L-Iljieli Tiegħek.

L-iljieli tiegħek bħal xemx li qatt ma tinżel

għax tmur titbekka mistoħbija wara ċ-ċpar

u d-dalma xorta taqa’.

Jien ninżel u ninħall fil baħar tiegħek

fil baħar sieket tas-silenzji.

Il-granet tiegħek bħal ġita fuq ix-xifer

pass, pass fil biża’ ta’ min iħobb jittarraf,

iżda taf sew kull rokna f’dawn l-inħawi

għax din il-mixja għamiltha kemm il-darba.

Kliemek bħal krema fuq l-għaġina

bħal żiffa tisfidak fis-skiet tal-ħemda.

It-tarf ma tafx fejn hu imm’hemm trid tasal,

sadanittant jien nibqa’ hawnhekk nistenna.

Alfred Grech

30/06/2018

LVII.

F’jum ir-rebħa tal-kbir Levita Martri,

Il-ħsieb farfett li jimraħ u jistħajjel,

Fil-beraħ jew magħluq fi skiet kamarti,

Bla reqqa daqs li kont daqsxejn ta’ tfajjel.

Żgur aqwa min-nirien fidi qawwija,

Żgur aqwa mit-theddid, mhux se tintelaq,

U tiżboq kull uġih, fuq kull tbatija,

Għax tilmaħ l’hemm id-dawl iroxx fix-xefaq.

Il-martri qiegħdu t-toqol tal-ġid tagħhom

F’ħoġor id-dinja, ħadd ma qagħad jitlajja,

U bħas-suldati, xejn ma ħadu magħom,

Ħfief u qalbiena qabdu t-triq tal-ħajja.

Lil Valerjanu u ’l-min irid jistagħna,

Nuruh il-morda, l-foqra, tal-Knisja l-għana.

Alfred Grech

Festa ta’ San Lawrenz – 12 ta’ Awwissu 2012.

Imnalla Hemm Int

Imnalla jkun ix-xatt tal-art

għax il-baħar jibla’ kollox.

Imnalla jkun ix-xefaq

għax tibqa tara għal dejjem.

Imnalla titfaċċ’int

biex tgħidli safejn nasal

tgħollili l-purtiera

biex nista nħares barra

u nħossni ħieles

Alfred Grech

29/06/2018

Dar-riefnu li qajjimna.

‘Mma x’hemm jifridna lilna t-tnejn

jekk mhux il vortiċi li jqajjem riefnu

u l-bir bla qiegħ ta’ dlam minn fejn tnissilna.

“Mma x’hemm jifridna?

M’hemm xejn!

Hemm din il-forma tal-karta pesta

li fiha jassarna l-ġenju

bħal-lampa t’Aladin

jew tal-flixkun mitluq għal riħu

fuq ix-xtajta.

Imbagħad bqajna t-tnejn miblugħa

u mistagħġbin

kemm stajna nagħmlu ħsara

lil xulxin

b’dal vortiċi li jifridna

b’dar-riefnu li qajjimna.

Alfred Grech

28/06/2018

Jien Ħsibt

Jien ħsibt li kont se ġġib il-ġenna miegħek,

wasalt! u kollox baqa’ bħal ma kien.

Komplejna t-tnejn fit-triq id f’id biex naslu

u l-ferħ tal-wegħeda ma sibnieh imkien.

Kont ħsibt li għandek dak li kelli nieqes

u għalhekk flimkien se naslu għat-total,

imbagħad intbaħna l’hawn xi ħaġa nieqsa

u bilġri bdejt infittex kif ninħall.

Alfred Grech

27/06/2018

Jien Naf Eżatt.

Jien naf eżatt minn fejn kont tlaqt

u issa fejn sibt ruħi.

iċ-ċimi li ħallejt bl-għajnuna tagħhom,

kienu l-ħbula li jiġbduni.

U sibt kif norbot ma moll ġdid

u nerġgħa nitfa’ l-ankri,

ftit ftit niżżerżaq bdejt ukoll

u nersaq lejn ix-xefaq.

