Aħjar il-Ħolm.

Aħjar il-ħolm bla ma tipprova  tbiddel

Dak li titfagħlek ma saqajk il-ħajja,

Aħjar kastelli tibni fuq ir-ramel

Milli b’idejk tipprova s-sema tilħaq

Għaliex is-sema jibqa’ hemm fejn qiegħed

U l-ħsibijiet bħal mewġ imorru u jiġu.

Int mingħalik li tista’ tkun l-imħabba

Iġġiegħele tagħmel dak li ma tridx tagħmel

Jew leħen li jsejjaħlek u trid tara

Minn fejn hu ġej. Hekk kienet u minn dejjem.

Int qbadt it-triq li qbadt għax b’fidi tajba,

Mingħajr ma taf fejn għad din tista’ twasslet,

Jekk hux fit tarf, jekk hux l-infern inkella

X’imkien ieħor, jew ġo deżert il-ħajja

Fejn ħadd u xejn ma jagħmel sens u tibqa’

F’dawk l-inħawi fejn għadu ħadd ma wasal.

Int tista’ tkompli tgħix ukoll misteru

Jien nibqa’ hawnhekk mistoħbi wara l-qamar.

Alfred Grech.

29/04/2019

Hawn X’Ġejt Nagħmel?

Inċemplillek sabiex ngħidlek

li ġej għandek, dar ir-riħ.

U f’nofs triq nistaqsi nibda’

nerġax lura minnifiħ!

Imqar int xħin nasal għandek,

tistaqsini għalxiex ġejt,

U xħin tħares fiss f’għajnejja

mingħajr kliem il-baħħ imlejt.

Ġejt biex naħrab, ġejt biex ninsa’,

ġejt hawnhekk ma nafx għalxiex,

ġejt inġedded it-tifkira

u int malajr ħejjet il-friex.

Alfred Grech

28/04/2019

Insa’ ż-Żmien.

Insa’ ż-żmien u l-kalendarju,

kollox jerġa’ għal li kien,

toħlom tista’ jew titttewweb

milli tbiddel dak li kien.

Ibni torri fuq ir-ramel

jew inkella tir ’l-fuq,

jew ipprova b’idek tilħaq

sħab fis-sema hekk mitluq.

Għax is-sema fejn kien jibqa’

ma jinbidel ħadd u xejn,

bħal kull ħsieb li jiġi u jitlaq

tinkwetax, għax mhemmx għalfejn.

Hemm il-leħen f’sidrek jgħajjat

għax l-imħabba tagħmel bik.

Dak il-leħen trid tisimgħu

li jirbombja ġewwa fik.

Qed fit-triq tar-rieda t-tajba,

iżda tasal ma tarfx fejn

tibqa’ ħajjtek kollha tfittex

u ma tafx jekk ġejtx għalxejn!

Jekk għad titlaq u ssib ruħek

ġo deżert riġlejk fis-sod,

lejn ix-xefaq, lilhinn minnhu

ibqa’ ħares fiss il-bogħod.

Hemm xtajtiet bil baħar tagħom

hemm bibien mingħajr muftieħ.

Ejja ħdejja għax jien nistiednek

f’din l-oasi tal-mistrieħ.

Alfred Grech

27/04/2019.

Jekk Toqgħod Hawn Tkellimni.

Jekk toqgħod hawn tkellimni,

Jien għandi nmejn nirxoxta

U nrabbi l-gwienaħ.

Jekk toqgħod hawn bi kwietek

Jien nibda nirrifletti

Liema rieħa fiha l-ħajja.

Jekk toqgħod hawn tismagħni

Tkun ferm sorpriża kemm hu ħafif

Li titlef ħajjtek inkella kemm hu tqil

Li tibda’ tgħixha.

Jekk tibqa’ tiflini sew issib li rġajt

Bexkilt il-karti u ma kull daqqa t’għajn

Id-dmugħ jinbidel f’għasel.

Jekk tġi  hawn bla ħwejjeġ

Insir naf min int tassew

U nibda nħares lejk,

Bħalma nħares ġewwa l-mera.

Alfred Grech

26/04/2019

Kaxxa Tad-Daqq.

Jekk trid tfittex f’kull misteru

U tiskopri minnufih,

Dak li hemm mistur fil-moħbi

Xi jkun dak li jaqa’ r-riħ,

Fit-tifkira tal-imgħoddi,

Hemm is-susa tad-destin,

Bqajt marbuta ma li ġralek,

Tlift il-fil ta’ fejn qiegħdin.

Ried ikun ir-raġel twajjeb

Illi ġabrek fit-telfien,

Iżd’għalkemm għamiltha miegħu

Bqajt m’għaraftx tassew min kien.

Għax inbdilt, ma bqajtx tingħaraf,

Irxuxtajt u qomt mill-ġdid,

Jew bdilt ħajjtek, ma bqajtx temmen

F’dak li jista’ jkun ta’ ġid.

Adalina xbejba sbejjħa

Qed tistenna l-jum sabiħ;

Bi tħejjija xtrat l-għamara

Xtrat senduq, b’dak li kien fiħ.

Kien fiħ libsa, kien fiħ kaxxa

Li ddoqq ħlejju u bla tlaqliq,

Dlonk ġabritha fis ġarritha,

Issuq rota, għal għonq it-triq.

U kif seta’ ħadd ibassar

Kemm hu kiefer id-destin?

Ħabta u sabta d-dinja waqfet

Spiċċa kollox dak il-ħin.

