Ma Kellux Jisbaħ.

Dal-jum ma kellux jisbaħ

Vagun li ma telaqx,

Din xemx li lanqas tidher,

Stazzjon li ma tilħaqx

Din triq li titfixkilha

Twelid li qatt ma kien

X’inhu mistenni minna

X’ser nilħqu lkoll flimkien.

Mingħajru stajna għaddejna

Ma kien jinbidel xejn

Mank biss ma konna nafu

Li dal jum ġie għalxejn.

Alfred Grech

08/04/2019

Ma Nafux Fejn Inti Sejjer.

Ma nafux fejn inti sejjer

Nistgħux aħna nafu t-triq,

Ġewwa sqaq l-inkongruwenza

Dħalna bid-daqqiet ta’ sieq.

Lanqas nafu xi trid minna,

Ġejna hawnhekk bla nafu kif

U kumplejna din il-mixja

Fost l-iżbalji u t-tikxif.

Mank bagħttilna kewkba tiddi

Biex turina ftit it-triq,

Ibqa’ magħna għax issa dalam

Qalbna swiedet b’ħafna dieq.

Sar il-ħin u d-dalma waqgħet

U madwarna hawn l-ilpup

Sibna ruħna f’dinja għalina

U ma nafux min qed isuq.

Ma nafux fejn inti sejjer

Kif trid lilna nsibu t-triq

Waqa’ l-għamad fuq għajnejna

U madwarna ċ-ċpar sar sfiq.

Alfred Grech

06/04/2019

Dmugħ*

U ż-żmien jgħaddi bla jistenna

X’tagħmel għandek jekk tkun trid

Bi-tektika jew żegliga

Jgħaġġel aktar minn għafrid.

Jekk biss lanqas tkebbes xrara

Jew xintilla ta’ bil-lejl

Ħalli ż-żmien tibżax ħa jgħaddi

Hemm l-arloġ iżomm il-kejl.

Min se jibda jdoqq it-trombi

Biex iqajjem lil mejtin?

Min se jgħanni għanja ġdida

Li jgħannuha l-qaddisin?

Jekk imbagħad xi riefnu tqajjem

Trid tkun taf jekk dan l-iskoll

Illi fuqhu ġejjna ngħammru

Il-piż jiflaħ tagħna lkoll.

Hemmx xi ħadd li jnewwel idu

Go dad-dlam tas-sotterran

Hemmx xi anġlu li jħabbrilna

Jew in-nassa ta’ xitan.

Jekk id-dmugħ li qed iġelben

Lanqas taf minn fejn hu ġej

Dan hu dmugħ ta’ ħotbi mbikkem

Tistaqsix għalhekk għalfej’.

Din hu biss disperazzjoni

Dan mhu xejn għajr dmugħ divin

Dan hu dmugħ ta’ ħotbi mbikkem

Illi ġemma tul is-snin

Jien għad noħloq il-burdati

Jew inqajjem uragan

Sabiex ngħatti x’hemm ġo fija

Biex ma tafu xejn minn dan.

Jien ma rridx li li twennes

Għax jien m’għandi bżonn lil ħadd

Lanqas ridt inkun iċ-ċentru

biex madwari jdur kulħadd.

Jekk illum tarani mdendel

Għax xi darba kont minn fuq

Pendestal kont jiena waħdi

Mill-irwiefen ġejt misjuq.

Alfred Grech

05/04/2019

*Lil Liouse Grech li nebbħet dawn il-versi.

It Was All Gone.

We were thrown towards

life’s empty shores by the tides

of the not knowing,

we were bull dosed into

barren lands by the needs of every day.

We were taught a way to cope with life

but the tools were never sharp

and to follow in the jungle

the same footsteps of before.

We were blown into not knowing

by the phantoms of the State

and caressed with the same feelings

that make dwarves napoleons.

We achieved but only minimal

so to serve the angry gods

and the feeling only temporary

and the template was a card.

Once the hurricane blew

it was all gone.

Alfred Grech

04-04-2019

Gwerrier Tal-Armi Jlellxu.

Għaliex qed taqta’ qalbek

għax għadek ma wasaltx

gwerrier tal-armi jlellxu,

fis-saltna fejn ma dhaltx?

U taf li dil-frintiera

int għadek ma qbisthiex,

u t-telgħa ta’ quddiemek

ma tafx jekk titlagħhiex.

L-oħrajn qiegħdin iħarsu

aktarx jiddieħku bik;

dawk qatt ma kienu ħbiebek,

Ma qabżu qatt għalik.

U tħoss in-nixfa u l-għera,

uġih il-qalb bil-kbir,

u trid bħal trabbi l-ġwienaħ

biex terġa’ tibda ttir.

Tibżax għad terġa’ tiġi

l-leħma bla ma ddum,

u taħtaf ix-xintilla

jkun għada ’kk mhux illum.

Alfred Grech

03-04-2019

Mintix Ħlief Riħ?

Mintix tismagħni hawn qed insejjaħlek?

Mintix tarani nfittxek mitt mil bogħod?

Qalb dawn l-uċuħ mitlufa f’dan il-misraħ

Qalb baħħ etern, deżert u r-ruħ tirtogħod.

Mintix tarani hawn kemm jiena fqajjar?

Mingħajrek ħsibt li mlejt iż-żmien misluf.

Mintix tintebaħ kemm it-tnejn nixxiebħu?

U ma nistx narak għax jien mitluf?

Mintix taraħ is-sħab għaddej minn fuqi?

U kull ma jmur interraq u nixjieħ

Minflok ma tersaq qrib titbiegħed aktar,

Sa nibda nemmen l’int mintix ħlief riħ.

Alfred Grech.

02/04/2019.

Waqt Wieħed.

Mhijiex is-sensazzjoni li tiskappa

in nefħa llużorja ta’ dak il-ħin

biex nisa’ l-waqt tal-issa

u nsir divin.

Ikun waqt ieħor li  jiddendel

mal weraq qisu qtar

bejn jaqa’ u ma jaqax

waqt ieħor imdendel

bejn l-issa u bejn l-imbagħad

li jagħmel l-illużjoni

tax/xeneġġjat

jistenna n-nifs tar-riħ li jtemmu.

Alfred Grech

02/04/2019