Se parlo Con Te.

Se parlo con te, io parlo col vento.

Se cerco dentro di me, io sto cercando te.

Se sento una canzone nell’aria, ascolto te.

Quando mi senti domandare senza aspettare una risposta

E’ perche sto cjiedendo tante cose di te.

Tu, che in questa immensita’ riesci a fare la differenza.

Con te ascolterei i silenzi del crepuscolo,

e l’incantesimo del tramonto.

Alfred Grech

31-07-2017

Sirt Biċċa Mill-Inkwadru.

Trid toqgħod għal li jiġi,

U tagħmel bħal ħaddieħor,

Tintebaħ li sirt bħalhom

U xejn ma kien mod ieħor.

Tintelaq mal-kurrenti

Tistaqsi jekk hux sewwa

Li drajt minn dejjem tagħmel

Qatt toħroġ minn hemm ġewwa.

U taħseb li hu tajjeb

Għax hekk għallmuk minn ċkejken,

Għaġnuk kif riedu huma,

Bqajt inti biss l-imsejken.

Għax hekk ħażin jew tajjeb

Hu dak li għallmuk huma,

Int lanqas biss mod ieħor

Ma taf, għax hekk miżmuma.  

Sirt biċċa mill-inkwadru,

Minn dak li tisma’ u tara,

Il-lixka li jbellgħuleIeh

Imwaħħla mas-sunnara.

Jekk tħoss lu sirt ribelli,

għax fik hemm l-anarkija

Ifisser qed tistejqer

Minn dik l-anomalija,

Li trid bilfors titgħallem

Tagħlim u ħażen tagħhom,

Biex terġa treġġa’ lura,

U ma tqisx ruħek magħom.

U tibda tħoss l’int ħieles,

U tagħmel kif jidhirlek,

M’għandekx bżonn ta’ xi mgħallem

Biex jgħidlek x’għandek x’tagħmel.

Akfred Grech

30/07/2018

Ħawnhekk.

Hawnhekk jien niġi biex nitkellem miegħek,

Inkella naħseb dak li taħseb inti,

Jien nikteb dak li tfesfes int f’widnejja,

U niġi nfittxek f’dat-triqat minsija.

Mnejn dari kienu jagħattu l-karrettuni

Il-mogħoż u n-nagħaġ u l-annimali ġwejjda,

Fejn ebda ħoss tal-bniedem ma jinstema’,

Għajr grillu mbiegħed solitarju jsaffar.

Il-lejla tibki s-solitudni tagħħha

Qalb is-sqaqien li mkien mhu ser iwasslu;

Matul it-toroq jidwi ħsejjes qodma

Bibien, arkati twieqi bil-persjani.

Warajhom ebda widna ma tissemma’

U l-ebda għajn moħbija mhu qed tara.

Fil-fewġa kiesħa ta’ riħ fuq inixxef

Il-ħwejjeġ fuq il-pereċ lanqas jidhru.

Nistħajjel li qiegħeda hawn int mistoħbija,

Fil-qamar felli jibki t-telfa tiegħu,

Jistaħba wara s-sħab u jerġa’ jidher

Inkella qalb il-kwioekeb li jittawlu,

U jwieġħdu nostalġija f’sema minsi.

Int tibqa ma tidhirx u mank titniffes

Jien noħlom li fis-sħab qed nara wiċċek.

Alfred grech

29/07/2017

Ma Niskantax Jekk Tiġi.

Ma nistkantax jekk tiġi

Imqar jekk sirt duħħan,

Sibilla tat-turmenti

U tat-twemmin pagan.

Bħax-xemx li tinżel siekta,

Fuq xefaq mimli ċpar,

Warajk ja profetessa

Qed niġri lej  u nhar.

Għax ma kontx għadni nafek,

Ridt niġi bla bla ksuħat

Il mansab ħsibijieti,

Mal kosbor tax-xewqat.

Inħossok bħalma tħossni,

Bħal qisu qam ir-rih,

Fil baħħ etern tal-kosmos

Qed tinseġ is-sabiħ.

Xħin ninsa l-għanja tiegħek,

Intir, warajk insus,

‘L-fuq mill-agħa tal-folla

U s-sema nibda nbus.

Alfred Grech

28/07/2017

130.

Int tisħet il-mument li sirt taf lili,

U tgħd li bqajt kif kont qatt ma ninbidel;

Jien nemmen li d-destin qed jilgħab bina

U ma narax għaliex ma tridx taf bija.

