Li Kieku.

Li kieku kont is-sieħba kont ninfixel,

U kont ir-raġel tiegħek sibtni mhedded.

Jekk jersaq ieħor lejk u jtik il-ħarsa

Li jaf x’irid, li tfisser mewt jew ħajja.

Li kieku tersaq lejja jien ninfixel,

Ma nafx nirrispondik u nibża’ nħares,

Nitfixkel x’għandi x’nagħmel x’għandi ngħidlek,

Liem’ huwa l-ewwel pass li jmiss, jispunta l-għaraq.

Jekk tħares b’dik il-ħarsa li taf tfisser,

Li taf xi trid, li taf ukoll x’qed naħseb,

Ma jibqa’ xejn, nirtira jew inċedi,

U jaqgħu qisom stillel il-promessi.

Imm’inti bqajt fejn kont u bqajt tistenna,

U jiena għadni hawnhekk ma nafx s’se nagħmel.

Jien naf li mhux ser tibqa’ hawnhekk tistenna,

Għax jiġi min il-fjamma jerġa’ jixgħel.

Alfred Grech

31/03/2017

A Se Stesso.

Jekk lanqas m’għad tiltaqa’ ma dak l-anġlu

Int dejjem tista’ tiġbed fuq naħħa oħra.

Jekk ma ssibx triq li minnha n-nies qed tgħaddi

Int dejjem tista’ tgħaddi minn triq oħra.

Kull ma trid tagħmel, toqgħod ftit għal ħemda,

U timxi passeġġjata solitarja,

Ma ħbatt ma xejn, ma ħadd u bqajt fil-beraħ,

U tħossok bħal għasfur tinqata’ fl-arja.

Li tlaqt minn hawn, li ma jsibukx, taf b’kollox.

Ma jilħqek ħadd, sadanittant tkun qribhom,

U lilhom twitti t-triq bla qatt ma tidher,

Biex jaħsbu li rxuxtajt xħin terġa’ ssibhom.

U hekk tkun inti l-anġlu li t-triq turi,

U tkun l-imgħallem int bla ma tkun kburi.

Alfed Grech

31/03/2017

XX

Fit-tarf tax-xatt etern l-irdum jittewweb,

Jinfetaħ xaqq fil-blat jiftaħlek rasek

Fejn toqgħod sew, għalkemm irid jittejjeb,

Jew tasal biex imissek dak li ħaqqek.

Stħajjiltek dak l-imdejjaq bih innifsu,

Idejħ infetħu u sab li kien jistenna.

Xħin fetaħ qalbu straħ ġo fih innifsu,

Bħal żiffa riħ li biha r-ruħ tithenna.

Il-ħin jitwal, daqskemm ikolli x’nagħmel,

U jekk bla kwiet int issa qed tarani,

Ikun għaliex hawn xejn ma jibqa’ x’tagħmel,

Isaltan jibda l-ġenn tal-ħsieb fuqani.

Ikun il-bidu wkoll ta’ rxoxt mod ieħor

Imbagħad ninfexx fil-għana għal-ħaddieħor.

Alfred Grech

21/10/2011

Filgħodu.

Din għodwa bħall-oħrajn li ġew qabilha,

Vaguni kkuluriti, nirkbu magħhom.

Kull meta tqum rewwixta l-mistoqsija

U tara s-sħab fis-semna l-poeżija.

Mgħobbija ħsibijiet u mimli biża’.

Dan hu filgħodu ieħor, baħar qiegħed,

Battal bħal kull fil-għodu li ġie qablu

Mingħajr it-tlugħ ta’ xemx kif mistennija.

Eklissi tal-infern, epifanija

Mingħajr iċ-ċerimonja, l-għodwa t-tajba,

Mingħajr it-tlugħ ta’ xemx filgħodu mtenni

Reżurrezzjoni din bħal ta’ qabilha.

Bil-ħsejjes tal vetturi taħt it-tieqa,

Ta’ sriedaq ma jidnnux u daqq ta trombi,

Ta’ klieb li ma jinbħux u nies titkellem

Jum ieħeor bħall oħrajn dawk li ġew qablu.

Jien ngħid li ma kienx hemm għalfejn nistembaħ

M’hemm xejn x’tistenna ġdid, jew x’tista’ tagħmel.

Jum ieħor bħall-oħrajn, m’hemm xejn x’tistaqsi

U xorta waħda jkolli nqum, mis-sodda noħroġ,

Biex nieħu sehem f’ritwal u x’jitlob minni

Dal-kukt ta’ qassisin bla vokazzjoni,

Ta’ qafas bla taħżiż li bnew in-naħal

Din għodwa bħall-oħrajn li ġew qabilha.