Lilhin minn fejn kienu jgħidu

li hu l-aħħar tad-dinja,

fejn hemm l-infern. fejn hemm ix-xjaten

fejn tieħu sabta kbira.

U ħadt sabtiet u erġajt waqajt

u naqa’ kemm il-darba

kull meta nemmen lilhom.

Jien naf li jien tbiegħedt

ħriġt barra mill-mogħodija

il-barra mill-perkors traċċjat

kif kienet tgħidli ommi.

Iżd’hemm ma sibtx ix-xjaten

u lanqas il-fenomeni,

hemm sibt li kont illuż

bid-dħaħen tas-setgħana.

Kastigi ħadt kemm trid

għax beżgħu li se nheżżeż

il pedamenti u l-kolonni

tat-tempji simulati.

Illum tbiegħedt, m’għadnix fejn kont

u lanqas naf fejn sejjer,

naf biss li issa drajt

u mhux se nerġa’ lura.

Alfred Grech

26/06/2018,

LVI.

B’dak li tgħallimt, il-ġid li kelli nfaqtu,

Erġajt dort dawra mejt ma xatt il-baħar,

Dak li ħallejt warajja bdejt inlaqtu,

Erġajt għamilt kullana biex niftaħar.

Lil hinn minn dan ix-xefaq lanqas tara,

Lil hinn mix-xtut minsija ta’ dil-gżira.

Il-liġijiet ġarrewhom il-burdnara,

U nħbew wara subgħajhom ta’ bla mira.

Għalkemm inġorru lkoll din it-tagħbija,

Viżjoni ma baqax, jew ftit milwija,

Il-maġġoranza taħseb bħal tarbija,

U jien ma nafx għaliex ħadt ftit għalija.

Imbagħad xħin jiġi l-lejl ma kull tifkira,

Jaqbadni ferħ ta’ ġenn u dieqa kbira.

Alfred Grech.

12-08-2012

Għaliex Emmint.

Għaliex emmint li ħadd ma jista’ ħliefek,

li tidħol f’ħajjti u hekk insib serħan.

Timlieli ħajjti b’kullma qatt stajt noħlom.

u ngħix f’dan l-għeden bħal Adam ferħan;

Għaliex emmint li jista’ jkun ħaddieħor

li f’daqqa waħda jibdel l-univers

ta dak li tħoss u dak li hemm madwarek,

u bqajt ma ntbaħtx li jiġri b’mod invers;

Xħin jiena neħles minn dal ġenn ta’ xewqa,

u nerġa’ noqgħod waħdi ftit bil-kwiet,

nintebaħ li kull ħtieġa ġġiegħelni ninsa

il-waqt li qed ngħix fih, dal waqt fis-skiet.

Alfred Grech

25/06/2018.

Iċċartet Ruħi.

Iċċartet ruħi xħin stennejtek ġejja

u bqajt nistenna w’int ma dehert imkien.

Mistħajjel kollox kien, għalxejn nixxennaq,

kien kollox frugħa, xejn ma kien li kien.

Jien biss irrid li noqgħod hawn ftit waħdi

fi nżul ix-xema ta’ jum li qed inin,

l-ebda sorpriża f’dad-deżert li jnessi

biex ngħix il-waqt sakemm isir il-ħin.

Alfred Grech

24/06/2018

Meta.

Meta ma tkunx in-narrattiva

ta’ dak li nġorr fuq dahri

l-imgħoddi mimli ħtija bħal korazza tal-bebbuxu

Jiena nkun sew

 għaliex inkun bla xkiel.

Meta ma niggranfax mas-sħab u l-kannizzati

ta’ dak li għad ikun għax mimli qtiegħ il-qalb

jiena lanqas ma nidejjaq

għax naf li ngħix illum.

jiena dak it-tfajjet ċkejken ta’ bla ħażen

jemmen f’kollox u f’kull ħadd

li jmiss il-kwiekeb għax saru baxxi

li jinfew waħda waħda tul il-mizja.

Meta ma nkunx miegħek

u ma jkollu ‘l-ħadd madwari

nibda nemmen li qed ngħix,

li qed ngħix fiż-żmien it-tajjeb.

