Jien Nikteb.

Jien nikteb mhux biex noqgħod

Nitpaxxa b’dak li ngħid,

Bħal min ried jieħu prosit

U jaf li għadu ’l-bgħid.

Bħal min ġol mera jħares

U jogħġbu dal li ra,

Narċisu jħares fl-ilma

U tgħidx pjaċir kemm ħa.

Jien nikteb bħal min jieħu

In-nifs li jsir duħħan,

Bħal min il-pipa jpejjep

U kollni nsir għarqan.

Jien nikteb għax ġo fija

Ibaqbaq kaldarun,

Inħossni rrid nisplodu

U ntajjar il-misħun.

Jien nikteb għax ġo fija,

Iriegħed bħal vulkan,

Bħal riħ li jiknes, jobrom

Sa fl-aħħar uragan.

Alfred Grech

06/10/2017