Alfred Grech

20/03/2017

Taħsibx.

Taħsibx li dan hu eżerċizzju,

Ta’ min ħafif irid lil-ġismu,

Dan hu passaġġ għan-naħħa l-oħra,

Li lanqas issejjaħlu b’ismhu.

Dan mhux traġitt minn-naħħa s’oħra,

Li jagħmel kull min hu bla sabar,

Pellegrinaġġ ta’ riflessjoni

Li jerġa’ jirxuxtak mill-qabar.

Din ħolma l-għad noħorġu minnha,

Dan hu rakkont li għad jispiċċa,

Din hija ħrafa bi tmiem ikraħ,

Telfien ir-ruħ li qed jisgiċċa.

Alrred Grech

28/03/2017

Friefet.

Żgħar il-friefet, zgħar u sbieħ,

Tlaqtu ttiru minnufiħ

Tiġru ‘l-hawn u tiġru ‘l-hawn

Mur aqbadkom ersaq l’hawn.

B’dawk il-ġwienaħ kbar u sbieħ

Itajjartu minnufiħ

Ħallejtuni f’tarf it-triq

Qalbi sewda mimli diq.

Isbaħ minnkom m’hemm imnkien

B’dawk il-ġwienaħ bosta lwien

Fikom noħlom il-ħelsien

Qed tittajtu kullimkien.

Ħallejtuni, rqadt għal ftit

U bdejt noħlom, ħolm kemm trid.

Trid tinbidel trid ittir

Fl-ogħla sema. Ikħal nir.

Kif se ttir jekk kemm iċ-ċpar

Dan temp ikraħ f’nofs Jannar,

Hemm ix-xita hemmn ir-rih

Ejja lura minnufih.

Il-bogħod rajtek, rajt l-ilwien,

Ejja ddakkar bla dewmien

Ejja rewwaħ b’ħafna ilwien

Tgħanni l-għanja tal-ħelsien.

Jibku l-fjuri. Jibki l-ġnien

Minn ġo t-tieqa fejn kont jien

Kemm nitpaxxa bħares lejk

Bewsa nħalli fuq ħaddejk.

Jekk kuluri ma narax

Nifli sewwa ma nistax

Kieku għami kieku trux,

Il-ġmiel tagħkom ma nifhmux.

Jien kont ġwejjed, ċkejken kont,

Qabel beda dar-rakkont.

Jien ħadt qatgħa, jien ħadt skoss

Ħsibtek mejjet għax bla ħoss.

Jekk f’saħħithom dawk ġwenħajk

Tmur u tiġi wkoll minn rajk,

Jekk jiddajfu, titlaq, tmur,

Ma tiġrix, hekk jien fi żgur.

Għalfejn tlaqtu, mortu l-bogħod

M’għadnix niflaħ, bdejt nirtogħod,

Erġa lura bla dewmien’

Kollox għadu hawn kif kien.

Id f’id nimxu t-tnejn flimkien

Ejj’ narawhom hemm fil-ġnien,

Kollox ward u kollox żgħar

Mar rebbiegħa kollox tar.

Ġibtu l-paċi, ġibtu s-sliem,

Tbiegħedu d-dwejjaq bla dewmien,

Ġibtu l-ħlewwa, ġibtu l-ferħ

Kontu l-bidu ta’ kull serħ.

Rajtek tibki, rajtek tmil,

Rajtu dellek kemm hu tqil,

Ridtni nitlaq, ridtni mmur

Kieku tlaqt, immut kont żgur.

Għaliex ħrabtli, mort il-bogħod

Qalbi ksirtli, m’għadnix sod,

Erġa’ lura, erġa’ fis

Għaliex lili m’għadekx tqis?

Ridt intir, insir farfett,

Nilbes libsa mis-sbieħ nett,

Ridt niddakkar ridt indur,

Ridt nittajjar fuq il-fjur.

Kienet hemm maġenb ix-xatt,

Malli tajthom ħadt ritratt,

Ħdejn it-tfajla taħt il-ħajt,

Isbaħ minnha qatt ma rajt.

Kont il-bogħod u ridt intir,

Fuq il-warda tal-ħarir,

Qalbi mtliet b’ferħ bla tifsir,

Taħt das-sema, ikħal nir.

Alfred Grech

24/03/2017

121.

Tiddejjaq xħin tismagħni x’għandi x’ngħidlek.