Alfred Grech

21/06/2018

Urania

E se lei non verrà

non deve cadere il mondo!

Se lei non verrà

avro’ piu’ tempo libero

per me, per la mia anima

per te o dea incandescente

che ogni tanto mi venga a trovare.

E se lei non verrà

non ci saranno i predatori

per fare preda di ogni traccia

che noi lasciamo in dietro.

E cosi sara’ un palcoscenico efimero

sul quale abbiamo recitato il nostro drama

una cosa che poteva esistere solo

nella speranza.

Alfred Grech

19/06/2018

Inti Li Għandek Wiċċ ta’ Qaħba.

Int li għandek wiċċ ta’ qaħba

Sikwit tonfoħli r-riħ ġo wiċċi u toħloq skoss l-irwiefen,

Int taf tirahanli ħajjti

U tifdili serħ ir- ruħ,

Għaliex ir-rahan taċ-ċaħda

Jinsab fid-dnub ta’ telfa

U l-agunija ta’ fuq ix-xifer.

Imbagħad tqum l-għada filgħodu

U jerġa’ kollox għal-li kien

Fuq artal il-konswetudni

Fl-ermitaġġ tas-solitudni.

Inti wkoll tisa’ tkun l-anġlu

Li tnewwilli ftit idejk

U teħodni fuq is-sies tat-tentazzjoni

Minn fejn jiena naf immiss is-sema.

Alfred Grech

19/06/2018

U Meta Lmaħtek Ġejja.

U meta lmaħtek ġejja

iġġorr il-ferħ f’idejk

bid-dija ta’ elf kewkba

intbaħt li dak l-abbiss oskura li kien belgħani

kien biss id-dlam ta’ kull misteru.

U xħin flimkien imxejna nofs it-triq,

intbaħt ukoll li dil-mogħodija

għaddejna minnha kemm il-darba.

Imbagħad mit-trab tal-art ix-xewqa nibtet

bħal warda li saqqejt għal kemm il-darba

u baqgħet dik li kienet – xenqet it-tafal.

Biż-żmien tinbidel int,

ninbidel jien

jinbidlu wkoll il-ħofor

li konna qed niskopru.

Alfred Grech

16/06-2018

Fil-Ġenesi Hemm Miktub.

Fil-Ġenesi hemm miktub

Li n-Nefilim tgħaxxqu bil-ħlewwa

Tal-bniet tal-Bniedem,

Sa waslu biex ħaduhom b’nisa tagħhom,

U minnhomk twieldu l-ġiganti.

Int forsi ridtni nkun il-ġgant

Neħilsek mill-ħbieb tiegħek,

Jien iżda kont minnn qabel naf

Li gwerra ġa mitlufa.

Int bdejt tibgħatli mal-ħamiem

Missivi konfliġġenti,

U l-ħamiem baqa’ jtir

U għadda minn fuq rasi.

Imbagħad intbaħna t-tnejn

Li konna ngħixu ħrafa,

U jiena l-anġlu ribelli

Meta mħabbtek kienet divina.

Alfred Grech

14/06/2018

Lil Valerie.

Ma stajtx tqajjimni int u lanqas it-telefonata

Ir-rqad hu helu wisq għar ruh imjassra.

Għaliex xħin tibda tongħos imqar ir-ruħ,

Xi jżomm din il-valanga

Tal-indifferenza milli tordom kollox.

Int tgħid li dipressjoni,

Jien ngħid li xerq iż-żmien,

U d-dlam ta’ lejl bla qamar u bla kwiekeb

Idawwal biss l-abbiss fl-ingratitudni.

Il-bosk kien iffullat u jien fittixtek,

U jekk ħadd ma jiftakar fik,  tibzax,

Għax jien niftakar.

U l-bogħod li hemm bejnietna għad jiqsar

F’seħer ir-ruħ u b’taħbit il-qalb.

Alfred Grech

2/06/2018

Meta Tibda Tistaqsi.

Meta tibda tistaqsi

U l-mistoqsijiet jibqgħu ġejjin

U l-ebda tweġiba ma toqgħod fil-keffa

tal-mistoqsija seħbitha,

tħossokx li qiegħed tilbes libsa li ma tiġikx

u tmur quddiem il-mera 

biex mingħalik tilludi ruħħek?

