Il-Ktajjen Tas-Setgħana.

Il-Ktajjen tas-setgħana huma tqal

Bħal dawk tal-purċissjoni

Fil-Ġimgħa l-Kbira

Għax jinbqgħu inkullati

Għax jaħsbu li għada ma jisbaħx

U li d-dinja ma timxix mingħajrhom

U mhemmx mod ieħor kif isseħħ

It-traġikummiedja

U jaħsbu li mod ieħor mhemmx

Kif titla’ x-xemx fil-għodu.

Ħrehhef tal-biża’

Stejjer tal-waħx.

Kullħadd jimmira t-tir lejn fejn jaqbilli.

Neħlisha jien, jeħles kulħadd

U l-boloħ u l-ilsiera

Jinżlu għarlubtejhom u jkantaw

Allelulja.

Minn qal li b’rieda ħielsa

L-għażliet li magħmlu aħna

Jekk dejjem u f’kulħadd

Id-dnub oriġinali.

Alfred Grech

30/11/2019

Le ż-Żejt Ma Jitlax F’Wiċċ L-ilma.

Le ż-żejta ma jitlax f’wiċċ l-ilma

Iż-żejt jiġrilu bħan-nugrufun

Jieħu dawra oħra

Jagħmel karambola

Jew parabbola u jerġa’ jinżel l-isfel

Sabiex naraw il-kutrumbajsi

Taż-żejt li beda jiżfen flok ma jitla’

U ninbdew ngħidu li dawn huma ħwejjeġ

Li bħalhom qatt ma rajna.

Dawn ħwejjeġ li jiġru biss

Fil-ġżira ta’ Lilliput

Meta l-Lilliputjani fettxew biex jimmażraw

U jankraw lil-ġigant

Li lilhu bdew jaduraw.

Le, ż-żejt ma jitlax f’wiċċ l-ilma

Iż-żejt għandu ħabta jibqa’ nkullat

Mal xi relitt fil-qiegħ

Sakemm isir qatran u biż-żmien

Jatrofizza.

Alfred Grech

29/11/2019.

Tlett Xadini.

Nimmutaw u ħalqna nagħlqu

Nimmutaw, ma ngħidu xejn,

Għax ħażin jibdew jifhmuna

Ħafna nkwiet, u dan għalfejn?

Nagħattu għajnejna sabiex ngħidu

Illi qatt ma rajna xejn,

U jekk hemm li jaf xi ħaġa,

Waħdu jibqa’ bejn ħaltejn.

Torox sirna, mank nisimngħu

Bomba tfaqqa’, terrimot

Ta’ xi skandlu li jgħeżżiżna

U ma jibqa’ xejn fis-sod.

Dak li jaqbel biss għalina

Ser nisimgħu, aktar mhemmx,

Ngħawwġu l-fatti ngħawwġu s-sewwa

Jidher ċar fid-dawl tax-xemx.

Alfred Grech

29/11/2019.

Xhini Din?

Xhini din li l-ħin kollu

Niġġieldu l-inkursuri

Li ħarrbtu fejn noqgħodu

Ħasbuna salt pasturi?

X’inhi li ta’ kull darba

Insibu l-min ibiddel

Il-mod kif drajna ngħixu

U jaqleb minn fuq s-isfel?

U jaħseb jista’ jitla’

U qisu xejn ma ġara,

U  jirkeb dahar ħaddieħor

U kollox sar jindara.

X’pajjiż sar dan imsejjken

Fejn l-aqwa kriminali

Jixxierku fin-negozju

Bl-immunita’ statali?

Iż-żejt f’wiċċ l-ilma jitla’

Għax fl-aħħar jasal l-aħħar

U ż-żejjed kollu żejjed

U nibgħatuħ ibaħħar.

Alfred Grech

27/11/2019.

U dan Għaliex?

U dan għax ħsibt li jiena

Għandi l-ħin u s-sabar

Li noqgħod naqra dak li ħsibt

Jew dak li tħoss għalkemm mirqum

Bir-rima jew mingħajrha?