Bħalkieku taqra artiklu f’xi gażżetta.

Misteru jkun li tgħix, u tgħix bħal friefet.

Biss aktar ma nixtieqx li nġorr minn ħajjti,

Għax bla ma naf, u bħal ma bdiet tispiċċa.

U x’jiġri minn dak kollu li jkun ġara?

Jitħassru mill-memorja universali,

Bħal kieku qatt ma kien u kull tifkira

Li jibqa’ ma tkunx tiegħi, għax ħaddieħor

Ma jista’ jiret qatt dak li kont jiena.

U tikber, hekk tiżdied l-evanexxenza,

Ta’ dak li kien u li m’għadux fl-essenza

Li hija l-illużżjoni ta’ li jiġri,

Misteru jkun li tgħix, u tgħix bħal friefet.

Alfred Grech

27/03/2017

Tempora Mutantur . . .

Hemm waqtiet li xtaqtek ħdejja,

hemm waqtiet li ħrabt il-bogħod,

hemm waqtiet ridt noqgħod waħdi,

Meta ġismi kien jirtogħod.

Hemm waqtiet stħajjiltek anġlu

hemm waqtiet ma ridtx naf bik,

hemm waqtiet li lili nnifsi

bdejt nistaqsi: X’qed jagħtik?

Hemm waqtiet li moħħi ddallam,

sirt il-ħtija ta’ kull qerq,

hemm waqtiet li lluminajtni

xħin kull mossa ġiet bis-serq.

Jekk għalhekk tistaqsi tibda’,

kif ninbidel ħin bla waqt,

u minn moħħok jibda’ jgħaddi

ħsieb ħażin li qatt ma xtaqt,

Kun af biss li jien ninbidel

u jinbidel bħali ż-żmien,

għax f’dil-ħajja xejn ma jibqa’

bla mittiefes, bħal ma kien.                                                                   

Alfred Grech

26/03/2017

120.

Jien nerġa’ nikteb strofa għal kull tqanqila,

U nerġa’ litanija waħdi ntenni,

Bit-tama li xi darba mbagħad tismagħni.

Hekk nistħajjilni jien kull xħin tifaċċa

Bħal jum imċajjpar li trid minnu tgħaddi,

Is-sens ta’ xhinu dan, għalfejn dak kollu,

U għaliex kont jien minflok ma kien ħaddieħor.

Jekk tiġi l-bieb tħabbatli jien niftaħlek;

Jekk ma tiġix, fejn tista’ tkun nistħajjel.

Fid-dlam ta’ swied il-qalb is-sema msaħħab,

Jekk ma titlax hawn fuq mhux ser tifhimni;

Jekk tibqa’ terfa’ l-ġebla qatt ma tasal,

U terġa’ bħal ma tlajt titgerbeb l-isfel:

Fl-abbiss, fil-baħħ mnejn qatt ma terġa’ lura.

Alfred Grech

24/03/2017

Għax Għada Jkun Bħall-lum Għalfejn Tiddejjaq.

Jien nerġa’ ġirja  u naqta’ nifsi,

U nemmen li narak, tleqq u sabiħa,

Jien nerġa’ nduq il-frott projbit tal-Għeden

Għax għadda ħafna żmien u bqajt bir-riħa.

Jien naħseb li ma nbdiltx ningħaraf għadni,

Għalkemm iż-żmien jekk tħares, għamel tiegħu,

U nerġa’ nisfidak biex terġa tiġi,

Immiss n-nar jew ngħaddi sbrixx minn miegħu.

Jien sirt stabbiliment li kollox joffri,

Immur inperreċ għomti biex jarawni,

Ma jimpurtax għalikom dak li noiffri,

In-nies ġejjin, ġejjin għax issa drawni.

M’għandix għalfejn nittama l’għada jisbaħ,

Għax għada jkun illum li jiġi wara.

M’hemmx agħar minn meta tħoss m’hemmx aktar għada,

Il-jum li jmiss, u din ukoll tindara.

M’għandix għalfejn nitħabat u nissara,

Ma tittamax ukoll jaqbduk id-dwejjaq,

Jekk tħares ‘l-quddiem m’hemmx lejn fejn tħares,

Għax għada jkun bħal-lum, għalfejn tiddejjaq?

Alfred Grech

23/03/2017

Inħossni Skomdu f’Dan ir-Rwol.

Inħossni skomdu f’dan ir-rwol l’għabbejtni.

Ġo fija hemm xitan, ukoll hemm anġlu,

U taf kif liox-xitan int tagħti l-ħajja.

