Superklassi.

Dawk li jibnu u dawk li jħottu,

Dawk li jibnu u ma jħottux,

Dawk li jferrxu  l-ġid bid-deni

U l-ġid tagħhom ma jaqsmuħx.

Dawk li tħalltu mas-setgħana

Ma l-oħrajn ma jitħalltux,

Is-setgħana mas-setgħana

Jew mod ieħor ma jfendux.

Ma xulxin ar’hom jiltaqgħu

Jippranzaw jew jiċċenaw

Biex tingħata l-impressjoni,

Dejjem dawn jiċċelebraw.

Din hi d-dinja tal-lussuria

Dinja din taż festi kbar

Għal min għandu l-ħela x’jonfoq

Jew jittarraf fuq ix-xfar.

Li jinvestu biex il-gwerer

Dawk iħalli ħafna qliegħ

Ma jieqfux dejjiema jibqgħu

U huma dejjem fuq ir-riħ.

Jew biex jagħmlu ta’ bir-ruħhom

Illi dejjem ferħanin

Għalkemm jafu l’huma ostaġġi

Fil-ġid tagħhom, mitlufin.

Biex itejjbu l-qagħda tagħhom

Jew jilgħabu bil-poter

Biex tal-pupi jiġbdu spaga

Dawk li jemmen fid-dover.

Dan twemmin is-superklassi

Jikkompetu ma xulxin

Jirbaħ fl-aħħar l-aqwa minnhom

Bla ma jafu fejn qiegħdin.

Alfred Grech

30/04/2018

Baħrija.

Ma nafx jekk għandix nifraħ

inkella nkun imdejjaq

Baħrija nvażata ta’ bla seħer

ta’ destin għarib u ġejjieni mċajjpar,

ġejt hawn, qed tiffittani

tisfidani u ttellifni s-sliem u s-skiet

tal-ermitaġġi tiegħi.

Jekk għad ittawwal ftit idejk

issib li trid tilħaqni.

Jekk tibqa’ hemm fejn int

jien nibqa’ nikkuntempla t-triq

li minnha rridu ngħaddu,

Inkella nagħmel qabża u ndur mal-kantuniera

tal-univers invers.

Baħrija ta’ dell iswed

jisgħobija li rġajna ltqajna

fi triq li mhix tas-soltu.

Aktarx li kien miktub li kellek taqsam il-mogħdija

mnejn kelli ngħaddi.

Ta’ din l-isfida, tpattija qares.

Alfred Grech

29/04/2018.

Jien Nista’ Ngħix Il-Ġrajja.

Jien nista’ ngħix il-ġrajja

Ta’ min jeħodha dejjem ma ħaddieħor,

Inkella li jistenna li jingħata

Dak li jixtieq, mhux dak li jmissu.

Jien miegħek ridt inżomm fuq il-mewġa ta’ kull passjoni

Misjuqa minn kurrenti staġjonali.

Mingħajr ma nafu fejn sejrin jew għal xhiex ġejna

F’dal-baħar ta’ bla xefaq jew konfini.

Jien naf li lili tiġi tfittex

Xħin l-aktar tkun tixtieqni

Għax taħseb li dil-ħajja tfisser l’għada

Minflok il-ħajja hi llum stess

U jista’ jkun li l-ħabel li jorbotna

Jitħabbel sew  ’mma mhux sejjer jinqata’.

Iż-żmien ibiddel biss il-ġilda

Għax ġewwa jibqa’ dak li kien

U taf li dak li ssib mhu xejn

Għajr dak li qiegħda tfittex.

Imbagħad nintebaħ aktar ma nsir nafhek

Li kull ma jmur jinħtieġ li nafek inqas.

Alfred Grech

28/04/2018

Li Kieku.

Li kieku qiegħda hawnhekk fuq din is-sodda,

Teħodli l-wisa’ kollu u ma tħallili l-ebda spazju

Tiblagħli nifsi tqil u nħossni nifga’

Għal-għomri kollu,

Marsus u ssikkat bħal minn ġo ħaġġa

Il-beraħ f’daqqa waħda sar lembut

Jingħalaq ħelu, ħelu

Biex noqgħod ngħodd ix-xorok u l-arkati

Tas-saqaf tagħna.