Ħadd ma riedha b’dik il-bixra,

Damet nieqsa xi sentejn,

l-għarus tagħha wkoll telaqha

kollox għab u ġie fix-xejn.

Dakinhar li xtrat il-kaxxa

Kaxxa mdaqqsa biex tindaqq

Kien hemm rabta misterjuża

Ma Giuseppe tabilħaqq.

Hi tassew li saret tħobbu

’Ma kif tgħix ma dax-xitan,

Li hu mimli bil-misteri

Moħbijin wara l-ħitan,

Ta’ dil-villa ssiġillata

Fejn hemmhekk ma jidħol ħadd?

U min kienet dik il-mara?

Ma jsemmieh isimha ħadd.

Ma kull rokna u kantuniera

Il-misteru ma jaqtgħux

Dellijiet ta’ żmien li għadda

Uċuħ fissi u ma jarawx.

U min kienet dik Susannah?

Min qatilha, għidli min?

X’hemm mistoħbi wara l-gideb

Li jirrenja ta’ kull ħin?

Sakemm fl-aħħar fil-quċċata

Ta’ dil-ġrajja x’hemm mistur

Dritt inkixef xħin il-kaxxa

Tajtha l-ħabel, bdiet iddur.

Ħadd u xejn mhu dak li jidher

Ftit tal-ħlewwa u ħafna nkwiet,

Tibqa’ ddoqq sa ma tispiċċa

Sa tintefa’ u jaqa’ s-skiet.

Alfred Grech

23/04/2019

Imnebbaħ Mill-Ilwien Ta’ Xi Qawsalla

Imnebbaħ mill-ilwien ta’ xi qawsalla

Int tgħid li jista’ jkun perikoluż:

“Aħjar li mal-oħajn tkun fir-ringiela

Logob b’ħajjtek dan, u jista’ jkun riskjuż.”

Int għid li trid issib raġuni dejjem,

Jien ngħidlek trid raġuni: u dan għalxiex?

U tgħid li trid tarani bħal ħaddieħor,

U jien ma nafx inkun dak li miniex.

U kemm il-darba ngħidlek illi nħobbok.

Għalik dal-kliem aktarx ma jfisser xejn

U nibqa’ niġri wara s-sħab u l-friefet

U noħloq is-sabiħ u jkun għalxejn.

Alfred Grech

23/04/2019

Fejn Se Nsibu L-Ażil.

Fejn se nsibut l-ażil minn dil-burraxka

Minn dat-tħarbit, tifrik tal-kampanja tagħna

Ta’ bini tiela’ mingħajr rażan

Mhux biex biex jaqdi l-ħtiġiejiet tagħna l-Maltin

Iżda biex ikabbar il-ħażna ta’ min għandu bil-wisq aktar

Milli fih jiflaħ u fiħ jifġa’.

 Ħanqa ta’ ħmar dan tagħna li mhu ser tgħola mkien

Fejn se nsibuħ l-ażil minn din l-ipokresija

Ta’ min jiftaħar b’dal proġress

Fit-tidwir ta’ roti tal ġigġifogu

Fin-nefħa ta’ bużżieqa li ma tinfaqa’ qatt.

Fejn se nsibu ażil minn min

Jibbmbardjana ta’ kulljum bil-ħrejjef

Uli jbiddel il-kuluri u jagħmel dak li jrid

Għax hekk tiddetta l-etika tar-realpolitik?

Fejn se nsibuħ l-ażil minn dak il-ħtif feroċi

Ta’ nisa verġni, tat-tfal innoċenti 

Ta’ min m’ghandux għaxja ta’ lejla?

Intom Maltin li moħħkom biex tiddramatżżiaw

U tqajmu l-mejtin mill-qabar,

Ittennu l-miti u l-għanqbut tal-imgħoddi,

Meta ser tqumu min-nagħsa u tistembħu?

Alfred Grech

22/04/2019

Mad-Dellijiet Imbikkma.

Mad-dellijijiet imbikkma ta’ musbieħ il-lejl

jitnadfu l-ħsibijiet fi sbieħ ta’ jum imdennes

fi tlugħ ix-xemx jitnikker bħal ħanfusa

 imtappan bi swied il-qalb

ta’ sħab ma jridx jitħarrek.

Kont għalija kolp ta biża’

kull meta jitla’ l-ajru;

bħal kewkba li fil-għodu lanqas tiddi;

bħal berqa ġejt biex tgħinnu nqum fuq tiegħi;

bħad-diwi tal-kuxxjenza tistaqsi x’kont qed nagħmel,

meta waħdi kont u intbaħt li sirt għarwien;

bħad-dell warajja ssus imqar jekk ngħaġġel,

naħarbek ma nistax għas sirt bħal anġlu,

twaqqafni f’nofs ta’ triq ġġibni bejn ħaltejn

ma nafx x’ser nagħmel.

Imqar f’dar riefnu li jonfoħ mid-deżert

insib il bnazzi

Alfred Grech

L-Għid il-Kbir

21/04/2019

A Sandra.

Saro’ la tua stella cadente che brilli nel buio del tuo cuore

Saro’ l’eco della tuo coscienza che risponde negli angoli piu’ stretti.

Saro’ il fulmine che ti venga a svegliare

saro’ il vento che ti fa volare come le foglie

saro la tua ombra che ti segue ovunque

saro’ il tuo angelo che ti venga a cercare

e guardarti negl’occhi

per vedere quanto grande e’ l’infinito

come si puo’ catturare l’eternità  in un istante.

Alfred Grech

21-04-2019