U mbagħad musbieħ tkebbisli biex nixxennaq.

Il-bieraħ kont qaddis ħabbejt bil-bosta.

Illum qomt bħal viljakk, giddieb u mqareb.

Int tgħid li bqajt ma nbdiltx u għadni nagħmel

L-iżbalji u d-dnubiet li mdorri nagħmel.

Illum jien niġi ħdejk t’ penitenti,

Ma nafx jekk temminnix ’mma jisgħobija.

Jekk għada għad tarani nerġa’ nigdeb,

Tibżax, tinkwieta xejn, dak huwa jiena.

Alfred Grech

22./03/2017

Għax Jien Ma Nafx Min Jien.

Bejn liema żewġ ħitan jew żewġ pilastri

Dal-ħabel ta’ ġrajjiet se nibda ndendel

Kullana ta’ waqtiet u ċirkustanzi

Min episodji żgħar ta’ ferħ u dwejjaq

Ta’ gwerra u paċi fl-ingranaġġ tal-ħajja.

Kemm drabi mort staħbejt ġo fija nnifsi

Intenni riċiklat kliem l-għerf u sieber,

Inxejjer il-bandiera tar-ribelli

Niftaħar li miniex fl-ilġiem tal-bqija,

Inkella lbist il-maskra trafiġġenti

Kif ħsibt li dawk riduni u mhux kif jiena

Tassew kont qiegħed nara lili nnifsi.

Għax jien ma nafx min jien! Qed tisma’ sewwa,

L-imgħoddi baħar qiegħed taħt xemx tisreġa

Għax issa naf wkoll x’qed nara sewwa

Sensiela ta’ ġrajjiet katalogati.

Alfred Grech

21/03/2017

119.

Ħallini ħa nisimgħek sbejjħa tgħanni

li bħali ta’ kulljum il-fehema tiegħek

twassalha u bħal kull waqt tal-għana tiegħek

insir mill-ġdid għannej waqt li nisimgħek.

Għax ħielsa bħal mhi tiegħi l-għanja tiegħi,

din is-sonata twila jew qasira.

Għax bħalek jien irrid ħelsien infittex

mingħajr ma nħabbel rasi jekk hux nogħoġob

inkella qed indejjaq lil ħaddieħor.

U dan bħal kull għannej li jgħanni ħieles

li jfittex qabel xejn li jberraħ qalbu,

jistrieħ mit-toqol tal-monotonija,

u bħal profeta jidwi l-leħen tiegħu,

u bħal poeta jsib l-ispazju tiegħu.

Alfred Grech

20/03/2017

Illum Diffiċli Nilħqek.

Illum diffiċli nilħqek ja sultana

Li tiġi meta trid, għax mort tiġġerra

Il-bogħod il-fuq mis-sħab, lilhinn mill-qċaċet

U lili hawn ħallejtni waħdi negħereq

Fid-dwejjaq, fl-iskwallur u d-dipressjoni.

Inħallu kollox għal darb’oħra mela,

U l-leħma li bħal xrar, leħħiet ta’ beraq

Għad tiddi fuq id-dlam ta’ ruħi mkasbra.

Jien xbajt infittex kliem ma nafx xi jfisser

Niżvoga, niċħad, nieħu n-nifs u nerġa’ naqa’

Fid-dożi zgħar ta’ kliem u dożi akbar

Ta’ dan is-skiet li bih inħobb niddawwar.

Tgħid tgħanni għad dik l-għanja tal-imħabba

Li ġiet bil-fors, spiċċat fid-delużjoni,

U għax dgħajjef, inkapaċi jew għax ġifa

Bqajt hawn biex nirreżisti ż-żmien imperreċ,

Inċappas ma xuftejk tad-dnub mitt wegħeda.

Alfred Greh

18/03/2017.     

Ikun Dak Li Trid Int.

Ikun dak  li trid int, kemm trid,

‘Mma kemm se ndumu tielgħin tlajja?

Ikun dak li trid int, kemm trid,

Sadanittant xhini l-alternattiva ta’ dil-ħajja?

Ikun dak li trid int, kemm trid

Madwar kull mistoqsija hemm iċ-ċpar

U ħafna rqajja.

Ikun dak li trid int, kemm trid

U jiena bqajt hawnhekk fejn kont nitlajja.

Odjuża din il-ħajja ta’ mal-bqija

Għal dawk li jiġu jiġru bir-risposti

Meta’għadni hawn nisdtaqsi, u bla dija.

Alfred Grech

17/03/2017

X’Inhu Jdejjqek Kavallier.

