INT U INT BISS.

Inti li tisfidani ma kull nifs li nieħu

mingħajr ma biss qatt tlissen kelma

u jien irrid inkejjel bil-kumpass  ċ-ċirku

li tagħmel ta’ kull darba

xħin tgħaddi qrib mingħajr ma tħares.

Irrid wkoll nistaqsi lili nnifsi

jekk jaqbillix nintilef

fl-immensita’ tal-ġenn li int tgħidilha imħabba

inkella noqgħod  kwiet fis-solitudni mnearrba

niddetta s-sokor ta- dinja oħra

fejn mhemmx ix-xibka ta- kulljum u mhemmx l-għanqbuta

li sibtni ta’ kull darba imxeblek ġewwa fiha.

Għalik nagħmilha l-qabża ġol-abbis mudlam

minn fuq ix-xfar misnun tal-amneija

u nerġa ngħix imqar għal ftit waqtiet dik l-illużżjoni

li inti u inti biss tagħmilni tista’

ferħan għal dejjem

Alfred Grech

29/08/2018

Qatt Ħsibt?

Dawk li jgħidulkom li din hi mixja

mhumiex iħarrfu

għaliex sabiex itaffu xi ftit l-assurdita’

xi ħadd webbilhom

li hemm destinazzjoni li jirdu jaslu fiha,

u li trid timxi dejjem ’l-quddiem

mingħajr ma tħares lura.

Jien m’emmintx u bħal Orfew

ħarist lura u kollox għosfor

fid-dlam tal-bieraħ.

Qatt ħsibt li dan mhu xejn għajr dawrien ċikliku

tal pjaneta li nqabdet fil ħolqa ta’ mħabba

max-xemx li tnin bil-mod

sa ma tinħela?

Alfred Grech

27/08/2018

U Issa Rrid Nibda’ Nifhem.

U issa rrid nibda nifhem

għaliex int qatt m’għandek il-ħin

u r-ritmi tiegħek jgħaġġlu wisq

biex nista’ nlaħħaq miegħek,

ondati ta’ mewġiet li qatt ma jaslu

sax-xatt tal-art fejn hemm il-blat

inkella r-ramel jistennihom.

Jien xtaqt inħares lejk

bħal meta l-qamar kwinta jħares l-isfel

lejn baħar iċċassat

jikkuntempla r-rifless tiegħu

imewweġ fit-tamiet li jogħsfru.

Minflok ikolli biss nitwekka

bil-frak ta’ kwiekeb mgħaddba

u nħares lejn eklissi ta’ qamar imdagħdagħ

inkella nżul ix-xema

ta’ mħabba li għaddiet

għax saret silġa.

Int missek taf biżżejjed

biex ma tilludinix

jew ħalli lili nidħaq bija nnifsi

filwaqt li naf li qed innaqqas

mill-għażliet li fadal.

Alfred Grech

26/08/2018

L-Isfida ta’ Sisifu.

Kullħadd imwaħħal hawn

Mal-ftit li dawk ħallewlna

Din hija l-art li nafu

U d-dinja li għaddewlna.

Ma nillargawex minn hawn

’qas nafu x’hemm bil-ħniena

Lilhinn miċ-ċpar tal-baħħ,

X’hemm moħbi jistenniena.

Irridu nibqgħu hawn

Kemm wieħed u kemm l-ieħor,

Hawn drajna u hawn qiegħdin

U ma nafux mod ieħor.

Ikun biss it-twemmin

Għax fieragħ kemm hu fieragħ

Iżommna nittamaw

Li llum aħjar mill-bieraħ

Fuq l-għolja tal-allat

Naħilfu mbgaħd l-isfida

Li nibqgħu ma nobdux

U din tkun ħajja ġdida.

Alfred Grech

24/08/2018

Bħal Meta x-Xlokk.

Bħal meta x-xlokk ifarfar iċ-ċpar tiegħu fuq il-qċaċet

U n-nida tfixkel lil kull minn irid javvanza

Huma t-truf ta’ xuxtek,

Il-kuda li tħallili ma  kull kelma

Li toħroġ minn xofftejk.

Għax nibda ma narax lil hinn

Minn fejn  il-qaws iwassal

Biex b’hekk sirt il-ħalliel

Li ġejt infittxek qalb il-folla.

Bil-ħeffa tal-għasafar dik mixjietek,

Li għandha minn qawwi li jitmewweġ

U jokrob mingħajr biss ma jaf il-għala,

Bħal meta fisfidaħ tweżieq il gruwa

Li tgħid li ġejja x-xitwa  u ttir ma sħabha

Bil-ħsejjes ta riġment,

Jinġarru mal-kurrenti ta’ filgħodu.

Int bħalitrid li tkompli fejn ħallejna

U tobdi lill-allat  bla ma tistaqsi,

Għax kontra dak  li s-sħab u l-kwiekeb jiknes

Ftit stajt tisfida.

