MWEJJEĠ AĦNA.

Ngħumu f’wiċċ k-ilma

mal-mewġ li jġorrna . . .

sa xfar ix-xefaq

biex ninsew mnejn tlaqna,

ninsew il-mewġ tal-bieraħ,

ninsew aħna min aħna.

Mwejjġiet aħna,

tqanqil ir-riħ li jnsessi,

taż-żiffa li tonfoħ mill-punent

u ġġib in-nixfa.

Sħaba ta’ weraq niexef

f’waqtiet ta’ ferħ u ta’ tbatija

nittajjru mal-għabra,

ninkinsu mill-buffuri,

ninbarrmu fl-uragani

t’għajru mħawad.

Alfred Grech

30/09/2018

Ir-Riħ Inewwaħ.

Ir-riħ inewwaħ

u jiena nħossni li qed naqta’ nifsi.

Mhux ir-riħ li jħabbel xagħari

(kull tisbita tqajjimni min nagħas),

iżda ċ-ċafċif jinsab fil-wiċċ

u l-bir tar-ruħ bla qiegħ.

Ir-riħ inewwaħ

u miegħu ningħi jien

bħal ruħ li ħarġet mill-ġisem

u tilfet it-triq,

tilfet in-niċċa tagħha

qalb dawn l-irwiefen.

Dawn huma s-sireni

waqt ħbit ta’ attakk mill-għajru

iħabbru l-aħħar tad-dinja.

Alfred Grecg

28/09/2018

L-Oxxenita’.

Fl-aħħar sabu ż-żejt jew il-minjieri tad-deheb

Huma li draw iħarrku d-dras tal-ingranaġġ

U tal-inerzja

Ipejjpu d-dlam supra statali supra naturali

Jikkontemplaw l-asppartamenti tal-miljuni

Li jinbiegħu fuq il-pjanta virtwali ta’ din l-art ħelwa

l-Omm li tagħtna isimha,

bil-miljuni tal-miljuni imferrxa u ma jistħux

biex jiftaħru li n-negozju qiegħed jikber

mal-investiment u mal-ekonomija.

Aħna nippublikaw il-poeżija oxxena

Fuq il-bibien u twieqi tal-irjus

Imbagħad nistaħbew fil-kmamar imnaqqxa

Bl-umdita xħin huma joħorġu flushom bil-gżuż

Fil-bramel taż-żibel

Bl-ilbies ta’ taħt imtabba

U noqgħodu nisimgħu il-leħen

Tal-biża u tat-terrur li jinfed il-ħitan taċ-ċelel.

Hekk huwa l-ġejjieni ta’ nazzjon mgħedi fit-tenessija

Tal-aljenazzjoni u l-affluwenza

Li issa beda jobżoq in-nirien fil-bibien ewlenija

Tal-lukandi tal-ħames kwiekeb

U aktar ixxarrab bil-pitrolju

Tal-ħwienet tax-xorb u t-tabarini.

Saret purgatorju ta’ did-dinja

Li tgħaddi minn triqat u tibla’

Kull ma jgħidu dawk li jaħsbu u jitkellmu għal-ħaddieħor

Għalina, għalihom għal kullħadd.

Noħolmu l-ħolm tad-drogi

Tal-ħmir il-lejl u tal-profeti foloz wara ljieli

Ta’ bla rqad, ta’ drogi,tal-alluċinjazzjonijiet

U tal-aljenazzjoni.

Għaddejjin minn toroq li ma jwasslu għal imkien

Minn sqaqien għomja bħall-iħirsa li jidhru

Iżda li mhumiex għajr il-bnedmin

Li magħom niltaqgħu ta’ kulljum.

Dawn huma l-istejjer li jixxardru fuq l-Aħbarijiet

Il-ħrejjef tal-mogħodija taż-żmien.

Alfred Grech

26/09/2018

LXV.

Għax jien f’tal-ferħ il-waqt għollejt idejja

U xejn ma noqgħod nara x’jiġri wara,

Intix qed taqsam miegħi xħin tkun ħdejja,

Inkella taqleb tibda dak li ġara.

Għax jien ma nixtieqx li għad xi darb

Imissek dak is-sehem li mhux għalija

Fuq karru li nisilfek taħrab ħarba,

Għaliex it-triq li qbat mhix ħlief mogħodija

Li twassal għad x’imkien li jkun imbiegħed.

Biex nasal għad sa ħdejk inrabbi l-ġwienaħ,

U nitlef naf is-sens ta’ fejn jien qiegħed

U nibda’ nara kollox qisu l-bieraħ,

Sakemm il-mejt jaqbadni f’dawk l-inħawi,

U naqa’ fl-art u ddur ix-xemx madwari.