X’inhu jdejjqek kavallier li sehemek hu t-taqbida.

Ewwilla taqta’ qalbek int li rajt il mewt għallkemm il-darba

Li tħares f’wiċċ l-għedewwa qisek tħares f’wiċċ il-mera.

Ewwilla għajjejt illum li tlajtha kemm il-darba t-telgħa tal-kalvarju?

X’jista’ jdejjqek kavallier li ttarraft għall-kemm il-darba

Issibu tqil il-pass li jmiss

It-toqgħod tal-imgħoddi jagħfes fuqek bħal madmad illi jliġġem?

U mnejn hi din it-tnehida ta’ qtigh il-qalb?

Isa ja kavallier urina l-ħila tiegħek.

Għax jista’ jkun tassew li ż-żmien qed jagħmel tiegħu,

ix-xabla li fl-imgħoddi kienet tinfed

ixxelfet bit-twegħir

u l-korazza li dejjem kienet tilma’ issa ddalmet bis-sadid.

X’jista’ jdejjqek kavallier tal-avventuri.

Dik ruħek għad tittajjar fuq l-imtieħen,

U tħares l-isfel fuq dawn il-qabda nemel

Isegwu l-purċissjoni,

Dawn il-ħafna li mingħalihom qed iżommu l-kolonni

Tal-ħaqq u tal-ġustizzja.

X’jista’ jdejjqek kavallier?

l-għedewwa kollha rbaħtom

baqgħalek għadu wieħed,

li huwa int innifsek.

Alfred Grech

17/03/2017

Hawn x’Bagħttni Nagħmel.

Xħin nasal għandek nistaqsik hawn x’bagħttni nagħmel.

Ma nafx kif tridni nżomm mingħajr ma naqa’.

Ekwilibrista bla miżien fuq dan il-ħabel,

Ma nafx kif tridni nżomm bla ma niżgarra

U naqsam dan l-abbiss biex nasal għandek.

Did-dgaħjsa li bla naf sibt ruħi fiha

Ġo baħar turbolenti tinnaviga

Fejn jiġġerrew u jirgħu klieb il-baħar.

Sal-lum ma nafx hix din it-triq għal għandek

Ħaddieħor ħa għalih għaliex qalulu

Li hu għażżien, li hu mingħajr viżjoni,

Li ma tgħallimx x’inhu l-iskop tal-ħajja.

U ma tarax li jien ma ħadtx għalija?

Imbagħad xħin nasal għandek nistaqsik hawn x’bagħttni nagħmel.

Alfred Grech

16/03/2017

Post Scriptum. Din il-poeżija hija mnebbħa minn aħbar li smajt fuq r-radju waqt li kont qed insuq (u allura mhux bil-fors qed jirriproduċi dak li smajt bil-preċiż) li xi ħaddiema tal-Awtorita’ tax-Xandir ħassew li kien hemm intimidazzjoni (bullying) fil-konfront tagħhom, meta ic-“Chairperson” indirzzathom bħala “għażżenin” u li “m’għandhomx skop fil-ħajja”.

Sic Transit Gloria Mundi.

Hekk u hekk biss stajt ngħixha din il-ħajja,

Hekk u hekk biss għad jgħaddu dal-mumenti

Tal-awrei, ta’ raġġi trasluċenti

Imdawwra ma dawk kollha l-esaltati.

Hekk tgħaddi l-ewforija ta’ dil-ħajja,

Dal-bżieżaq tas-sapun jinfaqgħu f’wiċċek,

Inkella li jitilgħu fuq wiċċ l-ilma.

Imbagħad immorru norqdu fil-misteri

Għax naħsbu li se jibqgħu jiftakruna

Meteori li jħallu ċikatriċi

Fuq wiċċ il-qamar sajjem, desolanti.

U jien li nibqa’ hawnhekk nagħnnilek għanja

Fil-ħarba esuberanti ta’ dil-ħajja,

Bit-tama li hemm int x’imkien tismagħni

Imqar jekk bħali għadek bla risposta.

Jien naf li sirt għalik bħal barometru

Biex tkejjel il-burdati konfliġġenti,

Kull meta tħossok bħali li qed tegħreq.

Hekk biss tarah għaddej il-ħin fuq mewġa

Għal-dejjem kull mument intransiġenti.

Hekk biss huma l-waqtiet tal-ewforija

Li jiena ta’ kulljum mingħajrek ngħaddi.

Alfred Grech

15/03/2017

118.

