Fi  sliem li ma jsellimx

maqsum fi tnejn u mperreċ

mal-mewġ li ma jidhirx

tiela’ u nieżel

u l-moħħ li ma jsegwix

id-dwejjaq li jwersqu,

wiċċek jitfaċċa ipotesijiet possibbli

jistkennu għad-dell tad-dielja

jissemmew l-urieżaq muti

jsajjru l-għeneb li ma jxenxilx.

Jiena u inti

nistkennu  taħt dil-ħarruba

li taf il-ġrajja tar-raħal.

Nistħajjlek kont sibilla tħares lejja,

b’idejk marbuta

u bi tbissimma fuq xofftejk

bħal donnok taf li dad-destin

mhuwiex għalina,

Fuq mewġ il-baħar jaslu dawk l-aħbarijiet

li ma rridux nisimgħu

it-tħabbir mingħajr id-daqq tat-trombi

jew dak li konna nafu

fil-purċissjoni ta’ wegħedet

li darba konna għamilna lil xulxin

u taf ukoll li l-ħalf li konna ħlifna

m’għadux jorbotna.

Alfred Grech

13/-1/2019

Għax Int.

Għax int bħal serafin fil-bieb tal-Għeden

Ma tħalli lil min jgħaddi u jidħol ħadd,

Tkeċċili  l-ħsibijiet ta’ kull mar’oħra

Biex bħalek nibda ngħid li ma sibt qatt.

Int taħsel twebbes rasek daqs ta’ blata

Imdawwra xahari mimli xewk u għollieq,

Jekk tiġi l-fewġa tmewweġ ma kull radda

Ma tkun ta’ ħadd u tagħti wkoll bis-sieq.

Jekk ta’ madwarek jitlef l-għaxqa tiegħek,

Int tibda tonfor titlef il-miżien,

U bħal gwerriera tarma tarka u xabla

Tiġġieled l-għadu u tagħti fejn kien kien.

Alfred Grech

12/01/2019

Anġlu Ġdid.

Jinżel qawwi d-dlam ta’ lejl bla kwiekeb

Il-ġibda tiegħek kibret wisq,

Għalxejn imlejt widnejja kollha xema

Għax l-għana tiegħek qatt ma stajt ninsieħ.

Mhux l-għana

Iżda l-vleġeġ li bdejt tifa’

Fatali ta’ Eros it-tigiż,

Id-daqqa t’għajn

U l-baħħ t’a fuq xpfftejk,

Il-ħoss tal-infinit li jidwi f’widnejja.

Bil-wegħediet tiegħek

Li għad tagħmilni anġlu ġdid.

Alfred Grech

12/01/2019

F’Għajnejk il-Fond Bla Qiegħ.

F’għajnejk il-fond bla qiegħ

ta’ min hu mixgħuf

u wiċċek jixhed il-ħmura ta’ filgħodu

u l-ilwien ta’ min qalbu ma jaqtax.

Xuftejk marsusa bħallikieku jridu jaħbu

Xi sigriet

Fil-kurrent mal-folla għaddejja

Bħali

Iżd’inti tispikka.

Jien bħalek nikkumbatti l-kurrenti taż-żmien

U r-rotot predestinati

Ta’ ferrovija misjuqa bla xufier.

U bħalek ridt nisfida

B’dak li għandi f’wiċċ l-allat

U għalhekk ikkastigat

U għalhekk ġejt infittxek

Biex nara lili nnifsi f’dik il-qawwa

Li sadanittant

Kont ħsibtha li telqitni.

Alfred Grech

11/01/2019

I WOULD WANT TO.

I would want to close myself inside a  locket

which you will hang around your neck,

so I can feel the flow of your blood

in the pulses of your veins

and the sequence of your  heart beat.

I would want to sit in silence

and refrain each word you said

and the sweet sounds that you whispered

and savor in the emptiness of a room

the depth and the weightiness

of each and every syllable.

Alfred Grech

10-01-2019

Irridek.

Irridek taħraqni sew

Bin-nar tal-esuberanza tiegħek

Fuq il-gradilja tal-ħeġġa li tħeġġeġ

Il-benniena ta’ mwejġiet li qanqalt fija

U tismotni biż-żejt jaħraq

Tal-balzmu fuq il-ġamar ta’ tmellis idejk

U l-ħlewwiet kliemek.

Irrid nintilef f’dak il-paradoss

Ta’ għamad ħieles ta’ ħdanek trasfigurat

Li jittrasmetti kull sensazzjoni

Li tiżboq ħolm il-bniedem.

Imbagħad irridek taqbadli jdejja

U tniżżilni fis-saltna tal-abbissi

Fis-saltna ta’ Hades

Biex jien nifdik mill-ġdid

Bl-għana ħieles ta’ Orfew.

Alfred Grech

10/01/2019

Jien Missni Qbadt u Tlaqt.

Jien missni qbadt u tlaqt

Minflok li qed infittxek

Iżd’ inti tfittex qiegħda dak

Li trid ma jispiċċax

Trid l-ewwel tgħix dak kollu illu jkissrek

Imbagħad tgħix dak li hu sabiħ għal dejjem.

Xi ġralek issa? Waqajt fis-skiet?

Inkun għalik il-kelma tal-profeta

U inti għalija ħarsa, nkella żball.

In-nies kas tiegħek lanqas jagħtu

Jekk mhux biss fl-impressjoni,

Iġorru l-preġudizzju tul ħajjithom

Bħal portafoll tal-flus.

Titbiegħed kemm titbiegħed mhux se tasal

U min dunbietek ma taħrabx għax aktar tghejja

U xħin jilħquk issib li tkun bla saħħa

U ċċedi l-armi.

Iżda mbagaħd jekk tkompli tmur lilhinn

Issibek biss min lest li jkompli jimxi.

Alfred Grech

09/01/2019