It-tnejn qed nibku ż-żmien li fih trabbejna

U ngergru għax id-dinja mhix ħanina,

Interrqu t-tnejn mogħodija separata

Jew toroq dritti li qatt ma jiltaqgħu.

Int bqajt ma ntbaħtx x’inhi l-aljenazzjoni

U jien ma nafx għaliex qieghdin nitbiegħdu.

It-tnejn nissieltu, nfittxu li hu tagħna

U tnejn nirraġunaw għax hekk qalulna.

Bil-kwiekeb tilgħab int u bil kometi

Jien negħereq fl-oċean tas-solitudni.

Alfred Grech.

27/07/2017.

X’Ikun Għalik Ifisser.

X’ikun għalik ifisser

Li jkollok lili ħdejk?

Ma nkunx qed jien nisraqlek

Id-dehera l’hemm f’għajnejk?

X’ikun għalik ifisser

Li nimxu t-tnejn flimkien,

Ma nkunx jien qed intellfek

Li tqatta’ l-isbaħ żmien?

X’ikun għalik ifisser

Li tgħidli: Inti biss!

U taf li t-tentazzjoni

Għad tiġi nkiss, inkiss.

X’ikun għalik ifisser

Li tidħol ġewwa sqaq,

Ma tafx kif toħroġ minnu,

Għax sqaq hu tabilħaqq.

X’ikun għalik ifisser?

Ma jkun ifisser xejn.

Għax dan hu destin wieħed

U l-ġrajja tagħna t-tnejn.

Li ltqajna f’din il-ħajja

U ħbatna ma xulxin,

U t-tnejn nistaqsu bdejna:

Tassew! Ħawn fejn qiegħdin?

Alfred Grech

27/07/2017

GĦALFEJN QED TAGĦĠĠEL

Għalfejn qed tgħaġġel. Għad naslu xorta waħda. Hekk jew hekk iż-żmien mintix se ġġebbdu; lanqas se tqassru. Is-seħer fl-rtibija tiegħek hu qawwi daqs kemm taħbat tkun qribi. Kull ċaqlieqa ta’ ġismek tirradja tqanqila ġdida. U kull kelma li toħroġ minn fommok ittenni dak kollu li jgħaddi mingħalija.

U nerġa’ nibda nagħraf lili nnifsi, xħin int tinbidel f’xewqa. Jekk int ma tintebaħx, jekk int ma taqranix ma tista’ qatt tifhimni. Jien ngħaġġel, ma ngħaġġilx għax din il-mixja tista’ ttul imqar sa għada u jiena u int nistgħu ngħaddu ż-żmien kollu intennti l-passi.

U hekk nibdew ninsew fejn konna bdejna, xħin nintelqu għaż-żiffa bħal weraq tal-ħarifa. Xħin ngħixu s-skiet nibdew nifhmu aħjar aħna min aħna. Imbagħad tifhem aħjar x’hinija l-ħemda u tirrispetta l-bogħod li hemm jifridna, is-skiet li jien ninħtieġ.

Jien noqgħod nilgħab b’dak li jista’ jkun bħal min jivvinta d-dellijiet waqt li nkun miexi biex mingħalija nkun qed noħloq lilek, inti li qatt ma kont.

Alfred Grech

26/07/2017

TASSEW TINSAB IL-BOGĦOD.

Tassew tinsab il-boġħod

Minn kif naħsibha jiena,

U dak li qed intenni

Tgergir ta’ ruħ għajjiena.

Noqorbu, mbagħad nitbiegħedu

U nsibu kif inbdilna

Int tibqa’ tgħid li tħobbni

U nagħmlu kif jiftlilna.

Inti tinsab il-bogħod

Imqar jekk taħseb għadek

Li qiegħeda bieb ma bieb

Ġo ħoġri għax l-imbid ħadek.

Għax jien fl-aħħar mill-aħħar,

Jien ngħid li lanqas nafek,

Dak li xi darba rtbaħna

Kien hawn, ħaduh ix-xjafek.

Alfred Grech

25/07/2017

Adele

E’ meglio se non ci incontriamo,

Perche se ci vediamo un giorno tu chiederei da me

Quello che non ti posso dare,

Quello che tui aspetti

E quello che ti appartiene.

