Huma Li Bnew.

Huma li bnew u għadhom jibnu,

Aħna li sibna niċċa u dħalna fiha.

Huma li serqu u ħadu ta’ ħaddieħor

Għalihom l-imxija hi biss skuża.

L-imxija bla ħitan u bla fruntieri

Aħna mitlufin fl-inkwadratura ta’ mal-ħajt

Bħal kieku konna oġġett ta’ riflessjoni.

Iżda ma rridux nemmnu li tlifna

T-triq għaliex ma żammejniex il-pass

U ma mxejniex magħhom.

Mhemm xejn li rridu nġibu lura

U mhemmx xejn x’irridu nagħtu.

Ir-rebbieħa tal-bieraħ huma

T-telliefa tal-lum u aħna l-plebei

L-ilsiera ta’ dejjem niżfnu fuq qabarhom.

Mhemm xejn għal xhiex tiddejjaq

Għax issa żmien il-ħsad

U t-torrijiet li bnew kienu biss

Taħwid f’moħħom u ilsna ma jinftiehmux.

L-andar kollu jrid jinħaraq

Iżda jien u int baqgħalna talinqas

Jum ieħor ta’ ħajja. Ejja ngħixuħ

U nisfidaw lill-allat;

Mill-bqija bżar fl-għajnejn.

Alfred Grech

21/05/2020.