Għax Qabdek it-Tferfir.

Għax qabdek it-tferfir u qed titfixkel,

Int għedtli li ma tafx kif qiegħeda tħossok,

Hassejt tal-kalamita ġibda kbira,

Ħassejt x’qed jimbuttak jew x’qed irossok.

Jien għedtlek, tinkwetax m’għandekx mniex tibża’

Għax jiena nħossha wkoll dis-sensazzjoni.

Jien xtaqt inżomm idejk ’mma f’daqqa waħda

Sibt ruħi ndur fid-dlam fil-konfużjoni.

Int għedtli jkun aħjar li nerġgħu lura,

Jien għedtlek, li qed tħoss mhux ħaġa b’oħra,

Kif qiegħeda tħossok int, inħossni jiena,

U nafu t-tnejn li konna hawnhekk darb’oħra.

Alfred Grech

31/10/2016

Hemm Min Jgħid Li Dan Żmien Moħli.

Hemm min jgħid li dan żmien moħli

Jew bħal bżieżaq tas-sapun,

Jew fid-dell ta’ qamar kwinta,

Kurżita’ ta’ dak li jkun.

Mill kaxxetta ta’ xewqati

Bħal xħin niftaħ portafoll,

Nibda’ nħarebx għanja ġdida,

Ta’ sirena fuq l-iskoll.

Hawn min staqsa jekk hux minnu,

Dan hux kollu simulat,

Hemm min qal din fissazzjoni,

Jew bħal ħolma tal-allat.

Kienet x’kienet r-raġuni,

Issa dawn il-vrus ħarbixt,

Jagħmlux sens, jew armonija

Jew tgerfixa li gerfixt.

Alfred Grech

31/10/2016

U Xtaqtek Li Kont Għamja.

U xtaqtek li kont għamja

Bierx lanqas biss tarani,

U xtaqtek li kont truxa

Biex lanqas biss tismgħani.

Xħin kont quddiem il-mera

Kont hemm bid-dmugħ f’għajnejja,

Kont dgħajjef, kont bla maskra

Nistenna lilek ġejja.

Mall-qtar tax-xema tħallat

Id-dmugħ sakemm sar iebes,

U lanqas ħadd ma ntebaħ

Li lanqas biss kont liebes.

Alfred Grech

29/10/2016

Diffiċli Tqum Filgħodu.

Diffiċli tqum filgħodu

Biex tkompli fejn ħallejt,

Għaddejna minn triq oħra

U dorna dawra mejt.

Għax fejn ħallejt trid tkompli

U ma tibdiex mill-ġdid,

Għax ma kull min tiltaqa’

Ifakkrek bla ma trid.

Ma tafx għaliex il-biża’

U lanqas it-twerwir,

Tal-jum li għadu jibda’

Fid-dwejjaq u t-twegħir.

Xi ħadd irid għad jgħidlek

Kif taħrab it-taħwid

Ta’ din il-kobba mħabbla,

Fejn m’inti qatt is-sid.

Alfred Grech

28/10/2016

Indumu Biex Nintebħu.

Indumu biex nintebħu

Li dawn qed jidħku bina,

Għallmuna lkoll kif naħsbu

Għallmuna wkoll duttrina.

Għallmuna xhinu s-sewwa,

Rigal tal-ubbidjenza

Għalmuna nikkompetu

U nagħmlu d-differenza.

Għalmuna wkoll kif naħtfu

U nħarrbtu wirt ħaddieħor,

Sejjħuli dan negozju;

‘kk mhux serq dan, xi jkun l-ieħor?

Indumu biex nintebħu

Li rridu mmorru lura

Nibdew bil-kontra naħsbu

Ukoll jekk ma fihx sura.

Nibdew indawwru kontra,

Noħorġu minn ġol-kaxxa,

U t-tyorri li fih konna

Malajr fix-xejn jisfaxxa.

Ħa jħarsu lejna bl-ikraħ

Daqskieku ereżjarki

Minn tagħhom xejn rridu

U lanqas bżonn il-marki.

Alfred Grech

26/10/2016

Insejna r-Ritmi.

Insejna r-ritmi, insejna wkoll it-tnabar

Li bihom konna naslu fuq ix-xifer.

