodwa t’innoċenza trijonfanti.

Tgħid terġa’ miegħi titla’ fuq din l-għolja

Biex tara jekk l-irxoxt għadux jitbissem?

U tgħid ukoll kull pass l-għamilt biex tasal

Kien hekk meħtieġ sabiex isseħħ il-fidwa?

Int tibqa’ għalija dak l-omnipotenti,

Taqlib il-moħħ fuq Tabor risplendenti,

U jiena mbagħad sabiex did-dieqa negħleb

Tax-xejn mhu xejn, irrid mill-ġdid ninbidel

U nsir l-ekwilibrista li kont dari

U naf li jekk tisgarra ftit riġlejja

Ma jkun hemm ebda xibka li tilqagħni.

Alfred Grech

26/09/2016

Hemmhekk Fejn Miexja.

Hemmhekk fejn miexja tħalli

L-impronta ta riġlejk

Fuq xtajta abbandunata

U l-ħmura ta’ ħaddejk.

Hemmhekk fejn drabi oħra

Imxejna ma xulxin

Biex nifhmu aktar sewwa

Id-dieq ta’ dak il-ħin.

Hemmhekk iż-żiffa tmelles

U jgħaddu  minn ġo fik

L-ilwien tas-sensazzjoni

Li tħoss li mhux għalik.

Hemmhekk fejn il-qawsalla

Turina wkoll disinn,

Minn fejn għad nistgħu ngħaddu

Mix-xatba ta' lil hinn.

Alfred Grech

25/09/2016

Erġajna t-Tnejn Li Aħna.

Erġajna t-tnejn li aħna taħt dis-siġra

Intennu t-tifkiriet ma kull tixjira,

Tal-friegħi mħobbijin bit-toqol tagħna

U lil xulxin nistaqsu bla tweġiba.

U ħsibtni li mill-ġdid f’għajnejk se nara

Id-dawl li kien iddieli kemm il-darba,

Għax m’hemmx li għad minn din l-għanqbuta neħles,

U bla ma naf għaliex trid toħroġ karba..

Bħal min isib li hawn kien drabi oħra,

Għax ħaseb mingħalih li bidel ħajtu,

Riċetta din fil-ktieb tas-salvazzjoni,

U dawl li jiddi ġdid, li qatt ma rajtu.

Bħal min kien jaf minn qabel kif tispiċċa

Dil-ġrajja li rreċtajna f’kemm il-biċċa.

Alfred Grech.

24/09/2016

Jien Qatt.

(Versi miktubin fuq l-sitil u ispirati mill-poeżija ta’ Tarciso Zarb)

Jien qatt ma ridt inkun f’dak moħħok

Bħal-linji ta’ pitagora, kunċett li joħloq biss

Xi teorema li qatt ma stajt tipprova.

Xtaqt biss inkebbes ftit tad-dawl

Fil-kuritura mudlam ta’ moħħi

Biex nista’ nħares lejk, nikkuntemplak,

U ngħarrex ftit madwari.

Nitwennes jekk jien naf li hawn xi ħadd fil-qrib

Xi ħadd li jibqa’ anonimu.

Jien qatt ma ridt inkun il-baħri

Li jkebbes il-huġġieġa tan-nawfraġju

Insellem lil kull min jinzerta

Għaddej minn fuq ix-xefaq.

Jien qatt ma nistennik li tiġi ħdejja

Ġa qbist in-naħħa l-oħra ta’ dal-kjażmu

Mudlam, jirbombja r-risonanzi ta’ ritmi ċikliċi

Ta’ dak li aħna nsejjħu – eċistenza.

Jien qatt ma ħsibt li kont ittellaq mad-dell tiegħi

Biex tara minna t-tnejn min jiġi l-ewwel:

l-ewwel ma ġejt qatt u lanqas ridt inkun

Fejn setgħu jindunaw bija l-għasafar tal-priża

Jisseqqru ’l-fuq minn rasi.

Ridt biss niddobba tromba

Biex ngħarrex kull fejn stajt

F’kull rokna ta’ dal-kosmos

U nibda mmiss b’idejja

Dak kollu li stajt nara.

Ridt biss inkun tweġiba għall-mistoqsija

Li sikwit tagħmilli.

