Hekk Ġara.
Hekk ġara kull meta
Ma smajtx minnek
U bdejt ninġarr mal-kurrenti
Imġarrab mill-għana
tas-sireni.
Hekk ġara
Kull meta ħaddieħor
Għamiltu alla tiegħi
U ħsibt li sehemi iżgħar
U ridt nixxiebaħ biex
Nibda ningħaraf.
Hekk ġara
U għal ftit ma tlilftx
l-għelm u l-mira
tfarrakt biċċiet
bħal meta tkisser ħġieġa.
Illum tgħallimt
Li l-għana tas-sireni
Hu biss skuża
Biex ma nslapax
U naf x’hemm lilhinn
mix-xefaq
Għax ħabtu ma xtuti
l-fdal tal-oċean.
Alfred Grech
16/08/2020.
Oxxenita’.
Ridt tara ħwejjeġ sbieħ iżda
mill-ħwejjeġ sbieħ ma baqa’
xejn
hawn biss skwallur
desolazzjoni
u xejn ma jista’ jaqta’ l’għatx
ta’ xenqet ir-ruħ.
Int bħali trid li tpinġi
l-ilwien tal-qawsalla
iżda qalb dil meħla ġwejjda
xejn ma jagħmel differenza.
Għalxejn trd tpinġi s-sabiħ
għax il-ġibda biex inħassru
u kollox sar bħal blugħa
u kollox vanita’
u kollox sar. . . oxxenita’
Alfred Grech
15.08.2020.
155.
Imqar jekk int ma tridx li
tkompli l-mixja
Jien xorta għad nurik mnejn
għandek tgħaddi
U niġi wara l-bieb ta’ darek
ngħanni
Nistiednek tiftaħ il-purtelli
nkella
Tbexxaq il-persjani. Għax
għad jibdielek
U għad tkun int titlobni
minn xuftejja
Inneħħi din ix-xenqa u
dil-kilba
Bħal min ikun mitluf
fl-anestesija;
U għad tkun int li
tistedinna nġonġu
Il-ħjut ta’ dan l-istar li
konna nsigna
Imqar jekk niġi ntektek
bil-ħabbata
U noqgħod hawn fil-ksieħ
nistennik tiftaħ.
Ma ġara xejn jekk tgħaddi
x-xitwa kollha
U jiena nibqa’ hawnhekk bħal
grad fil-kesħa.
Alfred Grech
13.08.2020.
F’Daż-żminijiet.
Għażiż poeta
F’daż-żmien l-assurdita’
Fejn jirbaħ dejjem
Il-medjokri jew il-lagħaqi
Fejn is-sabiħ kastig tar-raffinat
U s-sewwa tilef leħnu
U ħadd ma jrid jistenbaħ
Min-nagħas tal-illużżjoni
Għaliex għadek id-ddoqq
il-flawt
Tistenna li l-ġrieden se joħorġu?
F’daż-żminijiet
Fejn jirbaħ biss il-qliegħ
U ssaltan biss ir-rejba
Għax għadek trid tittama
Li għad issib widejn li għad
jisimgħu.
F’dawn iż-żminijiet
Fejn ħarqu l-kotba tal-istorja
U lill profeti,
Ħaġġruhom, neżżgħuhom u
qatluhom . . .
Għażiż poeta?
Alfred Grech
13/08/2020.
Xħin Tneħħi l-Frilli Kollha.
Xħin tneħħi l-frilli kollha
Duħħan fuq l-orizzont,
Jew tbexxaq is-siparju
X’jibqagħlek hemm, fil-fond?
Xħin tneħħi l-illużjoni
U l-ġiri ta’ bla sens
Tmur lura ġo kamartek
Biex tfittex ftit tal-wens?
X’ikun li jqawwi ’l-qalbek
Jagħmillek il-kuraġġ,
Biex l-għada terġa’ tkompli
U jfeġġ tad-dawl xi raġġ?
Bilfors trid tagħmel qabża
U temmen f’dak li ġej,
Tisfida l-elementi
U tistaqsix għalfej?
Alfred Grech
12/08/2020.
F’Ġuf Iż-żmien Fejn Jien Twelidt.
F’ġuf iż-żmien fejn jien twelidt
Hemm il-mitbaħ tas-skiet
Fejn jixgħelu l-ħsibijiet
Minflok il-kwiekeb li jaqgħu
Fid-dmugħ ta San Lawrenz.
Għalhekk għażilt li nikteb
bil-lipis
Biex inkun nista’ nħassru
xħin irrid
Kull darba li nikteb
bil-linka
Jerġgħa jibdieli.
Għax imqar xħin nirbaħ nistaqsi
Lili nnifsi xi tfisser
U ta’ xhiex inhi dir-rebħa.
Huma ‘l-ftit l-anġli
t-tajbin
Dawk li ma jobdux
l-oħrajn jilgħaqu kollha
kienu
Qiegħ iż-żarbun l-allat
tat-tafal
Inkella jaħsbu li din hi xi
logħba
Ma jafux li jiena nagħmel
dak li ngħid
U kolp fuq kolp kuljum
inwieġeb.
U kemm hu ta’ dwejjaq
Meta lanqas taf l-għadu li trid
tiġġieled
Qarnita li saret ħaġa waħda
Ma dawk ta’ fuq il-mambar.
Alfred Grech
11/08/2020.
F’Dawk Il-Waqtiet.
F’dawk il-waqtiet
Xħin kollox jidher ta’ taħt
fuq
Mhux lakemm iġġonġi t-truf
U tgħaqqad żewġt iġnub.
Tisma’ biss xi serduq jidden
Jew il-ħoss ta’ xi ċuqlajta.
Aktarx li ridt noqgħod fuq
l-ogħla xifer
Biex nuri lil kulħadd kemm
jien ta’ ħila
U nibda ngħodd in-nemel
Miexi purċissjoni fejn
kulħadd jimmira
Fejn se jasal bir-riħa ta’
ħaddieħor.
Hekk sewwa li fl-għabex ta’
dak kollu
Li jintesa jegħleb is-swied
il-qalb
U xħin saħħa ma jibqagħlix
Nibda għaddej minn
ġol-ħitan.
Alfred Grech
10/08/2020.
