Indur U Nagħqad.

Indur u nagħqad sa ma nasal għandek

Filwaqt li int fir-raġġi sħan titbissem

Biex nagħmel sens minn dak li nara’ u nisma’

Inkella noqgħod hawn nitbekka l-għajja,

U ż-żmien ma jeżistix.

Jien noqgħod hawn nistaqsi jekk hix ħolma

Li rrakkontajna lil xulxin bla ma ħlomniha

Fl-eklissi eterna, fid-dlam skjerat ta’ lejla

Fil vortiċi żlugat ta’ dil-belliegħa imdennsa.

Jien għedtlek dak naf li kelli ngħidlek,

Mingħajr ma ħadd għallimni kif nitkellem,                                                           

U bqajt ma nbaħtx bil-ħasara lio qed nagħmel

Il ħsara li nagħmel lili nnifsi.

Il-ħlewwa tiegħek bħas-sbuħija

Tirradja fjamma trasluċenti

Imbagħad tintilef f’dalma etern ta’ toqba

Sewda li tibla l-eżistenża tagħna.

Tkellimni b’kull ċaqliqa li tiċċaqlaq

U fl-aħħar tasal għad tipperswadini

Biex nasal għad lil hinn sa fuq ix-xifer

U hemm nisfida ’l-dak li kont u li għamilni.

Alfred Grech

08/11/2017