Insejna l-għana  bikri ta’ kull ħlejjqa

Li kull filgħodu tgħanni l-ferħ tal-għada.

Mhuwiex le dan il-jum li fih niltaqgħu,

Xħin bdejt inħoll l-irbit li jista’ jżommni

Hawnhekk mal-moll bħad-dagħjjes irmiġġjati

U nibqa’ tiela’ u nieżel fuq wiċċ l-ilma.

Xi minn daqqiet int taf taqtagħli nifsi

Bħal xmara li tinvadi b’mod sottili,

U tgħarraq il-pjanuri fejn jien nimraħ

Fuq l-orizzont iseħħ nawfraġju ieħor.

Kif tista’ tiżradika minn għeruqħa

Dil-qalb, li għada tħossha li mhix lesta?

Alfred Grech

25/10/2016

Kull Meta Jiġri Bħalma Ġrali l-Lejla.

Kull meta jiġri bħalma ġrali llejla

Li lanqas saħħa naħseb ma baqgħali,

Inkun sirt qisnu dak id-dekasteru

Li nħoloq biex ineħħi l-ħafna dwejjaq

Ta’ dekasteri oħra u żiedhom aktar.

Kull meta jiġri bħalma ġrali llejla

Li lanqas saħħa naħseb ma baqgħali,

Niftakar fl-għana li kont tħobb tgħannili

U nsir il-kantawtur mingħajr kitarra.

Kull meta jiġri bħalma ġrali llejla

Li lanqas saħħa naħseb ma baqgħali,

Insir dak ir-ribelli zgħir u ċkejken

Li jaħraq miċċa u f’salt iqanqal gwerra.

Kull meta jiġri bħal ma ġrali llejla

Għax hemm xi ħaġa fija l’ilha mejta.

Alfred Grech

24/10/2016

Qaluli.

Qaluli wkoll li din mhix poeżija,

Qed nikxef wisq min jien, dir-ruħ għarwiena,

U żgur li ser insib min isawwatni,

Għax jaqra moħħi u jaf minn xhiex inbati.

U jien ma nafx jekk din hix poeżija,

Għax jekk mhijiex ser tibqa’ bħal tnegħida

Ta’ ruħ li tħossha fgata u trid tittajjar,

U trid ftit tal-ispazju fejn tinstema’.

U jekk hawn ħadd ma baqa’ biex jismagħha,

U koll jekk qatt ma sabet din, xi rokna,

Inkella sotterran fejn tista’ tidwi,

Trid tibqa’ bħal farfett tittajjar ħielsa,

Bħal fwar ta’ fuq il-ward biex tibqa’ tiela’

’L-fuq, ’l-fuq mis-sħad, fejn min jismagħha

Biss huma l-ftit, inkella huma l-anġli

Li tagħllmu ’l-fuq jogħlew fl-istratosefera.

Tibżax! Ukoll jekk hemm min isawwatni,

Illum il-ġilda drat u sirt impervji

Għalmin irid min dit-tnegħida jagħmel

Sawt jew frosta; u għax illum il-ħarsa

Tiegħi tinsab ’l-fuq minn kull quċċata.

Alfred Grech

22/10/2016

Taħt Sema Mdellel.

Taħt sema mdellel jibki lilu nnifsu,

Intennu kliem li lilna jagħmel ħsara,

Fuq bjut is-swar ta’ djar li jrossu fihom,

Il-fosdqa ta’ tamiet mimlija ħrara.

Le mhux bużżieqa vakwum ta’ morali

Li lanqas tagħmel sens għax mhix pruvata

Biex terġa’ u tgħid xi darba kelli għażla

U bqajt ġo din il-pjazza jekk iffullata.

F’dan l-univers li jittraskura l-bniedem,

L-uġigħ, id-dwejjaq, qsima il-qalb u piena,

Imqarr jekk niġi mgħallem biex nilagħabha,

Dil-logħobha mhix il-logħoba li naf jiena.

Alfred Grech.

21/10/2016.

Il-Baħar Ta’Bla Xefaq.

