Telqet Sena Oħra.

Qatt daqs dis-siegħa

Ma bdejt inħoss

Kemm huwa fieragħ

Tiġbor u tross.

Telqet sen’oħra

Ma baqa’ xejn

Minn dak li għedna

Kollu għalxejn.

Xjaħna sen’oħra,

Għadna l-istess,

Nagħmlu l-iżbalji,

L-ebda  progress.

Għadna noħlmu

Li jkun aħjar

Għada ,bħal bieraħ

Li ma u tar.

Hekk dir-rutina,

Ngħixu kulljum

Xejn ma jinbidel

Xejn mhu se jdum.

Alfred Grech

31/12/2016

Din Hija s-Sinfonija.

Din hija s-sinfonija

Li ssegwi l-aħħar att,

Xħin jinżel is-siparju,

U bħalha ma smajt qatt.

It-tmiem ta’ din is-sena,

It-tarf ta’ dal-perkors,

Fost ħafna ġigġifogu

U merħba waqt dal-għors.

Iċ-ċiklu jkun inħela,

Is-saħħa tkun infniet,

Fi nżul ix-xemx inemnem

Tal-jum ix-xema ntfiet.

Bid-daqq tat-trombi u l-għana

Dan l-għabex tal-allat,

Il-ġamar tal-ħuġġieġa

M’għadux illuminat.

Kull xħin niltaqa’ miegħek,

Niltaqa’ miegħi stess,

Kull xħin nitkellem miegħek

Għalxejn, m’għamiltx progress.

Jien sirt is-sinfonia,

Ta’ dak li qatt ma kien,

Tindaqq fi tmien is-sena

Għax wasal issa ż-żmien.

Alfred Grech

30/21/2016

XI.

Erġ’ejja qabel jasal tmiem id-dinja

Bid-daqq tat-trombi madawwar kollok dija;

Bejn il-ħażin u t-tajjeb aqta’ linja,

Biss lili niċċa għamilli ’l bogħod mill-bqija.

Erġ’ejja, għaliex ħakmitni s-sensazzjoni

Li jiena posti sewwa qatt ma sibtu;

U għext sal-lum bil-ħseib u l-konvinzjoni

Li l-karru li ridt nirkeb qatt ma rkibtu.

Erġ’ejja, ħalli għal darb’oħra tiftaħ

Bibien il-ħabs ta’ ruħi, tirxuxtani

Minn qabar qtigħ il-qalb, u tgħinni nirbaħ

Dak kollu li ’l bogħod minnek jimbuttani.

Erġ’ejja, u did-darba flok tissallab,

Ħafifa għamilha għal min ikun jittallab.

Alfred Grech

29/09/2011

Fid-Dell Evanexxenti.

Fid-dell evanexxenti ta’ dir-ruh mitlufa

tixref biss l-apparenza; is-similitudni

ta’ dak kollu li xi darba kien jixxiebaħ.

Ejja saħħara tal-millenji,

ħalli xuxtek titliegħeb ma riħ fuqan

li jingħi salt ġagulatorji ta’ rwieħ minsija,

fid-dell ta’ trasparenza li qatt ma tidher.

Werżaq kemm trid id-dwejjaq ta’ jum ieħor,

il bikja tal-mewġiet li jmorru u jiġu,

li jmellsu ta’ kulljum max-xtajta tieghek.

Int tista’ tqajjem riefnu ħalli jiknes

il-ħmerijiet li ta’ bil-fors ikollok tisma’,

u tqajjem maltempata illi tqaċċat

l-antenni minn għeruqhom,

u hekk ma tħalli ‘l-ħadd bi kwietu.

Din tkun il-karba tiegħi li trid togħla

’l-fuq mis-sħab, lejn sema’ li f’dawn l-inħawi

ma jqanqal ebda faraġ.