M’għadekx tagħtini dehxa wara l-oħra,

Kull meta fuq din l-art tal-innoċenza,

Bħal xita traxxax fuq il-bjut li jibku

Idejk tiftagħom, tħaddan l-ewforija.

M’għadekx taħsadni bħalma taħsad berqa

Fl-iljieli twal mudlana u solitarji,

Kull meta nibda naħseb li ser naqbad

Il-vjaġġ it-twil, fis-skiet, fl-indifferenza.

Jien qatt ma stajt nitgħallem triq għal għandek,

Għax triqti kienet dik fejn int kont sejjra,

U meta sibt li wqaft mill-mixi tiegħek

Hemmhek kien tarf it-triq, u t-tnejn weħidna,.

Nixtarru hawn f’dax-xatt fejn qatt ma konna

Il-frak tal-kwiekek jaqgħu, waħda waħda.

Alfred Grech

14/03/2017

It-Tieqa Tad-Dwejra – It-Tieni Lament.

Dan lament ieħor għalik ikona mqaddsa

Li tixgħed tmiem iż-żmien li konna nafu

Li telqet minn quddiemna u għebet

Bħalma jgħibu l-għasafar li jittajru

Biex aħna nibqgħu hawn itturfnati,

Inħabbtu fuq sidirna bħalma l-mewġ itturnfat

Iħabbat fuq il-blat indifferenti;

Nittewbu l-bżieżaq arja ta’ li nafu

Miblugħa bl-apparenzi li qe jgħibu

Ta’ dak li aħna xhieda tiegħu

Kull ħaġa tieħu r-ruħ u tieħu l-forma

U bħalek tisparixxi

Fil-qiegħ ta’ taħt wiċċ l-ilma.

U kienu l-ħafna dawk li bkewk

Li riedu jirxuxtawk, jibnuk mill-ġdid

Mill-qiegħ ta’ taħt wiċċ l-ilma terġa’ titla’

Bħal xeneġġjat li jerġa’ jiġri b’lura.

Għaliex irridu ngħixu lkoll dal jasar

Tal-moħħ li ma jaħsibx, tal-ikoni,

Tat-tgħewdin tal-massa li trid temmen

Ġwejjdin għaliex għalina hemm min jaħseb

U nagħmlu li jgħidulna

F’dil-ħajja li kull waqt li ngħixu tieqaf

Kull darba li noħorġu minn ġol moħba.

Fil-qiegħ ta’ taħt wiċċ l-ilma jegħerqu l-apparenzi

Jegħerqu l-ikoni, għax xejn ma jibqa’ għal dejjem.

Alfred Grech

13/03/2017

Qaddis Mill-Ġdid Insir.

Arani kemm jien ħieles

u nimraħ bħal farfett

intir minn warda għall-oħra

tingħaqad għad f’bukkett.

Irrid induq kull warda,

u nghannaq kull blanzun

u ngħannaq is-sbuħija

li nsib kull fejn tkun.

Irrid induq kull warda

kull warda tal-bellus

u nirgħa ġewwa x-xagħri

u x-xewk li rrid inbus.

U mela f’dan il-jasar

li nkun jien tiegħek biss?

Irrid jien ngħanni l-ħajja

u mmut inkiss. inkiss.

Min qal li jrid jintrabat

u jidħol ġol-infern,

il ħabs tas-sikkatura

jindifen għall-etern.

Arani ser inrabbi

par ġwienaħ biex intir

u ngħola ’l-fuq fis-sema

qaddis mill-ġdid insir.

Alfred Grech

12/03/2017

Tinħeba Wara l-Kwinti.

Kull meta moħħi mlejt

Li l-ħajja mhux kif ħsibtha,

Li din hi ferrovija

Li jiena qatt ma rkibtha;

Għax minghalija ħsibt

Li Venere kont inti,

Fantażma li kont naf

Tinħeba wara l-kwinti.

Għax meta kont għajjien,

Il-qtar tad-dwejjaq qrasu,

U qatt ma ħadt raġun,

Kulħadd kien dabbar rasu.

Tiġġieled, mhemmx fuqiex,

Ribelli ta’ bla skuża,

Jekk tkun prosekutur

Lil min trid int takkuża?

U ngħaddu minn kull triq,

U nfittex fejn ninħeba,

U nidħol ġo kull għar

Biex noħroġ fin bla tebgħa.

Alfred Grech

11/03/2017

Għax Bħali Ħsib Li Hawn Ser Tibqa’ Għal Dejjem.