Alfred Grech

02/11/2012

 

Kif Nista’ Qatt Ninsik.

Hemm ismi fuq kuxtejk tatwat

U  f’ruħi hemm it-toqob ta’ kull ħtija,

Il-fdal tat-tentazzjoni fuq xuftejja,

U nġorr fuq ġismi l-marki li ħallejtli.

F’kull pass li nagħmel hemm l-uġih

Tas-sogħba għax reġa’ bdieli

Is-sogħoba tal-mixja mhjix kompluta

Tal-kwiekeb li  jintfew

Tal-qċaċet li qatt ma ntlaħqu.

Fuq il-ġilda nġorr il-grif

Tal-poeżija li ħarbixna int u jien bejnietna.

Kif qatt nista’ ninsik.

Alfred Grech

24/09/2018

Issa Li Drajna.

Issa li drajna x-xiwi ta’ dis-sħana nfernali

globaliżżata bħal kapitali jifrex it-tentakli

u jidħol ġo kull rokna u jinfed saħansitra l-fissuri l-aktar fondi

rajna kif għamilna biex inzidu aktarit-taħwid

u l-iskart u n-nugrufun fl-arja  li nibilgħu

għax issa drajna wkoll nilqgħu il ħsara ġo ġisimna

kif wkoll kull skart diġitali, efimerali,

li jittieħed bħala tagħrif, aħbar, inkella kull xort’oħra

ta’ tagħlim  li fiħ irridu naqdfu.

Ejja nitgħalmu t-tagħlim ta’ dawk l-ixxamplati

li jiftaħru bil-mixi l-quddiem

b’ekonomija dejjem tikber

in-negozju qed jiżdied u mitt skuż’oħra

 biex ikompli jisolħu, iqaxxru u jfaqqru

dil-blata f’nofs il-baħar fejn jgħum il-ħut il-kbir.

Ejja ma nnewħux aktar għax issa xtutna ftaħnihom beraħ

għall-miħja ta’ kull xorta ta’ profeta

taħt l-iskuża li issa Malta saret Ewropea

u għamilna l-qabża fil-kwalita’.

Imma niftakru wkoll li s-setgħa hija l-akbar ċaħda tal-jien eaġerat

għaliex il-jien li jaf min hu ma jinħtieġ ebda setgħa

biex ikun dak li hu

u lanqas ifittex li jgħix f’ħaddieħor

jew fil-fama li ħaddieħor għandu tiegħu.

Alfred Grech

23/09/2018

Int Jista’ Reġa’ Bdielek.

Int jista’ reġa’ bdielek

u wieqfa, bqajt għaddejja

B’idejk miftugħa beraħ

tistenna l-leħħa ġejja.

Int ħsibt li tlajt muntanja

fil- ta’ dil passjoni,

sibt ruħek ma tridx temmen

li din kumbinazzjoni.

U mxejna din il-mixja

bla ma staqsejna ’l-għala,

quddiem ir-riħ tal-bidla

f’idejna kwies battala.

Intlifna qalb il-folla,

fittixna ġewwa fina,

ix-xbieha ta’ ġol-mera,

u kull ma ż-żmien jagħtina.

Bil-biża li jitwieled

kull darba li tittajjar

ir-ruħ li għad trid timraħ

u togħla qed titħajjar.

U f’dawk il-ġanet siekta

bla tagħmel mistoqsija

tispiċċa s-seħer titlef

fid-dlam ta’ filgħaxija.

Imbagħad it-tnejn jistaqsu

ta’ dit-tapezzerija

għaliex it-tnejn qed ninsġu

u imxella ħjut bil-mija

Alfred Grech

22/09/2018

Impotenti u Bla Saħħa.

Impotenti u bla saħħa din il-karba

li toħroġ mill fissuri u mill-għerien ta’ qiegħ ir-ruħ

tixxabbat u tiggranfa mal-gollieq

biex tispiċċa fil-widejn indifferenti

ta’min għandu l-flus u għandu setgħa.

Fejn huma dawk il-qċaċet tal-għoljiet

li fuqhom trid tistrieħ is-saħħa u l-ħajja ħienja ta’ dal-poplu

L-irjus li jinxtraw mill-għasafar tal-ħtif

u jsarrfu ta’ għodda fil-magna

li titħan u trambal u tkisser ix-xewqat u l-ħolm

tat-trasfigurazzjoni tal-pajżaġġ u tal-ambjent.

li fih ilkoll nieħdu n-nifs, nitħarrku u nitrejjqu?