Tista’ wkoll, jekk trid, taħsel bid-dmugħ tiegħek din l-art ħawlija

bħal meta jaħsel id-dulluvju li jġorr miegħu

il ħmieġ li s’issa nġemgħa,

kull qafas li jassarna;

għaliex fil-jasar issa nsibu t-triq tal-hena.

Alfred Grech.

28/12/2016 

Inżel Ja Dalma.

Inżel ja dalma lejlija ħa tnissi l-ennui

Jinqela’ ġewwa taġen il-ħin moħli,

Ifraħ ja qamar mistħi għax m’għadekx

Tkebbes ġewwa fija l-ġamar tal-ħuġġieġa

F’nofs kamp taħt sema ndifferenti.

Ifraħ, għaliex is-skiet ta’ din il-lejla

Jifdi d-dwejjaq u l-uġiħ inċidentali,

U int ja poeżija, ejja kemm trid

Busni, igdimni aħraqni għax jiena

Ngħix ġo din id-dinja, nawfragat

Fil-baħar infinit tal-ħela tiegħek.

Ejja u iktibli b’ilsna tan-nar fuq sidri

Tatwaġġ ta’ dak li huwa xieraq

Biex inkun naf hux qed nistordi

Inkella qed niġġennen.

Jew naħseb l’għad niltaqgħu

Biex tgħidli x’ikun dak li jafu biss il-kwiekeb.

Inżel ja dalma lejlija

Għax xħin inkun fil-beraħ

Jiżdiedu dawk l-ilsna tan-nar

Ġo fuklar imġemmed bir-rimorsi

Mas-serħan li tfittex lejla twila

Biex jiswieli f’dak kollu li rrid niftakar

L-għada.

Alfred Grech.

27/12/2016

Baħħari Jien.

Baħħari jien li nbaħħar lejn ix-xefaq,

mid-dawl għad-dlam, mill-għama erġajt ġejt nara,

mill ħajja għal mewt u mbagħad mill-mewt għall ħajja,

bħalma jgħaddu l-jiem taż-żmien ineżorabbli.

Jiena ngħaddi mill ksieħ tal-borra nieżla

għas-sħana ta’ xemx tisreġ f’nofs awwissu.

Ukoll minn ħsieb għall-ieħor bla nintebaħ,

u minn waqtiet ta’ ferħ għal dawk ta’ dwejjaq.

Int trid tkun dik li tgħid li l-waqt hu issa

u jiena rrid inħalli għal darb’oħra.

Fl-intensita’ ta’ qawwa sovrumana

inħares lejja stess sabiex ningħaraf,

bħas-sibilla li qatt ma fixklet waħda.

Hemmhekk issir il qabża li tinkwadra,

iċ-ċaqliqa bejn l-hawn u fejn tintilef.

Iċ-ċikli li bħall-għajru ‘mprevedibbli

imbagħad trid tibqa’ tgħid li trid tifhimni.

Alfred Grech

26/12/2016

Il-Lejla Għalxejn. 

L-antenna parabolika dawwartha,

Dawwartha l-lejla wkoll f’kull direzzjoni.

Fejn kont stat bqajt, għalxejn ġejt hawn nistenna,

Għar-rdoss ta’ dan it-tempju alluċinanti

Bħala dak l-evanġelista li ried jikteb

Rakkont ma jitwemminx mingħajr ma jikteb.

Il-lejla għalxejn tlajt ngħarrex fuq it-torri

Bit-tama li tolqotni l-fewġa tiegħek

Bil ħmura dawra mejt trasfiguranti

Ta’ xemx li tmur tinħeba wara x-xefaq.

U għalxejn fis-skiet u l-ħemda li nxett fihom

Biex ma taħrabli l-ebda leħħa tiegħek,

Nistenna bqajt, namrat li baqa’ jħobbha

Liż-żingara li taf idejħ taqralu.

Il-lejla wkoll stħajjiltek ġejja liebsa

Mantell ħamra biex tgħatti l-għera tiegħek.