Ja kewkba tiddi fuq pajżaġġ imtarraf,

Jien nidħol ngħum fil-baħar fietel tiegħek,

Fid-dlam ta’ lejl bla qamar jirrifletti

Il-qtiegħ il-qalb, il-baħħ tal-eżistenza,

Xħin lanqas int ma twieġeb.

Jien niġi nfittxek kull xħin nisma’ d-diwi

Tal-Għana li jfakkarni fis-sireni,

U nibqa’ ’l-quddiem miexi bla ma nieqaf,

Għaliex minn dan il-baħar mhux ser noħroġ:

Il-baħar ta’ bla xefaq.

Alfred Grech

20/10/2016 

Lanqas Naf.

Lanqas naf għaliex bdejt nikteb

Dawn il-vrus, ma jfissru xejn,

Anqas naf kif f’daqqa waħda,

Ġie dal-ħsieb ma nafx minn fejn.

U hemm ftit umiljazzjoni,

U hemm ftit tal-verita’,

Hemm is-sewwa tal-istilel

Ftit ukoll t’umanita’.

Xbajt infittex invenzjoni,

Sabiex lilek nattirak

Xi kapitlu jonqos nikteb,

Jista’ dan jinteressak.

U jekk għandek tiġi ħdejja,

Ejja ddumx u la tinsinix,

Żmien qed titlef, din mhix ħajja

Hekk imdendel, tħallinix.

Alfred Grech

18/10/2016

Trid Tħarrek Wiċċ il-Baħar.

Trid tħarrek wiċċ il-baħar

bil-mesġa ta’ subgħajk,

u l-ħafna kliem li jqanqal

sad-dell li hemm warajk.

Ir-ritmu l’aħna qbadna

mhuwiex dak ta’kuljum,

tal-melodija friska

tal-ferħ fil-qalb miżmum.

Xi ftit jew wisq jibqgħalna

fuq xefaq iffullat

l-għazliet ta’ żewġ namrati

f’ġejjieni mmakulat.

Ma rridx inħoll ir-ritmu

ta’ ħżus li ma narax,

ta’ dak li seta’ ġara

ta’ dak  li naqrax.

Għax forsi ntlift għall-kollox,

għax forsi wkoll salvajt,

u forsi tista’ taħrab

il-ħofor fejn waqajt.

Alfred Grech

19-10-2016

Valletta.

(Versi fuq stil ta’ Tarcisju Zarb)

Skwallur avvilenti ta’ toroq paralleli

li jarmu rieħa dekadenti u desolanti

bħan-nemel jgħaddu n-nies għax imdorrija

ħa jkollom x’jirrepetu xħin jinġabru

lura f’raħalhom,

inkella fid-dlam tal-griebeg kull fejn jgħammru

bħal bebbux li f’qoxortu jerġa’ jidħol.

Bħal-nemel jgħaddu n-nies mingħajr passjoni

ifittxu u jesploraw irkejjen ġodda

ta’ qliegħ, fejn jistgħu jieħdu nifs ħafif

li mhux imniġġes u mhux imdellek

bir-riħa tas-sigarri, tal-kafe’,

tal-ħobż mixwi, tal-pastizzi u kull rieħa oħra

li ħierġa minn ġol-kċejjen skoraġġjanti.

Bħan- nemel il-vetturi jfittxi spazju

fid-dojoq tat-triqat li għad jespandu.

U fuq l-uċuħ kulur il-konkos

ebda tbissima, jew fewġa ta’ riħ ħieles

għajr ir-riħa tal-fwieħa li jiddandnu biha n-nisa.

Dil-belt ta’ tant uċuh u tant burdati

ta’ lwien li ma jgħajjtux u lanqas jaqblu,

muti u torox bħan-nies li jgħammru fiha

li taf l-irġiel u taf il-galantomi

trid tiġbor bħal qaqoċċa ġewwa qalba

il-pretensjonijiet ta’ poplu mżewwaq

ta’ ruħ li tilfet lilha nfisha.

Dil-belt li fiha tlift għall-kemm il-darba

il-fil, għad tista’ għal darb’oħra tgħid xi ħaġa,

li jien nixtieq nismagħha,

ukoll jekk m’għandha xejn xi tgħidli aktar.

Alfred Grech

15/10/2016  

Valletta.

