Għalhekk M’Għadniex Ilsira.

Għalhell m’għadniex ilsira,

għax siba triq għalina

u ħriġna minn ġol fosdqa

sakemm ix-xorti ttinna.

Għalhekk m’għadniex ilsira,

għax sibna triq għalina,

u bdejna naħsbu b’moħħna,

ħadniha kif tiġina.

Għax ħriġna barra l-merħla

u ma mxejniex mal-moda

u bdejna nsibu postna,

u ħsiebna qed jissoda.

U ħriġna barra l-merħla

l-oħrajn qaqoċċa waħda

iħarsu lejna bl-ikraħ

u drajna l-ħlas taċ-ċaħda.

U ħriġna mill-binarji

u dawk jissieltu baqgħu

min minnhom jiġi l-ewwel

u l-bżieżaq bdew jinfagħu.

Għalhekk m’għadniex ilsira,

tgħallina spejjes tagħna,

tgħallimna kif nirbħulhom,

xħin lagħbu logħba magħna.

Għalhekk m’għadniex ilsira

m’għadniex nibilgħu kollox

li jxandru jew li jiktbu,

u kollox ħorrox borrox.

Għax dawk in-nies tal-kilba

bil-maskra tal-morali,

tas-setgħa jew tal-liġi,

mhumiex għajr kriminali.

Zverġnawlna  l-art fejn ngħixu

u d-dinja ta’ madwarna,

u ħarrbtu kull fejn sabu

u daħlu sa ġo darna.

Għalhekk mgħadniex ilsira

għax ħlisna minn difrejhom,

u dak li għandna nagħmlu,

ma jdoqqx żgur għal widejnhom.

Għalhekk m’għadniex ilsira,

għax minnhom lanqas bqajna

nisimgħu jekk hux tajjeb

jew dak li konna drajna.

Għax minnhom lanqas bżajna

u nħallsu tal-isfida

il-prezz sabiex tinfeda

din ruħna mqar b’taqbida.

Alfred Grech

08/07/2018

Le Mhux hawn ġejt.

Le, le mhux hawn ġejt jien nisma’ ħbarek,

fil-qalba ta’ din l-art fittizja,

fuq ħabel issikkat t’ekwilibrista

biex nerġa’ nsib li spazju li kont tlift

u r-roqgħa art fejn nagħraf lili nnifsi.

L-ilħna tiegħek bqajt ma nagħrafhomx,

iżda stajt inħossni ngħum fir-ritmu tas-skiet tiegħek.

Issa sirt ukoll farfett milwiem

indur minn warda għall-oħra biex induq għasel l-allat

iqattar u jiżżerżaq fuq ilsieni.

Jien nerġa’ niġi miegħek sabiex

it-tnejn li aħna niżfnu iż-żifna tar-riħ fuq

lil hinn minn kull quċċata.

Imqar jekk sibtni għal darb’oħra f’nofs deżert,

fil-labirint tal-għażla

nistenniek li tfiq mill-muta li darrejtni fiha

li tkisser u tfarrak kull sens t-orjentazzjoni

kull sens ta’ ħbiberija

kull ħolqa li tgħaqqadna

fil-katina tal-ferħ u l-armonija

li dwara jħobbu jitkellmu l-profeti.

Int tista ma tkun ukoll għal dejjem

il-kewkba li turini triqti,

l-agħasfur li għad iġibli

l-aħbar it-tajba.

Alfred Grech

07.07.2018

Għal Min Trid Li Nissallab.

Għal min trid li nissallab

Għal dan, għal dak jew dik?

X’inhu dal-ġid komuni?

mank tmissu ma jħallik!

Għal min eroj triduni

nissara gladjatur,

min hu dan Ċesri mxennaq

għal demmi ġie maħtur?

Min qed jissikka ċ-ċirku

fi ħadan is-soċjeta’

li lilu lkoll inċedu

Kull sens tal-liberta’?