E’ meglio che non ci conosciamo

Perche’ cosi’ io non ti asspettero’

O pretendero’ che sei un altra

Che una volta ho incontrato.

Alfred Grech

25/07/2017

Kull Meta.

Kull meta nisma’ kelma tqila u twila

Bħal donnha ħarġet minn ġuf l-infinit

Jien nibda naqra l-ħsieb li għandek f’moħħok

Fis-sħana u ħedla ta’ das-sajf imqit.

Int tibda’tħares fiss  fi ħbub għajnejja

Ir-rima tiġi w’ħedha sa ma r-ritmu jfur

U nibqa’ negħereq f’baħar ta’ bla xefaq

Interraq il quddiem mingħajr ma ndur.

Kull meta nibda bħal fil-lehma mqanqal

Għaliex trid toħroġ bla ma tkun l-istess

Il-karba u jiena xejn nista’ ma nagħmel

Ħlief niftaħ il-bieb beraħ tal-ingress.

Alfred grech

24/07/2017

Jekk Taħseb Li Din Hija Poeżija.

Jekk taħseb li din hija poeżija,

aqraha kemm trid, agħmilha tiegħek.

Lili ma tolqotnix, għax għandha wisq min-narrattiva

ta’ dak li qatt ma jseħħ.

Jien mgħaddi mill-infern ta’ xi meries,

u meta niġi lura nħobb intenni

dak li ħasejt xħin kont għaddej minn ġol-meries.

Intenni li ħassejt imżewwaq b’ritmi mlewna

u l-karba tiegħi tistħajjilha l-għanja tal-imnikket.

U jekk mhux jien li kont għġaddejt minn ġol-meries,

inqiegħed lili nnifsi fi-żarbun ta’ min kien għadda,

u nħoss li qiegħed nifhem sewwa sew

l-uġigħ, il-qtiegħ il-qalb

u dak li jġiegħelni ntenni,

dak li qed nistħajjel.

Mill-bqija din għad tista tkun ukoll

il-poeżija liebsa libsa

ta’ min imur għat tieġ bla mhu mistieden.

Alfred Grech

24/07/2017.

Hemmhekk Għad Niġi Nfittxek.

Hemmhekk għad niġi nfittxek,

Fil-kjażmi tal-blat għeri;

Hemmhekk qrib xatt il-baħar,

Fejn l-għana tal-isferi.

Hemmhekk fejn xejn ma jikber,

Fejn lanqas l-annimali

Ma jesqu biex ifittxu

Jitrejjqu, u kollox bagħli.

Hemmhekk fejn lanqas warda

Ma tikber, lanqas ħlejjqa

Fid-dlam tal-għar jirbombja

Ġo mina dejjqa dejjqa.

Fid-dlam ta’ xquq mudlama

Minn hawn san-naħħa l-oħra,

Fir-ritmu li jirbombja

Id-diwi ta’ ħajj’oħra.

F’ġuf l-art lil taf il-bidu

Tal-ġrajja kif tissawwar,

Hemmhekk fejn ħadd ma jfittex,

Qrib baħar qed ifawwar.

U ndum sakemm insibek

Biex hekk tkun int għalija

Li darba kienet kewkba

Dil-ħebla barranija.

Alfred Grech

22/07/2017

U Jekk Niltaqa’ M’Oħra

U jekk niltaqa’ m’oħra,

Mingħajr l-imgħoddi tagħha,

Il-ġrajja li ttenniha,

U d-dinja li ġġor magħha.

U jekk niltaqa’ m’oħra,

Ma tkunx bid-diadema

Li taħbat ma dik tiegħi

U nħarbtu b’hekk l-iskema.

Trid tkun minn xi dar oħra,

Titkellem b’lingwa ġdida

U ġejja minn pjaneta

Li għad irrid nisfida.

Jekk għad niltaqa’ m’oħra

Tkun ġejja mnejn tkun ġejja

Li tħares fiss f’għajnejja,

Tkun taf taqrali jdejja.

Alfred Grech

21/07/2017

Jekk Int Tħares.

Jekk int tħares kull fejn tħares

in-natura stess turik,

illi kollox il-kuntrarju

tiddejjaqx, tieħux għalik.

Għax jekk tħares kull fejn tħares

dejjem hemm polarita’.

Kollox għandu l-kontra tiegħek

u mhemm xejn bla parita’.