Il-lejla wkoll għarrixt għal xi xintilla

Ta’ dik il kewkba li m’għadiex tibbrilla.

Alfred Grech

25/12/2016

Bejna Dan il-Waqt u l-Ieħor.

Bejn dan il-waqt u l-ieħor

Hemm biss l-eternita’,

Jekk jirnexxielek tifhem

Mintix fl-oskurita’.

Bejn dan il-pass u l-ieħor,

Xħin tfittex ma ssib xejn,

Hemm dit-taħbita u l-oħra

Tqanqila tagħna t-tnejn.

Bejn dan il-ħsieb u l-ieħor,

Issib għarfien ir-ruħ,

Tifhimni għax mal-ewwel

Sirt taqra’ wkoll l-imħuħ.

Fil-ħemda ta’ dil-lejla,

Ma nafx jekk tkunx hawn qrib,

Int tisma tpespis ruħi,

Li fik serħan issib.

Fis-skiet tal-lejl hemm dalma,

U f’qalbi hawn is-swied,

Hemm dwal ipetptu jgħaġġlu

Li żgur mhux tal-Milied.

U fost il-ħsejjes kollha,

U l-ġiri ta’ kulljum,

Hemm int quddiem għajnejja

Li nsibek malli nqum.

Bejn dan il-waqt u l-ieħor,

Id-dinja bejn ħaltejn,

Hemm l-infinit jifrida

U l-biza’ tagħna t-ntejn.

Alfred Grech

23/11/2016

X’Ġejt Infittex f’dil-Maxtura.

X’ġejt infittex f’dil-maxtura?

Ġejt infittex ma nafx xhiex,

Ġejt infittex it-tarbija!

Lit-tarbija ma sibthiex.

Hawn ix-xejxi, hawn il-fidda,

Hawn id-deheb u hawn l-ilwien,

Hawn id-dawl u mhux idawwal,

Xewqat sbieħ minn kullimkien.

Ġejt infittex ħafna ħwejjeġ,

Ġejt infittex ma nafx xhiex,

Ġejt inħaffer fil-baħħ tiegħi,

Dak li jien, dak li miniex.

Li stajt kont u li baqgħali,

It-tregħid tal-univers,

Biex inqabblu mal-polz tiegħi,

Insir naf kemm jien divers.

X’ġejt infittex f’dil maxtura?

Li kont nagħmel fis ħallejt,

Ġejt hawnhekk infittex l-hena,

Jew ma nafx hawn għalfejn ġejt.

Alfred Grech

21/12/2012

X’Ġejt Infittex f’dil-Maxtura.

X’ġejt infittex f’dil-maxtura?

Ġejt infittex ma nafx xhiex,

Ġejt infittex it-tarbija!

Lit-tarbija ma sibthiex.

Hawn ix-xejxi, hawn il-fidda,

Hawn id-deheb u hawn l-ilwien,

Hawn id-dawl u mhux idawwal,

Xewqat sbieħ minn kullimkien.

Ġejt infittex ħafna ħwejjeġ,

Ġejt infittex ma nafx xhiex,

Ġejt inħaffer fil-baħħ tiegħi,

Dak li jien, dak li miniex.

Li stajt kont u li baqgħali,

It-tregħid tal-univers,

Biex inqabblu mal-polz tiegħi,

Insir naf kemm jien divers.

X’ġejt infittex f’dil maxtura?

Li kont nagħmel fis ħallejt,

Ġejt hawnhekk infittex l-hena,

Jew ma nafx hawn għalfejn ġejt.

Alfred Grech

21/12/2012

Anche Questa Sera.

Ma perche’ anche questa sera sto pensando a te?

Forse perche’ sento la tua voce del selenzio,

Forse perche’ sono solo

E quando sono solo

Euterpe venga da me

Sussurrando nelle orecchie.

Mi piace pensare che sei gia dietro l’angolo,

Perche’ quando perdo il tuo fascino

Cosa rimarra’?

