Għalihom.

Għalihom ħtif ta’ ftit miljuni oħra,

għalina mostru ġdid twikkejna bih,

għalihom mhemmx serħan-il għajn, sbuħija,

li jiswa’ biss il-qliegħ ta’ minnufih.

Għalina wirt il-kruha li se tibqa’,

għalihom qisu qatt ma ġara xejn,

xtraw lil kullhadd, kullħadd jaf sew x’qed jiġri,

Ta’ fuq jgħidulek: qed tinkwieta għalfejn?

U jekk tissogra għal darba tiftaħ ħalqek

issibhom annimal l’ għalik iħebb.

intebħu issa! ġralhom bħal tal-ħrafa

tiġieġa qatlui tbid il-bajd tad-deheb.

Alfred Grech

30/06/2019

Lilek.

Lilek ja sirena tal-bnazzi

Li tiġi kull filgħodu ssellimli

Bla ma titbissem

Għax tibża’ li b’daqshekk

Tikkomprometti ruħħek.

Lilek t’għajnejk skuri

U xuxtek sewdenija

Tagħtini daqqa t’għajn imbagħad tiżgiċċa

U tgħidli li tassew

Tixrieqli l-għodwa t-tajba.

Lilek ja sibilla

Ta’d rgħajk miftuħa

Li għandek qalbek kbira

Biex tħaddan il-kolossi

Li b’riġlejhom  jagħaqqdu naħa m’oħra.

Lilek dawn il-versi

U għad irridek tgħidli

Xi jkun għaddej minn moħħok.

Alfred Grech

29/06/2019

Nibqgħu ngħannuha.

Nibqgħu għalina ngħannu minkejja dat-tifrik

Li hawn madwarna, minkejja l-ġenn sferant u l-ġiri nfernali

Minkejja d-dħaħen taċ-ċiment u trabijiet ta’ bini

Minkejja li r-regħjba ta’min hu bla wiċċ u mingħajr bla isem

Joħdulna s-sabih kollu li hu l-wirt li huwa tagħna

F’ din l-art li saret l-art l-eżilju.

Nibqgħu ngħannuha  din l-għanja reffiegħa tagħna

Imqar jekk il-issa s-setgħa u l-affluwenza

Għamew lil min jippoża ta’ xi ġgant fis-salvazzjoni tagħna.

Ejja nibqgħu ngaħnnu flimkien ja poeżija tiegħi,

La titlaqni kif għandek ħabta tagħmel

F’dawk l-istaġuni fejn l-għajnejn  jagħmew

U l-widnejn jittarrxu u  jibda ftit ftit dieħel

In-nagħas tal-apatija u qtigħ il-qalb

Minn dinja se tisplodi

Ta’dawn il-ġejjer li saru manikomju.

Alfred Grech

29/06/2019

Mnarja 2019.

Bħal meta jdejja nċappas b’linka diġitali

li ma titħassar bl-ebda gomma jew deterġent.

Il kullar għoroktu kemm il-darba

u t-tbajja baqgħu hemm imqar bil-kandeġġina.

Jien nibqa’ niġbed dan il-ħabel

sakemm ikolli saħħa,

sakemm ikolli saħħa nifs il ġewwa niġbed

u nibqa’ u nibla biex nirrimetti kollox.

Imbagħad nistiednek tiġi ħdejja

tippassiġġa miegħi qalb is-sħab id f’id

biex b’hekk inkunu nistgħu nigħidu illi rbaħna

il-ġravita’ ta’ sajf fl-indifferenza.

U kollox jispiċċa ħtiġiejiet ta’ dak il-ħin

ta’tfal żgħar isaffru għanja kiebja

lill-qamar felli.

Alfred Grech

28/05/2019

Lil Ommi.

Ma rridx narak tiżżerċaq f‘diż-żurżieqa

Li ma nafux mnejn bdiet, fejn ser tispiċċa,

U ma nafux mil-liema  tgħaddina

Għalkemm triq wada hemm: it-triq tan-niżla.

Bħal meta tmut ftit ftit ix-xemx f’saħħitha,

Biex fil-punent tistaħba wara x-xefaq,

Għalkemm int tista’ taħseb l’hemm xi tama’

Li twaqqaf il-perkors inkella ġġebdu. . .

B’xi mil jew tnejn, b’xi passi, ftit pulzieri.

Alfred Grech

28/06/2019

Tiftakar?

Tiftakar għal waqt wieħed ħassejt tkexkixa?

Ħassejtek  mintix hawn

Ħassejt it-tregħid ta’ wiċċ l-ilma

Fi mwejġiet li jaħarbu u jintilfu

Fil-baħħ tal-infinit.

Tiftakar li għal waqt wieħed

Ħassejt l-irdum u l-ġebel għoli

Jitgħawweġ fuq nnifsu

U jdur għal fuqek?

Imma f’daqqa waħda ftakar

Li l-ħin kien sar

U ma tridx tħalli lil min jistenna.

Jekk ma tintilifx fil-hoss tal-ilma

Tintilef fir-raġġi tax-xemx

Fiż-żiffa li tonfoħ minn fuq rasek

U tħaxwix tal-frieħi għad-dell tal-bruka.

Issa sibt li qatt mhu se tilħaqni

Għax qed tmidd idejk lilhinn mix-xefaq.

Alfred Grech

27/06/2019

Fanatażmi jħeddu d-dwejjaq

Bħal friefet jirxuxtaw

Kull dell lid-dawl iħedded

Id-dawl li jasal s’haw’.

Mal-ħama ntagħġen issa

Il-ħażen u t-tbagħbis

Fir-ramel ta’ dix-xtajta

Tal-qerq u tat-tkeskis.

Kull xewqa u kull tqanqila

Ma dak li rajt b’għajnejk

Is-skiet ukoll sar qares

U nsetti ma xufftejk.

Inewwaħ is-skiet tiegħek

Kull pass li tagħmel tqil

Il-vini tiegħek nixfu

Mank  timxi bla ma tmil.

Alfred Grech

27/06/2019.

Transcendence

Cannot help to think of the forbidden fruit

Of what could be or could have been

Your destiny and mine

Two roads that never crossed

Two rails that never met.

They ran so well together

Parallel to each other

Towards eternity.

There in eternity all this passion all this zeal

Shall be consumed in the ultimate cremation

Of the nothing, the void,

In the gratuitous and the virtual

The humiliating and the exalting.

I will be there for you

As the knight to his lady sworn

In the illicit and immoral

So that even the nobleness of it all

shall be transcended into

The insignificant.

Alfred Grech

26/06/2019