X’hinija dil-ħmerija

jgidula umanita’,

il-ħsieb li fuqna jaħkem

u jross b’immunita’?

Għax ġejna lkoll ilsiera

tas-saltna t-idejat

sa mill benniena blajna

hi frugħa tal-frugħat.

Jien lilek naf, lill-ieħor,

kull wieħed hu divers

irid jgħix l-eżistenza,

għalih sar l-univers.

Alfred Grech

06/07/2018

LX.

Xħin tlaqt mnejn kont imxaħxaħ iżda mkażbar,

Sibt ruħi f’nofs deżert ta’ din l-art żgħira,

Mimlija nies medhija wiċċha tħassar,

Deżert ir-ruħ fil-qalb mimmlija għira.

Hawnhekk fejn ebda wiri qatt ma juri,

Fejn għandi mmur, inkella fejn hi l-linja,

Il-ħaqq mhux dejjem saltan, m’hawnx sinjuri,

Tal-fehma biss-il-ħsieb tkun fuq id-dinja.

Għax inti ridt tkun taf x’hemm ġewwa qalbi,

U sibtni qed inqim l-allat tat-tafal,

U dawk l-uħux li qatt ma semgħu talbi

Moħbija, u marbutun mas-sarġ ta’ faħal.

Il-bieraħ mingħalija kont se naqa’.

Illum imxejt għaliex irrid niltaqa’.

Alfred Grech

03/09/2012

 

Il-Poeżija ma Taħsibhiex.

Il-poeżija ma taħsibhiex,

il-poeżija tiġi w’ħeda

bħal meta teħber il-qalb

jew tiftakar f’xi ħaġa li tkun insejt;

bħal meta l-borra tinżel

jew taqa’ d-dieqa f’qalbek.

Il-poeżija ma tinqarax,

għaliex kull xħin tinqara

titlef ir-ritmu u titlef ir-rima

u titlef il-passjoni 

u ssir tnehida astratta

ta’ min jaqraha.

Alfred Grech

03/07/2018

LVIII.

Iż-żiffa tbus xuxitha xħin terfagħha

Ilwien sbuħitha ssellfet il-qawsalla,

Bħal dakinhar, l-aħbar, id-diwi tagħha

Lissen misteru kbir: għax int omm’Alla!

Wiċċha baqa’ li kien ta’ omm żgħażugħa,

Bħal meta tat lid-dinja l-Ewwel Iben.

Fil-ħsieb li kien minn dejjem hemm miżrugħa

Mhux għal dat-trab, żerriegħa li tindifen.

Il-fuq mis-sħab, issib min jistenniha,

Tikseb mill-ġdid ir-rahan li qatt ma tilfet,

Wesgħat bla tarf mifruxa hemm għaliha,

Lill-dawk li ħalliet fl-art, it-tama silfet.

Ir-raġġ li laqgħa lilha, dawl fuqani,

Għalhekk  kull raġel fl-art, hu biss barrani.

Alfred Grech

Santa Marija 15/08/2012

Jekk Ikolli Mmur il-Ġenna.

Jekk ikolli mmur il-ġenna

Jien miegħek ma niġix.

Intant il-ġenna tiegħek

Hi x’imkien fejn hemm il-moffa,

U fejn hemm is-saltna tal-ilma qiegħed.

Fejn kullħad jobbi bla jistaqsi

Għax ħieni bla ma jaf

U fejn hemm il-qaddisin li jipproteġu

Jagħmlu xirka tal-qaddisin.

Il-ġenna tiegħi mhix bħal tiegħek fejn hemm biss

Hwejjeġ tajbin;

Il-ġenna tiegħi għanda minn tal-qawsalli,

Imżewwqa b’kull kulur

Fejn is-sbuħija feminili

Issebbaħ il-ħolqien

U fejn it-tentazzjoni huwa mod kif tgħix il-ħajja.

Il-ġenna tiegħi fiha l-ġenn

Bħall-univers  li fih qed ngħixu.

Alfred Grech

02/07/2018