Li kieku tibqa’ hawnhekk fuq din is-sodda

Is-sema kollu kwiekeb qed ipetpu

Jingħalaq ġewwa l-kaxxa tal-ġojjelli,

Inkella fil-basket tiegħek.

Għalhekk, għal lejla waħda biss, ejj’ nagħmlu ta’ bis-ruħna

Li ngħixu ferħanin għall-dejjem minn ta’ dejjem.

Alfred Grech

26/04/2018

LXXXI.

Bħal meta tagħmel ħalba xita f’Mejju,
Hekk hu dad-dmugħ li fih jegħrqu għajnejja;
U bħalma ż-żmien ifejjaq jagħmel ħlejju
Irrid dal-wied innixxef minn ħaddejja.

Ikun iż-żmien li jfejjaq il-feriti
Għalkemm iċ-ċikatriċi tibqa’ tidher,
Uġigħ ir-ruh inissel stalagtiti
Inkella swied il-qalb jitqob s-sider.

Il-qtar tad-dmugħ hu biss tal-bidu s-sogħba,
Biex jiena ntbaħt li beda jisgħobbija
Mit-toqol tat-telfien tinlgħab il-logħba,
Ma' dak li jien ma ntbaħtx qed jidħak bija.

Id-dmugħ li jien xerridt ħasilli ħsiebi,
Biex naqbad nerġa’ t-triq flimkien ma' ħbiebi.

Alfred Grech
24-04-2013

Aħna Nafu. 1.

Aħna nafu li mhix din il-mantra tagħna,

li twassalna sabiex ninfdu s-sisien tal-preċipizzju.

Aħna nafu li mhux dan huwa r-rużarju

biex iwassal leħen fgat mill-qigħan ta’ ħalq l-oraklu

fil-konfini tas-silenzji jew tax-xefaq

li jitbiegħed u jittwessa mat-tragward

li qed infittxu.

Aħna nafu li l-messaġġ f’dil-purċissjoni

iwassluħ das-serbut nemel li jistaqsu lil xulxin

minn widna għal widna u minn żmien għak żmien.

Din mhijiex il mixja fid-deżert li għad trid lilna twassal

sal konfini ta’ li nafu jew nistqarru

għax kull deżert mhux għajr in-narrattiva

tar-ruħ li ġġor magħha xbigħat minquxa.

Fid-deżert hemm biss l-eżami tal-kuxxjenza.

Aħna li għadna nterrqu dawn l-inħawi ta’ li nafu

bin-nostalġija ta’ triqat u moghodijiet

li minnhom konna għaddejna meta konna għadna tfal

konna ħsibna li daż-żmien qatt mhu se jgħaddi

li dan hu biss ix-xeneġġjat

li se jibqa’ jirrikorri.

Alfred Grech

24/04/2018.

Inti Li Ġejt Isserrep.

Inti li ġejt isserrep

U tibqa’ bejn ħaltejn,

Hawnhekk il-misraħ tnaddaf

U kollox sar kristall.

Fuq xefaq fejn jiltaqgħu

l-ħjut tad-dawl u d-dlam

tal-linja li trid tifred

it-tajjeb mill-ħażin.

Hemm fl-aħħar nifs tal-ħajja,

Fejn taf li għext għalxejn

Fejn bqajt ma sibhtx tweġiba,

Fejn taf li xejn mhux xejn

U xejn ma jibqa’ għal dejjem.

Fil-wegħeda taż-żernieq,

Fejn għad kullħadd jintagħżel

Is-sewwa mill-ħażin

Mal-leħħa li trid tkebbes

In-nar ta’ kull taqbid.

Inti li ġejt isserrep

Trid tibqa’ bejn ħaltejn

Xħin tħares sew fil-mera

Issib iż-żewġ uġuħ

Fl-istess munita. . .

Int taf li ġewwa fija

Hemm anġlu u hemm xitan.

Alfred Grech

23/04/2018

Jien Xtaqt li Lanqas Nagħżel.

Jien xtaqt li lanqas nagħżel

Bejn dak li mhux tassew

U dak li qiegħed nara

U l-ħrejjef li ssemmew.

