Mudell.

U tista’ tkun ukoll mudell

li ruħek sibt fuq it-tribuna

sparat min katapult oxxen

u tista’ tgħid li sibt fortuna.

u tista’ tkun ukoll mudell

bħal manikin għall okkażżjoni

u ruħħek sibt fuq pedestall

għarwien mingħajr kontestazzjoni.

Jew kont ukoll dak il-mudell

iġġorr it-toqol li mank tiflaħ,

jew min ma libes qatt qalziet

u l-għera tiegħu qatt ma jilmaħ.

Miskin imbagħad mhux se tkun int

Għax id-disfatta mbagħad tinbdara,

Miskin kull min jitwekka bik

li jsewwi jrid li tħalli wara.

Alfred Grech

15/01/2019

Xi Minn Daqqiet.

Xi minn daqqiet, nismagħha rrid mingħandek

Għax l-anġlu tiegħi m’għandux leħen,

U l-leħen illi jitla’ mill-abbissi

Hu leħen ix-xitan.

Biex noqtol ix-xitan li hemm ġo fija,

irrid l-ewwel insum

Imbagħad immut bil-ġuħ.

Kull meta nisfa’ mweġġa’

Għax nitlef it-taqbida

Jinħtieġ li nerġa’ lura minn fejn tlaqt

U noqgħod hemm nixtarr

Jekk dak it-tul li mxejt

Ewwila kienx bla fejda..

Int tista’ tkun għalija

Dak l-anġlu li jħabbarli

Li t-tmien jinsab fil-qrib

Jew wara l-kantuniera,

U jien nintilef f’litanija

Ta’ bla tmiem u ta’ bla kuda.

Alfred Grech

15/01/2019

X’Tagħmel?

X’hinija din il-molla li tikkarga

U terġa’ twaddbek qisu qatt ma kien,

Tistaqsi lilek stess: hawnhekk x’jien nagħmel

u tibqa’ bla ma ssib serħan imkien?

U x’tagħmel xħin tkun għomt il-baħar kollu

U ssib li fuq dix-xtajta nnawfragajt?

U x’tagħmel xħin iddura għal kemm il-darba

U ssib li f’din il-pista kont weġġajt?

U x’tagħmel xħin tkun taf li bħal Sisifu,

L-isfida mhux il-blata iżda ż-żmien?

U ssib li f’dan il-post, f’dis-sitwazzjoni,

Kont taf li se ssib ruħħek u hekk kien?

Alfred Grech

14/01/2019

Fi  sliem li ma jsellimx

maqsum fi tnejn u mperreċ

mal-mewġ li ma jidhirx

tiela’ u nieżel

u l-moħħ li ma jsegwix

id-dwejjaq li jwersqu,

wiċċek jitfaċċa ipotesijiet possibbli

jistkennu għad-dell tad-dielja

jissemmew l-urieżaq muti

jsajjru l-għeneb li ma jxenxilx.

Jiena u inti

nistkennu  taħt dil-ħarruba

li taf il-ġrajja tar-raħal.

Nistħajjlek kont sibilla tħares lejja,

b’idejk marbuta

u bi tbissimma fuq xofftejk

bħal donnok taf li dad-destin

mhuwiex għalina,

Fuq mewġ il-baħar jaslu dawk l-aħbarijiet

li ma rridux nisimgħu

it-tħabbir mingħajr id-daqq tat-trombi

jew dak li konna nafu

fil-purċissjoni ta’ wegħedet

li darba konna għamilna lil xulxin

u taf ukoll li l-ħalf li konna ħlifna

m’għadux jorbotna.

Alfred Grech

13/-1/2019

Għax Int.

Għax int bħal serafin fil-bieb tal-Għeden

Ma tħalli lil min jgħaddi u jidħol ħadd,

Tkeċċili  l-ħsibijiet ta’ kull mar’oħra

Biex bħalek nibda ngħid li ma sibt qatt.

Int taħsel twebbes rasek daqs ta’ blata

Imdawwra xahari mimli xewk u għollieq,

Jekk tiġi l-fewġa tmewweġ ma kull radda

Ma tkun ta’ ħadd u tagħti wkoll bis-sieq.

Jekk ta’ madwarek jitlef l-għaxqa tiegħek,

Int tibda tonfor titlef il-miżien,

U bħal gwerriera tarma tarka u xabla

Tiġġieled l-għadu u tagħti fejn kien kien.

Alfred Grech

12/01/2019

Anġlu Ġdid.

Jinżel qawwi d-dlam ta’ lejl bla kwiekeb

Il-ġibda tiegħek kibret wisq,

Għalxejn imlejt widnejja kollha xema

Għax l-għana tiegħek qatt ma stajt ninsieħ.

Mhux l-għana

Iżda l-vleġeġ li bdejt tifa’

Fatali ta’ Eros it-tigiż,

Id-daqqa t’għajn

U l-baħħ t’a fuq xpfftejk,

Il-ħoss tal-infinit li jidwi f’widnejja.

Bil-wegħediet tiegħek

Li għad tagħmilni anġlu ġdid.

Alfred Grech

12/01/2019

F’Għajnejk il-Fond Bla Qiegħ.

F’għajnejk il-fond bla qiegħ

ta’ min hu mixgħuf

u wiċċek jixhed il-ħmura ta’ filgħodu

u l-ilwien ta’ min qalbu ma jaqtax.

Xuftejk marsusa bħallikieku jridu jaħbu

Xi sigriet

Fil-kurrent mal-folla għaddejja

Bħali

Iżd’inti tispikka.

Jien bħalek nikkumbatti l-kurrenti taż-żmien

U r-rotot predestinati

Ta’ ferrovija misjuqa bla xufier.

U bħalek ridt nisfida

B’dak li għandi f’wiċċ l-allat

U għalhekk ikkastigat

U għalhekk ġejt infittxek

Biex nara lili nnifsi f’dik il-qawwa

Li sadanittant

Kont ħsibtha li telqitni.

Alfred Grech

11/01/2019