Il-Punt tal-Tluq.

F’liema nfern dalgħodu tfajtni

ja sibilla mġewwħa tibla’ sustanzi alluċinanti?

Jien tbiegħedt kemm stajt mill-għana tas-sireni

li hemm jissieltu fil ħabs ta’ sidri

biex nasal hawn fuq din ix-xtajta

l-aħħar tragward  ta’ ruħ li tfittex lilha nfisha.

Mal-vaguni għaddejjin quddiemha

tal-ġrajjiet tal-ħajja tisma’ biss dik it-tifsira

li għandha mill-għana tas-sireni

li kienet dejjem u tibqa’

l-anġlu tas-saħta

tal-ħofor moħbijin tul il-perkors.

Jekk kienet l-ambulanza,

il-pulizija jew il-magna tat-tifi tan-nar

xorta waħda kont taf u kont avżat

li wara s-sejjħa tas-sireni

hemm saram kbir li jfixkillek il-viżjoni

iħabbillek il-boxxla

u jitfgħek ħafna lura

biex terġa’ għall-darb’oħra fil-punt tat-tluq.

U kemm il-darba sibna ruħna hawnhekk

proprju hawnhekk

fil-punt tat-tluq?

Alfred Grech

13/07/2019