Alfred Grech

23/09/2016

Xħin ma Nxejjrux il-Bnadar ta’ Mitt Stemma.

Xħin ma nxejjrux il-bnadar ta’ mitt stemma,

Nibdew ngħolew ’l-fuq mis-sħab imdendel,

Nisirqu d-dawl divin minn wara l-kwinti

U ma l-allat t’Olimpu nikkiskutu.

U nirbħu wkoll bl-għerf tagħna ’l-ġiganti,

Ma dal-mużajk insiru ħaġa waħda

Ta’ bla disinn, bla ħhsieb u lanqas tfissru.

Nibdew resqin lejn oriżżonti ġodda

Tal-għada bla destin, tal-lum li ħarab,

Inrabbu mbagħad il-ġwieneħ biex infasslu

Fuq sema ndifferenti ġometriji

F’dan l-inivers li għadu jrid jiġġedded,

Fuq qċaċet illi t-tempra marritilhom

Biex saru wkoll mhux aktar importanti.

Alfred Grech.

22/09/2016

Żmien in-Newba.

U x-ħin għajnejk tagħlaqhom
Il-baħar jerġa’ lura
Tintebaħ li l-lejl wasal,
Wara għabex ta’ bla ħmura.

Iż-żmien il-ġdid li jibda’
Iħabbar tmiem id-dieqa,
Il-baħħ tal-eżistenza
Stampat mal-ħġieġ tat-tieqa.

‘Mma dan bħal kull żmien ieħor
Għax kull ma kellek tliftu,
Dak kollu li ħadulek.
Inkella li stajt sliftu.

Biex jibqa’ qalb ir-ramel,
Kristall u żrar in-newba,
Għax issa kollox jiskot
U jibqa’ biss it-tewba.

Alfred Grech.
04/12/2015

Għalissa Nieqaf Hawn.

Għalissa nieqaf hawn ħa nkun assenti,

Hemm wisq tal-iffullar fuq l-awtostrada,

Ir-ritmi mgħaġġla wisq mank nista’ nlaħħaq

U lanqas irrid naf x’hemm lest għal għada.

Bħalissa għaddej wisq traffiku minn moħħi,

Jekk għadek tqum u tħossok mimli ħrara

Għalik il-jum it-tajjeb, iżda lili

Ħallini mal-vertiġini nissara.

Alfred Grech

19/00/2016

Dan hu l-ispazju tiegħi.

Dan hu l-ispazju tiegħi,
dan huwa l-bahh li minnu jrid jitwieled
univers ġdid, dinja oħra,
fejn il-kejl hu differenti,
u l-miżien jiddaqqqas f’sikktu;
il-bogħod mir-ritmi ħorox ta’ħaddieħor,
il-bogħod mill-ħars tal-folla,
il-bogħod mill-ħarsa tiegħek,
u mill-akkużi li tagħmilli.

Għax inti sirt agħar minnhom,
għax ma tifhimx,
għax ma tgħarafx,
il-wied mudlam li minnu jgħaddi kull poeta.

Alfred Grech
12/07/2015

C.

Int tfarfar id-destin mill-fdal li jibqa’

Għax mhux b’din il-munita trid tħallasni.

Tiġini t-tentazzjoni u nerġa’ naqa’

Mat-togħoma t’għaraq mielaħ li darrasni.

Bis-sensi li jitolbu attenzjoni

Kull xħin għajnejja għalaqt inbidlet l-arja

U nbtaħt b’dir-ruh li għexet l-illużżjoni

Perkors li ta’ kuljum tarah ivarja.

Is-sensi moħbijin bħal isqra mġewwħa

Biżżejjed tkun mingħandek it-tbissima

Biex jiftħu par ġwenħajn mifruxa beraħ

Imkeffen f’ġisem mimli b’dit-tilqima.

Id-dubbju ta’ kuljum qed igerrimni

U jiena mingħalija l’int tifhimni.

Alfred Grech

16/09/2016 

Fissazzjoni.

Ma nafx kif iffissajt li tridni nħobbok,

Jekk int mintix ħlief dehera efimerali,

Aspett li ta’ kuljum tarah jinbidel

U kull xħin nersaq lejk jiċċajpar kollox.

