Xejn Ma Jinbidel.

Inti tinża’ u tibqa’ għarwiena

Fil-poeżija li tħallili

Bħal leħen is-skiet

li qatt ma jidwi.

Dagħbien il-baħħ li tħalli

Saltnet ir-riħ li qatt ma jinsa’

Bil-weraq li jġorr miegħu

U l-ħsejjes ta’ ġol-misraħ.

Xejn ma jinbidel

Kull xħin niftakae fik,

Bħal ferrovija li tisparixxi

Fil-bjuda ta’ ġoċ-ċpar.

Alfred Grech

14/10/2017

Assurdi.

Assurdi li qed ngħixu ġo din l-arka,

Imċaħħda milli nafu x’hemm hemm barra,

Jew x’hemm lilhinn mix-xefaq fl-illużżjoni

Li din arka magħżula minn dawk l-oħra

Li hemm fil-wiċċ jitbandlu qalb il-ħalel.

Inħarsu f’wiċċ ir-riħ li jisfidana

U nemmnu li hemm qawwa ogħla minna

Inkomplu għaddejjin fuq wiċċ il-baħar

Inkella ma nemmnux f’dan l-ekwilibriju

Li nafu u ma nafux, fi vjaġġ fatali.

Assurdi li bħal qlugħ bla riħ battala

Għażilna l-avventura minn-nawfraġju,

Qed ngħuma f’nofs dal baħar ta’ bla xefaq

Mitlufa f’oċean indifferenti.

Li missna hawn qiegħedin ħadd mhu se jaħlef,

Jew jekk qiegħedin hawnhekk hekk kienx imissan,

Intbaħna wkoll li hemm oħrajn qed jegħerqu

Li għandhom bżonn ukoll l-għajnuna tagħna.

Alfred Grech

13/10/2017

Fejn Taf?

Fejn taf li mhix passjoni

Bħal taġen fuq in-nar

Tinqela bla tintebaħ

Taħt xemx ta’ nofsinhar?

Jew hix il-perċezzjoni

Għax moħħok jilgħab bik

Tiġik malajr ix-xewqa

U din malajr tħallik?

Kif taf li mhix ħolm’oħra

Mill-ħafna ħolm li ħlomt

U xejn minn dak li jgħaddi

Filmat kif erġajt qomt?

Kif taf li din mhix ħolma

Li minnha għad trid tqum

Tintebaħ xħin fl-art taqa’

F’sessik u bla ma ddum.

Dak kollu l-għaddejt minnu

Bħal ħolm li tar mar-riħ

Hemm biss tifkira tiegħu

Uġihj jew ferħ qatiħ.

Fejn taf li mhux qed jigbdu

Fl-dak kollu li jingħad,

Din mhix ħlief muntatura

Fl-iskemi tal-Istat;

Li dan mhux simulakru

Ta’ dak li missu kien,

Issib suġġerituri

Hawnhekk u kullimkien

Imm’ int bil-fors trid temmen

Iż-żmiem hekk trid tgħaddih

Għax xħin madwarek tħares

Tintebaħ minnufiħ.

Alfred Grech

12/10/2017

GħALIK UKOLL

Għalik ukoll li ma tafnix jien nikteb:

inti, li għandek dalmet il-lejl kiefer ġewwa moħħok. . .

inti li tqum filgodu u b-ħafna tama

toħroġ barra t-triq biex tgġannaq l-ombra

u tisma’ x’qegġedin jgħudu minn wara darek.

Għalik li dħalt f’dinja t’għalik waħdek

u dad-dgeġwiġ li jdarras xejn ma tfittex

ta’ dan is-serbut nemel  miexi miexi

mingħajr ma jaf fejn sejjer.

Għalik ukoll li dħalt ġo dinja oħra lli ma kelliex tkun

u bdejt tistaqsi lilek stess kif hawn sibt ruħħek;

għalik ukoll nixtieq li nagħmel

kif jien imdorri nagħmel

mar-riħ dal-versi nferrex

biex nilħaq

lil min ir-riħ  iwieġeb

u jgħidlu iva . . .