U dan għaliex qed taħseb li xi ħadd

Baqgħalu r-rieda

Jaħli l-ħin biex joqgħod jifli

Dak li hemm fil-ktieb mitbugħ?

Il-ħajja dan il-waqt

U dan il-waqt hu waqt ta’ skiet

Ta’ dlam li qatt ma tinfdu

Tal-illużjoni li kont jien

Mingħajr aljenazzjoni.

Jekk noqgħod naqra u nisma’ l-aħbarijiiet

L-aħbar li tista’ ddejjaq hi fil-bogħod

U fl-isfond ta’ dan kollu

Tindaqq xi l-melodija.

Alfred Grech

25/11/2019.

Ħallejnihom.

Ħallejtuhom iġibu l-vjolenza

Dan ngħiduh mingħajr biża u tlaqliq

Ħallejtuhom ikissru w iħarrbtu

U għal milljuni jagħtuna bis-sieq.

Jittradixxu u jbiegħu pajjiżna

Lill-barrani u jħammġu kull m‘hawn,

Ġabu fuqna kull mard u kull vizzju

Qatt ma rajna xenati bħal dawn.

Saru isqra tal-ħtif, nies feroċi

Biex neżżgħulna kull sens ta’ rispett,

Dardru l-ilma li minnu nixorbu,

Żebilħuna u waqqgħulna għaż-żuffjet.

Issa ħasbu xi ħadd se jemminhom,

Biss hawn bċieċen li għadhom reqdin,

Iżda ż-żejt jitla’ qiegħed f’wiċċ l-ilma

U jinkixfu l-midinba qiegħdin.

Ħtija tagħna għax aħna fdajnihom,

Lilħom tajna l-muftieħ tad-destin

Il-ħmieġ kollu wiegħduna li jneħħu

U issa huma qed jikxfu ’l-xulxin.

Alfred Grech

25/11/2019

L-Olimpjani.

Issa li l-olimpjani spiċċawlhom il karti tal-logħob

u fadlilhom ftit mossi x’jistgħu jagħmlu

qabel jiblagħhom l-abbiss

u jinżlu jitgerrbu għal-isfel

mill-għoljet u mill qċaċet fejn kienu tant jiddandnu

għax kienu jaħsbu li ħadd ma seta’ għalihom

huma daru fuq Zeus, il-kbir Zeus

ir-re tal-allat

iben Rhea u l-qawwi Kronos

li sallum dejjem kien it-tarka tagħhom

u laqgħa għalihom bħal tfal imqarbin li kienu

u sgiċċa mill mira ta’ kull vleġġa velenuża

billi aljena lil kullħadd u lihom magħhom

bl-istejjer ta’ qabel l-irqad u bil ħrejjef l-oħra

bil-kutrumbajsi li kien imdorri jagħmel

inkella teatrini

għax hu kien attur u kien makakk

imħarreġ sew fis-sena tas-simulazzjoni.

Iżd’issa mqar il-kbir Zeus

żmienu kien għamlu u s-seħer li kien imdorri jitfa’

fuq kulħadd spiċċalu

għax trekken hu ukoll

u nqabad sewwasew ġo l-għanqbuta li kien niseġ.

U meta marru ħdejħ jistaqsuħ x’setgħu jagħmlu

Zeus il-kbir tbiegħed minnhom

u lissen kliem ma jinftiehemx

u beda jisħet il waqt u l-ħin

li hu wkoll ma spiċċax ġewwa żaqq

Kronos missieru bħall-allat ta’ qablu.

U issa wieħed wieħed bdew jitgerrbu

it-taraġ għoli tal-palazz irrestawrat

ewlieni fil quċċata fejn jista’ jidher

minn kulħadd u minn kullimkien

fuq l-għolja mqaddsa tal-allat.

Sab ruħu waħdu issa l-kbir Zeus

jiġġieled il-qilla tal-plebej u tal-bnedmin

li fis-sedqa tagħħom emmnu

u għax emmnu hassew irwieħom milgħuba.

iżd’issa qamu min-ngħas twil u tqil li kien ħakimhom

Alfred Grech

24/11/2019.