Kont Naf.

Kont naf fejn stajt kont sejjer

qaluli r-riħ ivenven.

Kont naf għal xhiex kont dieħel

kont naf għax hawn kont ġejt,

u għamad lanqas kelli

komplejt minn fejn ħallejt.

Kont naf fejn stajt kont sejjer

fost beraq u tkarwit,

u lmaħtom fil-qawsalla

l-ilwien ta’ bidu ġdid.

Kont naf bil-preċipizzju

żurzieqa lejn l-abbiss

bid-drawwa li titrabba

li ġiet inkiss inkiss.

Alfred Grech.

20/03/2019

Biex Naqbad Dubbena Oħra

Biex naqbad dubbiena oħra

U ngħid li ksirt ir-rekord

Ta’ kaċċatur li jolqot

U nibqa’ mingħajr armi

Izd’għandi l-aqwa tarka

Li hi l-kompliċita’.

Ej’ niġġerrew flimkien

U ħielsa ntiru qisna friefet

Imqarr jekk għad imkien ma naslu

U mbagħad ħallik ħa tgħidli

Li jiena bqajt ma kbirtx.

Qatt smajt il-ħoss li tagħmel

Ir-ruħ li nqabdet ġo trabokk

Fis-skiet li jtarrax il-widnejn?

Kull m’għandi bżonn

Li jkolli ‘l-min jismagħni

Inkella li noqgħod filgħaxija

Ngħod waħda waħda l-kwiekeb li jitilfu.

M’għandix bżonn tal-parir

Għaliex kull kif

Jien lanqas biss nisimgħu.

Alfred Grech

20/03/2019

Mhemm Xejn Aktar.

M’hemm xejn għajr dit-titjira

fuq sħab itturfnat fl-estremi

ta’ dak li tagħraf taħt sema imlibbes

l-ilwien ta’ qabel tlugħ ix-xemx

bil-ġwienaħ ta’ avultun li jrid ifittex

ta’ jum ieħor fuqhiex jitrejjaq.

M’hemm xejn għajr diskursata

ma twassal għal-imkien

tħaqqieqa oħra biex jgħaddi l-ħin

u mingħalik sirt għaref aktar milli jmissek

imbagħad mhux ħlief tintebaħ

li mxejt wara min irid jinqeda bik.

U bqajt ma ntbaħtx li l-fruntiera

ta’ bejn is-sottomess u r-ribelli

mhijex daqshekk efimera

fl-evanexxenza ta’ dak li tara li qed jiġri

kopjun preskritt

li tiegħu int u jien

atturi prediletti.

Alfred Grech

18.03.2019

Imqar Min Hawn. 

Imqar min hawn  mingħajr ma niġi ħdejk

inħoss it-toqol tiegħek,

is-seħer li jġib miegħu t-tfixkil

ta’ kobba mħabbla,

u nħoss li l-bogħod li qed jifridna

jiqsar u l-baħħ li hemm jispiċċa.

Jien naf li ma kull qabża tal-arloġġ

int tagħmel tewba ġdida

għax taf li tonqos qiegħeda u tnin

il-fjamma li kebbisna.

Imqar minn hawn li qed il-bogħod

il-fwieħa tiegħek tasal

l-aroma li trid tnissel ġewwa fiha

il-ħila li nibni pont u niġi n-naħħa tiegħek.

Imbagħad niċċelebraw bil-kbir

bir-rit riparatorju

għal kull desakrazzjoni.

Alfred Grech

17.03.2019

Arak Tibda’ Titbussem.

Il-biża’ tiegħi hu l-qawwa tiegħek

iżda jien naf li int beżgħana daqsi

għalhekk bqajt siekta

għalhekk faqqajt

sajjetta fil-bnazzi.

Il-biża’ tiegħi huwa l-qawwa tiegħek

jien nibqa’ nersaq lura

bla ma nitkellem

u lanqas ser nitniffes.

Xħin tagħraf jien min jien

arak tibda’ titbissem

u tkompli l-mixja miegħi.

Alfred Grech

16.03.2019

Il-Bogħod.

Trid titfi n-nar ta’ dil-ħuġġieġa

Billi toqgħod il-bogħod minnha

Il-bogħod hu r-riħ li jitfi x-xema

U r-riħ li jnaddaf qiegħa.

L-aħjar kliem li tista’ ttenni

Huwa s-skiet ta’ ħarsa waħda,

Is-skiet li jinfed sa l-imrammi

U jħalli biss tifkira.

Imbagħad trid tibqa kmanda

Ta’ kull xewqa u kull tqanqila

Fl-abbiss tal-kaos bikri

Fil-ħlewwa u t-tenerezza.

Imqar jekk ma tlqajniex

l-istess bħalkieku ltqajna,

iltqajna għax kellu jkun

u jekk mhux dakinhar

kmiemi jew tard kienet tkun

darb’oħra.

IL-bogħod hu meta trid tistaqsi

Min jiena.

U tħalli jgħaddi ż-żmien

Biex issir tafni.

Alfred Grech

15/03/2019

Idus Martii

Tixgħel suffarina bħalma tixgħel l-imħabba

imbagħad tħaliħa taqbad sa tinħela.

U taħseb li qed tgħix id-dram bħalkieku fuq il-palk

xħin jinżel is-siparju issib li xejn minn dan.

Qed tgħix il-waqt u taħseb: din hi  l-eternita’

xħin tasal fl-aħħar tieqaf

u tifhem li kien żball.

Alfred Grech

15/03/2019