Għalik li taf li kollox huwa għalxejn

għax tinkiteb għad l-istorja.

Alfred Grech

11/10/2017

Moħbija Tkun Fil-Qratas Żagħar Mormija.

Moħbija tkun fil-qratas zagħar mormija,

Mingħajr ma ħadd jindenja jagħti kashom

Għax toħroġ trid bħal meta l-poeżija

Minn bejn ix-xquq tal-art bl-asfalt mogħottija.

Bħal verita’ li tista’ mank tingħaraf

Mil-li tagħllimt jew għadek qed titgħallem

U ssib li xejn ma jiswa’ dak li jgħidu

Bil-qwiel u l-għerf li nġemgħa tul is-sekli.

Is-sewwa kien u għadu u jibqa’ moħbi

Ikkammuffat  taħt strati skart u żibel

Li nġema’ jew bi żball jew sforz il-bniedem

U trid issibu b’lenti ftit  qawwija.

Waħedha toħroġ din bħal-poeżija

Bħal għanja mingħajr ton u ta’ bla ritmi.

Kien żmien  fejn kont sabiħa u attraenti

Illum li xagħrek bjad u l-ġilda tkemmxet

M’għadekx b’dik iż-żegliga timxi dritta

Dublett qasir żarbuin b’takkuna twila

U jiena bħall ħaddieħor wiċċi ndawwar

U nerġa’ nara sew jekk kontx rajt sewwa

U nerġa’ nagħraf lilek għall-darba oħra.

Għax mhux tassew li ż-żejta f’wiċċ l-ilma jitla’

Trid togħdos wisq fil qiegħ u tfittex sewwa

Biex għad xi darba ssib dik ix-xintilla

Il-bogħod mill-ħars tan-nies, ’mma nsibek fl-aħħar.

U mingħalija tgħaddi bla ma nafek

U tgħaddi tisfen żifna li tinagħraf

Sakemm isir il-lejl u mbagħad tinħeba.

Xħin insibek  inħossni mort imqarraq

Għax kont ħlejt ħafna żmien indur u infittex

Met’inti kont qiegħeda hawn, hawnhekk biswiti.

Alfred Grech

10/10/2017

ekk Tieqaf Ftit Tintebaħ.

Jekk tieqaf ftit tintebaħ

Mhux wieħed jien minn dawk

Ġrejt wisq fil-fatt iżd’inti

Kont għadek dejjem hawn.

Hawnhekk m’għadux pajjiżi

Inħossni bħal miblugħ,

Il-mewġ li jiġi lura

U baħar kbir miftuħ.

Fis-skiet erġajt sejjaħtlek

U l-ġilda bdiet tixraf,

Għax wiċċek beda jieħu

Is-sura ta’ min naf.

Xħin tħares fiss f’għajnejja,

Taqrax li sar l-ħin,

Biex terġa’ tieħu postok

Fil-Pantheon divin.

Alfred Grech

09/10/2017

Int Ukoll Weħilt

U int ukoll weħilt ma dis-sunnara

igganġjata, lanqas tafx kif ser tinqala’.

U jien kont naf li bħalek jagħmlu kollha

għax jien kont hemm minn qablek

fit-tarf tal-blat ta’ xatt il-baħar

u qbist u taljt ukoll għall kemm il-darba

biex nara l-ilma kemm hu kiesaħ.

U naf ukoll  x’fond hemm u x’hemm fil-qiegħ,

għaliex missejtu kemm il-darba.

Int trid tagħmilha li mintix ixxomm il-liska;

iżda jiena li kont hemm għall-kemm il-darba

naf żgur li tard jew kmieni  għad trid taqa’ int ukoll

għat –tentazzjoni, u jien nerħilek il-ħarira

ħa tiġbed kemm trid int, sakemm iċċedi.

Imbagħad la tgħidx li kont kattiv,

jew li m’għedtlekx minn qabel

Alfred Grech

08/10/2017