Ed io son sicuro che sei sempre pronta

A regalarmi una favola.

Alfred Grech.

21/12/2016

Out. Out, Brief Candle, Life is but a walking shadow.

Shakespear, Macbeth.

Għaliex ilbist dil-libsa,

Ma nafx fejn ser immur?

Sirt issa wieħed minnhom,

U hawn sibt ruħi ndur.

X’se jservi kull ma niġbor?

X’se nieħu bli tagħllimt?

Żgur mhux se jġorru miegħi

Xħin tlaqt, u nkun sellimt!

Tgħiduli, l’ għal ta’ warajja,

Ngħaddih, nafhulhom b’wirt.

Imbagħad xħin  lanqas huma

Ma jafu jien x’fissirt?

U waħda wara l-pħra

Ġenerazzjonijiet

Jintemmu, kollha jgħaddu,

Kullħadd imur fis-skiet.

U hekk millenji jgħaddu,

Jintefa’ kull musbieħ,

Jintfew ukoll il-kwiekeb

U xejn ma jibqa’ sħiħ.

U x’jibqa’ minn dak kollu?

Dak kollu l’hu sabiħ?

Dik kienet ħolma kbira,

M’hemm xejn, hemm biss ir-riħ.

Alfred Grech

21/12/2016

Milied 2016.

Kont ħsibt qed tistennieni,

Għalhekk ġejt jien malajr,

Kont ħsibt li d-dar se timla’

U nibda nizzik ħajr.

Kont ħsibt li ridt tarani.

Ma domtx  biex indunajt,

Mimlija bik innifsek,

U xtaqt li lura rġajt.

Ġejt hawn biex miegħek naqsam,

Il-ferħ ta’ dan iż-żmien,

Aħjar li ġie ħaddieħor,

Jew seta’ kien min kien.

Kont ħsibt li stajna nimxu

U nkomplu t-tnejn flimkien,

Din mixja li bdejniha,

Minn qabel beda ż-żmien.

Alfred Grech.

20/12/2016

Imm’ Hemm Tentattiv Ieħor.

Imm’ hemm tentattiv ieħor li ridt nagħmel,

Hemm kolp li ma jiswiex,

Kolp ieħor tal-aħħar

Ta’ min hu ddisprezzat.

Bħal dawk l-għannejja li jgħannu

L-imħabba qisha akkwist,

L-imħabba-ossessjoni.

Kuljum nitgħallem miegħek

X’inhuma dawk l-ispazji li tinħtieġ,

Biex terġa’ ttini prova

Li bqajt ma tgħallimt xejn.

Imm’hemm tentattiv ieħor

Bħad-dehra tiegħek f’nofs id-dramm

Li tagħti lok għal meravilji

Għal ħafna kutrumbajsi

Tal-ħsieb li ħsibtu mnebbaħ

Tal-ħolqa li m’għalaqtx,

Tax-xewqa f’ċirku imdendla.

Imn’alla ma kellekx ftit ħin għalija,

Għax dejjem impenjata,

F’dibattitu bla tmien bejn mewt u ħajja,

Bejn dak li trid u dak li jaqbel.

Bħal dawk l-għanjiet li jgħanni kull poeta

Li jibdlu l-ħajja ta’ kulljum.

Imbagħad staqsejt għaliex weġġgħuni

Jekk jiena nogħola fuq is-sħab?

Alfred Grech

19/12/2016

Anonima.

Aħjar m’għaraft qatt wiċċek,

U nibqa’ bejn ħaltejn,

Staqsejtek kemm il-darba

’Mma kollu kien għalxejn.

Aħjar ma nkunx naf ismek,

Noħloqlok wieħed jien,

Int tista' tkun hawn qribi,

Jew qiegħeda kullimkien.

Aħjar! Tgħidlix min inti,

Fid-dlam tal-lejl miżmum,

Int tista’ tkun kull waħda

Li nkellem ta’ kulljum.