U bejn nitfixkel nibda’

Li hu minn dak li mhux,

F’qoxorti nerġa’ nidħol

U nagħmel bħal bebbux.

U mank li dak li noħlom

Jissarraf f’realta’

Biex fl-aħħar nistgħu ngħidu,

Din hija l-verita’

Jien xtaqt li lanqas nagħżel

Li mhux minn dak li hu,

Biex b’hekk it-trasparenza

Issir tassew virtu’

Alfred Grech

20/04/2018

U Le Ridt Biss li Ngħanni.

U le ridt biss li ngħanni

U ngħid li qed inħoss

Dak li qed jissikkani

Bħal morsa qed iross.

U le ridt biss li ngħanni

U mhu qed ngħid xejn ġdid,

Jien ngħidha kif inħossha

Kelm’iebsa bħall-ħadid.

Mhux nagħti xi tagħlima,

Infassal xi qawl ġdid,

Nagħmilha ta’ profeta,

Inxandar t-tiġdid.

Din ruħi wisq imxekkla

Marsusa f’dan l-ambjent

Trid tagħmel bħal ħaddieħor

U timxi mal-kurrent.

U le ridt biss li ngħanni

Għaxfl-agħana hemm il-ħelsien

Ta’ruħ li trid tiskarta

U tħares ‘l-quddiem.

U hekk se nibqa’ ngħanni

U hekk inkun magħruf

L-għannej tal-għanja ġdida

Għal ftit tal-ħin misluf.

Alfred Grech

19/04/2018

Tridni Nemmen.

Tridni nemmen dak li nara

Bla ma naħseb  u nixtarr,

Tridni nemmnek xħin titkellem

U dak kollu li tistqarr.

Ma nafx jekk xħin tirritani

U tirfisli l-kallijiet,

Nagħmilx pass u nerġa’ lura

Biex nistħarreġ ftit fil-kwiet.

Għandix jien nitolbok skuża

Jew nistenna, mmur x’imkien,

Biex tinbidel il-burdata

Jerġa’ kollox għall-li kien.

Alfred Grech

17/04/2018

Int Sirt Bħaċ-Ċpar.

Inti li sirt bħaċ-ċpar, ma nafx għadekx tiftakar;

Jien għadni ngħix ix-xefaq li ħallejtli.

Xħin sar duħħan il-falliment tal-bieraħ

Erġajt ġejt lura tistaqsini l-għala

U sibt li l-ħtija mhix fl-istilel tagħna,

Il-ħtija tagħna stess għaliex għaddejna

Mill-istess triq; infittxu dak li sibna

Drabi oħra bin-nhar f’mergħat moħbija,

Intennu ta kulljum rużarju wieħed

Fir-rokna li silifna l-anġlu tagħna.

Int trid li tkun bħall-ilma, tibqa’ tgelgel

Fil-kors bla terġa’ lura tan-nixxiegħa;

Jien naħlef li rrid norbtok mhux bis-seħer

U l-ktajjen ta’ dal-faxxinu mentali,

Biex terġa’ ta’ kull darba tistaqsini

X’inhu li jġiegħlek toqgħod hawn tismgħani.

Alfred Grech

16/04/ 2018.

Provokazzjoni.

Huma bosta li jgħarfu wiċċek

U ħafna jafu ismek

Iżda ruħek għaraftha jiena biss.

Għax inti bħal djamant li jiswa’ ħafna,

tgħodd biss għal dak li jgħożżok.

Jien naħseb fis-skiet tiegħi

U mbagħad insir ribell

Għaliex għal xi raġuni

Jinħema fija dak kollu  li urejtni.

U int issir provokazzjoni

Kull meta tmidd il-pass,

Issir irriverenti kull xħin tiċċaqlaq,

U ssir id-dannazzjoni ta’ kull darba

Li nduq il-frott tas-siġra.

Jien ninsa’ t-togħma tiegħek ta’ kull darba,

Iżda mbagħad inħoss il-ħtieġa

Daqskieku kont id-droga prefertita.

Alfred Grech

12/04/2018

Frugħa.

U f’ħajjti sibt il-milja tiegħi

Għaliex insejt li qiegħed ngħix.

Nindiehes mat-tmellis ta’ jdejk assenti

Mas-seħer tiegħek kullimkien

U mill-fwieħa ta’ tifkira saret xewqa.

