Għad Jiġi Żmien. (2)

Għad jiġi żmien li mhux fil-bogħod

xħin ma tistaqsinix

mnejn ġejt u trid tagħmilha ta’ anġlu

u ta’ xitan biex tifhem it-taħbiriet li jmieru lil xuxlin

imqar jekk il-qawsalli issa nsterqu

minn kwiekeb li waqgħu. mid-dekadenti,

u trid tkun tassew int it-trasparenti

daqs nixxiegħa ta’ ilma ġieri

biex tifhem kliem is-serpent li jittradik

u jkaxkrek qalb il-ħmieġ tal-opulenza.

Mill-bqija, tiġġerra kemm tiġġerra

qalb it-toroq ta’ Damasku

qalb it-toroq tal-ibliet u tal-irħula

ta’ dawn il gżejjer iffullati u fgati

qalb l-uċuħ mistħajjla u aljenati

li lanqas biss jingħarfu mit-tallaba.

Jien l-iblaħ f’tarf l-irdum għax m’għamiltx bħalhom

nittallab ftit tad-dawl u tal-ispazju

mingħand id-demiurgi li ma nafomx

ta’ mingħajr maskra

biex fl-aħħar bdejt ukoll intenni magħhom

li dan tassew ħelsien.

In-nies għaddejja u tinbqa’ għaddejja purċissjoni

mingħajr ma taf għalfejn,

mingħajr ma tagħaraf lilha nfisha

għaliex qed tfittex triq il-ġenna li tilfitha.

Alfred Grech.

19/05/2019.

Stajt Kont Jien.

Int stajt kont biss l-iskuża

biex jien ninbidel f’ġenju kkastigat ġo lampa,

Inkella biex nitfixkel fix-xibka

li ntiżġet biex taqbad l-anġli,

trabokk issiġillat li stajt naħarbu

li ma kienx għal dan il-ħolm li blajt

bħal nifs duħħan tabakk tal-pipa,

wara snin intir u ninżel fil-mitjar ta’ art

imbiegħda.

Stajt kont jien l-żvinturat

il-vitma tas-skiet kewkbi,

jien stess l’għafast il-grillu

ta’ mħabba mejta u rwejjaħ minsija

ta’ dellijiet jirtogħodu,

ta’xemx li nġarret ma mewġ il-baħar.

Jien stess li qtajt il-kurdiċella

ta’ ħajja ġdida.

Jekk kien miktub minn dejjem

li nerġa’ naqa’ ġo dil-ħofra

la hemm xi tgħid u lanqas x’tagħmel.

Biss issa rrid inħabbel rasi kif nerġa nitla’

għax issa din saret qisha drawwa.

Alfred Grech

18/05/2019

Int u Jien.

Int u jien bħal żewġ fanali jiddu

Fil-baħħ tal-infinit

Naħsbu l-istess ħsieb u nispiċċaw

Avviż għal min ibaħħar.

Int u jien żewġ galleriji qed jitperċċu

Fuq toroq paralelli li ma jiltaqgħu qatt,

Insellmu lil xulxin u ‘l-kull min jgħaddi

Bla ma nitkellmu,

Iżda t-tnejn li aħna nafu

X’għandna ngħidu.

Bħal ħares trasparenti fuq wiċċ l-ilma

Li ma jilmax imqar taħt qamar kwinta

U l-ferħ ta’ ġenn iżerżaq biss ħlewwithu

Fiż-żiffa ta’ filgħaxija.

Jiena nħoss ir-riħ tat-tnegħid tiegħek

Jonfoħ fuq spallejja

U kull tant żmien ikolli nqum mill-gdid

Mill-ħmar il-lejl li fiħ nintasab

Xħin l-għanja misterjuża tħalli l-kwiekeb

Ipetptu.

Alfred Grech

17/05/2019

Baqgħu Ġejjin l-Ibgħula.

Baqgħu ġejjin l-ibgħula

Għax isem agħar minn dan ma jgħoddx għalihom

Sagrilegi u desakranti u tal-mistħija

Iqattgħu fil-blat aħrax u jiżvinaw

Dix-xbejba li rat wisq f’ħajjitha

B’difrejn li ma jafux

M’hemm  l-ebda ħniena.

