Bid-Daqq Tat-Trombi Fuq Ħuġbejk

Bid-daqq tat-trombi fuq ħuġbejk

kull meta għajnejk tpetpithom

u tgħid għaliex poeta sirt

biex ruħek tberraħ għad dawl tax-xemx.

Imqar jekk fi kliemek hemm l-għafja tal-mewt

hekk tħossok aktar ħieles qalb l-għelieqi

tat-tamiet imġarrfa.

ma jiswa’ xejn x’jaħseb ħaddieħor

iċ-ċapċip tal-kotra u t-tmaqdir tal-ftit,

għaliex int tieħu nifs bil-poeżija

għajnejk jinfetħu ktieb u widnejk ġakulatorji.

Fittixt il-vokazzjoni li twelled lilek innifsek

mill-ġdid u tiżvina quddiem in-nies ta’ din id-dinja

biex tibda mill-ġdid tara fir-raxx tal baħar

il-qawsalli u l-ilwien tal-poeta jiżfen

fuq ir-rgħawa ta’mewġ il-baħar.

Profeta għami li miet bla ħalla kitba

biex bħal kwiekeb fit-tarf tax-xefaq

tingħasar ruħek xħin tieħu s-sura.

Alfred Grech

17/10/2019

Tista’ Tgħid Li Din Id-Darba

Tista’ tgħid li din id-darba

kont jiena li ħallejtek

u tlaqtek waħdek mar-ritmi tas-sħab

li jgħaddi jħokk mal-bini għoli

bil-qniepen idoqqu ma kull tpetpita

t’għajnejk

u kull kelma li stajt tislet kienet agħar

mill-aħħar waqtiet tal-ħajja.

Jien fittixt qalb il-wileġ tal-ilsna

u tal-kliem li bih nitkellmu

iżda mbagħad ġrali

bħal dak il kavallier ta’ barra minn żmienhu

jinfed l-imtieħen tar-riħ.

Issa saru għajnejja l-poeżija

u widnejja l-melodija li qatt ma stajt nintona

tisserpeġġja bħal gelgul

li baqa’ dejjem ħiereġ.

Jien xorta waħda għadni nħossok

taħt il-ġilda u r-raxx li ttajjar

għadu jqanqal

it-tkexkixa tal-fewġa bikrija.

Dan mhuwiex l-għannej li għanna

u ħalla wrajħ il-poeżija mhix miktuba

bħal farfett il-lejl li jgħib

mal-paternoster.

Dan huwa l-għana ta’ min

jaf jislet ir-ragħwa tal-mewġ

qabel ma jasal fuq ix-xtajta.

Alfred Grech

16/10/2019

Tfixkilna t-Tnejn f’Saqajna.

“We are such stuff as dreams are made on, and our little life is rounded with a sleep.”

(Shakespear: The Tempest”)

Int tqajjem uragan fl-għadira tiegħi

Kull xħin ma nafx x’ser nagħmel bija nnifsi.

Int tlissen kliem stunat li ma jkunx f’waqtu

Kull darba li fittixt jien ftit tad-dija.

Int tħallat l-ilwien kollha tal-qawsalla,

Jien nislet wieħed wieħed lewn  kif jaqbel,

Imbagħad kont nieħu l-premju ta’ ħaddieħor

Kastig li lanqas biss ma jkun jistħoqqli.

Id-dinja nara kont minn lenti oħra

Issir fana biex turi lill-baħħara,

U xħin kien jidher kollox illi kkwieta

Intbaħna li tfixkilna t-tnejn f’saqajna.

Alfred Grech

15/10/2019.

149.

Issa m’għadkomx tqajjmuna kull filgħodu

Tkun għada lanqas biss ix-xemx ma telgħet

Bil-ħsejjes provokanti tal-imrietel

Imġiegħla taħdmu minn sitta sa sitta.

Issa m’għadniex nisimgħu l-irvell tagħkom

Titkellmu  b’ilsien stramb li mank jinftiehem

Għefiered ġejtu hawn mill-ibgħat rokna

Tallaba ta’ dal waqt titlobu l-loqom.

Issa m’għadniex nisimgħu lanqas karba

U niżlet għal waqtiet ftit armonija

Fis-sliem, fis-skiet kif dejjem imdorrija

Dar-rħajjel illi ġwejjed baqa’ lura.

Issa m’għadhomx inaqqxu biċċa,biċċa

Is-skiet fil-qalb tal-eżistenza tagħna.

Alfred Grecg

14/10/2019

Sfruttaturi.

Neħħew is-skiet mil-ġuf tal-eżistenza

u d-dawl tax-xemx u l-fewġa ferriħija,

Neħħew ir-ritmi sielma tal-enimmi

u mill-isfond, il-għana tal-għasafar.

Dardru l-għajn li tisqihom ilma safi.

Xi minn daqqiet tħajjart jien nagħmel bħalhom,

Insir pervers, nsir ukoll diffiċli,

ħa npatti ftit għall-ħażen li jiżirgħu

li jseħħ f’isem il-ħaqq, f’isem is-sewwa.

Għax ħasbu li se jsibu lkoll tweġiba

u ma basrux li kienu waslu fl-aħħar.

Ħaddieħor joħlom kien u joħlom baqa’

iżd’huma fl-oċean tax-xejn intilfu

u ħasbu li ħaddieħor moħħu mela

u baqgħu hekk sejjrin matul ħajjithom

u sabu li bla tmien u mingħajr xeba’

il-mixja li fil- baħħ tax-xejn wasslithom.

Alfred Grech

13.10. 2019.

Leviathan

L-alla li qasam il-firmament

Baqa’ jgħid li m’hawnx bħalu

Għax qatel il-mostru u qasmu fi tnejn

Jaqtgħulek nifsek r-ritmi mgħaġġla tagħħom

Jibnu kullimkien

U jaħtfu kull roqgħa art li jsibu

Biex kerrħu kullimkien.

U l-kruha bdiet issaltan

Fuq din l-art ta’ mitt wiegħda

Għax l-ieħor qal li jrid jagħmel

Sinjur zgħir minna l- maltin.

U l-kruha baqgħet issaltan u tiżdied

Sakemm ma kienx hemm prezz ogħla

X’jitħallas u sakemm kien wasal jum il-ħaqq

U ma bqqgħux aktar l-infidili

U l-ibgħula jippoplaw

Wiċċ din l-art żverġnata.

Alfred Grech

12/10/2019

U Ma Stajniex Noħolmu Aktar

M’hemm xejn li jeżaltak f’dan kollu

hemm qerq u distrazzjoni

hemm barrikati u swar għoljin

li jien stajt ġejt u qbisthom

kollha li ma kienx għal dak il waqt

ta’ distakk u aljnazzjoni.

U jien stajt weġibt ukoll

iżda xufftejja marsusin

ġol-morsa tas-sħubija

u bqajt biex dħalt ’l-ġew

mill-għanqbut tas-sotterran mudlam

fejn id-dħaħehn tal-ħelsien

jgħatti d-dawl ta’ tarf il-mina.

Sibna bir bla qieġħ

għax tlifna l-innoċenza

u ħloqna biss erwieħ

biex stajna nsejna fejn tassew irridu mmorru.

Kull meta waqafna naħsbu ftit

qabadna ferħ ta’ ġenn

u qomna bit-tferir ta’ twerwir tal-biża

u ma stajniex noħolmu aktar.

Alfred Grech

10/10/2019