Hu fix-xaba’ tal-frott li ġibt quddiemi

Li jien sibt il-baħħ ta’ ħwejjġek

U l-għatx għal dik il-ħaġa li mhix tas-soltu.

Iżda, jien li qiegħed ngħix bejn dak li jien

U li nixtieq; bejn dak li noħlom

U dak li jgħix il-ħolma qasira tkun is-sensazzjoni

Tal-miġja tiegħek u tal-bżieżaq tas-sapun

Li jfawwru fuq wiċċ l-ilma.

Kull xħin tintefa’ f’ħoġri

Jien ninfed ħbub għajnejk bil-ħars distratt

Jew nagħmel dik il-qabża li tmur lil hemm.

Insib ruħħi n-naħħa l-oħra

Fl-infinit, fl-etern, fix-xejn qatt ma jinbidel.

Għax xejn ma jista’ jwaqqaf din il-mixja

Sat-tarf li jiġbed lejh kull direzzjoni

Fejn kollox huwa ċar li tista’ tifhmu

Bħal mixi ta’ gelgul tal-ilma ġieri

Lejn l-oċean  idifferenti.

Jien miegħek nerġa’ ngħaddi wkoll

Mill-wied mudlam tat-tentazzjoni

Tqanqil ta’ kull passjoni u tat-tiġrib,

Kull meta tgħaddi minn quddiemi.

Inti tibqa’ tgħid li trid u jiena ngħidlek

Li din hi frugħa tal-frugfħat u xejn ħlief frugħa.

Alfred Grech.

11/04/2018

Lil Carmen.

Ja mara ta’ lejl wieħed,

Għal waqt ma kont ħsibt xejn,

Inkella l-ħajja waqfet. Iżda xħin il-folja taqleb

Qatt ma taf xi tkun se ssib

Jew li hemm tassew l-imħabba.

Kien għad kurrenti wisq

Xħin int itterrompejtni.

U ħsibt li kien it-tmiem xħin tlajna  l-istess tlajja.

Jien li miġnun warajk

Li tiġi mbagħad tfittixni

Issib li kont assenti

Xħin l-aktar kont tinħtieġni.

Imbagħad tinfexx fil-kliem li jien kont għedtlek

Bħal kienu ġugarelli.

Noħoilqu l-ftit bil-ftit filwaqt li ngħixu l-ħajja

U npejjpu l-weraq tal-ħolm tagħna

Xħin nieħdu nifs il-ġewwa.

Xi darba rrid nonfoħlok il-fewġa fuq ħaddejk

U nsemma lilek biss, il-poeżija tiegħi,

Għax kull ma xtaqt kien biss

Li ntenni dak li naf

U ngħidu lilek biss.

Imm’int intlift

Fix-xogħol li kellu jsir.

Alfred Grech

09/04/2018

Exsultet.

Ħa tifraħ din l-art li xi darba konna ngħidu

li hi l-isbaħ ġawra fil-kuruna tas-sultan,

Għax issa niżlu fuqha bħal isqra

l-għasafar tal-ħtif,li jaħtfu l-ġid bil-ponnijiet

il-ftit li baqgħu jonfħlu l-bżieżaq

tal-ekonomija tas-sapun.

Ħa jifirħu l-Ministri u ta’ madwarhom

li jistgħu jitpaxxew u jiftaħru

li qed jaqdu ’l-alla tal-ħala, taż-żeblieħ għal kull deċenza,

tal-bini bla rażan, u tal-kollox jgħodd imbasta għall-flus,

tal-istravagnaza u tal-affluwenza,

għax issa l-Maltin lanqas għadhom iridu jħammġu jdejjhom,

lanqas iridu jaħsbu b’moħħom u lanqas m’għandhom għalfejn

għax hemm min jaħseb għalihom.

Ħallu t-trombi tas-salvazzjoni

idamdmu, jirrumblaw,  jirbumbjaw

u jifqgħu l-widnejn li  qatt ma semgħu l-ħsejjes tal-muturi,

u jidħlu f’kull rokna fejun tista’ tmur tistrieħ

għall-kwiet jew tikkuntempla;

Ħa jirbumbjaw u jekkeġġjaw il-qawwa tas-sidien il-ġodda,

li jaħtfu, li jħammġu u li jeqirdu

bl-iskuża tal-isvilupp u tal-ekonomija dejjem tikber.

