U Tgħidli Li Issa Qed Tarani Mod Ieħor.

Kif titfi żewġ ġamriet li qieghdin jaqbdu

Daqskemm l-inħuħ ta’ tnejn li qed jinħabbu?

Dan huwa l-agħar irbit li jista’ kollok

U l-labirint li fih intlift isir letali.

Iddawwar tiġi int idejk ma għonqi

U tilbet f’ħoġri.

Imma kun af li jien tad-demm u l-laħam.

Kull bewsa tissiġilla ftehim li ma ftehemniex

Wegħediet li qatt ma wegħedna

U kompliċita f’xi ħaġa li lanqas aħna stess

Ma nafu sewwasew x’hini

Iżda li t-tnejn li aħna qed inħossu

It-toqol tagħha.

Imbagħad tħallini hawn bla nifs

Biex ngħannaq iż-żmien kollu

Tiftaħli l-bibien beraħ għall-infinit.

U xħin tmellisli d-dwejjaq ta’ ġo ruħi

Tobżoqlk fuq xuftejja t-tbissima

Li ħadd u xejn ma jista’ jifhem

U tgħidli li issa qed tarani

Mod ieħor.

Alfred Grech

28/02/2019

Għalhekk Infittxek Jien.

Għalhekk infittxek jiena ja mara ta’ kull lejla

sabiex tkun inti l-poeżija u ttaffili

mid-dieqa ta’ kuljum,

tkun int il-loppju u tbiegħed minn quddiemi

il-kalċi tal-imrar,

il-qilla taż-żmien li jkidd u s-swat li ma jidhirx

iżda li bil-ftit il-ftit jilwilek daharek.

Għalhekk infittxek jien ja mara tal-ewforija

għax miegħek nista’ niżfen il paso doble

u ċ-ċaqliqiet tal-fantasija mal-melodija tal-allat.

Għalhekk infittxek jiena kull filgħaxija

għaliex f’iljieli bħal tal-lum jien nista’ negħereq miegħek

imqar għal ftit tal-ħin

taħt sema mimli kwiekeb ġo baħar l-infinit.

Għalhekk infittxek jiena għax nibża’ li nkun tliftek

kull meta ma tiġix u naħsbek tkun insejtni

u l-ebda ċaqlieqa ma tressaqni lejn il-ġonna tiegħek.

Xi minn daqqiet inħoss it-tqanqiliet mingħajt xintilla

mingħajr ma nkun stenbaħt sabiex

inwieġeb għas-sejjħa.

Għalhekk infittxek jien kull meta ma ssejjaħx

kull meta ma toqrobx

u jien fil-battal ta’ ruhi nħoss in-nuqqas tiegħek

il-baħħ li fih idejja ma jsibux ma xhiex iqabbdu.

Alfred Grech

26.02.2019.

Din  Hi Malta li Ridna.

Din hi Malta li ridna

Għax bżajna mill-babaw,

Ħakkiema, maltin bħalna

Mas-setgħa jiggranfaw.

Mix-xjaten li jaħkmuna

Għax l-għadu qed hawn ġew,

M’aħniex ta’ min jafdna

U bżajna naqdfu sew.

Din hi Malta li ridna,

Il-ġlieda tal-ħesien

Insejna, rkibna karru

Ta’ dak li seta’ kien.

U sirna biċċa waħda

Min kontinent misjur

Insejna min konna aħna

Ġens żgħir: imma sinjur.

Tas-swar ftaħnihom beraħ

Kanċelli u l-bibien,

U ftaħna saħansitra

ix-xtut għal min kien kien.

26/02/2019

Imqar jekk Jonfoħ Riefnu

Imqar jekk jonfoħ riefnu mill-grigal,

imqar xħin din il-maltempata taħli lilha nfisha,

u tara s-sħab jiħmar bid-dija tax-xemx tiddi

jiġik il-ħsieb jekk din hijiex

il furja ta’ waqt wieħed

il qawwa li kontra tagħha

jissielet il-qalbieni.

