Jien Nista’.

Taqa’ d-dalma fuq għajnejk

bħalma jaqa’ s-skiet bil-bjar bla qiegħ

miksura biss mill-infinit

tal-krib ta’ xi qattusa fi sħana ta’ Jannar.

Jintfew il-kwiekeb fuq baħar qiegħed

u jistordi l-qamar kwinta ċċassat

fis-sema ta’ bla sħab.

Jien nista’ mkun id-dell intruż

li jtellef il-ħemda bil-ħsibijiet ivenvnu.

Jien nista’ nibda’ nimxi wkoll fuq wiċċ l-ilma

mingħajr ma nemmen l-għandi ħila,

Jien nista’ nitlob dak li naf

li qatt ma nista’ naqla’.

Jien nista’ nibqa’ hawnhekk nixtarr

il-ġenna fl-art li qatt ma kienet

għax issa imdawwar bid-dell

ta’ min ma jimpurtx mis-saħħa ta’ ħaddieħor

mill-grattaċjeli u mill-bini sfiguranti

jisfida’ l-omnipotenza

li jużurpa saħansitra s-skiet tal-ispettatur.

Lejla kiesħa ta’ sema mbikki

ta’ qamar jistaħba ġo sema bla lwien,

erġa’ rxoxta d-dellijiet ta’ dawk li ġew qabli

ukoll jekk issa ħarbu u nħallu fid-dlam

u reġa’ waqa’ s-skiet f’dawn l-inħawi

tar-ruħ fejn għada tkun tintradam

bil-ħsejjes, bis-swied il-qalb

u fit-terrapein tal-ħerba spjetata.

Alfred Grech

06.02.2019

Jifteħu Għajnejk.

Jinfetħu iva għajnejk

jinfetħu xħin taqa’ l-borra

u jmur iċ-ċpar inkriminanti

ta’ kullma bellugħlna sakemm

ikkonvinċewna li sirna rġiel u nisa . . .

u ċittadini.

Jinfetħu għajnejk beraħ

xħin tħossok mintix soda

xħin jibda jaqa’ l-qxur

tat-twemmin, tat-tabu’ u tal-pilastri

li qatt ma kellhom pedamenti.

Jinfetħu għajnejk biex tara

il-baħħ fejn jidwu l-litaniji

li jżommu l-merħla magħluqa fil konfini

ġwejjda bla ma tistaqsi

dak li jiġiha f’moħħa

Alfred Grech

05/02/2019

Nistenna.

Nistenna s-skiet iġorrni

fuq mewġ il melodija li ma smajtx

nistenna li ninkalja fuq xi xtajta

fejn jiżfnu mat-twerżieqa tal-vjolini

iċ-ċief ifittex it-tifsira.

Nistenna li dal waqt hu l-qofol

tal-waqtiet li għext sa issa

mhux l-apiċi tas-serħ u l-hena

iżda l-punta ta’ djamanti

li għad irid jisfronda

is-seħer t’għada.

Alfred Grech

04/02/2019

Lil Mikiel Anton Vassalli

Sunett.*

M’għadux ġo qabrek jifraħ l-għadam tiegħek,

U xejn ma jiswa’ llum it-tifħir tagħna,

għax ħsiebek u ħidmietek, l-għelm minn tiegħek

Malta, maltija nsiet għax qed tistagħna.

Min ried itik fuq wiċċek u żarma driegħek

magħna m’għadux, minflok titrabba qiegħda

ġenerazzjoni ġdida li trid tmiegħek

dak kollu  l’hu għażiż u għamlet wegħeda

Li tegħereq fit-tmattir tal-opulenza,

Insejna dak li lilna ġens jagħmilna,

l-ilsien, twemmin, l-għaqal u l-prudenza,

U ngħumu bdejna fejn mank biss jilħqilna

mal-pixxiplamti, l-ilpup tal-affluwenza,

u nħottu kull ma bnew dawk ta qabilna.

Alfred Gech

03.02.2019  

B’apoloġija li Gorġ Pisani.

Oqgħod Ħdejja.

Ejj’oqgħod ħdejja

Imqar ‘kk ma titkellimx,

Għax jiena nisimgħek xorta..

Xħin inħares lejn iż-żmein

Għaddej mit-tieqa ta’ kamarti

U jista’ jkun lli tkun ix-xemx, ix-xita nkella r-riħ

Int tibqa’ ma tinbidilx.

Għaliex madwarek m’hemmx irbit

tibgħat f’estasi li li kull min qiegħed ħdejk

U għaliex il-ferħ tassew

Hu l-okkażżjonijiet li toħloq

l-okkajoni turi int min int

intix tassew sultana.

Ma Kull Daqqa.

Ma kull daqqa ta’ ħarta

ż-żonqor iċedi.

Jien m’għandix il-ħin

Li noqgħdo noftoq il-misteri

U kull daqqa li nirċiei

Nirribatti b’għaxra oħra.

Iżda xħin inkun bi kwieti

Nifli sew kull pass li jmiss

U kull għelm li ġej mill-beraq

Għax in-nebħ u hu l-alfabett

Tal-anġli.

Imbagħad ħalli jgħidu kemm iridu

Li noqgħoid nissemma għar-riħ ivenven

Jew ninnamra ma xi kewkba

Alfred Grech

02/02/2019

Sens Il-Ħajja

Ieqaf ħares lejn il-ħajja

Bħallikieku pis li ġġor,

Ieqaf ħares lejn ix-xefaq

Bla ma teqred, bla ma tgorr.

U tistaqsi x’hemn fil-wita,

U tistaqsi x’hemm lil hemm,

Sibt tifsira ma kull kelma

U ttenniha mhux lakemm.

Qalb il-versi ta’ kull għanja

Qalb il-ħsejjes tat-tilwim

Hemm il-ħeġġa, hemm mil-qawwa,

Hemm il-frott ta’ kull tagħlim.

U mar--resħa ta’ kull fewġa

tħoss tqanqil li bħalu mhemmx,

Hemm il-leħen ta’ qanqiena,

Hemm l-ilwien ta’ nżul ix-xemx

Għax imqar tal-ħajja l-ħsejjes

Jirbumbjaw fis-skiet tal-lejl,

Għax imqar fid-dlam tistaqsi

Sens il-ħajja għandux kejl.

U jekk tieqaf bla ma tħares,

Imma ttenni ta’ ġo fik,

Abbli ssib li qiegħed tighixha

Sew il-ħajja b’kull ma ttik.

Alfred Grech

01/02/2019