Impotenti u bla saħħa dan il-poplu mal-profeti tiegħu

quddiem din l-għarukaża u dil-ħniżrija

fuq il-mitbaħ ta’ Mommone

fejn ir-ragħwa tal-wiċċ issebbaħ il-fdal tal-bastiment li għereq

ta’ din il-prostituta li f’idejn il-manigoldi ta’ ħafna flus

żverġnat u żvinat lilha nnifisha biex tpaxxihom.

X’ser jgħidu dawk li jiġu minn warajna

dawk li jiġu minn ħafna mili l-bogħod

u jxerrdu dmugħ tal-kukkudrilli

għal din l-art ħelwa, l-omm li tagħtna isimha?

Daqs iż-żibel u l-iskart qed jagħtu każ

ta’ x’jaħsbu n-nies u jrid il-poplu

li jistħoqqlu, illum iktar minn qatt qabel

li jimraħ, iberraħ ruħu u jieħu n-nifs f’dawk l-inħawi

li huma wirt minn Alla.

Din hija dik ix-xbejba li spiċċat f’idejn il-manigoldi

li baqgħu jinfdu u jaqsmu l-laħam dghajjef,

li baqgħu jonfħu dejjem jonfħu dil-bużżieqa

li qatt ma trid tinfaqa'.

U issa li kullħadd ixxaħxaħ f’semhu tal-kemxa

li jqassmu l-ħallelin wara xi serqa

x’ser ngħidu aħna lil uliedna u ulied uliedna

taż-żminijiet li għad iridu jiġu,

aħna l-gwardjani tal-wirt ambjentali u spiritwali

li ħallewlna dawk li ġew qabilna,

ta’ dak li jagħmilna dak li aħna?

Aħna nħrsu bla jindaħal f’din it-traġedja rriversibbli

ta’ flus, flus, flus u aktar flus?

Alfred Grech

20/09/2018

Muża.

Għalik ħallejt lil mara li ħabbitni

għax ħsibt li qed tfixkilni

u inti femmina per eċċellenza

kont qiegħda tghir.

U  issa li sfajt armel u hawn nistenna

int qajla tiġi żżurni.

F’dil-mixja solitarja tlaqtni waħdi

eżatt xħin kelli l-aktar ħtieġa

tal-anġlu li jurini x’għandi nagħmel

biex noħroġ mid-deżert ta’ bla konfini.

Daqs it-tisfir tal-grillu s-sejħa tiegħek

bla mistennija.

Alfred Grech

20/09/2018

Intbaħt li Stajt Weġġajtek.

Intbaħt mli stajt weġġajtek

Imqar mil-bogħod

U kull messaġġ li ibgħat

Inaqqas id-distanza ta’ bejnietna.

Is-solitudni tiegħi

Bħal ittra li tibgħatli

Imbagħad nitlaqha hemm,.

Bħal f’xi rumanz id-diskursati ta’ bejnietna

Mimlija rtokki u qari ta’ prova

Kliem imqiegħed ħdejn xulxin idoqq għall-widna.

Iżda maż-żmien jintesa’ kollox

Jisfaru jew jiqdiemu mal-karta li fuqħa mitbugħa.

Meta rġajt ġejt lura f’ħajjti

Jiena lanqas ma qagħadt lura.

Issa noqgħod niġbor il-weraq  niexef tal-ħarifa

Fejn imħażża l-ismijiet

Ta’ dawk l-erwieħ li qatt ma twieldu.

Alfred Grech

16/09/2018

Kif Tista’ Tgħix Għal Dejjem?

Kif tista’ tgħix għal dejjem

jekk darba qatt ma kont,

Jekk qatt ma kont xi ħaġa

jewk kollox kien rakkont?

Int kont biss fi sbuħitek

għal waqt hekk dejjem bqajt,

mhux fama għal min jiġi

jew dak li qatt ma rajt.

Jien xtaqt li mqar xi darba

għad nilħaq dak l-istat

mingħajr ma qatt ninbidel

għal dejjem iffissat.

Xi ħaġa tkun inbidlet

u nħossni xħin inqum,

m’għadnix kif kont il-bieraħ

u mmut ftit ftit kuljum.

U xħin tiltaqa’ miegħi

issib li jien inbdilt

ġurnata wara l-oħra

mingħajr ma tkun tfixkilt.

U fl-aħħar xejn ma jibqa’

mank dak li hu pinġut

m’hemm xejn xi treġġa’ lura

jew seta kien tradut.

Għax aħna żmien jinbidel,

u tgħid ġejt il-quddiem

u tieħu dak li jiġi

bis-sabar u fis-sliem.

Għalhekk kif trid li tibqa’

jekk darba qatt ma kont,

u lanqas għal waqt wieħed

ma qatt tajt rendikont?

Alfred Grech

18/09/2018.

Li Kont Bebbuxu.

Li kont bebbuxu noħroġ rasi

wara l-ewwel ħalba.