Imqar xħin jitlef saħħtu r-riħ

li jġorr u jqaċċat minn fejn jgħaddi

inwieġeb jien għar-ritmu ntern

tal-għanja li sawwarrtlek

u ma nibżax minn min irid għaddej

jibqa’ min fuq in-nies, minn gol-ħitan

u jifqa’il- bibien u t-twieqi,

għax naf li hemm fil-fond intuwittiv

ir-rieda ifrem mis-saħħa u l-enerġija.

Imqar xħin tara baħar li jrid jibla’ l-art

f’assedju fferoċjat tal-invadenti,

int taf li int fis-sewwa

tal-għoli mnejn tinstab u tikkomtempla

mnejn tista’ tara kollox

u taf li fejn inti qiegħed xejn ma jilħqek

għaliex il-qawwa hi biss efimera jew mistħajjla

u kollox jerġa għal li kien.

Alfred Grech

23/02/2019

Għażiża Malta.

U ma jimporta xejn li wiċċek qed jinbidel

u sejra ssir ma tingħarafx minn hawn u tal-ftit ieħor,

Għax hekk jew hekk wieħed mill-ftit jiena,

u m’għandix saħħa niġġildilhom

u hekk jekk jew hekk ma jimpurtax għax issa drajna.

U ma jimporta xejn li ġismek qed jiċarrat

Sfreġjawk il-manigoldi ta' bla wiċċ,

ir-reghjba għal flus, bla skruplu u bla kuxjenza

ibiċċru fik bil-ftit il-ftit kull ant bil-ħafna

bl-iskuża tal-progres u tal-modern u nkunu bħal ħaddieħor,

Għax issa hekk jew hekk jiena gawdejtek.

Fi snin tfuliti int kont Ġnien tal-Għeden

u issa għal ta’ warajja it-tifrik is-saħta u l-kundanna

Is-sliem għalik għażiża Malta.

Alfred Grech

24/02/2019

Apokalissi.

Għidilna Int Mulej x’għad jibqa’ minn dan kollu,

xħin il magni mxajtna tat-tħarbit jeqirdu sal-inqas roqgħa

xhin l-għorrief u l-għalliema u l-esperti

jsebbħu u jżejjnu kull biċċa ġnien fejn nistgħu niżfugaw.

Ma ddoqx qaniena jekk ma tħallix ir-riħ ivenven

u l-ebda skuża biex tittajjar ma ssib

l-alwetta li tfittex il-mistrieħu l-għena

fil-wegħeda tal-abbundanza.

U x’nagħmlu bil-ġrajja li għada kemm għexniha

u bqajna niftakruha fl-għeruq u l-pedamenti tagħha

mingħajr ma ntennu strofa?

Tist’inti toqgħod tħares lejn ix-xahari tat-tifkiriet u n-nostalġiji

maħruq bl-inkwinament studjat u mmartellat

bil mezzi tax-xandir

fantazma qawwija li fl-għabex

iċċarrat l-istar kosmiku b’difrejn li jaqtgħu aktar minn imqass?

Dan issa sar il-karnival tal-uċuħ ġodda

tal-friefet li jixxejjru u jiddandnu

irridu naqsmu l-ġenn ta’ diskoteka

t’għajnejn li jiflu sew bil-ħars ta’ min għad irid jaħtaf.

Dan issa sar il-ħmar il-lejl ta’ ħwejjeġ mhux magħrufa

mistoqsijiet li jibqgħu biss mistoqsijiet,

ta’ maġistrati milwija taħt il-pis li mank jifilħu

f’dan l-uragan ta’ blugħa u ġenn sfrenat

li jobrom u jaħtaf lil kull min isib quddiemu.

Għalina Mulej kull saħta li tfaqqa

kull dagħwa li tisma’ u ma titkellimx,

il-krib, l-ewforija u l-estasi ta’ min qed jibla’

u dmugħ ta’ min tassew safa’ miġuħ.

Ilkoll inkantaw it-Te Deum Laudamus

minn dawn il-griebeg tal-isfruttar

ta’ lsiera aljenati fl-iskemi affluwenti

għal-qlub tad-demm u l-laħam

dan issa sar loppju divin.

Din hija l-karba ta’ elf sentinella

dan huwa d-diwi tal elf megafon

raġġ dawl  li jdawwal elf torri ta’ Babel

u sejjħa għal merħla mitlufa bla ragħaj.

