Kaxxa Tad-Daqq.

Jekk trid tfittex f’kull misteru

U tiskopri minnufih,

Dak li hemm mistur fil-moħbi

Xi jkun dak li jaqa’ r-riħ,

Fit-tifkira tal-imgħoddi,

Hemm is-susa tad-destin,

Bqajt marbuta ma li ġralek,

Tlift il-fil ta’ fejn qiegħdin.

Ried ikun ir-raġel twajjeb

Illi ġabrek fit-telfien,

Iżd’għalkemm għamiltha miegħu

Bqajt m’għaraftx tassew min kien.

Għax inbdilt, ma bqajtx tingħaraf,

Irxuxtajt u qomt mill-ġdid,

Jew bdilt ħajjtek, ma bqajtx temmen

F’dak li jista’ jkun ta’ ġid.

Adalina xbejba sbejjħa

Qed tistenna l-jum sabiħ;

Bi tħejjija xtrat l-għamara

Xtrat senduq, b’dak li kien fiħ.

Kien fiħ libsa, kien fiħ kaxxa

Li ddoqq ħlejju u bla tlaqliq,

Dlonk ġabritha fis ġarritha,

Issuq rota, għal għonq it-triq.

U kif seta’ ħadd ibassar

Kemm hu kiefer id-destin?

Ħabta u sabta d-dinja waqfet

Spiċċa kollox dak il-ħin.

Ħadd ma riedha b’dik il-bixra,

Damet nieqsa xi sentejn,

l-għarus tagħha wkoll telaqha

kollox għab u ġie fix-xejn.

Dakinhar li xtrat il-kaxxa

Kaxxa mdaqqsa biex tindaqq

Kien hemm rabta misterjuża

Ma Giuseppe tabilħaqq.

Hi tassew li saret tħobbu

’Ma kif tgħix ma dax-xitan,

Li hu mimli bil-misteri

Moħbijin wara l-ħitan,

Ta’ dil-villa ssiġillata

Fejn hemmhekk ma jidħol ħadd?

U min kienet dik il-mara?

Ma jsemmieh isimha ħadd.

Ma kull rokna u kantuniera

Il-misteru ma jaqtgħux

Dellijiet ta’ żmien li għadda

Uċuħ fissi u ma jarawx.

U min kienet dik Susannah?

Min qatilha, għidli min?

X’hemm mistoħbi wara l-gideb

Li jirrenja ta’ kull ħin?

Sakemm fl-aħħar fil-quċċata

Ta’ dil-ġrajja x’hemm mistur

Dritt inkixef xħin il-kaxxa

Tajtha l-ħabel, bdiet iddur.

Ħadd u xejn mhu dak li jidher

Ftit tal-ħlewwa u ħafna nkwiet,

Tibqa’ ddoqq sa ma tispiċċa

Sa tintefa’ u jaqa’ s-skiet.

Alfred Grech

23/04/2019