Għalxejn tlabnihom u krabnielhom

Dak hu wirt sagrosant

Dak hu wirt tagħna

Ħalluh għal min għad irid jiġi.

Għalxejn inġbarna lkoll bi ħġarna

Bil-ħeġġa tagħna u bin numri

Għax jidher li m’hawnx setgħa li twaqqafhom,

Inkella s-setgħa qiegħda magħom

Inkella jħarsu l-hemm u jħarsu l’hawn

U jagħmlu ta’ bir-ruhhom

Li saru għomja u torox.

Alfred Grech

16/05/2019

Bandaltni Waħda Sewwa.

Bandaltni waħda sewwa

Għax taf tipprovokani

U jien ma fhimt xejn  aktar

Għax kollox spiċċa sewwa.

Staqsejt għadekx tiftakar,

Weġibtni bi tbissima,

Bħal kieku kont assenti

Għax ħsiebek autostrada.

Sejjaħtli bla ma rajtni

U jien bdejt naħseb b’qalbi,

Mad-daqqa t’għajn l-imħabba

U b’ruħhek bdejt tibdilni.

Iltqajna t-tnejn fuq sħaba

Mingħajr ma konna nafu

Il-ħajja bħal ħuġġieġa

bin-nar nilgħabu bdejna.

Iltqajna t-tnejn fuq sħaba

U d-dinja bdiet tinbidel,

Inżajna u sibna ruħna

Għarwiena u mhux mill-ħwejjeġ.

Alfred Grech.

15/05/2019

 

Int Kont ‘l-Fuq Mill-Ħin.

Int kont ’l-fuq mil-ħin kont hemm minn dejjem,

Kull meta d-dellijiet jitwalu aktar,

Kull meta l-jiem jiqsaru u jibda jwerżaq

Il-werżieq. Kont il bogħod, ftit il-bogħod aktar.

Imm’int minn dejjem kont fil-ġuf tax-xewqa

U jiena ngħodd il ħoss ta’ kull tektika.

Ma jagħraf ebda żmien in-nuqqas tiegħek.

Mhux dak li jien ninħtieġ kien qed ikiddni

Li jkiddni kien il-bogħod li hemm bejnietna.

Kun af li l-istennija hi agħar mill-firda,

Bħal meta l-minutiera tibda teħel

l-għajnejn ifittxu dak li tkun tistenna

Iż- żmien ma jieqaf qatt jew jgħaddi jiġri

int biss trid timla’ l-baħħ tal-eżistenza

għax in-nuqqas bħal ħin li jirrikorri.

Alfred Grech

14/05/2019

 

Is-Sensi Jikkargaw.

Is-sensi jikkargaw ma l-għodwa t-tajba,

fis-sejjħa ta’ jum ġdid biex tista’ tħares

lejk stess fil-mera bħalma solitarju

il-qamar jikkontempla lilu nnifsu

u jaħbi wara daharu id-dlam imtenni.

Fil-ħsejjes ta’ filgħodu hemm is-sejjħa

ta’ x’jaf il-bniedem jagħmel bla ma jaħseb,

fis-skiet tal-ħerqa li xi ħaġa jħalli

warajh biex jiftakruh li jiġu wara

u jibdel wiċċ id-dinja u jħarbatha,

u jżid l-iskart, in-nugrufun u l-entropija.

Ix-xita traxxax għad issir dulluvju,

id-dinja tfur u tgħereq taħt wiċċ l-ilma

u kliemna jkun bħal min il-karti jbexkel

tal-logħob li ta’ kuljum ilkoll nilgħabu.

Imbagħad inneħħu wkoll minn fuqna l-għata

u nidħlu għarwenin fis-saltna t’Alla

is-saltna tas-smewwiet, il-ħaqq u s-sewwa.

Adam li b’xewqtu ħabb għall-ewwel darba

sinċier mingħajr ma jaf dak li qed jaħbi.

Alfred Grech

13/05/2019