Dak Li Dejjem Xtaqna.

Għaliex tistaqsi jien x’se nagħmel?

X’se nagħmel jien ma nafx

Dis-sejjħa mhix minn ġewwa

Dis-sejjħa żgur minn barra

Mhix ġejja minn ġo qalbi

Mhix ġejja minn ġo ruħi

Jew għadni wisq marbut

Mal-imgħoddi.

Hemm xewqa li ma nfissiriex,

Hemm ħsieb li ma naħsbux,

Hemm għan li ma nafux,

Hemm ġibda, mbuttatura,

Li twasslek lejn ix-xefaq,

Lilhinn minn hemm, hemm l-irdum,

Hemm id-dlam u hemm il-baħħ,

Hemm jien inkun qed nibki lili nnifsi,

Għax xtaqt inkun dak kollu

Li sal-lum qatt ma kont,

Għax xtaqt inkun pilota

Biex ninnaiviga u nkejjel

l-ispazji l-aktar fondi

tal-baħħ ma jimteliex

tal-univers mistħajjel.

Hemm jiena pellegrin konfuż

Li għad ifittex sejjħa

Tad-diwi ta’ ġo fih

Li lanqas biss jinstema’

Tad-diwi li mhux hemm

Iżd’huwa d-diwi

Li lilu jrid jissemma.

Hemm iblaħ jilgħab ma xortih

Ġullar li n-nies skartatu

Li safa’ kkalpestat

Għax issa l-kotra dratu

Għax issa n-nies inbidlet

Għax issa d-dinja xjaħet

U xejn ma baqa’ mill-ħlewwa

Tan-nanna tirrakkonta

l-istejjer tal-fatati.

Hemm sħab imdendel fuq ix-xefaq

Hemm beraq ma jidhirx,

Hemm ragħad mank biss tisimgħu

Hemm dak kollu li wiegħduna

Li bih webbluna

Hemm dak li dejjem xtaqna.

Alfred Grech

12.08.2019