Ja mara solitarja,

Dak leħnek fin, jirtogħof,

Fanal li qed jistiednek,

Jixgħellek dawl fil-bogħod.

Jekk qed l-imħabba tfittex,

Ta’ min ħalliek u ma,

Int kont li ftaħtlu l-bieba

’L-għasfur li tar u mar.

Jekk għadek qed tistaqsi,

Dan kollu mnejn sa fejn,

Int issa qed tintebaħ

Li kollox kien għalxejn.

Alfred Grech

17/12/2016

Fuq Dawn l-Iskolji Tfarrak il-Jien Tiegħi.

Fuq dawn l-iskolji tfarrak il-jien tiegħi,

Il-bogħod mas-swied il-qalb fl-iskur tax-xefaq,

Il-bogħod mil-baħar ħiemed ta’ dix-xtajta,

Fuq wiċċ il-qtar tad-dmugħ fejn għad jintefaq.

Fil-forġa tal-ħaddied fejn għad jissaffa,

Bħat-tafal li xi darba sar ċaqqufa;

Fid-dlam tal-wied mudlam fejn għadu jberraq,

Biex waħda, waħda jgħaddu s-snin mitufa.

Tħallix imbagħad xi għadma biex igerrem,

Raġuni jsib li jonfoħ daqs bużżieqa,

Ma tridx tħallilu qatt ir-riedni f’idu,

Imfissed daqs tarbija ġewwa n-nieqa.

Għax jista’ jkun ukoll li dit-tnehida,

Tkun skuża bħall-oħrajn biex  jiffjorixxi

Fil-masġar tiegħu stess irawwem drawwa,

Imbagħad ikun għalxejn tirreaġixxi.

Alfred Grech

15/12/2016

Għaliex Qed Tistedinni.

Għaliex qed tistedinni, biex nerġa’ nħares lura

Ja drijade ta’ dawn l-inħawi?

Erġajt ewwilla ħlomt bil fewġa’ tal-grigal?

Inkella b’qamar kwinta kollu mgħotti

Bit-tajjar?

Għidli Phoebe, għidli Atlanthea,

Jekk qattx rajtuh inemmes wara l-kwinti

Dal qamar mistħi wisq biex jerġa’ jqajjem

It-tqanqiliet tal-iskeletri?

Erġa’ newwaħ ġo widnewjja

Bħalma jnewwaħ il-grigal

Xħin jagħmel tiegħu ,biex nerġa’ ngħid li qed inħoss

It-tmellis tiegħek.

Erġa’ semmgħali dawk il-ħsejjes ta’ bil-lejl,

Biex forsi nikkonvinċi lili nnifsi

Li rġajt smajt leħnek.

Erġa’ newwilli

Bħalma tnewwel id-daqqiet ta’ ħarta

Kull meta sirt fidil u mbagħad bdejt nemmen

Biex ngħid li rġajt  sirt iż-żgħażugħ

U nagħmel bħalma jagħmel kien missierek.

U int, ja kewkba li tiddi meta trid,

Twieġeb meta jogħġbok,

Tgħidlix li qed inqanqal fik mill-ġdid

Xi ftit tal-għira.

Alfred Grech

16/12/2016

Bla Żmien.

Li kieku tkun taf kellek il-ġejjieni,

L-imgħoddi qatt ma kien, ma jaf bih ħadd,

Il-ħin ma jfisser xejn għax m’hemmx il-bieraħ,

U lanqas għada: dan ma jasal qatt.

Li kieku kellek taf jien x’jiena naħseb,

U jiena nħares lejk, ma nistaqsix,

Bejnietna t-tnejn m’hemm xejn, m’hemm ebda ħabi,

U tkun taf kollox fuqi u ma nistħix:

Inkunu t-tnejn qiegħedin ġo ċirku ngħixu,

Bħal żewġ tewmin bla bidu w lanqas tmiem,

Il-ħin bużżieqa, biha t-tnejn nitlgħabu,

U bħalma lura tmur, hekk ’l-quddiem.

