Għal Waqt Wieħed.

Ejja f’jum ieħor u mill-ġdid iftaħli

l-putelli u l-persjani tat-tieqa tal-kjostru

li jkejjel il-ħabs mudlam tas-solitudni

fejn jimirħu aktar mill-imġienen

l-iħirsa foloz tas-sotterran ta’ ruħi.

Ejja f’dan il-waqt tal-iktar sogħoba

Fejn l-għaraq tad-demm jispunta minn bejn il-pori

U kisser u farrak il-mostri mxajjtna

Ulied il-kilba bla rażan

U fi ħdan l-abbiss ta’ ġuf id-dlam ħallini nsalpa

Fuq wiċċ il-baħar tal-assurdita’

Jew ninġarr bħal anġlu la m’għobdiex

Jew l-għasfur milqut fi żmien il-kaċċa.

Ejja għax inti biss tista’ tfejjaqni

Minn dan il-mard tal-indolenza

Fejn ma jtik li tagmel xejn

Għax xejn ma tista’ tagħmel

Jew li tagħmel ma jiswiex.

Jien lilek ħloqtok mhux mit-tafal tal-art

Iżda minn kull tifkira, mid-dellijiet tal-ħolm

U kull tqanqila xħin infaħtlek f’imnifsejk

ix-xewqat ta’ ruħ tistħajjel il-fidi tagħha.

Din l-istedina qed issirlek għal waqt wieħed biss.

Alfred Grech

06/05/2020.