Jekk għall-frotta hemm dukkara,

kemm għall-warda u għall-blanzun,

mingħajr fertiliżżazzjoni,

xejn ma jnissel, xejn ma jkun.

Imma llum bl-imbuttaturi,

jew inkella ma nafx xhiex,

tista’ tkun ukoll newtrali

bħal fejn qabel ma konniex.

Tista’ żżewweġ bla ma tlaqqam

tista’ tnissel bla dukkar,

Kollox sar daqshekk virtwali,

bla ma taf mnejn ġej, fejn mar.

Imm’għiduli tista’ tnissel

kemm bis-sew jew bit-tfixkil?

Jew inkella tista’ tkattar

bla maskil jew feminil?

Min m’għarafx id-differenza?

tibda’ tgħid xhinu n-normal?

Xejn mhux xejn kull perverżjoni

tibda tħawwad moħħ it-tfal.

Min m’għarafx id-differenza

mhux ħlief blugħa jew ksuħat?

Biex taparsi ftaħna moħħna,

bqajt jien biss dak l-antikwat.

Alfred Grech

19/07/2017

129.

Jekk ma tiġix illum qatt mhu se tiġi.

Jekk noqgħod nistenniek int lanqas tiġi.

‘Mma jiena xorta waħda nibqa’ mqajjem

Nistenna li xi kewkba għad titbissem.

Indawwar il parabbola ta’ ruħi

Għal fejn aktarx tkun ġejja t-trasmissjoni.

Jien nibqa’ mqajjem ngħodd inkella nżebbeġ

Iż-żibeġ tal-kuruna tar-rużarju,

Inkella nsib xi mantra li tnessini

Id-dwejjaq ta’ kuljum u l-konswetudni.

Int qajla tħobb titfaċċa bla ma tħabbat,

Wisq inqas tħobb li jiġi fil-pakketti,

Inkella f’xi kontenitur tal-plastik.

Imbagħad intbaħt li qatt ma seta’ jkolli

Mara oħra xħin ikolli l-pinna f’idi.

Alfred grech

17/07/20176

Baqgħu Jibnu, Baqgħu Jghollu.

Baqgħu jibnu, baqgħu jgħollu

Baqgħu jagħffġu kullimkien

Baqgħu jibnu u mbagħad iħotti

Fejn stajt timraħ m’hemm imkien.

Baqgħu jibnu, baqgħu jgħollu,

Ma kien hemm kontroll imkien,

Għax mhemmx rieda li nsalvawha

‘L-dinb l-art ħelwa mit-telfien.

Baqgħu jgħidu li se jsibu

Soluzzjoni  bla dewmien,

U ħallew lil min iħarbat

U jinkwina kullimkien.

B’hekk issib l-ekonomija

Baqgħet tikber u tiżdied,

U qalulna li se ngawdu

għax ma jiġi xejn bil-fsied.

Baqgħu jibnu, baqgħu jgħollu

Biex m’għad baqa’ kenn imkien

Fejn tistrieħ u toqgħod waħdek

Tgħożż il-ħemda tal-għerien.

Għax taħt skuża jew taħt oħra

Riedu jkomplu jagħmlu l-flus,

Għax mingħajrhom xejn ma tagħmel

U la tgħannaq, lanqas tbus.

Ħadd ma żammhom, baqgħu jibnu,

Dawn qed biss jiżviluppaw,

Biex hekk Malta ssir ftit isbaħ,

Toqgħodux tikkritikaw.

Faqqsu l-ispekulaturi,

Qalu sew, u bir-raġun

Żdied il-qliegħ ukoll it-talba,

Dan żvilpupp, m’hemmx paragun.

Baqgħu jibnu, baqgħu jgħollu,

Issa lanqas hemm fejn tmur,

Tieħu n-nifs u xi ftit arja,

Għax issib spekulatur.

U komplew bużżieqa jonfħu,

Donnha din ma tinfaqax,

Għaliex jonfħu u jibqgħu jonfħu,

Tagħtix każ! Ma jimpurtax.

Iżda tiġi għad ġurnata

Niġu nfittxu u ma nsibux,

Rokna waħda bil-ħamrija

Jew il-ward għax ma jikbrux.

Alfred Grech

16/07/2017

Taħt Skuża Jew Taħt Oħra

Taħt skuża jew taħt oħra

Qed jagħmlu li jaqblilhom,

U jġibu elf raġuni

Biex jagħmlu li jfettlilhom.