Ma nafx kif tridni ngħid li hu għal dejjem,

Jekk taf bit-terrimoti tal-burdati

Li jbiddlu wiċċ id-dinja kull filgħodu

U inti bħali minn mument għall-ieħor.

Għax trid ukoll issib ir-ruħ tewmija

U taf li l-varjeta’ daqshekk hi kbira,

U tgħid li għal kull biċċa hemm seħbitha

U taf li l-għażla hija dejjem tqila.

Għax jien insib is-seħ fil-baħħ ta’waħdi,

Tvenvin ir-riħ fis-skiet tas-solitudni

Għalilja l-unita’ fix-xejn ta’ dejjem,

U serħ fis-skiet il-bogħod mill-multitudni.

Alfred Grech

15/09/2016

Jien Ma Nħossx.

Jien ma nħossx li għandi nerġa’ niġi taħt idejk

Issa għadda ħafna żmien

Ħafna ħwejjeġ imbidlu

U nbilt jien ukoll.

Le ma nħossx li għandi nerġa’ niġi

Il-bogħod hu bħal irjieħ

Imewwtu wkoll il-ġamar li jkun baqa’ jnin

Wara burraxka.

Il-bogħod hu bħal xħin titlef l-ajrulan,

Ta’ wara mhux l-istess

Hu bħal xħin tmur tixtri

U ssib li tlift il-protafoll.

Alfred Grech

14/09/2016

Awtobijografija.

Jekk aħna kkonsagrajna

Dak illi nemmnu fih,

Ukoll jekk illużorju

Bħal ħolm li trid tinsieħ.

Jekk kien il-ħolm li ħlomna

Int tgħidli nikteb ktieb

Ta’ din in-narrattiva,

Li tagħha niftħu l-bieb.

Kien biss il-ħsieb li għadda,

Kien biss il-ħoss tar-riħ,

Jew kienet it-tifkira,

Ta’ dakj li tisma’ bih.

Awtobijografija,

Jew mafkar għal li ġej,

Għax lanqas ridna nemmnu

Li kollox hu għal xej’.

Alfred Grech

06/09/2016

Maċ-Ċaqliqiet Rotundi.

Maċ-ċaqliqiet rotundi

Ta’ ċrieki ġewwa ċrieki

Li tagħmel kull taqtira

Li taqa’ minn ħaddejk

Jitltaqgħu ċrieki kontra tal-qtar tiegħi

Fuq wiċċl-ilma li issa sar qanqil f’taħdida ħierqa.

Jien għadni fil-benniena

Ta’ dak li konna ħlomna

U għadni ta’ kuljum inġorr

It-tifkiriet fil-qoffa

Ta’ dak li seta’ kien

Li kieku ma sfidajtx

U mort lil hinn minn fejn stajt nasal.

Għad jgħaddi ħafna żmien

Biex joqgħod xi ftit l-ajru

U l-baħar inkurlat isib il-medja tiegħu.

Sadanittant, fiċ-ċrieki kontra ċrieki kontra ċrieki

Erġajt sibt ir-rutina

T’eternita mingħajr ċaqliqa.

Alfred Grech

10/09/2016

Sejjaħtlek hekk fis-solitudni tiegħi.

Sejjaħtlek hekk fis-solitudni tiegħi,

Għażilt dak li għażilt frott il-ħelsien,

Xħin jien ftaħart li jien wild il-burdati,

Illum ma jiswa xejn għax jien min jien.

Ħobbni u obgħodni 'mma fil-qiegħ ta’ qalbi,

Bħal sħab bla xita jgħaddi bla dewmien.

Jien naf ukoll u dana  l-oħrajn jafu 

Niġġerra, ndur u nagħqad fl-isqaqien.

Imbagħad il kontijiet xħin jiġi l-aħħar,

Fejn milli mar, ma jerġa' lura xejn,

Xħin lilkom insellmilkom indur lura,

U nerġa’ lejn id-dar għax ħlist mid-dejn.

Alfred Grech

10/11/2014

Jien Ġejt Hawnhekk.