(Versi fuq stil ta’ Tarcisju Zarb)

Skwallur avvilenti ta’ toroq paralleli

li jarmu rieħa dekadenti u desolanti

bħan-nemel jgħaddu n-nies għax imdorrija

ħa jkollom x’jirrepetu xħin jinġabru

lura f’raħalhom,

inkella fid-dlam tal-griebeg kull fejn jgħammru

bħal bebbux li f’qoxortu jerġa’ jidħol.

Bħal-nemel jgħaddu n-nies mingħajr passjoni

ifittxu u jesploraw irkejjen ġodda

ta’ qliegħ, fejn jistgħu jieħdu nifs ħafif

li mhux imniġġes u mhux imdellek

bir-riħa tas-sigarri, tal-kafe’,

tal-ħobż mixwi, tal-pastizzi u kull rieħa oħra

li ħierġa minn ġol-kċejjen skoraġġjanti.

Bħan- nemel il-vetturi jfittxi spazju

fid-dojoq tat-triqat li għad jespandu.

U fuq l-uċuħ kulur il-konkos

ebda tbissima, jew fewġa ta’ riħ ħieles

għajr ir-riħa tal-fwieħa li jiddandnu biha n-nisa.

Dil-belt ta’ tant uċuh u tant burdati

ta’ lwien li ma jgħajjtux u lanqas jaqblu,

muti u torox bħan-nies li jgħammru fiha

li taf l-irġiel u taf il-galantomi

trid tiġbor bħal qaqoċċa ġewwa qalba

il-pretensjonijiet ta’ poplu mżewwaq

ta’ ruħ li tilfet lilha nfisha.

Dil-belt li fiha tlift għall-kemm il-darba

il-fil, għad tista’ għal darb’oħra tgħid xi ħaġa,

li jien nixtieq nismagħha,

ukoll jekk m’għandha xejn xi tgħidli aktar.

Alfred Grech

15/10/2016  

Valletta.

(Versi fuq stil ta’ Tarcisju Zarb)

Skwallur avvilenti ta’ toroq paralleli

li jarmu rieħa dekadenti u desolanti

bħan-nemel jgħaddu n-nies għax imdorrija

ħa jkollom x’jirrepetu xħin jinġabru

lura f’raħalhom,

inkella fid-dlam tal-griebeg kull fejn jgħammru

bħal bebbux li f’qoxortu jerġa’ jidħol.

Bħal-nemel jgħaddu n-nies mingħajr passjoni

ifittxu u jesploraw irkejjen ġodda

ta’ qliegħ, fejn jistgħu jieħdu nifs ħafif

li mhux imniġġes u mhux imdellek

bir-riħa tas-sigarri, tal-kafe’,

tal-ħobż mixwi, tal-pastizzi u kull rieħa oħra

li ħierġa minn ġol-kċejjen desolanti.

Bħan- nemel il-vetturi jfittxi spazju

fid-dojoq tat-triqat li għad jespandu.

U fuq l-uċuħ kulur il-konkos

ebda tbissima, jew fewġa ta’ riħ ħieles

għajr ir-riħa tal-fwieħa li jiddandnu biha n-nisa.

Dil-belt ta’ tant uċuh u tant burdati

ta’ lwien li ma jgħajjtux u lanqas jaqblu,

muti u torox bħan-nies li jgħammru fiha

li taf l-irġiel u taf il-galantomi

trid tiġbor bħal qaqoċċa ġewwa qalba

il-pretensjonijiet ta’ poplu mżewwaq

ta’ ruħ li tilfet lilha nfisha.

Dil-belt li fiha tlift għall-kemm il-darba

il-fil, għad tista’ għal darb’oħra tgħid xi ħaġa,

li jien nixtieq nismagħha,

ukoll jekk m’għandha xejn xi tgħidli aktar.

Alfred Grech

15/10/2016  

Int Lanqas Biss Tiftakar.

Int lanqas biss tiftakar, il-kliem ta’ dak il-ħin,

Intlift fis-sensazzjoni, tagħmilha tal-ħanin.

Intlift fin-narrattiva, intlift fil-kurżita’,

U lanqas bqajt tiftakar, id-dehen u l-abbilta’.