Jekk bħali tterraq ir-ramel tad-deżert

ma tislet ebda faraġ

minn dak li ssib madwarek.

Maqtugħ mill-bqija

tkun tlift id-direzzjoni

u dari saret mhux biss rifuġju

iżda pjaneta.

Jien naf li ġejt tħabbatli

iżd’issa tlift ix-xeħta

u l-kuntatt.

Alfred Grech

15/09/2018

La Toftoqx.

La toftoqx u la tiflix u la tgħidlix x’hinu

l-istil ta’ dak li naħseb.

Int  x’int, int biss tifkira.

U jekk ma tinbidilx

int tista’ tgħix għal dejjem.

Xi ħaġa tmut ġo kif

kull meta tiġi lura

sakemm ma jibqa’ xejn

minn dak li kont xi darba.

Għax ta’ kull darba terħi ftit

mill-ġbid tal-ħabel li jissikka

tinbidel int u tibdel dak li tkun

tmur kontr dak l-emmint

u ċċedi dejjem biċċa

sakemm tmur tfittex

u ma ssib xejn minn dak li kont qed taħseb.

Biex tibqa’ tgħix għal dejjem trid

ma tinbidilx inkella

tibda timxi b’lura.

Alfred Grech

16.09.2018

Imbagħad Inħares Dritt F’Għajnejk.

Imbagħad inħares dritt f’għajnejk

u ngħidlek: Int sabiħa

u dritt nintebaħ li jien sirt kollni kemm jien tiegħek.

L-ebda seħer m’hemm f’dan kollu

bħal meta tiddisprezza lil xi ħadd

imbagħad tindiehes miegħu.

Għar mid-duħħan li jippumpjaw il-vetturi

li jniġġes l-arja tagħna.

La tħallinix inħoss il-ħtija

kull darba li nkun ħdejk

ta’ xi dnub jew xi deliit

li qatt ma kkommettejt

inkella kkundannat għal-għomri.

Alfred Grech

14/09/2018

LXIII.

Ir-ruħ trid ħaddan hi lid-dinja tagħha

Fil-ħemda twieżen dak li għal ħaddieħor,

La jista’ u lanqas jiflaħ, hi ġġor magħha,

Tbati, u ma tgħarafx min waqt għall-ieħor.

Ir-ruħ trid tfittex hi l-għeliem minn tagħha,

Kolonna ta’ duħħan f’deżert il-ħajja,

Jew tiġi minn x’imkien, jekk għad tismagħha,

-          Fis ħalli minn idjek, u ejja wrajja-.

U jekk qalb dat-tfixkil hemm it-tweġiba,

Ma tiġi qatt għaliex imkien m’hemm wiri,

Qalb dal-pajżaġġ imħarbat trid issibha

Biex hekk għad jasal darba tmiem il-ġiri.

Imbagħad tistaqssinix kif sibtni qribek,

Inkella ’l-min staqsejt sabiex insibek.

Alfred Grech

15/10/2012

Ħsejjes.

Il-ħsejjes tat-takkuna b’ritmu mdaqqas

Jisiltu s-swied il-qalb ta’ sqaq imwarrab

U ntennu dak li ngħidu

Bi kliem meqjus li jaqta’ xafra.

Kont nibza’ li niltaqa’ għad ma waħda bħalek,

Issa li ltqajna naf li tgħodd għalija;

Għalija biss.

Id-dinja tiegħek għandha żewġ emisferi:

Dak li hu tassew u dak li hu

Desakrazzjoni flagranti.

Int tgħid li ma tridnix inkun tallab

Biex tista’ tidħaq bihom.

Jien lanqas naf jiniex ferħan

Għax qiegħed nara lilek hawn quddiemi

U ma nafx jieniex inċedi għall-uġih

Inkella rbaħt il-biża’.

Int għanbdek xeħta ta’ min jistenna jisma’

Xi ħaġa ħiemda u siekta daqs ix-xorti.

Alfred Grech

13/09/2018

Jekk Noħroġ Mill-Binarji.

Jekk noħroġ mill-binarji

Immur fi dlam il-lejl,

Inħossni qiegħed naqdef

ġo wisa’ ta’ bla kejl.

U jekk jien nieqaf naħseb

U naħrab mit-treddin

Il-folla n-nies tad-dinja

Fid-dramma ta’ kull ħin.

Inrabbli ġwienaħ ġodda

U f’daqqa nibda ntir,

Il-fuq mis-sħab li jgħarrex

Ġo sema ikħal nir.

U noqgħod nikkuntempla

Xi jfisser dan il-ferħ

Li teħles minn tal-bniedem

Ix-xkiel u tgħix fis-serħ.

Alfred Grech

13/09/2018