Alfrerd Grech

23/08/2018

L-Aħħar Waqtiet.

L-aħħar waqtiet

huma tqal għal fuq l-istonku,

għax inti tkun emmint

li dan mhu xejn għajr taraġ li titilgħu

u ma kull tarġa tiskopri s-sewwa

inkella sewwa ġdid jekk mhux is-sewwa kollu,

u tibqa’ tiela’ ’l-fuq sa tasal sal-quċċata

mnejn tista tara kollox u tara x-xefaq.

Imbagħad tinteba f’daqqa waħda

li mhi quċċata xejn

għax tkun wasalt fit-tarf,

fit-tarf tal-preċipizzju.

Alfred Grech.

21/08/2018

Għaliex Qed Tistaqsini?

Għaliex qed tistaqsini w’qajtx fil-muta?

Int taf li kull tant żmien jien irrid niskot

u nagħmel bħal bebbuxu

nidħol ġo kamarti,

għaliex il-baħar imkurlat

jimlieli għajnejja bix-xrar tal-kwiekeb

u ħsibijieti biċ-ċpar tal-illużżjoni.

Għaliex qed tistaqsini x’inhi l-biċċa?

met’inti daqsi taqra

il-passi ta’ quddiemna

u l-melodija li daqqejna waqt iż-żifna

li kienet frott tas-seher

ta’ lejla ta’ bla qamar u bla kwiekeb.

Alfred Grecvh

20/08/2018

Għaliex Qed Tistaqsini?

Għaliex qed tistaqsini w’qajtx fil-muta?

Int taf li kull tant żmien jien irrid niskot

u nagħmel bħal bebbuxu

nidħol ġo kamarti,

għaliex il-baħar imkurlat

jimlieli għajnejja bix-xrar tal-kwiekeb

u ħsibijieti biċ-ċpar tal-illużżjoni.

Għaliex qed tistaqsini x’inhi l-biċċa?

met’inti daqsi taqra

il-passi ta’ quddiemna

u l-melodija li daqqejna waqt iż-żifna

li kienet frott tas-seher

ta’ lejla ta’ bla qamar u bla kwiekeb.

Alfred Grecvh

20/08/2018

PERSEFONE.

Taħt nisġet ix-xoqqa żebbuġija

il-kliem jintilef

imtaffi minn spettaklu

ta’ min jgħid li huwa bin ix-xemx.

Iż-żiffa toqtol kull tama

li xi darba tarani miegħek

fuq gradilja u xofftejk

tilfu l-ħajra tat-tbissima.

Għajnejk ifittxu toroq ġodda

ta’ kif ifissru ruhħom

minghaħjr diskors,

mitlufin f’mirage

ta’ deset l-enimmi.

Tistaqsi għal qatr’ilma

minn bir in-nixfa.

Jien għandi l-ilma tal-ħajja -

kont tgħidli –

Imbagħad fil-ħolm stħajjiltni

l-oasi tiegħek

u bdejt tħobbni.

Mhux l-għafsa tiegħek qed tweġġani

u mhux difrejk

Iżda l-ħars battal ta’ bir bla qiegħ

li hemm f’għajnejk

u l-ksieħ ineżorabbli

tad-dellijiet li ma kellhomx

xaqq dawl warajhom.

Alfed Grech

15.08.2018

U Taf LI Din Mhix l-Aħħar Darba.

Ma dil-gomma li tiġġebbed

noqorbu lejn xulxin

Imbgħad nitbiegħd.

Hekk hi l-eternita’

Illum irridek jiena

Trid għada lili.

Fuq dan iċ-ċirku tond li qatt ma jaqta’

l-eternita’

nitbiegħdu minn xulxinu

u nerġgħu niġu

fuq bandla tiela’ u nieżla

għall-irdoss.

Illum irbaħtlek jien,

Tirbaħli għada

U ngħid li ma rridekx

Meta naf tajjeb, li żmien bi żmien

Tarani għad ma ġenbek

Iżd’inti ma tkunx trid,

U taft li din mhix l-aħħar darba.

Alfred Grech

13/08/2019

Il-Mostru Ma Nkunx Jien.

Infern dal-wara nofsinhar t’ awwissu.

Min għajnejk jiżżerżaq dmugħ

li mhux ta’ San Lawrenz

U jien trasfugurat.

Iż-żiffa sħuna trid twassalli

ix-xrar tax-xenqa tiegħek

u n-nar li jixwi fuq il-gradilji.

Imqar jekk int daqshekk il-bogħod

li ma tkejjlux,

ma tagħmel xejn ħażin

jekk għad tissogra.

Jjekk tfittex hux din hija l-verita’

inkella hux tixxiebaħ,

jekk jien jiniex tassew,

inkella fissazzjoni

ta’ min xtaq jasal l-għada

mingħajr ma jisbaħ.

