Issa Li Ġejt Tmellisli.

Issa li ġejt tmellisli bir-rix tal-ġwienaħ tiegħek

sirt naf li tiegħek mhix il-ħtija xħin ħassejt li qed titbighed minni,

bħal diwi mtenni li jintilef fil-widien inkella qalb l-għoljiet,

Muntanji glaċjali ta’ żmien fejn kollox qed jinħall u xejn ma jibqa’ kif kien qabel.

Tgħid kienu r-ragħad imxajtan jew sajjetti

tal-ħsejjes epokali, Parousia li tiġi kull tant mien

biex aħna ngħoddsu lkoll ġo dil-għadira tal-ilma mbierek?

Tgħid jiġri dan kull meta jirxuxtaw minn ġo qabarhom, l-iħirsa

tal-konswetudni mansa ta’ dal-ġens imxewwex

b’widnejħ ibbumbardjati bħal leit motif ta’ żmien il-kaċċa

jew bi xniegħat u qlajjiet ta’ skandli, ta’ tixħim, tbagħbis u gideb

u kull abbuiż li tista’ taħseb?

U ma kienx lanqas ħtija tiegħi li ma smajtekx

ja leħen imriegħex u mwerwer xħin tisma’ dad-dagħa kollu,

dal-ħafna ġdiem tal-ħsejjes  li jifqgħu t-tnabar tal-widnejn

u l-ħafna għajdut li jaħsad għax jgħidu li wasal

l-aħħar tal-aħħar.

U lanqas naħseb kienet ħtija tiegħek

għax kif stajt inti qatt tasal biex tinfed

il-barriera tal-ħsejjes u tinġiż vebali ieħor.

Inti ruħ trasfiguranti bħal velu li jagħtti u ma jgħattix

bħal żlieġa li tiġi u tmur u ma tiflaħx  għal ħafna skossi

ta’ min irid iqanqal ħafna rabbja.

Urini biss li għadek hemm u trid terġa’ tiġi

bħal dik it-tajra li ma nsietx min kien rabbiha.

Alfred Grech

07/05/2017