Issib li xejn mhu xejn u x-xejn hu kollox

U l-ebda xefaq ma jifred

Il-baħar tassew mix-xtajta simulata.

Jiena u int iltqajna fi żmien ħażin

U f’ħin li lanqas jaqbel.

Għaliex xħin jiena ridt nidħol bħal bebbuxu ġo qoxorti

Int ridt tmur tkompli ttajjar

It-tajr tal-karti.

Jien naf li jekk jgħaddi ż-żmien

Hemm kliem sottili aktar li nista’ ngħidlek

U inti tibda’ tifhem.

Iżda sal-lum int għadek ma straqtlix

Dak il-misteru li jiena ridt noffrilek,

Għax int mhux dak li trid.

Fil-karta tal-ħelsien li jien fassalt għalija

Mhemmx int għax inti bqajt ma ħadtx il-forma

Li tixraqlek.

Jekk trid illum tingħaqad miegħi

Ġo dil-kappella ta’ l-iskonsolati

Nintonaw is-sinfonija tal-enimmi

U ntennu kliem Koħelet

O frugħa tal-frugħat u kollox frugħa.

Alfred Grech

11/06/2018

Le Jien Ma Nimxix Miegħek.

Le jien ma nimxix miegħek,

jien għandi r-ritmi tiegħi.

Int tagħġġel wisq għalija

u lanqas na fejn inti sejjra.

Hemm punt ta’ tluq

u punt ta’ fejn it-tnejn niltaqgħu,

iżda mil-bqija,

ikun ħela ta’ ħin u sikkatura żejjda.

Nixtieq li kieku nibqa’ sejjer

u nara fejn se tmur tistaħba x-xema,

Għaliex inkella xejn ma nieħu lura d-dar

jekk mhux id-dwejjaq ta’ xemx deluża

li qiegħda ftit, ftit tegħereq.

Alfred Grech

10/06/2018

Int Tista’ Tkun.

Int tista’ fraka tkun ukoll tar-ramel,

li timla’ dad-deżert tas-solitudni:

qanpiena matutina li tirxoxta

dir-ruħ mirduma fl-għass tal-multitudni.

Int tista’ tkun il-qatra li trid timla’

il-baħar ta’kull xewqa seduċenti,

u fl-infinit tal-firmament imewweġ

int tista’ tkun il-kewkba trasluċenti.

Int tista’ tkun il-ħmura ta’ filgħodu

li jirrifletti s-sura tas-sbuħija,

il-fdal tad-dieqa hekk kif tmur in-nida

f’saltnet is-seħer kif joħolmu l-bqija.

Alfred Grech.

09/06/2018.

Isma’ L-Ħsejjes.

Isma’ l-ħsejjes siekta li jiġu minn imkien

u agħti widen għal waqt wieħed

bla ma taħseb.

Hemm tweġibiet li huma ikbar mill-mistoqsiji tagħħom

li ħadd ma għandu l-ħila qatt jistaqsi.

Iftaħ idejk għall-kull ma jiġi

imbagħad tintebaħ li mqar min ried jagħmillek il-ħsara

ta’ min jitħassru

għax hu marid u inti mħux se tfejjqu.

Tista’ biss tfejjaq lilek innifsek

mill-marda li tittieħed.

Għanni l-għanja muta li ma tafx

imqar jekk int stunat

tintebaħ li sirt l-aqwa għannej

kompositur mill-kbar xħin tingħaqad

mal-ħsejjes ta’ madwarek, il-ħsejjes tal-ħolqien,

f’dan l-univers jissussulta, jivvibra u jgħanni.

Alfred Grech

08/06/2018

 

 Epithalamion

(Lil Marie u Ryan li ngħaqdu fiż-żwieġ 06/06/2018)

Intom allat ta’ olimpu

u inti Imene wild Urania

li tkun minn ta’ quddiem fil-marċ nuzzjali,

wassal lil dix –xbejba għażiża lejn seħibha.