Ridt biss taqbila tisma’, li żżommok fuq ix-xwiek,

Hemmhekk ma stajtx insibek; hemmhekk kien fejn tlifniek.

Ma bqajtx int tgħożż il-kelma, ma fhimtx il-ferħ ta’ ġenn,

l-ilwien, ir-ritmu, r-rima, u r-ruh fejn trid tistkenn.

Bħal għuda fuq wiċċ l-ilma, tinġarr ma kull kurrent,

U bqajt għan-niżla’ nieżel; tagħllimt kull vers bl-amment.

Alfred Grech

15/10/2016 

Hekk Biss Jien Nista’ Nirbaħ.

Hekk biss jien nista’ nirbaħ

Xħin nitlef din is-sura,

Is-sens ta’ ħtija jikber,

F’min mar u reġa’ lura.

Hekk biss jien nista’ nirbaħ

Xħin nitlef din ix-xbieha

U nkun qed ngħix ħajj’oħra

F’burdata li nqum biha.

Xħin jiena kollox nitlef

U niġi nitlob ħniena,

Irbaħt ukoll id-dinja

U sirt dak li mhux jiena.

Bħal nemlu jgerrem ġebla

Bla xejn ma nippretendi,

U lura qatt ma nħares

Sakemm għad din tirrendi.

U jekk xi ħadd jistaqsi

Dwar dak li nemmen jiena,

Araw fejn tmur tistaħba,

Ix-xemx xħin tkun għajjiena.

Alfred Grech

14/01/2016

Tittappan Fik Tamieti.

Tittappan fik tamieti

Bħal meta tieħu skoss,

Għax tlift il-kopertura

Ma bqajtx kif kont għar-rdoss.

Bħal meta tieqaf f’daqqa

Tektika tal-arloġġ

U magħha tieqaf qalbi,

Xħin tħabbat bdiet bl-addoċċ.

Xħin tiċħad il-ġejjieni,

Xi ħaġa li bassart,

Jien ma nilgħabx bid-dadi

Kull meta jaqgħu fl-art.

Bħal meta tilgħab inti,

Għax inti tirbaħ żgur,

Il-profeziji tiegħek

Iseħħu kull ma jmur.

Jien ma nilgħabx bid-dadi,

Għaliex kull punt ta’ tluq

Sar issa wkoll possibbli

Ma kull kurrent misjuq.

Alfred Grech

14/10/2016 

Qalb Din L-Ambigwita’ fejn trid Tirfani.

Qalb din l-ambigwita’ fejn trid titfagħani

Inkun dak il-ġullar li beda jaħseb,

Inkun dak it-tellief li qatt ma stenbaħ

Ilsir tat-tqanqiliet mingħajr konfini.

Int tilgħab din il-logħoba tal-mixtieqa,

Inkella ta’ xi vittma trid l-għajununa,

Tikxifli ċ-ċikatriċi u tbenġil ieħor,

U tgħidli li sirt anġlu xħin serraħtek.

U tibda tuża’ l-għamad tal-qdusija

Għalkemm hemm taħt l-ilbies is-seduzzjoni,

U qatt ma taf eżatt fejn inti miegħek

Qalb din l-ambigwita’ li tfajtni fiha.

U tħalli l-bieb miftuħ għal min jaqbillek

U tagħlaq u tinbarra xħin jiftillek,

U toqgħod tistennieni niġi nħabbat

U tirbaħ int għax għandek aktar sabar.

Alfred Grech

12/12/2016.

Kont Ngħanni.

Kont ngħanni, ħaduli l-arpa,

Kont nikteb u tlift il-pinna. . . .

Ma niftehmux U lanqas qatt ma konna.

Kont tkellimni u qtajt it-telefon.

Kellna niltaqgħu

U rajtek ma ħaddieħor.

Kull mistoqsija qed taħraqni:

Min jaf fejn mort?

Min jafa fejn kont?

Kemm domt ma ġejt?

Jien għadni hawn!

Inti tgħandek ħabta ttir bħall-friefet

Il-warda tkunlekbis  ta’ skuża.

Kliemek jinfed id-dlam

U l-qaws maqsum fi tnejn.

