Inħobbok.

(Lil Amelia)

Inħobbok fl-assenza tiegħek

Sa ma terġa’ tiġi

U nistenna li narak u ma narakx.

U naħseb l’int ukoll tkun taħseb fija

Jew li darba tista’ tkun

Għalkemm naf ċert illi qatt mhu se tkun tiegħi.

Inħobbok f’kull messaġġ li nibgħatlek

U f’kull tweġiba li nirċievi, jekk nirċievi,

Kull meta tkun sorpiża li titfaċċa

U għal waqt wieħed għajnejna jiltaqgħu

U t’a kull darba romblu kbir irambal

l-asfal fl-istonku tiegħi

u s-siparju jerġa’ jitla’ bl-i stennija

biex narak u nassisti għall-aħħar att

l-att ta’ trijonf.

Inħobbok u nibqa’ ngħid li nħobbok

Waqt li nsuq u minn maġembi jgħaddi jvenvnu

Filliera ta’ vetturi bħal f’xi ħolma

U mbagħad nasal fejn ridt nasal

Bla ma naf kif hemm wasalt.

Inħobbok bħal fi nżul ix-xemx li

Tmidd l-epifanija tagħha fil-punent.

Inħobbok sa meta terġa’ tiġi, jekk tiġi

Bħal min qed ngħum ġo baħar kbir

Mingħajr xtut u mingħajr xefaq.

Alfred Grech

25/06/2019

U Din Xhini?

U din xhini li tagħmel kollox sewwa?

Għax qabel kellna l-Alla jara kollox

U issa għaliex hemm ħafna għajnejn għatxana

li jissoervae bħal isqra diġitali

xi ħadd ma nafux min jittawwal dejjem

bħallkieku hemm xi spun wara l-persjani.

Il-ġwejjef jgħid li kienet il-kuxxjenza

jien ngġid li tas-sabiġ x’aktarx tkun l-għamla

kull kif kont nitlaq niġri ngħix il-ħajja

u nħaffeħ, ngħaġġel qabel jisbaħ għada

Illum m-għadnix. . . .

Alfred Grech

23/06/2019

Dagħwa.

X’Alla inti,

li tfajtni qalb l-ilpup u l-vanitużi

biex kelli tabilfors nitgħallem bħalhom

u hlaqtni tassew  dgħajjef u bla ħila

biex nilbes tabilfors il-maskra tagħom?

X’Alla inti,

Nissiltni f’dan il-għawġ bla ma staqsejtni

nintagħġen u biex nibla’ l-ħrejjef tagħhom

ilkoll liebsi kappestru bla ma jifmhu

għajr dak li twieldu fih u ntagħġnu bħali?

X’Alla inti?

Nissiltni, għamilti kopja liema bħala,

ilsir tiegħi, tal-Jien ribelli u naf nagħarraq

kull ħaġa li mmiss magħha bil-foħrija;

tagħllimt id-drawwiet tagħhom mill-fisqija

li npatti lill-kullmin jagħmilli d-deni

biex b’hekk jirrenja l-ħaqq u nreġġa lura

kull ħsara, u l-miżien jiddaqqas f’sikktu.

Niżvina xħin inħares lejn ħaddieħor

u nqishu bħal xi hadd l’hu inqas minni

fis-sura, fil kulur u minn fejn tnissel.

X’Alla Inti,

li ġibtni f’univers daqshekk vjolenti

u nemmen li hemm ordni superjuri

u nemmen li xi ħadd minn wara l-kwinti

jaf kollox, jaf ukoll b’kullma qed jiġri?

U nista’ nkompli ngħid u nibqa’ nħaqqaq

mingħajr ma biss nistenna xi tweġiba.

Alfred Grech

21/06/2019

'L-Hemm Sejjrin.

'L-hemm sejjrin

Aħna nagħmlu li jinħtieġ isir.

Minn jum għal jum ninġarru mill-kurrenti

U nagħmlu dak li jgħidulna

Jew nagħmlu bħalma għamlu ta’ qabilna

Jew nagħmlu bħall-ħaddieħor.

Hekk sejjrin mingħajr ma biss nistaqsu

Jekk hux li kellna f’moħħna

Jew dak li kellna nagħmlu.

Alfred Grech

21/06/2019

Int Qed Titbiegħed Minni.

Int qed tibiegħed minni u sejjra fl-għada

Meta għada jista’ jkun li qatt ma jkun

Għaliex ġemmajt il-waqtiet kollha

Biex dak ikun l-aħjar wieħed.

U bqajt ma ntbaħtx

Li jiena għamilt f’qalbi

Għax l-istennijiet tiegħek

Kienu kollha lilhinn mit-territorju tiegħi

Minbarra wkoll li kienu

Kontra kull pass għaqli.

It-tidlijiet tiegħek xħin ħallejtni

Kienu bħal waqtiet ta’ fuq ix-xefaq

Taż-żernieq tal-għada

U jien ma rajt il-waqt

Li ruħi tħalli ġismi

U neħles minn kull xkiel u minn kull madmad.

Issa taf li għalkemm tiġi bħal anġlu

Bid-dawl f’idejk jew għall-għarrieda

U bla mistiedna

r-ramel taż-żmien hu kontra tagħna

u jiżloq qed bil-mod il-mod minn bejn subgħajna.

Iżd’issa li t-toroq tagħna qed jitbiegħdu

Kull ma jmur inħossni niġi f’sikkti.

Alfred Grech

18/06/2019

Ma Swejna Xejn.

Ma swejna xejn

Għalxejn subgħajna għollejna

sabiex ninghaddu

ghax baqgħu għaddejjin minn fuqna.

Aħna mewġ misjuq

miż-żiffa tal-grigal

ibus riġlejn l-irdum

u jħaddan ir-ramel tax-xtajta.

Aħna karfa misjuqa mill-buffuri

tinagħżel mit-tiben

ittir u tisparixxi.

Bħal bieżaq tal-arja ġol ilma,

Jgħumu għal ftit tal ħin

imbagħad jinfaqgħu.

Alfred Grech

16/06/2019.

Nintasab Nikkuntempla.

Nintasab nikkuntempla bla ma naħseb

quddiem dan kwadru mmakulat ta’ ħajjti

Jew nilgħab mat-tikmix u tondjaturi

tal-frilli f’dawk l-inħawi li jintlaħqu

fejn mhemmx għalfejn tixxabbat

fejn ma nafx aħniex niftehemu.

Int terġa’ ta’ kull darba tiġi tbaxxi

l-barrikati

biex mingħalik li se jkun tkun eħfef li jien nifem

u mingħalik tkun aktar affidabbli

dil-qegħeda li tqum tagħmel kull filgħodu.

Nistiednek nerġa’ jien biex għal darb’oħra

tħares sew fil-mera

Filwaqt li qatt minn moħħok ma jgħaddilek

li jista’ jkun li dan staġun u qomt riħ isfel

u r-riħ idur u jitla’ l-ajru

u illi  f’daqqa waħda spiċċa s-seħer

bħal meta ġġib pitazz u taqbad tikteb.

Alfred Grech

15/06/2019