Mitlufa l-Poeżija.

Mitlufa l-poeżija li toħroġ mid-djieq imdellel tal-fissuri

ulied id-dlam imtertaq ta’ mħuħ li baqgħu lura

tal-profondita’ bla qies

għaliex mhemm xejn li jista’ jifdi dal-ġens mgħammad

misjuq lejn jasar il-gaġeġ u l-barumbari

għax hekk hi s-sejjħa ta’ dal-poplu.

Issa l-poeżija trid toħroġ bl-iktar saħħa

imqar jekk din tisfronda l-barrieri u barrikati

tal-imrieżaq illuminati.

Aħna nibqgħu għaddejjin fis-skiet tul il-perkors

u lilhom inħalluhom jinħlew fil-blugħat

ta’ mil-lum għal għada.

Aħna nibqgħu insalpaw lejn xtut li ma nafux

lejn xefaq li kull ma jmur jitbiegħed aktar

u lilhom inħalluhom hemm jistagħdru

fil-baħar baxx matul ix-xtajta

fl-għadira tajn fejn imdorrija.

Mhumiex ta’ min jikkalpestahom

għax twieldu hekk, għax sabu min isuqhom

għax għandhom min jagħmilhom

il-mudelli tiegħu

għax għaġnuhom

inkwinaw il-mudullun ta’ moħħom

u issa lanqas moħħ ma għandhom

biex jaħsbu jekk, qatt ħasbu,

għax baqgħu ma tgħallmux u sfaw ilsiera

ta’ dak kollu li bellgħulhom.

Alfred Grech

15/07/2019