Alfred Grech

06/07/2012

104.

Għaliex qed tgħidli dan, Mara tal-Għeden,

Daqskieku kont qed ngħix il-ħolma tiegħek?

Projjettazzjoni ta’ li nisma’ u nara,

Vagun maqtugħ mill-bqija miexi b’lura.

Nixtieq li nasal s’hemm ‘mma qatt ma nasal,

U lanqas naf tassew fejn għandi nieqaf,

’Mma naf li għadni għaddej fuq il-binarji,

U naf li f’tarf il-vjaġġ int tistennieni.

Bħal video clip li rġajt dawwartu b’lura,

F’għajnejk it-tqanqiliet li kont nistenna,

Inqarr dik ix-xintill lit rid tiġbor

Il-frak mil-bogħod, il-frak ta’ kwiekeb mejta.

Alfred Grech

14/12/2016

Int Tibqa’ Timbuttani.

Int tibqa’ timbuttanti f’dawk l-inħawi

Fejn għadu ħadd ma mar, fejn ma rridx nasal,

Għalkemm int għadekx hawn irrid bħal ninsa’

Dawk l-ibħara li stajt fihom ninnaviga

Id f’id miegħek. Xħin tlaqt ridt illi kollox

Jerġa’ lura bħal ma kien u ż-żmien jieqaf.

U jista’ jkun ukoll li għamilt sewwa

Li ma smajtx minni. Norqod u nistembaħ

Bil-ħsieb li qatt ma nżilt fl-infern tad-dinja.

Int kont l-allat tisfida tal-quċċata,

Biex tixli dak li ħadd qatt ma ried jemmen,

U jista’ jkun l’għalik il-mewt mhix temma,

Għalik dik kienet skoll għal min se jegħereq,

Bħal min jisfida ’lmin hu aqwa minnu,

Jew jinbex lil min lanqas jaf jirrabja,

Bħal min iżomm miftuħ il-bieb ta’ daru

Bit-tama li l-ħalliel ma jdumx ma jasal.

Alfred Grech

13/12/2016

103.

M’hemm xejn xi jqarreb biex għad nasal għandek,

Hemm biss il-melodija ta’ bla ritmu,

Hemm biss ir-rima tfewwaħ li ħallejtli.

Kullħadd iġorr it-toqol ta’ l-għelt tiegħu,

Uġiħ is-skiet marsus fi bwiet imtaqqba.

U għahekk, kullħadd qed jgħolli l-barrikati,

Ħitan għoljin li saru trasparenti.

Għax tgħid! Illum erġajt għaddejt minn moħħi,

Emminni, lanqas naf  għandekx tkun ħdejja

Hemm blata tonda tgħalaq il-bieb tiegħek.

Inti  li qbadt u tlaqt għax kont xebbajtek,

Jiena li dawra mejt dort kemm il-darba,

Jiena li kont immiss is-sema b’idi,

Jiena, li hawn nittama l’għad xi daraba. . .

Alfred Grech

12/12/2016 

102.

Il-lejla se nħallik tistenna’ l-qamar,

Bħal kewkba b’wiċċ imbikkem għax feruta;

Bħal dawl ikkunsagrat ta’ satellita,

Mis-sema wqajt u ntlift fis-skiet tal-lejla.

U jiena erġajt għal dak li mdorri nagħmel,

U jiena bqajt imdendel ma kull xifer.

Il-lejla l-qamar libes ir-raġġiera;

Il-lejla wiċċ il-baħar naqsu l-fidda,

Biex bqajt hawnhekk intenni litanija,

Bħal dagħjjsa solitarja nżomm f’wiċċ l-ilma.