Jekk tibża li tisfida l-mostru

Il-mostru ma nkunx jien

tkun int li bżajt

minnek innifsek.

Alfred Grech

12.08.2018

Raħal.

Jien ġejt hawn biex nagħmel bejta

Ġejt infittex ftit mistrieħ

Mill-għajjat tal-folla mġenna

Fost il-ħemda, għall-erwieħ.

Iżda dawk jiżdiedu baqgħu,

Baqgħu jibnu kullimkien,

Jingumbraw, iħarbtu, jkissru,

Jiżverġnaw kull fejn kien kien.

Dawk t’hawnhekk ħwejjiġhom biegħu,

Għax imsieken ma basrux,

Illi żmien bi żmien għad niġu

Geġwiġija bħal bebbux.

U dawk ġew, dawn komplew jibnu

Biex ma baqa’ l-ebda kenn,

Min dar-raħal kwiet u ħiemed

Sar teatru mimli ġenn.

Alfred Grech

11/08/2018

Jien Kont F’Għajnejk.

Jien kont f’għajnejk u int kont tħares lejja,

Kien hemm il-bogħod bejnietna

Distanza ta bla truf.

Jien ħsibt li ġrejtha kollha,

Xħin qtajt in-nifs

Sibt lilek qed tfissidni.

Kien hemm il-baħar jaqsam ta’ bejnietna

Iżd’int waqajt mis-sema u ġejt ġo ħoġri

Imbagħad xħin sar il-ħin

Jien bżajt li mhux qiegħdin niftehemu.

Għalkemm it-tnejn imdawwra madwar mejda

Nixorbu l-kapuċċin.

Jien  stajt nissinkronizza l-arloġġ tiegħi

Mal-ħin tiegħek.

Iżd’inti bdejt tibissem

Jew kont ġa taf x’ser ngħidlek

Inkella,

Li terġa’ tkun darb’oħra.

Alfred Grech

10/08/2018

Ridtek Tħares Ftit f’Għajnejja.

Ridtek tħares ftit f’għajnejja

Ridtek tħares ftit fl-abbiss

Jew tistaqsi l- mistoqsija

U taqrani kif imiss.

Ridtek tħares ftit f’għajnejja

Ridt nistaqsi jien min jien,

Bdejt inħoss is-sħana tiegħek

Kollox reġa’ għal li kien.

Ridt inħossni biċċa minnek,

Ridt nintilef fl-univers,

U ridt ngħum fil-baħar tiegħek

Ridt inħossni ftit divers.

Jiena deherli li ħassejtek

Issefsifli fil-widnejn;

Kont imnebbaħ, kollox sewwa,

Xħin ħassejtni bejn ħaltejn.

Ridt ninġarr mar-rima tiegħek,

Ja sibilla, fejn tmur int;

U ridt nisma’ x’tista’ tgħidli

Sforz il-heġġa, sforz l-istint.

Ridt inħares fija nnifsi

Jekk hux din il-verita’;

Jew inkella hemmx xi maskra

Biha nsib l-identita’.

Alfred Grech

09/08/2018

Jien Xtaqt Inħares lejk.

Jien xtaqt in+ħres lejk

kif int qed tħares lejja.

Iżd’int bqajt twelled it-titani

u jien żvinat mort niġri

ninħeba wara x-xefaq.

Xtaqt ngħajjat ngħidlek titlaq

iżd’int bqajt tħares fiss f’għajnejja.

Ġejt hawn niltaqa’ miegħek

biex neħles mill-magħmul li kelli fuqi,

is-saħta li tidwi baqgħet dejjem ġo widnejja.

Dan hu l-biża’

dan huwa dak li jħoss

min joħlom ħolma kera

u jqum xħin it-twerwir

ma jkunx jifilħu iżjed.

Iżda’ jien la nista’ nqum

u lanqas niflaħ aktar.

Jien nibqa’ hawnhekk

fi ħdan l-eternita’

biex ngħodd ir-ramel ta’ dix-xtajta.

Alfred Grech

07/08/2018

Imqar Tarani Fir-Rifless.

Żommni ftit ieħor ħdejk

għandi mnejn nistordi

inqar l-għaraq ta’ ġbini

issa kesaħ,

u nista’ noqgħod hawn

nistaħba taħt l-iskomdu

ta’ li ma jagħmilx sens.

Imqar l-għanja trid teħel

u l-kliem ma jfisser xejn.

L-għammieq hu tqil u fond

fond iktar milli ħsibtu.

L-għammieq ma jwasslek għal imkien.

Hemm l-għanja tas-seħer li trid toħroġ

l-għanja taż-żernieq

li tbiddel il-burdata.

Jekk ngħidlek: Erġa ttawwal

fl-abbissi ta’ bla qiegħ,

tobdini?

Imqar tarani fir-rifless.

Alfred Grech

02/08/2018