Din Hija L-Mixja.

Din hija l-mixja li rridu nagħmlu

Fin-narrattiva li ma tintemmx

Kien hemm min libes dawn il-ħwejjeġ

U llum jinsab taħt l-ilmijiet tal-oċean.

Din hija l-mixja tagħna

Fit-toroq imserrpin tal-belt

Iffulata bl-uġih ta’ wċuh

Li ma jarawx fejn qed iħarsu.

Din hija l-mixja li twieldet magħna

Fid-dlam tal-illużżjoni

U fil-qawmien ta’ kuljum

Tal-ħolm qadim tad-dellijiet

Li jiġru magħna u jħarsuna

Filwaqt li jaljenawna

Minn dak i qiegħed jiġri

Matul il-lejl mudlam

Tar-ruħ biex lanqas hemm

Ma noħorġu ’l-barra mill-binarji.

U hekk nibqgħu ta’ kulljum

Nibdew il-vjaġġ mill-ġdid

Mingħajr ma nafu fejn se naslu.

Alfred Grech.

21/02/2020