Imbagħad Xħin Erġajna Lura.

Imbagħad xħin erġajna lura lejn il baħħ li belgħana

intbaħna li ma kien xejn,

kien biss duħħan tal-bidu,

u li dik kienet ħolma,

mera biswit mera,

illużżjoni ottika;

għaliex xħin tlaqna aħna

ma kien għad baqa’ ħadd.

u kollox ma kien xejn.

Iżda din anqas ma kienet

ħolma ġo  ħolma

bħalma kienu dejjem jgħidu,

jew li kien hemm xi ħadd qed jiġbed

spag diġitali u jilgħab bit-tikek

tridimensjonali.

Fix-xifer ta’ rdum fesdaqna l-fdal tal-poeżija kiebja

li rxuxtat mar-ritmi nfernali

u t-tinbiħ ta’ ħafna sillabi nkatenati

mingħajr sekwenza.

Fuq xatt il-baħar ta’ bla xefaq ilmaħtek solitarja

u deherli li smajt leħnek ja sibilla ta’ wiċċ b-ieħor

u ma tafx iżżomm ir-rabta,

tqasqas il-ħsejjes tal-kliem ma jinfiehemx

u l-profziji li għandhom tifsir doppju.

Issa, f’dal il-waqt ridt naħtaf is-sensazzjoni

u nikkalzraha fil kapsula dejjiema

xħin ilmaħt il-biża’ f’għajnejk

u d-daqqa t’għajn glaċjali

ta’ min iħoss li qarrqu bih

jew abbużaw minnu.

Tibżax jien noqgħod ħdejk

ħa nisma’ x’għandek x’tgħidli

għaliex b’hekk biss u bit-tqarmiċ tas-snien

tista’ toħroġ minn ġo fik

ix-xitan li trid taħbili.

Alfred Grech

18/07/2019.