Għax bħali ħsibt li hawn ser tibqa’ għal dejjem,

Mhux aħna t-tnejn li konna sibna ruħna,

Inħarsu wiċċ imb’wiċċ bħal qisu f’mera,

Fl-għadajjar ta’ xulxin saqjna nbillu,

Għadajjar l’issa saru baħar wieħed,

Nistaqsu lilna nfusna x’qed infittxu:

Hix din il-verita’ li lilna tħennen

Inkella kienet ħolma li ħlomniha;

Jekk dan hux ingranaġġ t’arloġġ inaqqqar

Il-mod kif nafu nifhmu dit-traġedja.

U jkun għalxejn li nduru d-dawra kollha

Biex bħal ninsew li din mhijiex ħlief ħolma,

U ħloqna wkoll ikoni għal żmien il-bidla,

Tal-waħx li m’għadux hawn.

                                    Jien qed nistenna

Li nilmħek għad titfaċċa ħabta u sabta

Minn wara l-kantuniera ta’ dil-bajja.

Għax bħali ħsibt li hawn ser tibqa’ għal dejjem,

U ntbaħt li meta kont iżżommli jdejja

Jien ma kontx hemm, int ma kontx hawn. Faċċata

Stajt kont int ta’ dil-munita, bin-naħħa

L-oħra tagħħha,  l-oskur tal-ħażen tiegħi.

Alfred Grech

10/03/2017

Lament Wara t-Telfa tat-Tieqa tad-Dwejra.

Offensiva dil-ħajja , dil-ħajja laċeranti

tal- ikoni li jaqgħu, jisparixxu u jħalluna

bil-ġerħa tad-nuqqas mikxufa beraħ.

Hawnhekk tintebaħ bil-kobor tad-desert tar-ruħ

li tikrob sabiex toqgħod il bogħod min-nies tad-dinja,

il-bogħod mill-ħsieb li jibqa’ jirraġuna,

il-bogħod mill-kobba mħabbla tat-traġedji.

Hawnhekk fejn kollox ħemda u lanqas biss trid taħseb

għaliex il-ġerħa fonda wisq biex tista’ dderri,

u kull waqt hu twil eternita’.

Hawnhekk tixtarr is-skiet tal-għelt tal-bieraħ,

imdendel mal-ħitan fejn hemm il-beraħ

fuq il-ġwienaħ tal-ħolm il-fantasija,

fejn hemm inewwaħ il-gawwi

li kontra r-riħ, iġiegħelek taħseb fis-saħta ta’ kulljum.

Hawnhekk fejn il-ħemda tegħreq fil-gideb tal-imgħoddi,

fejn il-ġejjieni huwa l-mod li bih tiftakar.

Hawnhekk tkun taf il-kliem li qatt ma smajtu, li dejjem bżajt tlissen,

sorpriż li din mhijiex oasi

filwaqt li l-ħemda qed ftit ftit tifgalek ħajjtek.

Hawnhekk fejn tara biss tbissima mgħawwġa

li taħbi d-dmugħ tad-dwejjaq f’sekwenza ta’ xeneġġjat

li rajna kemm il-darba.

Hawnhekk il-melodija tippersisti fil-ħemda li tiċċaqlaq,

li tiġi wara kliem imqanqal ta’ bla tifsira.

Alfred Grech.

10/03/2017

117.

Dan huwa tmiem il-ġrajja kif nafuha,

Ħaddieħor ħasbu wasal tmiem id-dinja.

Kull darba li nistaqsi lili nnifsi

Hawnhekk x’ġejt nagħmel, int tqum biex turini,

Ix-xbieha ta’ kif tkun għadira mdardra;

Ta’ kif ikun ix-xejn li fih qed ngħunu,

Titfagħli ħabel twil marbut ma baga

Biex mingħalik b’daqshekk ser issalvani.

Jien li twelidt fix-xejn tax-xejn ta’ dejjem,

Fix-xejn insibni naqdef xħin titfaċċa

Idejk tagħtini, u naf li mhux għal dejjem

‘mma wieħed mill-waqtiet li ridt niftakar,

Biex nerġgħu għad fejn konna qabel ġejna,

Li lanqas mhuwa t-tmiem ta’ dan iċ-ċiklu.

Alfred Grech

09/03/2017

U Xħin Issir Taf Kollox.

U xħin issir taf kollox

Dak kollu li trid taf,

Kif sar, kif kien minn dejjem,

Il-ġilda bdiet tixraf.

U ħadd ma ġie mistoqsi

Kif kollox ippjanat,

Bla leħen fil-kapitlu

U kollox kalibrat.