Alfred Grech

23/02/2019

Għax Issa Għalija Int il-Baħar.

Għalxejn tażżarda tmur aktar lilhemm

Jekk int mintix kapaċi toqgħod.

Għalxejn tisfida lix-xitan li hemm ġo fiha

Jekk imbagħad mintix kapaċi tirkbu.

Jekk tgħid li hu tassew,

Ħabibek hu minn qatt ma gideb

Habibek hu min jemmnek

U jifhem kull ma tgħidlu

Ħabibek huwa jkien.

Imbagħad xħin tibda titgħallem tagħżel

Il-karfa mil-qamħa

Ikun wasal iż-żmien lil titlaq tiġri.

Imbagħad jekk trid tassew li toqgħod ħdejja

Ejja malajr u taħlix żmien

Issir iż-żmien li fadal

Biex aħna t-tnejn noqgġod hawn

Fis-skiet ta’ nżul ix-xemx

Nikkuntemplaw il- baħar ħiemed

Għax issa għalija inti l-baħar.

Alfred Grech

22.02,2019

U Meta Trid Ċempilli Waħda.

Dak li  hemm bejnietna kien qisu fuq vagun

il-ferrovija waqfet x’imkien

jew daħlet ġo xi sqaq.

Jien kont inħossni nbennen

u ma joqosni xejn

Iżda f’dan il-jum ta’ nofs Frar

nixtieqek qiegħeda ħdejja

ħa nagħnnqek waħda.

Insellimlek ja mara ta’ sbuħija

ta’ ħila aktar minni

Il-lejl qed joqrob sew bħal anġlu miexi ħafi

u l-ħajja tibqa’ għaddejja bħal karusel

li marlu l-ħabel.

Ma nisa’ qatt il waqt xħin int ma ġejt qatt lura

u l-baħar ta’ ġo fik kien, u għadu mqalleb

mill-bqija kollu storja.

u jista’ jkun li dan hu dmugħ

li għad irid iġelben,

u din hi xita li trid traxxax

fuq xeni tal-addiju li qatt ma kien.

Ismek jibqa’ jidwi

fin-nostalġiji tal-ġejjieni.

U jekk għad trid tkun taf

jien xorta għadni mħawwad

u sal-lum ma nafx x’irid.

Meta triq ċempilli waħda.

Alfred Grech

20.02.2019

Fuq Xofftejk it-Togħoma tal-Qabar

Int taħseb li mhemm xejn il-bogħod

mix-xefaq ta’ quddiemek

li lħaqt it-truf,

u li ma tista qatt titbegħed aktar.

Iżda kull darba li jżernaq

Nitilgħu tarġa’ oħra

F’din l-iskalapża li twassal

‘l-fuq mis-sħab.

Is-sensazzjonijiet u t-telfien tas-sensi

Ma jkunux dawk li nsibu fil-ġiri ta’kuljum

Iżda fl-ibgħat truf fejn qatt ma nistgħu naslu.

Deherli li-ħassejt il-mewt

xħin għaddejt subgħajja minn ġo xagħrek

u fuq xofftejk it-togħoma tal-qabar.

Alfred Grech

20/02/2019

Ma Kien Għad Fadal Xejn.

Jien niġri magħkom fit-tellieqa

Fuq il-karru tax-xewqat u tal-waqtiet

Biex għad xi darba nilħaq

Il-ħolm li ma ħlomt qatt

Iżda qalbi għada tagħmel il-ħsejjes

Tal-folla irrabjata.

Jien niġri magħom f’dit-tellieqa

Ta ħafna kliem

li la għandu bidu u lanqas tmiem

Noħlom il-ħolm li jibqa’ għal dejjem.

Il-ħolm li jippersisti

Imqar xħin jieqaf darba għal dejjem

iż-żmien.

Jien għandi x-xewqat tagħkom

U nitla’ l-istess taraġ tal-artal

Mingħajr ir-rit u l-protokol

taż-żmien li għadda

taż-żmien li ħadd ma jista’ jwaqqaf

u noffri lili nnifsi ħaruf tas-sagrifiċċju.