M’hemm xejn fil-baħħ tad-dlam għajr kelb li jinbaħ

Għajr barbaġann li tilef is-sehem tiegħu

U lilek xlejt mal-ħoss tal-fewġa għaddejja,

Għax kelb li ma jinbaħx ma jafx lil sidu.

Alfred Grech

15/12/2016.

Carpe Diem.

Għaliex trid tgħix int fl-għada

Met’int qed tgħix illum,

Tibżax, għax għada jiġi

Malajr u mhux se jdum.

Għaliex tgħix fl-istennija,

Qed tgħix fl-oskurita’,

Għix issa u bla tintebaħ

Tkun tgħix l-eternita’.

Ukoll jekk għal jum wieħed

Fid-dlam tkun, mhux kuntent,

Mil wied tal-mewt trid tgħaddi

U tgħaddi wkoll bl-amment.

Ukoll jekk tħoss id-dwejjaq,

Ma tafx dawn minn fejn ġew,

Kun af li għada jiżbaħ

U jmirru minn fejn ġew.

Alfred Grech

09/12/2016

Int Missejtli Din Il-Korda.

Int missejtli din il-korda

Il-ħoss tagħha ma daqqlix,

Għax ħassejtu kemm il-darba,

Dat-tferfir ma jinzillix.

Int qed tilgħab logħoba goffa,

Int qed tqanqal ħafna mewġ,

Dil-ħuġġieġa li trid tqabbad,

Għandek mnejn iġġibha żewġ.

Imma taf li kull xħin tħares

Ġewwa l-mera ma tagħrafx,

Għax il-mera tirrifletti,

Mhux se tgħidlek li ma tafx.

Ma tarax kemm inti belgħa,

Ma tarax li mhux se tbiegħ,

Mingħalik li tlajt is-sema,

U sibt ruħhek hawn fil-qiegħ.

Ħeqq imbagħad, jien x’nista’ ngħidlek,

Jekk trid tibqa’ tilgħab hekk,

Hekk taf tgħix, dik hija ħajjtek,

Hekk taf tilgħab u daqshekk!

Alfred Grech

06/12/2016

Inmħossni Dik Il-Kewkba.

Inħossni dik il-kewkba

Li ma tistax tibbrilla

Minħabba dak li ġara

U baqgħet biss xintilla.

In-nawfragat fuq gżira

Fejn qatt ma jersaq ġifen,

Inkella kull minn jgħaddi

Jinsieħ, jew bħal indifen.

Dak kollu li ġie qabel,

Bħal leħħa kien, ta’ berqa,

U issa li sirt nafek

Li ġej ukoll bis-serqa.

Dak kollu li se nibnu

Bit-trab irid jinkesa’

Tinkiteb għad l-istorja:

Dan kollu jird jintesa’.

Alfred Grech

08/12/2016

101.

U jiena nerġa’ nfittex triq għal għandek,

U inti weara l-velu tal-ġejjieni,

U inti bħal baħrija qalba sewda

Iżżommni fuq ix-xwiek bil-profezija.

Madwar għajnejk stajt nara biss sorpriżi,

Mal-ħġieġ tat-tieqa mtappan bl-agunija,

Għaddieħ iż-żmien taħħbit il-qalb imjassra,

Marsusa bejn l-idejn li qatt ma fetħet,

Għax skuża ma sabitx, il-warda tagħna.

Intlift fil-labirint tal-mistoqsija

F’nofs uragan ta wġieħ il-jien imkabbar,

U bħal fidil iżilt fuq irkubtejja

F’nofs baħar iswed tuta mimli labar.

Stordejt bil-ġmiel ta’ ġismek u bil bjuda.

Alfred Grech

07/12/2016

M’Hemm Xejn Li Għad Xi Darba.

M’hemm xejn li għad xi darba

Jxabba’ dan il-ġuħ, għajr inti

Li għal darb’oħra għad trid tgħaddi

Mit-trasfigurazzjoni ta’ waħda

Mill-ulied ta’ Zeus.