                                                                                                                   

Jien ġejt hawnhekk nistaqsi fejn se mmorru

Għax inti kont ġa taf u xħin staqsejtek

Intbaħt li jien ukoll kont qed niġġerra

Biex naqbad dawk il-friefet illużorji,

Inkella kont qed naħrab id-dilemma

Li għandu kull maħluq. Hawnhekk ħaddieħor

Bilqieghda jgħaddi l-ħin jaljena rasu

Strodut quddiem xi skrin alluċinanti,

U jiena ġejt hawn ħdejk tad-demm u l-laħam

Għax ħsibt li stajt taqrali wkoll xortija.

Alfred Grech

08/09/2016

XCIX..

Bużżieqa tas-sapun mifqugħa fl-arja,

Ġrajja’oħra li tintiseġ u tintesa’,

Jekk drajna lil xulxin taf fejn jien sejjer,

U għad nintilef nimraħ tul dil-wesgħa.

Mhux sejjer naqbad qatt ukoll jekk nonsob,

Il-ħlewwa tal-waqtiet u t-togħma tagħom,

Għax terġa’ u tgħid, nistaqsi lili nnifsi:

Kinetx dil-ħajja l’għext inkella magħhom.

Ġarrewni ċ-ċirkostanzi travolġenti,

Jekk kienx dan il-mument li fih nintilef,

Burdata t’arja sħuna mal-kurrenti,

Inkella sentiment li ż-żmien kien tilef.

Ninsabu llum mexjin qalb ward fil-ġonna,

U qiegħdin hawn għaliex m’għadniex fejn konna.

Alfred Grech

13/-9/2016

Hawn Baħħ Ma Jimteliex.

Hawn baħħ ma jimteliex

Fil-ħofra ta’ kuljum,

Jekk għadek ma fassaltx

Ma nafx kemm ser iddum.

Jekk għadek ma fassaltx

Fejn sejjer int ma tafx,

Vapur mingħajr kaptan.

Ix-xefaq ma jagħarafx.

Hawn baħħ ma jimteliex,

Hawn żiffa ma trewwaħx,

Hawn kliem ma jitfissirx,

Hawn ward li ma jfewwaħx.

Ċempilli u ma naqbdux,

Stedinni u ma niġix,

X’se jġib it-temp illum

F’dal jum li ma jgħaddix?

Alfred Grech

05/09/ 2016.

Ninħeba.

Ninħeba wara bewsa

Għax nibża’ mill-effett,

Inċempel waħda u naqta’

Ninqabad bħal mulett.

Nixtieq nitkellem miegħek

Għalkemm ma nafx xi ngħid,

Ittektek tkun ġo moħħi,

Għalkemm tinsab il-bgħid.

Jekk hemm xi ħaġa taqbad

Dan żgur mhux nar divin,

Għalkemm inħossni l-ġibda,

Jien tlaqt għax sari l-ħin.

Inkella għax kont hawn qabel,

Sensiela l’issa drajt,

Inkella għax għadni nfittex,

Il-wiċċ li qatt ma rajt.

Alfred Grech

03/09/2016

Tittieħed ir-Rassenja.

Tittieħed ir-rassenja

U jiena ma nkunx haw’,

Tgħidux: Kien hawn u telaq,

L-għażliet malajr spiċċaw.

Biss għidu li din ħolma

Li jien ma niftakarx,

Jekk għad xi ħadd jiftakar,

Li karkar hawn, ma marx.

Jew jekk xi ħadd li jibqa’

U jkompli fejn ħallejt,

Dan lili jiftakarni

Xħin jien inkun insejt.

Alfred Grech

02/09/2016.

 Kif Tista’

Kif tista’ b’vista korta’

Qatt tinfed l-infinit,

Tal-għerf li hemm mistoħbi

U mnaqqx fil-granit.

Ċedejt għall-kalamita,

Tas-sensi li jżommuk,

Ilsir ta’ mostru waħxi

Li minnek ibiegħeduk.

Mal-art intfajt titkarrab

Tispara bil-kanun

Ta’ moħħ li dara’ jilgħab

U jdawwar ir-raġun.

Kif qatt is-swar tas-saltna

Trid tinfed bi stallett,

Qasira l-vista tiegħek

Ankrata fl-intellet.

Alfred Grech

01/09/2016