Iħarbtu dak li nafu

Għax huma progressivi,

Jingħoġbu ma kull wieħed,

Jitqiesu permissivi.

U n-nies? In-nies mhux tifhem

X’hemm sew mitfuħ fis-sasla,

U ħadd ma jrid jitkellem

Għax jibża’ jidħol f’basla.

U ħadd ma jrid jitkellem,

Spiċċajna bla miżura,

Jew jibża li jinqabad

Fil-morsa tal-għajjura.

U ħadd ma jrid jitkellem,

Kien l-amar tal-mexxejja,

Tal-tribujiet il-foloz,

Bl-għajnuna tal-qaddejja.

U baqa’ għaddej ir-romblu,

Irambal fl-inklużżjoni,

Jew kien ir-riħ tal-bidla,

Jew diskriminazzjoni.

Kelb rieqed l’għaliex tqajjmu?

U trid tivvinta r-rota,

Għaliex ħabib ta’ qalbi

Tistrieħ fuq min jivvota?

Alfred Grech

14/07/2017

They Wired Us Up.

They wired us up

They told us about the love and the pain

And the sentiment

And we believe them

But then we learned

That nothing lasts forever.

They tell us to stay back

And peep out of the window

To see the rainbow.

And then we realized

That what we so

Was also monsters.

They did not want us to play

With the forms and the shapes we created.

And made everything else a sin.

Alfred Grech

14/07/2017

U Jien Kont Lest Li Naqra.

U jien kont lest li naqra fil-ġrieħi ta’ ruħek

Il-biża’ tagħna t-tnejn

Minkejja t-tbissim tagħna.

U mxeja mal-kurrent sa tarf ix-xifer

Mingħajr ma qatt ħarisna lura.

Iżda llum m’għadx hemm is-sottiljezzi

U dawk il-ħwejjeġ kollha li jagħmluni

Mhux bħal bqija.

Imbagħad nibdew nistaqsu lilna nfusna

Dan kollu fejn se jwassal

Jekk aħna nbidlna u lanqas għadna

Ningħarfu minn kif konna.

Inti bdilt lili

Jien bdilt lilek.

Iżda, qabel ma ninfirdu ridt nistaqsi:

Għaliex il-ħolm li ħlomt ma kienx bħal tiegħi?

Alfred Grech

13/07/2017

Kollox Lellux

Kollox lellux li ma jlellilx

Imxellel fis sliem li ma jsellimx

Maqsum fi tnejn u ma jaqax

Ma nafx fejn nerġa’ nista’ nsibek.

Ja sirena li ma tgħannix

U ma tgħaddix minn dawn l-inħawi,

Tiela’ u nieżla ma mewġ imewweġ

Ma xtut li ma jidhrux,

Kien hemm żmien li kont titfaċċa

Bla ma jistiednek ħadd.

U f’nofs ta’ nhar ta’ jum ta’lulju

Wiċċek jitfaċċa ma kull ipotesi

Imżewewaq mal-urieżaq muti

Li jsajjru l-għeneb li ma jxenxilx,

Sibilla tħares lejja

B’idejha marbutin

U bi tbissima fuq xofftejja.

Jien nibqa’ hawnhekk qed nistenniek

Taħt din id-dielja li taf il-ġrajja tagħna.

Inperreċ ruħi f’dal-kliem

B’hekk biss inħossni qed nistagħna.

Alfred Grech

12/06/2017

Das-Sajf.

Int għedtli: ejja ħdejja u jien nittrasformak.

U sirna bħal ġelat jinħall fid-dawl tax-xemx

U sirna bħal bramniet iwerwru xatt il-baħar.

Fix-xemx ta’ lulju tisreġ l-iġsmna tagħna

Saru bħal noti plasmati

Fuq partitura mdewwba tifrex pawsi ħorox

Bejn nifs u ieħor.

L-iġsma tagħna bħal strumenti

Jdoqqu sinfonija

Li ġġiegħelek taħseb sew u tħobb għal dejjem.

Is-sajf iġiegħlni mmiss is-sema b’idi

U naqbeż ngħum fil-baħar ta’ bla truf,

Fejn hemm ibejjtu l-gawwi tat-tifkira

U hemm fejn tista’ tmur tistaħba r-ruħ.

