Sibilla.

Xħin bqajt ma ġejtx

Is-sema ddallam f’daqqa

U lanqas ta’ bir-ruħi

Ma stajt nagħmel

U naħsbek qiegħda ħdejja

U ridt intir u nogħla

U sfajt għasfur ġo gaġġa.

Xħin bqajt ma ġejtx

Intlift fis-skiet tad-dwejjaq

Għax lanqas biss stajt nixgħel

Xi jtaffi ftit tad-dieqa

U sibtni bħal għasfur

Li f’daqqa tilef l-għana.

Stajt ngħereq biss

Fl-immensita’ ta’ ħdanek

U nħoss l-inġazz u l-ksieħ

Tax-xitwa riesqa lejja.

Alfred Grech

28/02/2020.

Until I Catch the rhythms.

Until I catch the rhythms of your waves

I do not know which way

Or what lane or viaduct

Will bring me to you

Oh sibyl of a thousand voice and tone

Reiterating the truth of the gods

Resounding in the caves of the soul.

Until I catch your current

Do I not know what promise, which prayer

Can bring me nearer to you

And shorten the distance between us.

But at every step leading

To the altar there is a story

Of love and faith

That would remind you of me.

Alfred Grech

02/07/2020

X’Nagħmel Jien?

U x’nagħmel jien?

Ngħolli spallejja

U ngħid li m’għandix x’naqsam?

U ngħid: Ma rridx nindaħal

Għax jien mhux qed nintlaqat?

U x’nagħmel jien xħin nara

l-uċuħ ta’ bla mistħija

’l-min sabiex jisfrutta

Lil min ġab il-liċenzja

Biex jisraq ’l-ħaddieħor

Ħaddieħor li ma jafx

Jew huwa dgħajjef.

U x’nagħmel jien xħin nara

Lil min qed jiggalleġġja

Bħal xini trijonfanti

Fuq baħar ħmieġ u ħerba

Involka ’l-barka t’Alla?

Alfred Grech

27/02/2020.

Agħtini Ftit Estasi.

Agħtini ftit estasi

l-estasi li int biss taf tagħti

li ma jagħtinix ħaddieħor.

Jiena qed infittex l-estasi

Qalb l-eklissi ta’ kuljum.

Biex ninsa’ l-ġejjieni

Biex ninsa l-imgħoddi

Biex ninsa’ lili nnifsi.

Jien qed infittex l-estasi

Għax mingħajrha t-toqol li nġorr miegħi

Ma nifilħux

U twila wisq it-triq tar-rutina tal-ħajja ta’ kuljum.

Alfred Grech

24/02/2020

Din Hija Mixja.

Din hija l-mixja tal-merħla lejn tarf l-irdum

Kulħadd jistrieħ fuq dawk ta’ madwaru

U ħadd ma jsaqsi fejn sejrin

Jew jgħolli rasu ’l-fuq u jħares fejn sejrin

Għax inkella nitfixklu f’saqajn xuxlin

U biex isseħħ dik l-ordni u l-għaqda

Li ndottrinawna biha

Jinħtieġ li nibqgħu għaddejjin

Ilkoll fl-istess direzzjoni.

U aħna issa sirna nani għal ħdejhom

Għax issa huma ħatfu u ggranfaw bla xebgħa

F’majjalata tal-ħnieer fir-razzett tal-annimali

U bnew u għollew safejn qablilhom

U telgħu ’i-fuq u bdew iħarsu l-isfel

Lejna.

U issa sirna nemel għal ħdejhom.

Alfred Grech

24/02/2020.

Diffiċli.

Diffiċli tfejjaq il-ġrieħi

tal-inkomprensjoni

meta kulħadd jagħlaq il-bibien

u jniżżel il-lukketti tal-kanċelli

tas-swar tiegħu.

Diffiċli twassal kliem ta’sliem

qalb ġebel ippuntat

u ritmi żvixxerati u laċerati

ta’ mewġ li jibla’ l-art.

Ingħlaqna fina nfusna

ħarisna biss sal-ponta

ta’ mneħirna u ma lmaħna xejn

għajr ċ-ċpar u ċ-dħaħen

tal-aggressjoni.

Ibla’ pillola oħra

u minn dan l-uġih xejn ma jibqa’.

Alfred Grech

23/02/2020.