F’miljuni ta’ miljuni

Kemm jgħaddu u jgħaddu s-snin,

F’din l-eżistena fqira

U mkejjla mill-bnedmin.

U bħali trid tistaqsi

Xħin jibda jgħaddi l-ħin,

Xħin taqbdek ferneżija

U l-bieb ħabbatt ta’ min?

Bħal meta tkun fl-eżami

U tħossok iffriżat,

Inkella f’awditorju

U mintix ippreprarat.

Xħin issa ssir taf kollox,

Il-għala, il-kif, minn fejn,

Wasalt fi tmiem it-trejqa

Tgħix aktar m’hemmx għalfejn.

Alfred Grech

08/03/2017

Inħaresd Lejk Mill-Qrib.

Inħares lejk mill-qrib,

Inħares bla nuċċali,

Ribelli mit-twelid,

Ma ssibx żgur ieħor bħali.

B’għajnejja magħluqin

Jien naqdef għall-kuntrarju,

Il-kontra ta’ l-oħrajn,

Biex niftaħ is-siparju.

Nitgħaxxxaq bli ma nafx

U li jmexxini lura

Fil-baħħ ta’ kullimkien,

Li beda jieħu s-sura.

Aġent provokatur,

U għandi ħtieġa kbira

Li naqbeż dan iċ-ċint

U nħares ġo l-għadira.

Int ħsibt li sew qegħedin

It-tnejn flimkien imxejjna,

U bqajt ma tintebaħx,

Li għadna fejun ħallejna.

Mal-ewwerl żiffa riħ

Bużżieqa se tinfaqa’

U bqajt ma tafx għaliex

Għax minni xejn ma baqa’.

07/03/2017

Jekk Ridtek Kull Filgħodu.

Jekk ridtek kull filgħodu

Tkun ħdejja malli nqum.

Xħin saret in-nofs siegħa

Trid tparpar bla ma ddum.

Jekk ridtek kull filgħodu

Fejn nista’ nsib nistkenn

Mid-dwejjaq li nqum bihom

Għalija ferħ ta’ ġenn.

Imbagħad xħin il-ġurnata

Issir u jgħaddi l-ħin,

Niltaqa’ man-nies nibda

U ma nibqax. miskin.

Insibni aħjar mingħajrek

Għax inti telf ta’ żmien

Għax int biss distrazzjoni

U bik ma mmur imkien.

U noħroġ minn ġol fosdqa

Nintreħa mal-kurrent,

U lanqas naf fejn sejjer

U ngħix biss il-mument.

Alfred Grech

04/03/2015.

Inħares Lejk Xħin Titlaq.

Inħares lejk xħin titlaq

Bħal ċpar ta’ filgħaxija

Xi minn daqqiet nitilfek

Fil waqfien interminabbli

Tat-traffiku f’pajjiżna;

Xħin nibda’ ngħid xi posta tar-rużarju

U ħsibijieti jgħaddu ferrovija li bqajt ma lħaqtx,

Li tieqaf biss xħin nieqaf naħseb.

F’din l-għodwa mbikkama u mlibbsa

L-ansjeta’ tal-eżistenza

Ma moħħi taħbat kemm il-darba

Kif int u jien tgħallimna ż-żmien nisirqu

Kull waqt li ħrabna ħarba u xħin għereqna

Fil-baħar tas-sbuħija.

Din ġenna li tinkwadra l-ħabs

Li bnejna aħna stess filwaqt li konna

Qed nieħdu nifs il-ġewwa mhux imniġġes

Mid-duħħan tal-meżżi diġitali.

Fit-tbissima tiegħek

Jien ngħaddi mill-meries tal-purgatorju,

Mill krib ta qalb imqarrqa,

U mit-tortura taċ-ċaħda.

Alfred Grech

03/03/2017

Tiġdid.

Illum mhux it-tkomplija

Tal-bieraħ illi mar.

Illum jien bniedem ieħor

Ġdid ħiereġ mit-tajjar.

Naqilbu rridu l-folja,

U naqbdu argument

Li qatt ma smajna dwaru

U nkomplu mal-kurrent.

Mas-sħab li jiġri ġirja,

Max-xemx li ma ħarġitx,

Max-xita mhix fi żmienha

Għal darba ma felħitx.

Biex nitla’ kull skalluna,

Mill-ġdid mingħajr rimors,

Tal-għada qatt ma sebaħ,

Ta’ kif kien id-diskors.

U din tkun il-viżjoni

Tal-għana li m’għannejtx,

Mat-temp li qed iħawwad

Indur hekk, dawra mejt.

Alfred Grech

0/03/2017