Das-sjaf li donnu għadu qatt ma beda

Li jgiegħelni nibda nferrex

Il-karfa, l-weraq niexef u l-petali ta’ ward il-fantasija

Biex nerġa’ nikkonvinċi lili nnifsi

Li ninħtieġ l-akrobazija.

Alfred Grech

11/07/2017

Taħbit l-Eternita

(B’apoloġija lil Tarcisio Zarb l-awtur tal poeżija li tibda

hekk: “F’dix-xemx kariga ta’ din is-siegħa. . “).

F’dix-xemx tikkarga l-qilla

tat-tiben irrumblat,

tfajliet jistiedni ħarsa

minxura fuq il blat.

Nistkennu mix-xemx tisreġ

taħt l-oqsfa tar-razzett

tan-nies antiku tagħna

għad-dell tal-parapett.

Kif aħna stupefatti

fl-ispazji miżgħudin

bil-ġmiel tas-sardinelli

u l-ħemda ta’ kull ħin.

Il-weraq li jitniegħed

u jolfoq bħal miblugħ

hekk kif dix-xemx oranġjo

fil-flieli wkoll ruh.

Tqaxxarna minn ħajjitna,

għax ngħixu f’dal-wesgħat,

biex niżru mal-iwrieżaq

ta’ firmament stampat,

U taħt dal-mistiċiżmu

poeta, fqir, plebew,

itenni skuntentizza

mal-ħlejjaq li għaddew.

Perennement tismagħha

it-talba tal-ġirien,

tiżżerżaq mal-imwieżeb

mas-shana tan-nirien.

Bla tarf l-irħula tagħna

u bħalhom fl-umdita’

tal-bjar fir-raba tagħna,

taħbit l-eternita.

Alfred Grech

09/07/2017 

Ikun Diżasru.

Ikun diżastru kbir tassew jekk niġi

mingħajr ma jkolli lesta poeżija.

Għax jiġi li nkun dħalt fil maqdes għeri

mingħajr ma nkun ġarrejt l-offerta miegħi,

u ġejt ngħannilek għanja u nerġa’ lura

u ġejt nistħajjlek qiegħda fid-dar tiegħi.

Għax jiena u int irridu nuru kollox

u nibqgħu nuru kollox dak li jidher,

u x’hemm minn wara l-kwinti qatt ma tara,

sakemm it-tmiem għad jasal, jasal l-aħħar.

U b’hekk ma nintebħux li xejn ma nbidel

u nibqgħu nuru kollox bħalma jidher,

sabiex mingħoġbu wkoll fid-dlam tal-massa,

u hekk nistħajjlu kollox baqa’ miexi

fis-sliem u s-skiet u x-xejn ta’ dejjem.

Xi minn daqqiet ma nafx kif se nfissirlek,

u forsi aħjar hekk.

Alfred Grech

0870772017

Jien Niġi Kull F’l-Għaxija.

Jien niġi full f’l-għaxija qalb id-dlam ta’ wara l-bjut,

biex nara jekk noqrobx xi ftit u nsib id-differenza ta’ bejnietna.

Min jaf jekk teżistix? Min jaf hemmx oħra bħalek?

Kull filgħaxija ngħaddi minn dat-toroq li jrossu wara t-twieqi u l-antiporti

d-dlamijiet li fihom naħbu

dak kollu li jgħoddx matul il-jum

u ma jingħadx fid-dawl tax-xemx.

Kull filgħaxija ninża’ l-qoxra li taqdini tul il-jum

u nindiehes mal fewġiet is-serħ li tmewwitli kull indiema.

Kull filgħaxija nintasab ngħarrex bħalma jgħarrex is-sajjied

għall-xi kewkba li trid taqa’,

imm’inti mhux lakemm tintlemaħ.

Kull filgħaxija naħseb li wasalt fejn kelli nasal. Iżda nsib

illi dħalt fi wieħed mis-sqaqien ta’ wara l-kantuniera.

Jien ħlomt li ġejt niltaqa’ miegħek ja ruħ li taf tfarraġni,

fit-taħlita ħsibijiet u konġetturi.

Għalhekk it-tnejn irridu naqsmu ħajjitna ma xulxin

għaliex ma kienx hemm għazliet oħra x’nistgħu nagħżlu

għajr illi t-tnejn noqgħodu nħarsu ġewwa l-mera.

U jekk ma tkunx tassew, aktarx noħolqok jiena.

Alfred Grech

03/07/2017