Il-ġlied sax-xatba wasal

U int għadek ma ġejtx.

Weġibtek għal kull mistoqsija

Imbagħad ħallejtni għama tiela’ t-taraġ

Fellus li għadu ħiereġ minn ġol-fosdqa,

Niġġerra mal-wesgħat u lilek ma rajtekx.

Alfred Grech

24/09/2011.

Fil-Ħemda ta’ F’l-Għaxija.

Fil-ħemda ta’ f’l-għaxija

Xħin waħdi nkun id-dar,

Nintona fuq mewġ ħieles

U nifed dak l-istar,

Biex noqgħod hawn nissemma

Il-ħoss tal-ħsibijiet,

U waħdi l-melodija

Li naf, indoqq fis-skiet.

U nibda nisma’ l-ħsejjes

Tal-ħolm li toħlom int

Għalkemm il-bogħod tkun minni

Il-ħoss hu ċar, distint.

U nibqa nġorrhom miegħi,

Nistħajjlek tkun fil-qrib,

U nibqa’ lilek nisma’

Fejn tkun u f’kull ma nsib.

Alfred Grech

11/10/2016

Ma Baqgħalix is-Sabar.

Ma  baqgħalix is-sabar

li nikteb strofa ġdida

f’ta’ ħajjti l-poeżija,

għax tlift ukoll l-isfida.

Inħoss li tlift ir-ritmu

u tlift ukoll ir-rima,

ir-ruh timtela’ dwejjaq

u titlef it-tbissima.

Ma baqgħalix il-ħila

fis-skiet tad-dalm inqajjem

l-iħirsa trijonfanti

mill-ġuf ta’ min hu sajjem.

Baqgħali biss it-tama

li għad iqum ta’ siegħa

irwiefen ta’ riħ qawwi

li għad inaddaf qiegħa.

Mill-bqija hawn se nibqa’

poeta tal-qawsalli,

nistenna tiġi s-siegħa

u nifraħ bli fadalli.

Alfred Grech

10/10/2016

Wara L-Ewwel Kolp.

Wara l-ewwel kolp issibek qiegħed togħodos

U d-dlam li jgħaddi minn quddiemek

Hu biss il-mossa f’waqtha

Biex terġa’ tiġi f’sikktek.

Jien naf li minn daqqiet nitbiegħed sew mill-mewġa

Li wasslitni fejn kelli nasal

U nidħol pront fis-skiet

T’għerien id-dlamijiet ta’ dari.

Tistħajjek rieġa nieżel bħal Orfew fl-infern

Tfittex lil Euridiċe,

U terġa’ mill-ġdid titla’ biex titlifha

Xħin tasal fil-wiċċ.

Għalhekk dil-ħolma tturmentata sejra tibqa’ tirritorna

Sakemm indum f’sensija.

Alfred Grech

07/10/2016

Felli Mfellel*

Felli mfellel tal-bettieħa,

Ruġjada fuq il-windskrin tal-karozza qamar ottubru

Li jibki l-moħħ qasir tal-ħamla l-kbira

Megħdija tgħożż l-iħirsa li jsostnuha fil-ġenn t’għemilha.

Kull xintilla li tgħaddi sbirixx

Taħsibha kewkba feġġa ta’ tamiet

Iżda bħal kewkba feġġa trid tintilef

Fil-qilla ta’ dlam il-lejl li jaħtaf kollox.

Il-frilli ħsibijiet imperrċa

Mal-pal tal-bajtar tax-xewk.

Ix-xarabank li tgħaddi min kull stazzjon

Ta’ ħajjet il-werqa m’gandiex il-ħin li tieqaf.

U tibqa’ għaddejja bla ma ssellem

Lilll-aljenat ifittex pjattoforma.

Ir-riħ li jisfidani qajjem irvell sħiħ ġo fija

Għaliex qajjimni minn dir-raqda

Li bħal kullħadd kont komdu fiha,

U mbagħad bħal fatta nibda nifhem

Għaliex dak li ngħid jien qatt m’huwa tajjeb.

Alfred Grech

06/10/2016.