O Imene Imeneaus f’dil-lejla ta’ sirda u żiffa ħelwa

li tonfoh l-għaniet inkantevoli tas-sireni.

Dawwar ma dwar rasek ward ifuħ u weraq tar-rand,

itfa’ fuqek il velu maestus u xidd is-sandli tad-deheb

biex tmexxi din il- purċissjoni lejn il-quċċata tat-twettieq

f’dan il-lejl iħeġġeġ bil ferħ, bil-għana u bil-melodiji li jixirqu.

Olqot l-art b-riġlejk u iftaħ l-għejjun tal ors u tal-imħabba.

Sejjaħ lix-xbejba u uriha t-triq lejn żewġha

sabiex tingħaqad miegħu fl-imħabba dejjiema

bħalma tingħaqad u titgeżwer il-liedna mas-siġra li magħha tixxabbat.

Intom xbejbiet f-ilbieskom trasluċenti

għalikom jum bħal dan għad irid joqrob

ingħaqdu intom ukoll fdil-litanija ta’ tifħir u għana

ta’ mħabba li hi tassew imħabba bejn mara u raġel.

Minħabba fik  o kbir Imene il-ġenituri  jkunu fuq ix-xwiek,

l-għarus jistenna u x-xbejba tkun ħerqan biex jitilgħu din it-tarġa

ta’ ħajjithom fit-trapass bejn iż-żogħżija u l-għaqal maturat.

Inti teħles u tgħaddi f-idejn iż-żagħżugħ il-warda ta xbejba

li tieħu minn ħoġor ommha.

Mingħajrek xogħol Venere hu bla fejda.

Mingħajrek kull dar tibqa’ bla wild,

il-ġenituri jibqgħu weħidhom,

u mingħajr ir-riti tiegħek kull ġens tonqoslu s-sinsla

li hi l-familja magħmula u mrawma minn raġel u mara.

Iftaħ mela l-bibien li jieħdu l-bogħod għaliex ix-xbejba waslet,

l-għarus ma jdumx jistenna u d-dawl tar-rifletturi

jilmaw u juri s-sbuħija ta’ dil-koppja.

Tibzax ja xbejba, għaliex ebda tiġrib ma jdallamlek il ferħ u l-ħeġġa

li huma sehemek. Ersaq il-quddiem u ersaq lejna

bħal dik is-sultana nieżla mit-taraġ imperjali.

Inti tisboq il-gjaċint li jgħolli rasu ‘l-fuq mill-għana kollu ta’ ġol ġnien.

Ersaq il-quddiem ja xbejba, dan huwa l-waqt li jagħmlek mara

isma’ l-għanja tagħna

għax żewġek huwa l-prinċep tal-irġiel, mogħni bil-ħila li

kienet dejjem xiehda ta’ għemilu.

U bħama d-dielja taqbad u u xxeblek ma kull sigra li ssib

hekk huwa jħaddnek u jagħmelk tiegħu għal tul iżmienijiet.

Ja Imene Imenaeus

ġibilna awguri tajba sabiex din il koppja

tista’ tħares ’l-quddiem u tgħix fil hena u fil ġid li jixirqu lil kul uman

għal tul iż-żminiiet.

Alfred Grech

07/06/2018

 

.

.

LV.

Le, le, mhux jiena kont illi tradejtek,

U wiċċ ħaddieħor rajt isbaħ minn tiegħek,

Mħux miegħi kont qed timxi mbagħad ħallejtek,

Filwaqt li dal-ħin kollu nħokk kont miegħek.

Le, le int kont tagħmilha ma ħaddieħor,

Xi ħadd li kien iħares lejk xort’oħra,

Għadek sal-lum m’għażiltx wieħed minn ieħor

U tfixkel ma xulxin, imġieba m’oħra..

Le, le mhux jiena kont, mhux jien emminni,

Kien tas-sireni l-għana ġo widnejja,

Indħil l-allat, jew sibt min iġenninni,

U waqa’ d-dlam u ċpar fuq xfar għajnejja.

Le, le jiena ma kontx, dak kien ħaddieħor,

U inti żgur għaraft wieħed minn ieħor.

Alfred Grech

07/08/2012