U Issa Inti Wkoll.

U issa inti wkoll waqaft

Ja mara t’elf mitt ħolma

Li ssoltu tiġi tfesfes ġo widnejja

Tqajjimni min-nagħas ħlejju

tal-apatija

U tirxuxtani

Mil-mewt ta’ min xeba’ jgħix il-ħajja.

Inti ukoll m’għadekx taf tixgħel il mixgħela

ix-xrar efimeru b’għeliem li ħadd ma jħassar

u tħalli minn fejn tgħaddi

il-fwieħa tal-inċens li jikkanċella

fejn qiegħed id-divin

għax issa aktarx li l-ħajra mietet

u kollox jidher dak li kien

bla tama li xi darba għad jinbidel.

Jien nibqa’ hawnhekk

Nagħmel dak li kont nagħmel

Nistagħdar f’din l-għadira

Ta’ dak li tista’ tobsor

U dak li hu bla lostru.

Jien nibqa’ hawnhekk,

Qaddej fidil tal-amar tiegħek

Nistenna li xi darba għad tidirli

Turini kif għad nista’ negħereq

fit-tnissija.

Alfred Grech.

05/08/2019

Ejja Nibnu.

Ejja nibnu, ejja nibnu

ejja  nibnu l-flettijiet

biex inżidu għandna

Għall-frustieri bil-mijiet.

Ejja nibnu, ejja nibnu,

ejja nibnu l-flettijiet

għax qalulna issa nistgħu

nagħmlu wkoll il-ħniżrijiet.

Ejja nibnu mhux għalina,

għal uliedna, għal Maltin,

biex nimlewhom b’kull ma jiġi

u bħal fniek hemm marsusin.

Għax il-Malti issa dara

id-dar joqgħod qisu xejn,

jew mal-gvern b’idejħ fuq żaqqu

iċċassat ma jagħmel xejn.

Ejja nibnu, nkomplu nibnu

saħansitra kullimkien,

x’jimpurtana l’għall ġejjieni

fejn tillarga mhemm imkien.

Ejja nibnu nkomplu nibnu

f’orġja waħda mifxulin

għax biex sirna bħax-xadini

nilluppjaw qed lil xulxin.

Alfred Grech

05.08.2019.

Lejn Min?

Lejn min triduni ndur

jekk jiena bqajt marbut

ma dak li tgħallimt bl-amment

ma dak li studjajt fuq il-banek tal-iskola?

Lejn min triduni ndur?

is-sema issa ssaħħab,

ix-xefaq iċċajpar

u ċ-ċief inewwħu l-biki

tal-għabex tal-allat!

Lejn min triduni ndur

jekk ebda karovana

ma tidher fuq ix-xefaq

it-trab jgħammex l-għajnejn

u r-riħ isfel kollox dellek?

Fejn min triduni mmur?

quddiem l-allat tan-niċeċ?

nissemma l-ħrejjef tal-storja?

inwettaq riti tal-iskandli u tal-qdusija?

ninfexx fit-tifħir li saħansitra

jistordi s-sriep fil-ħofra?

Fejn min immur

jekk jien kamaleont

imbiddel il-kulur

skond il-madwar?

Alfred Grech

04.8.2019.

Jista’ Jkun.

Jista’ jkun li ma nogħġbokx

u xorta tfaħħarni f’wiċċi

u ddur u tgħid minn wara

ħaddieħor kif jinxtara.

Jista’ jkun ukoll li nogħġbok

turini ma tkunx trid

għax ħsibt li din tellieqa

u tul ma tridx żżid.

Jien xejn ma ridt ngħidlek

ħlief dak li għamilt

kien biss mill-qalb ħiereġ

kien biss dak li għażilt.

Nurik kif naħsibha

nurik x’qed inħoss

mill-bqija nsellimlek

u nidħol għar-rdoss.

Alfred Grech

03/08/2019.

Mazz Tal-Fjuri.

Int tista’  tqis dal-versi mhuma xejn

Mhux ħaġa li trid tgħożżha

Dawn versi li ħierġin

Mill-bir tat-telf mis-sensi.

Int tista’ ma taħsibx li hemm tifsir

Għax huma trasparenti

Bħal qtar tan-nida fuq il-weraq

Ta’ filgħodu li jfur u jisparixxi

Fid-dawl tax-xemx.

Dawn huma versi li ħadu l-ħajja

U ġew ma nafx minn fejn

Intiżġu bla tifsil u ħadu l-għamla

Li qed tara.

Jekk tagħlaq ftit għajnejk issib

Li dawn mhumiex

Għajr mazz tal-fjuri.

Alfred Grech

02/08/2019.

Għaddejjin  Bħal Rieqda Mqajjma.

Għaddejjin bħal rieqda mqajjma

minn fuq il mewġ tal-ħolm imsikket

bħal bastiment mistħajjel  li jaf jidher

u ma jidhirx.

Imbagħad nistembħu biex nintebħu

li ż-żmien kien għadda

u ċ-ċpar kien telaq

u li t-tajr tal-passa m’għadux ipassi

minn dawn l-inħawi.

Imbagħad nintebħu li mhux aħna

nħollu l-irmiġġi u nħallu d-dagħjjes

jintellqu mal-kurrenti xħin jofroħ il-baħar.

Imbagħad nintebħu li jkun għalxejn

li nissieltu kontra l-ħalel

għaliex dan baħar ta’ bla xefaq.

Alfred Grech

02.08.2019

Jien Dawn Ma Fhimthom Qatt.

Jien dawn ma fhimthom qatt

li jiktbu biss sabiex ikunu kitbu

biex jgħaddu l-ħin

u jġiegħlu lill-ħaddieħor isegwihom

għax jaħseb li qiegħdin fuq pedestall

fejn ma jilħaqhom ħadd

jew joqgħod jifli dak li huma stess

mank jafu jfissru.

Jien dawn ma nifhimhomx

li jonfħu ħafna bżiezaq

jilgħabu b’ħafna kliem

u tagħmel trid il-kutrumbajsi

biex tara kif tifhimhom;

imbagħad xħin jiesek taqta’

u dawra mejt iddur

tispiċċa tkun pulit u tgħid: Kemm hi sabiħa!

mingħajr ma tkun fhimt xejn

tibqa’ miblugħ

tittama li jgħodduk

ma dawk l-illuminati.

Jien dawn ma nifhimhomx,

ma fhimthom qatt

u għalkemm irrid nistqarr

li ġieli għamilt bħalhom,

għadni sal-lum

ma nifhimhomx

u qatt mhu ser nifhimhom,

Alfred Grech

01.08.2019