M’hemm xejn x’jurini t-triq

Li għada trid twassalni

Lil hinn mix-xefaq,

Inkella fuq ix-xfar ta’ rdum

Li miegħu għad imelles

Mewġ il-baħar.

Jekk għad xi darba fost il-ħsejjes

Ta’ kuljum nitkixxef leħnek

Immur infittex qalb id-dellijiet

Biex nara nsibx lil-wiċċek.

Waqt li kienet nieżla x-xita

Deherli li smajt passik.

Hu biss il-ħolm li noħlom

U xejn aktar.

Alfred Grech

06/12/2016

Inti Li Miegħi Ġrejt.

Inti li miegħi ġrejt madwar id-dinja,

Żunżana ddur mal-bozza tat-triq tagħhna,

Int bqajt ma nbaħtx li dak li nagħmlu aħna

Fuq il-miżien taż-żmien m’għandux tifsira..

La tistenniex li f’d an ix-xatt ta’ baħar

Jitfaċċa għad xi mħallef li jibbrilla.

Ma tindunax li l-krib u d-dwejjaq tagħna

Ma jagħmel ebda mpatt fuq dan il-kosmos,

Li xejn ma jimpurtaħ. Indifferenti?

Tgħid int ukoll xi darba trid titgħallem

Li l-ħin li ħlejt kien mezz biex tista’ tinsa’,

Tgħid għadek int ma ntbaħtx li r-ritmi tagħna

Biegħeduna mill-eternita’ li ngħixu,

Biex tara u tifhem dak li hemm madwarek?

Jekk inti wkoll sibt ruħek f’dina id-dgħajjsa,

Dan ma jfissirx li t-tnejn fuq mewġa waħda,

Kull darba mbagħad li niġi biex nistħarreġ

Inkun qed nara jekk għadekx teżisti.

Alfred Grech

03/12/2016.

Qatt Ħsibt.

Qatt ħsibt kemm huwa faċli tgħid daqshekk ?

F’dal vortiċi bla rażan f’dil-burraxka,

Xewqat u tqanqiliet u elf delużjoni

Bl-aċċelleratur taħt saqajk?

Bħal dawk li jridu jipperswadu li huma wkoll normali,

Iżda li normali mhumiex.

U jinvokaw qawsalla ġdida tal-ilwien

Biex jaqsmu t-toroq.

Mhuwiex tassew li tirrifletti dak li tgħidli

Mhuwiex tassew kif tgħid li temmen kull ma ngħidlek,

Mhuwiex tassew; u jien miniex nixxiegħa t’ilma ġieri,

Għax jista’ jkun li drajtha wisq dit-telgħa,

Kif lilek nista’ nogħoġob,

Kif lilek nikkonvinċi.

U jista’ jkun ukoll dan l-oratur

Qed jitlef l-elokwenza.

Għax jiena qatt ma ridtek li tixjieħ quddiem il-mera,

Għax jiena qatt ma ridtek ta’ kuljum issir medjokri.

Alfrerd Grechj

02/12/2016

Taf x’Inħoss?

Taf x‘inħoss meta niltaqa’ miegħek għid?

Qisni qomt minn raqda u ma striħajtx

U nerġa’ nipprova nistrieħ u ma nistax..

Għax hemm żunżana żżanżan

U jien ma rnexxilix għall-kollox nagħlaq

Is-siparju.

Il-persjani tiegħek jibqgħu imbexxqa

Bħal magħluqin ’mma mhux għal kollox.

Bħal bieba ta’ trabokk li trid taħtafni.

Taf x’inħoss meta niġi lura minn għandek?

Inħossni bħal kexxun battal,

Bħal nixxiegħa li ma tnixxix

Inħossni bħal xjenzjat li jrid ifassal teorema

U ma jafx kif,

Inkella esploratur ifittex dinja ġdida.

Alfred Grech

01/12/2016