Jien bħalkom qed ninġarr minn dal-kurrenti

Ta’ żminijiet li ftit tista’ tifhimhom

U nfittex id-diskors li bih tifhmuni

F’rambaġġ ta’ dinja rrumblata

Fejn lanqas hemm għalfejn tifhem kull kelma

Għax kollox aljenat fit-tifsir tiegħu

U kollox jista’ jfisser differenti minn dak li taħseb.

Għax minn dak kollu li tgħallimna

Ma kien għad fadal xejn.

Alfred Grech

19/02/2019

Sadanittant.

Sadanittant biex jgħaddi l-ħin

Jien nibqa’ naħseb fuqek.

Ma jiswa’ xejn li jgħaddi l-ħin

Li jiena u int inqattgħu ggranfati ma xuxlin

Nitkellmu fuq kull ħaġa li tiġina f’moħħna

Għax din tellieqa għal dak li jmissek tagħmel

U tibqa’ ma tagħmlux.

Ma jiswa’ xejn il-ferħ ta’ ġenn li xi kultant inħossu

F’din it-traġedja jew kummiedja

Fil-baħħ u x-xejn ta’ li jagħmilna.

Ma jiswa’ xejn li timmirali

Il-kliem kollu biex tferini

Għax inviżibbli t-tarka tiegħi

U msaħħra ħajjti.

Ma jiswa’ xejn li tgħid li tħobbni

Għax naf li għada sejra tirkeb

l-ewwel karru li jiġik jew li jaqbillek

biex iwasslek fejn trid tmur.

Xejn ma jiswa’ ftit mistieħ u ftit tas-skiet

F’din l-oasi li rawwamna

Jiena u int għal ftit tal-ħin

Għax wara ftit int reġa’ bdielek

Għaliex akbar mill-maħfra u s-sens ta’ ħtija

U akbar mill-imħabba

Hemm it-tpattija.

Alfred Grech

18/02/2019

Meta L-Baħar Jofroħ.

Meta l-baħar jofroħu r-riħ idur,

tkun waslet mewġa kbira li trid tkaxkar

u ġġorr magħha dak kollu li nafuh,

dak kollu li tgħallimna,

dak kollu li bnejna u li hu sabiħ,

dak kollu li ħsibna li xi darba kien is-sewwa.

Meta l-baħar jofroħ u r-riħ idur,

tkun ġejja maltempata li ġġorr magħha

it-toroq ta’ din l-art u l-bini tagħha,

sabiex minflok jittella’ bini ġdid

fejn kull sular

ikun it-togħma ta’ Ġnien il-Għeden

u flok it-taraħ kif nafuh

ikollna axxensur li jwassal sas-smewwiet.

Imqar jekk is-smewwiet mank għadhom jidhru

jew issa sibna li wara x-xefaq

hemm sema isbaħ minn dak li qed jgħattina.

Alfred Grech

17.02.2019

Funeral.

Dan huwa funeral ta’ mewt li diġa’ tħabbret

Din hija nvażjoni tal-ftit art li kien għad fadal

Dan hu għaġeb tal-għeġubijiet li ħadd mhu qed jistħajjlu

Dan huwa għaġeb illi ħadd ma jrid jitkellem dwarhu

għax kullħadd irrassejat,

kulħadd jgħidlek li mhemm xejn x’tagħmel.

Din hi saħta li ġiet fuqna għaliex m’hemmx fuq min nistrieħu

Din hi saħħta li ġiet fuqna għaliex mhawnx min imexxina

Din hi saħħta għax kullħadd qed jidhaq bina

Din hija saħħta, iva saħħta

li ġibniha aħna b’idejna

Għaliex blajna din il-ħrafa sabiex hija jaljenawna

Għaliex blajna din il-ħrafa u dak kollu li bellghulna

Għax kulħadd qed mans bi kwietu jara biss kif ipappiha

Għaliex issa saħansitra mqar xtraw bi flusna moħħna

biex spiċċajna ngħidu bħalhom

Għax neħħewla l-barrikati u neħħewlna kull difiża

u hekk sirna biċċa minnhom.

Alfred Grech

16/02/2019