Ifirħu, ħa tifraħ l-art għaliex il-glorja

qed tegħereq ġewwa fiha u qed tħeġġeġ

id-dawl tas-sultan setgħani tagħha.

Ħa jifirħu l-irkejjen kollha

għaliex jagħrfu t-tmiem tad-dwejjaq u tad-dalma.

Ħa tifraħ din l-art, l-omm li tagħtna isimha,

imdawwla kif inhi mid-dawl fuqhani

li ġej minn kredu trijonfanti tal-progress

tal-izvilupp u tar-regolamentazzjoni.

Tiftaħar illi kienet saħansitra minn tal-ewwel

li tibdel liġijiet u taqleb ta’ taħt fuq kull-ordni naturali,

ġerarkiji, troni u dominazzjonijiet,

u tispiċċa biex tibla l-ħmerijiet minn kull fejn jiġu.

Ħalli l-qarnita ta subajjha twal u nviżibbli

tal-kilba, tifga, tnaqqar, issewwes u taħtaf

kul biċċa roqgħa art verġni

fost in-ngħas u t-telqa ta’ poplu lluppjat

aljenta bix-xbiegħat virtwali

aktar milli bin-naqxiet tat-tafal.

Għalhekk għeżież ħbieb, li bħali

tinsabu għarkubjejjkom quddiem il-qawwa u l-glorja

ta’ setgħa moħbija

li tiggranfa u tisloħ u tifga

l-aħħar għeliem tal-ħelsien fid-dieher

sejjħu miegħi s-setgħa ta’ dan l-alla ġdid

li lili għoġbu jgħoddni għalkemm ma jistħoqqlix

fost il-leviti.

Isawwab fiha d-dawl bla dellijiet

tal-illuminazzjoni l-ġdida

ta’ soċjeta’ nkusiva, fejn titneħħa d-distinzjoni,

kull diskriminazzjoni, u kollox livellat

għal xejn mhux xejn u fejn kulħadd

irid jilbes maskra waħda;

Biex jiena wkoll nista’ ngħanni

t-tifħir ta’ din ix-xemgħa.

Amen.

Alfred Grech

08/04/2018.

Illum M’Għandix Xi Ngħidlek.

Illum m’għandix xi ngħidlek

Inħossni bal miblugħ

Inħossni bħal bużżieqa

Bla rih, ballun mifqugħ.

Illum irrid ninbidel,

Nintilef fis-sabiħ,

Mhux sewwa li nsir bħalek

U f’moħħi nkun mistrieħ.

Alfred Grech

04/04/2018

Stqarrija.

Jien li ma kellix għażla,

Bqajt miexi f’dal-perkors,

Imqarr jekk x’kelli nagħmel,

Kont naf mingħajr diskors.

Jiena li xejn ma kelli,

Bla ġwienaħ stajt intir,

Ma bqajtx marbut ma ħwejjġi

U l-prieċi tal-inxir.

Stajt nimraħ stajt niġġerra,

Nittajjar fuq il-ward,

Imqar xħin giet ix-xita

U bdejt inħoss il-bard.

Stajt nimraħ u stajt neħles

Minn dak li kien ta’ xkiel,

Niddakkar minn kull warda

Mingħajr ma nħalli ħjiel.

Jien li ma kelli xtoqol

Ta’ wirt u ta’ nteress,

Stajt noħlom li nkun ħieles

U fuqi ħadd pussess.

Stajt nogħola ‘l-fuq, nittajjar,

U noqgħola ’l-fuq mis-sħab,

Ukoll stajt nilgħab logħoba,

Ta’ min qatt kien lagħab.

Jien li ma kellix x’nitlef

Stajt nerġa’ mmur mnejn ġejt,

U nerġa’ nibda niġbor,

Kull biċċa mnejn ħallejt.

Jien li ma kellix x’naħbi

Stajt b’wiċċi minn quddiem

Nixlihom u nikxifhom

F’kundanna ta’ bla kliem.

Alfred Grech

03/04/2018