Qtitlu.

U issa qtiltu wkoll is-skiet

Is-skiet tal-bjar li jidwu

Bid-dinosawri li rxuxtajtu

F’dan l-olokawst ċivilizzat

U bil barka tal-omnipotenti.

Qtiltu l-ħsieb

Li jitwieled minn ma tafx

Fil-għabex ta’ bejn il-lejl u l-jum

u d-dlam tas-solitudni.

Qtiltu t-tpetpit tal-kwiekeb

l-imħabba tal qamar jitbissem

li beda jħossu skomdu

jitħallat magħkom il-bnedmin.

Qtiltu s-sabiħ tal-ħajja

U dardartu kull togħma tajba

Ħattejtu s=swar taċ-ċitadella

Li kienet tilqa’ għalina

U sirtu bħal majjali.

Qtiltu lili.

Alfred Grech

12/07/2019

Kont Int.

Kont int li ġejt tkellimni,

issefsef ġo widnejja,

ir-riħ li jonfoħ qawwi

burraxka li tkun ġejja,

il-qawwa tal-burdati

tiċrit u s-skiet tad-dwejjaq,

li tagħmel bla ma tifhem,

daħħaltni ġo sqaq dejjam.

Kont int il qamar kwinta

iħabbat elof battuta

bit-tamborlin ta’ qalbi

u mbagħad waqajt fil-muta.     

Kont inti li bi kliemek

bil-ponta vvelenata

fil-qalb ls-sider tinfed

preċiż tkun immirata,

inkella bħal flawtista

warajk iġġorr il-massa

u tibqa’ bla ma taħseb

għaddejja tross l-ingassa.

Alfred Grech

12/07/2019

Taqbila.

Qatt smajt  nies mhumiex kuntenti,

fetħu ħalqhom, ġew sparati,

ma belgħux dak li qalulhom

u malajr ġew likwidati.

Qatt smajt inti b’min mhux komdu

u sparixxa waqt il glorja,

qatt smajt int bi stejjer veri

saru miti tal-istorja.

Qatt smajt inti li hemm magna

toħloq għadu minn kull qlajja

biex iżommna aljenati,

biex kullħadd isus warajjha,

Qatt smajt inti li hemm magna

illi toħloq il-figuri,

iħaddmuha minn fuq għolja

tal-allat u tas-sinjuri.

Hemm ukoll l-ispag jinġibed.

iħaddmuhom nies distinti,

u jġebbduhom bla ma jidhru;

dawn joqgħodu wara l-kwinti.

Hemm grajja oħra li tissawwar

ġrajja vera li tiskarta

l-għajn u l-widna tal-ġurnali

ma nkitbitx fuq l-ebda karta.

Dak li tara mhux ħlief maskra

dak li jidher mhux ħlief velu,

fuq żewġ toroq paralelli

jitfu l-lampi li jixgħelu.

Alfred Grech

11.07.2019

 

Bħal Diwi.

Bħal diwi jtenni dak li kellna f’moħħna

marsusa fil morsa tal bizgħat mistħajjla,

biex issa spiċċajna fil-ħolm tad-dellijiet

li kienu u fil-kitbiet ta’ fuq il-mafkar

li għad iridu juru fejn darba konna.

Dan it-twerdin u dawk il-graffiti

setgħu xi darba jlissnu l-ħlieqa

jew l-aħbar li tkun rivelazzjoni

tax-xejn li aħna, jew aħna minn fejn ġejna.

Iżd’aktar ma jgħaddi ż-żmien

aktar insiru barranin ġewwa qoxritna

f’did-dinja mitluqa bħal ballun tal billjard

fil baħar xurban tal-spazju.

Jista’ jkun li għad xi darba ngħidu

li aktar m’għadniex il wild ta’ din id-dinja

dil-pjaneta li sawwritna u sammritna

mad-destin tagħha u li tagħtna l-qilla

u l-kburija li nistaqsu.

Minn fuq il-quċċata li għad xi darba nilħqu

u ġewwa l-ġrajja mhix miktuba

ta’ jasar u delużjoni

indommu ftit ftit l-annali

ta’ ġrajjietna, nħożżu kull tqanqila

li l-art tagħmel din l-art li welldet kollox.

Niddejjqu xħin inġarrbu l-aħħar eklissi

ta’ ruħna u nilmħu l-kapsula spazjali

toqrob aktar lejn ġudizzju universali.

Fiż- żmien dan kollu tħabbar mill-profeti

li qalu wkoll li għad mill-ġdid nitwieldu.

Alfred Grech

10.07.2019

147.

Imbagħad il-mistoqsija tqum: jekk inti

Għandekx mal-fdalijiet ta’ dan nawfraġju

Titlajja tiela’ u nieżel ma kull mewġa

Kurrenti u aqliqiet li toffri l-ħajja.

Iżd’int trid tkun eroj u lanqas tobdi

L-umur jew il-burdati tal-kurrenti

Jew tilbes il-kappestru ġewwa l-merħla

Għaliex l-irbit tal-amar huwa l-madmad.

Inikella jagħmel għaġna sabiex minnha

isawwar bniedem ġdid minn kopjua antika.

iżd’inti ma tobdix għax minn nixxiegħa

Li minnha sqewk tagħllimt il-logħba tagħom

U stajt bis-saħħa kollha tgħid “non serviam””

inkella ma taħsibx mank tlissen kelma.

Alfred Grech

08/07/2019

STAQSEJT  FTIT.

Staqsejt ftit: għaliex dan kollu?

Għax inkella nibqa’ l-art!

Ma kull riħ u ma kull fewġa

bqajt ninġarr biex b’hekk inġbart.

Mal-kurrenti prevalenti

biex nixxiebaħ ma l-oħrajn,

jekk ma tridx għarib li tibqa’

u titmiegħek ġewwa t-tajn.

U tlajt waħdi sal-quċċata

ta’ li hu jew seta’ jkun,

ħarist lura u bqajt inħammem

jekk stajtx nagħmel paragun.

Stajtx kont ieħor illi bħali

ma lemaħx it-tren li ġej,

fl-istazzjon tal-ferrovija

kemm il-wieħed baqa’ għaddej.

Alfred Grech

07/07/2019.