Lil Stephen Hawking.

Eleġija.

Fuq truf il-qċaċet fejn xi darba ħsibna

Li bdejna qafas ġdid fuq li tgħallimna

Bqajna hemm staġnati frott l-insikurezza

Biex niggranfaw mal-mambar tal-profeti.

Imbagħad ġejt int bil-ħsieb submlimi tiegħek.

U bdejna niflu sew il-ħofor suwed

It-toqob ta’ kull żmien f’kull dimensjoni

U mbagħad kissirt il-qoxra u ħriġt il-qalba

Tal-lewża li kissirt bl-intelliġenza.

F’inżul ix-xemx inin minn wara l-kwinti

Sebbaħt ukoll l-iljieli bil-ħolm tiegħek

B’dawk ix-xintilli, xrar tal-kwiekeb jiddu.

U frott il-għerf tgħollejt hemm fuq l-ispalel

Ta dawk l-iġganti, ġenji li ġew qablek.

Fil-fwar ta sbieħ il-jum li jiżvanixxi

Issa li m’għadekx hawn il-bieb jingħalaq

Fuq dawl il-ħsieb li jgħola ‘l-fuq u jiddi

Jinfed in-nagħas, l-aljenazzjoni folta.

Alfred Grech

14/03/2018

LIII.

X’qed taħbi u tostor wara dik is-sura,

Sbuħija tal-istatwi fik magħġuna?

LI kieku ma kontx nafek, nerġa’ lura,

Milqut minn dawk l-għajnejn, bħal sejf misnuna.

X’qed taħbi wara surtek il-ħanina?

Li kieku ma nafekx kont nerġa’ lura,

U kont tħajjarni nduq tuffieħa bnina,

Għalkemm illum jien frotta sirt misjura.

Li kieku ma kontx nafhek, nibdlek m’oħra.

Illum li naf il-prezza tad-drapp tiegħek,

Illum, indawwar wiċċi n-naħħa l-oħra,

Ma rridx li jkolli x’naqsam aktar miegħek.

Illum li nafek sew, għalfejn nistaqsi?

Int taf li m’hawnx ħaddieħor jafek daqsi.

Alfred Grech

17/07/2012

Lilhinn Minn Dad-Deżert.*

Lilhinn minn dad-deżert ta’ ruħ għatxana,

Xħin ma jibqagħlek xejn għaliex tistenna

Jisbaħ l-għada;

Jew tħares lejn li ġej b’għajnejn il-gawwi

Bil-ferħ ta’ sfida li tiġik biex taqta’ xewqtek.

Jien xtaqt li kont għannej sabiex insawwar

Dak l-innu li għad jista’ ismek jgħolli.

Imqar xħin tara s-sema mċajpar bir-riħ isfel

Inkella tara l-qlugħ fuq baħar qiegħed

Mill-ponta tat-turretta b’inqas ħerqa,

Inti tistenna!

Jien miegħek irrid ngħannaq żernieq ieħor

Li jżernaq fuq dal jum li qatt ma jisbaħ

U nerġa’ nistaqsik għall-kemm il-darba:

Lilek li taf it-tweġibiet imdendla

Bħal fil-kwadru ta’ nżul ix-xemx efimeru.

Bħal kieku qatt ma kien u m’hemm xejn aktar

Għajr ħsieb li jisparixxi wara x-xefaq

U nerġa’ niskoprik filwaqt li nifraħ:

Ja mara tal-misteri.

Alfred Grech

08/03/2018

*F’jum Il-Mara

Serħan ir-Ruħ

Serħan ir-ruħ fil-gaġġa tal-imġienen,

Iħares f’wiċċ il-mera tal-ħsieb tiegħi,

Li jirrifletti l-marda li tittieħed,

ix-xbieha bil-maqlub li kibret miegħi.

U lanqas xejn ma jiġri xħin inkisser

Il-mera ta’ dal ġenn, m’hemm ebda ċaħda,

l-oriġinal ma jkunx aħjar mill-kopja,

Għalkemm l-oħrajn jittawlu xorta waħda.

Alfred Grech

18/06/2012.

Tremenda Din Il-Hajja

Tremenda din il-ħajja

tiġi u tmur ma tafx għalfejn

u lanqas taf fejn sejjer.

Tremenda din il-ħajja

-alluċinanti-

sabiex titgħallem tgħum u żżom f-wiċċ l-ilma

trid taf li ma kull qadfa qed titbiegħed

u t-tmiem ugwali.

Tremenda din il ħajja,

induru dawn l-inħawi

ġo toroq ta’ bla zbokk

quddiem semafori giddieba

u statwi li jħawwduna

iċċassati tul il-perkors.

Ngħum f’ibħra mhux tas-soltu

ninġarru mal-kurrent

mingħajr ma naslu.

sa tarf irdum id-deżolazzjoni

ta’ dan ix-xatt li jrid għalih

is-solitudni tagħna,

u minn qalb id-dlamijiet

trid toħroġ din il-karba

Alfred Grech

05/03/2018

Imqarr Din Tkun Fissazzjoni.

Imqar din tkun fissazzjoni

Li noqgħod ta’ kull datba nistennik

Titfaċċa bħalma tifxref ta kull draba x-xemx  filgħodu

Minn wara x-xefaq;

Inkella bħalma l-fewġa tal-grigal

Tolqotni u tistordini

Biex tfakkarni

Li x-xitwa baqgħet magħna.

Imqarr din hi fissazzjoni

Li noqgħod nistennik bil-pinna fidi

U l-linka ma tqattarx inkella tinxef

Bħal meta nisma’ l-ħsejjes tat-takkuna

Mal-passi li joqorbu u tibqa’ għaddejja

Bla ma tieqaf.

Imqar din hi fissazzjoni

Bħal kull fissazzjoni oħra

Li mingħajrhom ma narax

Għaliex inqum filgħodu.

Alfred Grech

02/03/2018

Fejn Sejjer?

Fejn sejjer? Liema leħen qed isejjaħ?

l-għanja tar-riħ li jvenven qalb is-siġar,

l-għanja ħienja tal-baħar ma kull mewġa,

jitmattar u jimtedd maċ-ċagħaq fir-ramel,

biex ħiemed joqgħod jisma’ lilu nnifsu

minn artijiet imbiegħda. Liema leħen

qed isejjaħli? L-għanja li t’għannili

f’dak li kulljum qed tgħidlli waqt li taħbi,

li ma tgħaddix min għajri. Liema sejjħa?

Mill-qiegħ tal-għerien fondi bħal tirxoxta

U taf id-dikursata ta’ minn dejjem

Tax-xemx mal-għajru tqil, tar-riħ, tax-xita,

Tal-ħajja magħha nfisha u sa mill-bidu,

Tidwi fil-baħħ u x-xejn tal-eżistenza,

Tidwi lil dak li jtenni lilu nnifsu,

Tidwi lil dak li jtenni kull ma jisma’.

Alfred Grech

02/06/2012