Hemm Żmien.

Hemm żmien li nkun irridek,

hemm żmien li ma rridekx,

waqiet bħal mhu dak t’issa,

fittixtek, ma sibtekx.

Hemm żmien ridt noqgħod waħdi

bħal wieħed iżolat,

nitbiegħed jien minn jeddi

biex noqgħod ixxamplat.

Biex nara dawk id-drabi

kontx jien dak il-pervers

għamilta ta’ barrani

inkella ftit divers.

Jew jekk jgħaddix mingħajri

dan dan l-univers bli fiħ,

il-ħbieb u ta’ madwari,

u ż-żmien għaddej bħar-riħ

Alfred Grech

09.12.2018

Euridice.

Għax qed inħoss il-passi tal-iħirsa

iġorru t-toqol tagħhom li fih twieldu,

il-ktajjen li mal-art ifesdqu l-jasar.

Qed negħerqu fir-rutina ta’ jum ieħor,

ta’ xjuħ fuq tlett saqajn, ta’ si sibilla

li fuq trepied taf tbassar il-ġejjieni

inbaħħar  bid-duħħan alluċinanti

bħat-tfal imwielda mwieżna fuq il-krozzi.

Kull xħin inżurek togħma bħal tal-oqbra

u ninżel ġol abbissi ta’ żmien ieħor.

Xjaħt eminenza griża ta’ ħarruba

tintebaħ bit-tikmix ta’ fuq il-ġilda

jiżdied filwaqt li s-saħħa qiegħda tonqos.

Nistaqsi jekk u kemm hu ż-żmien li fadal

sakemm inżurek nerġa’ taħt il-ġebla,

inkella barra dan, hemmx xi żmien ieħor.

Alfred Grech.

09/12/2018.

XLIX.

Kull meta nħares barra minn dit-tieqa

Hemm narra hemm id-dlam, hemm l-għawġ u d-dnewwa,

Kif nista’ minn dir-rokna ntaffi d-dieqa

U mmejjel ftit il-mira lejn is-sewwa?

U nwieġeb bla tlaqliq, li lanqas nista’,

Bħal kotra ġwejjda u ssiekta xħin tagħllimni

Li s-saħħa tiegħi ngħaddi lil min jista’

Iħaddem is-sistema u b’hekk jaħkimni.

U dawk li minn daqqiet iġibu l-qirda,

Għax b’ħeffa kbira jwettqu t-twemmin tagħhom,

Iżidu l-għawġ, il-qrusa, jżidu l-firda

F’isem kull ħaġa sewwa u dawk ta’ magħhom.

Jinħtieġ għalhekk noħorġu minn din-niċċa

Għaliex l-imperatur bla ħwejjeġ spiċċa.

Alfred Grech

15/04/2012

Kif Tridni Nemmen Fik?

Tridni nemmen fik

u bqajt bla wiċċ, bla ma tingħaraf

bla isem  u bla numru tal-identita’.

Jien ismi bdiltu kemm il-darba

u lbist ta’ maskerat

int bqajt ma dehertx

u meta sejjaħtlek

kien leħni stess li baqa’ jidwi

mal-ħitan u mal-irkejjen.

Int bqajt ma ġejx,

u sirt l-iskuża sabiex għada

nibdew mill ġdid dak li għamilna l-bieraħ

u l-bieraħt lura

u t-toqol baqa’ qatt ma ħfief.

Alfred Grech

06/12/2018

Jien Nippassiġġa

Jien moħħni nippassiġġa

fi sqaqien l-eternita’

f’dawk il-mogħodiejiet efimeri

ta’ meta l-istorja kien għada ma nkitbitx,

jew jekk inkitbet intilfet

f’dak kollu li ġie wara,

fil-fakass ta’ dak li kellu jkun

u qatt ma kien.

U issa la ma ġejtx,

jien qed narak minn lenti oħra

bil-wiċċ imħaffer fit-tond

għaliex fl-għabex tal-allat

ix-xemx mistħija tmur tistaħba

jew tinħeba wara x-xefaq

u inti tkun BrunHilde tibdaħ

is-super bniedem

u tara li dan kollu jgħaddi wkoll.

Iżda jien ma nista qatt għaliha

li xħin jgħaddi kollox ngħidu

li din ma kienetx għajr ħolma

u li dak li jibqa’ wara ma jkun xejn

għajr dwejjaq.

Alfred Grech

02/12/2018.

U Jien Kont Naf.

U jien kont naf li hemm xi ħaġa nieqsa,

Tistona f’dak il-kwadru li pinġejna,

għax il-qalb teħber u miegħek kont inħossni

li dħalna t-tnejn id f’id fil-ġnien tal Għeden.

U kont intbaħt b’kull daqqa t’għajn li tasal

bħal vleġġa vvelenata li trid tinfed

u jiena kont indawwar ħajt madwarna

‘Mma kien għalxejn, is-susa dejjem tgerrem.

Nistaqsi mbagħad jekk f’tal-infern l-abbissi

għadx tista b’tant tfixkil ixxettel warda,

inkella qalb id-dlam ta’ lejl imbikkem

tilqax f’idejk it-tnejn kewkba li taqa’.

Alfred Grech

01/12/2018

Jien Tassew Jew Sirt Ħaddieħor?

Jien tassew, jew sirt ħaddieħor,

hemm xi ħadd qed jikkuppjani,

hemm ħaddieħor fl-għamla tiegħi

jien nitkellem, bla tarani.

Hemm xi ħadd li qed jippoża

li hu jien, bil-lingwa tiegħi

qed itenni litanija

daqs li kieku kien jgħix miegħi.

Jien tassew jew jien min jiena?

hemm xi ħadd li qed jixxala

bl-istess forma diġitali,

tgħid l’għaliex, nistaqsi l-għala?

Biex ixandar u jinqeda

b’din il maskra trijonfali?

Kien tassew, jew kien xi gidba

Iżda qatt mhu se jkun bħali.

Jien tassew jew jien xort-oħra

m’għaraftnix u trid taħtafni,

simulakru, sirt ħaddieħor,

Ma nbdilt xejn għax mank tarafni.

Alfred Grech

01/12/2018