*Din il-poeżija nkitbet wara li ġejt infurmat li l-Editur ta’ Il Ħajja F’Għawdex beża’ jippublika artiklu li jien għaddjetlu għal dik ir-ivista.

Għal Dejjem Ta' Dejjem.

X’għajb, xi dwejjaq li naf li qiegħed fihom

fil-logħoba li tintlagħab fil-baħħ ta’ moħħi,

xħin naf li qiegħed nagħmel bħal ħaddieħor

u naf li hawn kont qiegħed ħafna drabi.

Xi dwejjaq, li biex ngħaraf lili nnifsi

minn qabel irrid naf li qiegħed nagħmel

kif jagħmel qed kullħadd. Nistgħad bil-qasba,

biex nara jekk naqbadx din l-emozzjoni

li mhix qed hemm, inkella momentarja.

Kont ħsibt li ġġib il ferħ u l-kuntentizza

u l’ issa d-dinja setgħet tieqaf taħseb

fli ġej, fli kien u hekk inkunu dħalna

fil-kwadru mmakulat ta’ din il-ġrajja

sabiex hemm nibqgħu, għal dejjem ta’ dejjem.

Alfred Grech.

05/10/2016

Waqfet il-Ferrovija.

Il-ferrovija waqfet,

Xort’oħra tkompli l-ġrajja,

Jien ġejt, eġpajt, f’sensija,

Dan hu stazzjon tal-ħajja.

Iżda:

Ħallejtlek dawn il-versi

Xi ftit tal-poeżija

Jagħmlulek kumpanija

Bħal wens ta’ filgħaxija

Biex taħseb xi ftit fija

F’dawk sninek l-imgħoddija

Xħin ħajjtek wiegħedt għalija

Ħallejt malinkonija

Għax issa ma ħaddieħor.

Ħallejtlek dawn il-versi

Xħin waħdek, tiftakar

Ħaddieħor jiftaħar

Mingħajrhom tiftaqar

Fid-dwejjaq tinsatar

Xħin f’darek tinġabar

Fil-ħin li tistabar

U terġa’ titkattar

It-tama ġo fik.

F’dil-ħolma qasira

Kien sew kieku bqajna

Quddiemna kull mira

Ninsew ta’ warajna.

Iżd’issa żmien ma baqgħalniex sabiex noħolmu.

Alfred Grech

21-09-2011

Nixxiegħa.

Nixxiegħa qatt ma tieqaf,

Nixxiegħa ssir dagħbien,

Ninġarr ma dal kurrenti,

Staqsejtni jien min jien.

Nixxiegħa t’ilma ħelu,

Inħares fiss f’għajnejk,

Inħott il-barrikati

U nibda nersasq lejk.

Nixxiegħa t’ilma ħelu,

X’ninġarr ma dal kurrent,

Għaliex kos reġa’ bdieli

X’inbidel f’dal mument?

Nixxiegħa qatt ma tieqaf,

Li fiha xtaq inħsilt,

Ma jibqa’ xejn x’jurini

Kif kont u kif inbdilt.

Alfred Grech

03/10/2016

Fejn Int Poeta tal-Kadenzi Mżewwqa.

“Fliema vers se teħodni miegħek . . .” (Tarcisio Zarb)

Fejn int poeta tal-kadenzi mżewwqa

Li tpinġi l-qawwa mnebbħa tal-misteri

Bl-ilwien evanexxenti tal-qawsalla

U tagħmel ħwejjeġ faċli mid-diffiċli?

Fejn int poeta ta’ mitt elf kadenza,

Li ttenni r-ritmi ta’ natura mqanqla

Fl-ilsien tal-beraq jew tar-riħ li jvenven,

Inkella fit-tħaxwix tal-weraq niexef?

Fejn int għannej, li ssoltu tgħanni l-għanja

Ma tlugħ ix-xemx taħt sema nkandexxenti,

Li tpespes bħall-għasafar xħin jistembħu

Fil-girja biex kull wieħed jasal l-ewwel?

Poeta ta’ kull lewn u tal-qawsalli,

Idejk mattarli ftit biex leħħa tkebbes,

Għax xrara jiena rrid u nerġa’ nibda

Imżewwaq il-burdati bil-qawsalli.

Alfred Grech

01/10/2016