Bħall-Għerienaq.

Bħal għerienaq ittawlu għanqkom

u tmiddi riġlejkom twal

fli spazji ta’ bla wisa’

oqgħodu ħarsu l-isfel minn fuq il-bjut

u l-parapetti tat-torrijiet u l-barumbari.

Għaliex qed tikxfu snienkom?

Donnkom irbaħtu lotterija!

Kerraħtu s-sema b’suritkom

biddiltulna l-vista mingħajr ma kellna bżonn nuċċali

u għattejtu bl-għarbiel ix-xemx

biex issa kulħadd bħan nemel u d-dud tal-art

fil-gandotti u l-mini ta’ taħt l-art.

Kien l-abbiss tal-ħmieġ u tal-qerq

li wasslkom sabiex sraqtu

xi ħaġa li mhix tagħkom

il-wirt ta’ dawk li għad iridu jiġu.

Issa wkoll daħħantu l-arja li nibilgħu

u sraqtu saħansitra s-simetrija

minn idejn Pitagora

filwaqt li l-allat t’olimpu baqgħu

iħarsu ċċassat fis-sokor tagħom

jew jongħosu fir-rqad imxaħxaħ

tal-opuklenza u l-lussurja.

Issa li ħsibtu li tlaqjtu sal-quċċata

tintebħu li kollox kien mistħajjel

għax xħin tinfaqa’ l-bużżieqa

il-ħmar il-lejl isir ġejjieni.

Bnejtu mafkar il-kruha

u monument lil ħallelin

fil maqdes tar-rejba

frott il-moħħ battal u l-għama

t’għajnejn li tħares bla ma tara.

U inti prekursur tal-għana virtwali

u taż-żufjett ibbalzmat

mur ħabbrilhom lil-dawk it-torox

u għidilhom li xejn mhux xejn

u xejn ma jiswa’

għax kollox żvalutat

u kollox daħna

u li issa huwa ż-żmien tal eżami tal kuxxjenza..

Alfred Grech

10/02/2020/